Ka kɔdɔrɔ ti Filipe, siɔ nyingɔ ndo giandó nyingambi ti wali kɔi mɛ mbɛ. Siɔ nyingɔ ni ndo salelandó lo so kambisangɔ aye mɛ na lingɔ tɛrɛ lo na bi mɛ na gangɔ, wa ni ndo hɛ̃ndó agbia tɛ lo falanga gba nvɛ̃ni. Na ngoi mɛndó Polo ná Silasi si ka Filipe ko, lo landandó ala na pɛ bi gba. Siɔ nyingɔ mɛ kaya tɛrɛ lo ndo tondó lo ya lo dɛrɛ kɔngɔ ya: “Akɔli olo du ambɛ tɛ Nzapa mɛ ɔ ndozu.” Ngbĩi, Polo tɛnɛndó hɛ̃ siɔ nyingɔ niko ya: ‘Na ili Yezo, si kaya tɛrɛ lo!’ Siɔ nyingɔ niko sindó kaya tɛrɛ nyingambi niko ti wali.

Na ngoi mɛ agbia tɛ nyingambi niko ti wali hũndó ya, ta ani na diringɔ luangɔ falanga na ndo lo ma ko, ala tindó na ngɔnzɔ nvɛ̃ni. Ala gwendó na Polo ná Silasi ka gbɛlɛ agbia ti gbata niko wa ala tɛnɛndó ya: ‘Akɔli olo ko nyɔ ndia wa ala ndo kpã nga mobulu ge ya gbata olo zu!’ Agbia niko hɛ̃ndó nyɔ ya asɔ̃ Polo ná Silasi wa abi ala ka bɔlɔkɔ. Sinzili ti bɔlɔkɔ bindó ala kaya bɔlɔkɔ mɛ na mbingɔ nvɛ̃ni, wa lo yɔrɔndó gɛrɛ la kaya olongbo.

Polo ná Silasi ndo yendó bia so gondangɔ na Yehova, wa awa bɔlɔkɔ mɛndɛ̃ ndo mandó ala. Na bɛ bi, mbala kɔi ala mandó yengingɔ ti sese mɛ kpengbani yengi da bɔlɔkɔ wa nyɔ ni zindó, ashɛnɛ ná olongbo mɛ ka gɛrɛ awa bɔlɔkɔ hãnandó. Sinzili ti bɔlɔkɔ gwendó iɔ kaya ni wa lo tãndó nyɔ bɔlɔkɔ ni zi. Na lo mɛ ya, lo dandó bɛ lo ya awa bɔlɔkɔ zu kpɛlɛ ko, lo mundó zãma ya ni ho tɛrɛ ni.

Bo na ngoi niko Polo gbondó kɔngɔ ya: ‘Ta mɔ li tɛrɛ mɔ siɔni ma! E zu lo ndo lo!’ Sinzili niko hindó tɛrɛ lo dã wa lo kukundó gbɛlɛ Polo ná Silasi. Lo hũndandó ala ya: “Ye mɛ mbi li ti nɛngɔ ya mbi lua songɔ kwá nɛ?” Ala tɛnɛndó hɛ̃ lo ya: ‘Ayɔ ya, mɔ ná azi ti ndasewa tɛ mɔ ĩ ye lo tɛ Yezo.’ Polo ná Silasi pandó nzɔ̃ pa mɛ ba Yehova hɛ̃ ala, wa sinzili niko ná azi ti ndasewa tɛ lo zu mundó batisimɔ.