Omulongwantu gwedhina Alan S. Duthie, okwa nyola membo lye lyedhina Bible Translations and How to Choose Between Them, a ti: “Ngele ngoye owi itaala kutya Ombiimbeli oyi li oohapu dhaKalunga ndhoka a nyolela aantu, shono osha hala okutya Kalunga oha popi natse. . . . Ngele elongelokalunga lyoye olya nwetha mo onkalamwenyo yoye ayihe, elaka ndyoka lya longithwa mOmbiimbeli ndjoka ho lesha oli na okukala epu okuuviwa ko.”

Mboka ye hole Oohapu dhaKalunga, otaya tsu kumwe thiluthilu noohapu ndhoka. Oyi itaala shili kutya “Enyolo kehe olya nyolithwa kOmbepo yaKalunga noli na oshilonga shokulonga oshili, okukumagidha, okupukulula nokuulukila omuntu ondjila yu uka.” (2 Timoteus 3:16) Ombiimbeli kayi shi owala embo lyonkuluyonale. Oyi na ‘omwenyo noonkondo’ dhokukandula po omaupyakadhi gaantu gonkalamwenyo ya kehe esiku. (Aahebeli 4:12) Opo embo ndyoka eyapuki li vule okuuviwa ko, naaleshi ya tule miilonga shoka taya lesha, oli na okukala lya nyolwa melaka ndyoka aantu haya longitha kehe esiku, opo aantu ayehe ya vule oku li lesha noku li uva ko.

Onkee ano, aantu mboka ye hole Oohapu dhaKalunga oya tuntukwa sho Ombiimbeli Omanyolo gopaKriste gOshigreka, ya pita mOshindonga. Oonzapo dhaJehova odha pititha Ombiimbeli ndjoka yi li pethimbo, mo 5 Maalitsa 2023. Etoloko lyOmbiimbeli ndika, olya yela noli li mondjila, shono she shi ningitha oshipu okuuva ko etumwalaka lyaKalunga. Etoloko ndika kalya li mo nale melaka lyOshindonga. Ihe otashi vulika to ipula kutya olye a toloka Ombiimbeli ndjika?

Nonando Ombiimbeli Omanyolo gopaKriste gOshigreka ompe kaapopi yelaka lyOshindonga, oya pita oshikando shotango mo 1950. Pethimbo ndyoka, oya li owala ya pitithwa mOshiingilisa ko-Watch Tower Bible and Tract Society—international Bible Society, ndjoka yi na ondjokonona onde, ngele tashi ya pokunyanyangidha Oombiimbeli. Oshungolangelo yOshiingilisa yo 15 Septemba 1950 oya ti: “Aalumentu mboka ya li mokomitiye yokutoloka oya holola kutya inaya hala . . . omadhina gawo ga tseyike noga tseyithwe manga ye li momwenyo nenge konima ngele ya sa. Elalakano lyOmbiimbeli ndjika okusimanekitha edhina lyaKalunga kashili omunamwenyo.”

Ombiimbeli yo-New World Translation of the Holy Scriptures yi ihwapo oya li ya pitithwa mo 1961. Nonando omadhina gaatoloki oge li oshiholekwa sigo okesiku ndika, kapu na omalimbililo kutya oya li ye na omainyengotompelo omawanawa nosho wo kutya oye hole Kalunga noonkondo. Oontentekelihapu dhOmbiimbeli yo 2013 odha ti: “Opo tu ulike kutya otwa simaneka etumwalaka lyOmbiimbeli, otwa tameke okupepaleka Ombiimbeli ndjika, molwaashoka otwa lenga etumwalaka lyayo. Otu uvite shi li oshinakugwanithwa shetu oshinene okugandja etumwalaka lyOmbiimbeli li li mondjila. . . . Elalakano lyetu kali shi owala okutoloka Ombiimbeli ndjoka yi na etumwalaka lyopetameko, ihe oyi na wo okukala ya yela, yi uvitiwe ko nompu okulesha.”

