Yehova la du wa lingɔ e. Lo la li aye zu, aye mɛ elengbi ti hũngɔ ná omɛ ta elengbi ti hũngɔ ma. Uzu ti lingɔ aye zu mɛ e ndo hũ ni ko, lo lindó aangelo gba. Aangelo du ana? Ala du azi mɛ Yehova li ala ngama lo. Ta elengbi ti hũngɔ ala ma, ngama se mɛ ta elengbi nga ti hũngɔ Yehova ma. Angelo ti uzu mɛndó Yehova li lo ko, lo zandó lo ti nɛngɔ ya, lo li atongolo, aplanɛte, nga na aye mɛndɛ̃ zu. Kɔi ti planɛte ni adu sese ndo ti nzɔ̃ni mɛ e azi e ndo du da.

Na gesi, Yehova lɛkɛndó sese na ndenge ti nzɔ̃ni ti nɛngɔ ya, azi ná asa du da. Lo lindó lá ti nɛngɔ ya, ahɛ̃ limiɛre ge lɛ sese. Lo lindó angomba, akota tɛ, nga na angu ti yakere.

Ye mɛndó li tɛrɛ lo na gesi nɛ? Yehova pandó ya: ‘Mbi na lingɔ asã, alé tɛ, nga na akɛkɛ.’ Ni la asɔrtɛ ti akɛkɛ, asã, nga na afɛlɛlɛ abandandó singɔ ge lɛ sese. Na gesi Yehova lindó asa, lo lindó ahú, asusu ná asa mɛ ndo du ka gbɛ ngu, asa mɛ ndo nɔnɔ na gɛrɛ la nga na omɛ ndo hala na ya la. Lo lindó asa ti yakere ngama adida, wa lo li ngandó asa ti kotani ngama doli. Sa mɛ mɔ ndo ye gba nɛ?

Na gesi, Yehova pandó hɛ̃ angelo mɛndó lo li lo uzu ya: “Zia ya e li zo.” Ta azi na dungɔ kwɛ kɔi na asa ma. Azi na dungɔ na kɔdɛ ti lingɔ aye, tɛnɛngɔ tɛnɛ, héngɔ ngia, nga na lingɔ sambela. Ala  nga na batangɔ lɛ sese ná asa. Mɔ hĩnga zo ti uzu mɛndó Nzapa li? E na mandangɔ kpale mɛ ba lo na ya wangɔ ti gesi.