Ngoi mɛndó Nebukadenezare gbɔ̃nɔ akangba ti Yuda ka Babilɔnɛ ko, lo hɛ̃ndó Ashepenaze kumba ti bangɔ ala. Nebukadenezare tɛnɛndó hɛ̃ Ashepenaze ya, lo pɔna na popo tɛ ala apalanga mɛndó kpengbani nga ti nzɔ̃ni. Apalanga ni na luangɔ fɔrmasiɔ̃ na pɛ abulu taa. Fɔrmasiɔ̃ niko na lingɔ ya, ala ti azi ti ndima gba ka Babilɔnɛ. Ayangambi niko lengbindó ti mandangɔ dingɔ mbeti, sungɔ nga tɛnɛngɔ Akkadien yanga mɛndó azi ti Babilɔnɛ ndo tɛnɛ. Ayɔ ngandó ya, ala tɛ ye mɛndó gbia ná azi tɛ lo ndo tɛ. Daniel, Hanania, Mishael ná Azaria ndó nga ka popo tɛ ayangambi niko. Ashepenaze hɛ̃ndó la ila mɛndɛ̃ ti Babilɔnɛ: Beltshazar, Shadrake, Meshake, ná Abedenego. Ala ziandó ya, fɔrmasiɔ̃ niko gbanzi ala na vɔrɔngɔ Yehova?

 Ayangambi niko siɔ mundó ekateli ti tɔndɔngɔ Yehova. Ala hĩngandó ya, ta ala lengbi ti tɛngɔ tɛ tɛ gbia ma, na lo mɛ ya ndia tɛ Yehova gbanzindó tɛngɔ ye ti bí. Ni la, ala tɛnɛndó hɛ̃ Ashepenaze ya: ‘E yɔ ka ti mɔ, ta mɔ hɛ̃ e tɛ tɛ gbia ma.’ Ashepenaze pandó hɛ̃ la ya: ‘Se ĩ kɛ̃ tɛngɔ ye wa se gbia hũ ĩ mabere azi mɛ tɛrɛ la ndo sɔ ko, lo na hongɔ mbi!’

Daniel tindó na dangɔ bɛ kɔi. Lo tɛnɛndó hɛ̃ wa batangɔ ala ya: ‘E yɔ ka ti mɔ se mɔ ye, hɛ̃ e ndunda ná ngu ti nyɔngɔ na pɛ bi sui kɔi. Na gesi, haka e ná afɔ̃ e mɛ ndo tɛ ye tɛ gbia.’ Wa batangɔ ala yendó dangɔ bɛ ni.

Na pɛ bi sui kɔi, Daniel ná afɔ̃ lo taa ndó na santé ti nzɔ̃ni ɔngɔ afɔ̃ la mɛndɛ̃ zu. Bɛ Yehova dendó na se mɛndó ala tɔndɔ lo. Kutu, Yehova hɛ̃ndó Daniel ndara ti hĩngangɔ abimɔnaneli nga kambisangɔ nda asuma.

Na ngoi mɛndó fɔrmasiɔ̃ wɛ ko, Ashepenaze gwendó na aya kɔli niko ka tɛ gbia Nebukadenezare. Gbia tɛnɛndó tɛnɛ na ala wa lo hũndó ya Daniel, Hanania, Mishaele, ná Azaria ndó na kɔdɛ nga na kpengba tɛrɛ ɔngɔ afɔ̃ la zu. Lo pɔnandó ala siɔ ti nɛngɔ ya, ala li kwa ka ya da tɛ lo. Ngoi mɛndɛ̃ gbia ndo hũndandó dangɔ bɛ tɛ ala na ndo akpale ti ngbondoni. Yehova lindó ya ala du awa ndara ɔngɔ awa ndara ná azi ti maji tɛ gbia.

Abɛse agwendó na ala ka kɔdɔrɔ mɛndɛ̃ ko, ta bɛ Daniel, Hanania, Mishaele, ná Azaria lindó na ni ma ya, ani du azi tɛ Yehova. Mɔ nga na dungɔ ngoi zu mbilimbili na mbage tɛ Yehova abɛse ta awa dungɔ mɔ ndoni kɔi na mɔ ma?