Sho tatu popi ngeyi, ookopi oomiliyona 245 lwaampono dhOmbiimbeli yo-New World Translation odha nyanyangidhwa muuyuni awuhe, yi ihwapo nenge iitopolwa yayo momalaka gamwe. Aaleshi yadho oyendji oya ndhindhilika mo shike?

Jesus okwa longa aalongwa ye ya galikane ngeyi: “Tate yetu, ngu u li megulu: Edhina lyoye nali yapulwe.” (Mateus 6:9) MOmbiimbeli omwa holoka edhina lyaKalunga lyopaumwene, Jehova, iikando 7 000 lwaampono. (Eksodus 15:3, OB-1954; Episalomi 83:18, NW) Konima yeso lyaayapostoli yaJesus, egongalo lyopaKriste olya li lya nwethwa mo nayi ketaloko lyAajuda oyendji mboka ya li ya yanda okulongitha edhina lyaKalunga. (Iilonga 20:29, 30; 1 Timoteus 4:1) Aanyolululi yiitopolwa yOmanyolo gOshigreka oya tameke okupingena po edhina lyaKalunga lyopaumwene, Jehova, nomadhinasimaneko ngaashi “Kalunga” nenge “Omuwa.”

Okomitiye yOkutoloka Ombiimbeli yo-New World Translation oya shuna mo edhina Jehova mOmanyolo gopaKriste gOshigreka, a moka lya holoka iikando 237. Okushuna edhina lyaJehova apuhe mpoka lya li li na okukala, inashi ningwa owala kaatoloki, ihe osha li sha konakonwa tango nuukeka. Pashiholelwa, muLukas 4:18 omwa tothwa oohapu dhaJesaja 61:1. Momanyolo gopetameko gOshihebeli, edhina Jehova otali adhika movelise ndjoka yaJesaja. Onkee ano, mo-New World Translation, Lukas 4:18 ota ti: “Ombepo yaJehova oya lambele ndje, oshoka okwa gwayeke ndje, ndi uvithile oohepele onkundana ombwanawa.”

Etoloko lya tya ngawo otali kwathele aaleshi ya mone kutya opu na eyooloko pokati kaJehova Kalunga nOmwana gwe awike, Jesus Kristus. Pashiholelwa, omatoloko ogendji oga toloka Mateus 22:44 ngeyi: “Omuwa okwa lombwele Omuwa gwandje.” (OB-2008) Ihe olye ta popi nomukwawo? Paushili wo wene, ovelise ndjoka oya totha Episalomi 110:1, ndjoka momanyolo gopetameko gOshihebeli ya longitha edhina lyaKalunga. Onkee ano, Ombiimbeli yo-New World Translation oya toloka Mateus 22:44 ngeyi: “Jehova okwa lombwele Omuwa gwandje a ti.” Eyooloko ndyoka li li pokati kaJehova Kalunga nOmwana olyi iwetikile. (Markus 13:32; Johannes 8:17, 18; 14:28) Oshinima shoka otwa pumbwa oku shi uva ko, opo tu ka hupithwe, oshoka Iilonga 2:21 otayi ti: “Kehe ngoka ti ithana edhina [lyaJehova, NW] ota hupithwa.”

Okomitiye yOkutoloka Ombiimbeli yo-New World oya ninga oonkambadhala dha mana mo sho tayi toloka Ombiimbeli ndjoka okuza momanyolo gopetameko gOshigreka. Oya toloka iinima yi li paushili, iipu okuuviwa ko, nomelaka ndyoka aantu haya longitha kunena. Pashiholelwa, oya kambadhala opo Ombiimbeli yo-New World Translation yi longithe eityo lyiityalonga yOshigreka. Momalaka ogendji gokunena, iityalonga ohayi lunduluka, opo ku hololwe ethimbo ndyoka oshinima tashi ningwa, ngaashi epitathimbo, enanenathimbo, nenge etegelelwathimbo. MOshigreka, iityalonga ohayi ulike kutya oshinima shontumba opo tashi ningwa, osha pwa okuningwa, nenge otashi tsikile okuningwa. Tala koohapu dhaJesus ndhoka dhi li muMateus 6:33. Oshityalonga shOshigreka shoka sha tolokwa “okupititha komeho,” otashi gandja edhiladhilo lyoshinima tashi tsikile. Onkee ano, opo tu uve ko nawa eityo lyoohapu dhaJesus, ovelise ndjoka oya tolokwa ngeyi: “Onkee ano, tsikileni okupititha komeho Uukwaniilwa waKalunga nuuyuuki we, nena ayihe mbiyaka yilwe otamu ke yi gwedhelwa ko.” Sha faathana, Mateus 7:7 okwa tolokwa ngeyi: “Tsikileni okwiindila, notamu ka pewa; tsikileni okukonga, notamu ka mona, tsikileni okukonkola, notamu ka egululwa.” — Aaroma 1:32; 6:2; Aagalati 5:15.

