Bi sui kɔi na pɛ diringɔ tɛ Yezo ka ndozu ko, ava lo luandó nyingɔ vurú. Ni lindó tɛrɛ lo ka Pantekote ti 33 ti N.E., wa azi londó ka ndo ndɛ̃ ndɛ̃ ndɛ̃ ga ka Yeruzalɛmɛ so lingɔ fɛtɛ. Ava Yezo 120 bombindó tɛrɛ la kaya shambrɛ kɔi ti ndozu. Ngbĩi, kpale kɔi ti kpɛ̃nɛ lindó tɛrɛ lo. Ye kɔi mɛndó ngama mɛnga wá sindó ka bɛ li ava lo wa ala bandandó tɛnɛngɔ ayanga ndɛ̃ ndɛ̃ ndɛ̃. Ala mandó kɔngɔ kɔi ti kpengbani ngama ti kpengba yá.

Azi mɛndó lo ka kɔdɔrɔ ndɛ̃ ndɛ̃ ndɛ̃ ga ka Yeruzalɛmɛ mandó kɔngɔ niko wa ala kpɛlɛndó kpɛ so gwengɔ ka yada niko ti hĩngangɔ ye mɛ ndo li tɛrɛ lo. Ala kamwandó gba mangɔ atoma ndo tɛnɛ tɛnɛ na ayanga gba. Ala tɛnɛndó ya: ‘Azi olo du azi ti Galile. Ala hĩnga tɛnɛngɔ ayanga tɛ e ngasia?’

Na gesi, Petro ná atoma mɛndɛ̃ longalandó so gbɛlɛ butu butu tɛ azi niko. Petro kambisandó hɛ̃ azi se mɛndó aho na Yezo nga na se mɛndó Yehova diri na lo lɛ lo ngɛ̃́. Lo tɛnɛndó ya: ‘Na olo Yezo ka  ndozu ka ndo kɔti ti Nzapa, wa lo hɛ̃ e nyingɔ vurú mɛndó lo ko kapa ni. Na lo ni la, ĩ ndo hũ wa ĩ ndo ma nga kpale ti kpɛ̃nɛ olo.’

Tɛnɛ tɛ Petro gbɔ̃ndó bɛ azi niko nvɛ̃ni, ni la ala hũndandó lo ya: “Ye mɛ ayɔ ya e li nɛ?” Lo tɛnɛndó hɛ̃ la ya: ‘Ĩ gbinya bɛ ĩ na ndo siɔ kpale tɛ ĩ wa ĩ mu nga batisimɔ na ili Yezo. Ĩ nga na luangɔ kado ti nyingɔ vurú.’ Na bi niko, azi 3000 mundó batisimɔ. Akpale niko lindó ya, ava Yezo banda tingɔ gba ka Yeruzalɛmɛ na mbala kɔi. Na lége ti lisalisa ti nyingɔ vurú, atoma tɛ Yezo zindó abombi gba mɛ ni lindó ya, ala ha na ava lo aye zu mɛndó lo hɛ̃ la nyɔ ya ala li ni.