Hasho nando. Ohatu uvitha egumbo negumbo pandjigilile, ihe inatu itaala kutya otatu ka hupithwa shaashi hatu uvitha. (Aaefeso 2:8) Ndele omolwashike inaatu itaala ngawo?

 Natu tale koshiholelwa tashi landula: Natu tye nduno omulumentu gwontumba omunahole oku uvaneke kutya kehe gumwe te ke ya pehala lyontumba mesiku ndyono omulumentu ngoka a hala ota ka pewa omagano gondilo. Ngele owi itaala kutya omulumentu ngono ota ka ninga ngaashi u uvaneke, mbela ito ka landula omalombwelo ge? Osha yela kutya oto ke ga landula. Otashi vulika nokuli wu ka lombwele ookuume naakwanezimo kombinga yoshinima shoka, opo nayo ya mone mo uuwanawa. Ndele nando ongaaka, omagano ngaka itatu ke ga pewa molwaashoka twa vulika komalombwelo gomulumentu ngoka. Otatu ke ga pewa, molwaashoka a hala oku ge tu pa.

 Sha faathana, Oonzapo dhaJehova odhi itaala meuvaneko lyaKalunga lyomwenyo gwaaluhe ngoka tagu ka pewa ayehe mboka taya vulika kuye. (Aaroma 6:23) Ohatu kambadhala okulombwela yalwe kombinga yeitaalo lyetu, opo nayo ya ka mone uuwanawa momauvaneko gaKalunga. Ihe inatu itaala kutya otatu ka hupithwa shaashi hatu uvitha. (Aaroma 1:17; 3:28) Oshili oyo ndjino kutya itatu vulu okutya otwa yambekwa kuKalunga, molwaashoka twe shi ilongela. Kalunga ite ke tu hupitha ‘molwiilonga ando yasha iiwanawa twe yi longa, aawe, ote ke shi ninga molwesilohenda lye alike.’ — Titus 3:5.