Ngashingeyi embo lyaMateus olyo owala lya pita manga mOshindonga. Ihe masiku, omambo omakwawo gOmanyolo gopaKriste gOshigreka otaga ka enda taga piti koolimwe noolimwe. Opwa ningwa wo omalongekidho, opo Ombiimbeli ayihe yi tolokwe mokweendela ko kwethimbo. Mbela aaleshi yOmbiimbeli yOshindonga otaya vulu ngaa okukala nuushili kutya etoloko ndyoka oli li paushili nolya yela nawa ngaashi etoloko lyOshiingilisa?

Eeno, osho lela, molwaashoka iilonga mbyoka yokutoloka Ombiimbeli oya kala tayi tonatelwa nuukeka kOlutuwiliki lwOonzapo dhaJehova. Opwa li pwa ningwa etokolo lyopandunge, opo iilonga mbyoka yokutoloka Ombiimbeli, yi longwe kaantu ye li pamwe mosipana. (Omayeletumbulo 11:14) Onkee ano, opwa totwa oosipana dhokutoloka muuyuni awuhe. Koombelewa oonene dhOonzapo dhaJehova, okwa totwa oshikondo hashi ithanwa Oshikondo shIilonga yOkutoloka, opo shi gwanithe po oompumbwe dhoosipana ndhoka, shi yamukule omapulo gaatoloki, nokukwathela oosipana dhomalaka ga yoolokathana dhi toloke Ombiimbeli yo-New World Translation, momukalo gwa faathana. Opwa li wo pwa totwa opolohalama yopakompiuta hayi ithanwa, Watchtower Translation System, opo yi kwathele aatoloki yOmbiimbeli. Opolohalama ndjono yopakompiuta, ohayi kwathele wo aatoloki ya mone nkene Oshiingilisa sha toloka oshitya kehe shOshihebeli noshOshigreka, naashoka ohashi ya kwathele ya hogolole iitya mbyoka tayi opalele. Nonando ongawo, iilonga yokutoloka ohayi pula ombunda. Ihe opolohalama ndjoka yopakompiuta oye shi ningitha oshipu kaatoloki ya toloke Ombiimbeli yo-New World Translation yi li paushili noya yela, ngaashi naanaa etoloko lyOshiingilisa.

Otatu ku ladhipike wu konakone Ombiimbeli yOmanyolo gopaKriste gOshigreka. Ngashingeyi oto vulu oku yi lesha kepandja lyetu lyokointaneta, nenge mopolohalama yo-JW Library. Sho to ka lesha Ombiimbeli ndjoka, oto ka mona kutya: oya yela, ompu okulesha, oyi na oshikalimo shoka tashi ku kwathele wu mone shoka shi li membo kehe nowu mone meendelelo oovelise ndhoka wa igilila; omu na wo iigwedhelwako yi na uuyelele uuwanawa. Shoka sha simanenena, oto vulu okulesha Ombiimbeli ndjoka wu na einekelo kutya oyi na etumwalaka lyaKalunga li li paushili, melaka ndyoka li uvitiwe ko kaantu oyendji.

Omafatululo giitya: Omwa fatululwa iitya oyindjiyindji mbyoka ya longithwa mOmbiimbeli