Eeno! Ombiimbeli oya za ‘kuKalunga ngoka ha tsu omukumo mboka ya tyololoka.’ (2 Aakorinto 7:6) Nonando Ombiimbeli kayi shi embo ndyoka tali popi kombinga yuupyakadhi wopamadhiladhilo, oya kwathela oyendji ya sinde omadhiladhilo gokwiidhipaga. Omayele gayo omawanawa otaga vulu wo oku ku kwathela.

•  Omayele geni omawanawa Ombiimbeli tayi gandja?

•  Mbela Ombiimbeli oye tu lombwela kombinga yaantu mboka ya li ya hala okusa?

•  Omanyolo geni taga vulu oku ku kwathela wu sinde omadhiladhilo gokwiikutha omwenyo?

•  Ongiini ngele kuume koye ota ti, “Onda hala okusa”?

•  Ongiini ngele onda li ndi na omadhiladhilo gokwiidhipaga monakuziwa?

• ● Lombwela yalwe nkene wu uvite.

  Shoka Ombiimbeli tayi ti: “Kuume oku na ohole aluhe, nomumwayina okwa valwa, opo a kwathe moluhepo.” — Omayeletumbulo 17:17.

  Shoka enyolo tali ti: Otwa pumbwa ekwatho lyayalwe, uuna tu na omadhiladhilo gokwiidhipanga.

  Ngele owa kala inoo popya nkene wu uvite, oto ka kala wa gwililwa po komadhiladhilo omawinayi. Ihe ngele owa lombwele yalwe nkene wu uvite, oto ka kala wa pepelelwa kashona nokukala wu na etaloko ewanawa.

  Kambadhala okuninga shika: Popya nagumwe nena, tashi vulika omukwanezimo gwoye nenge kuume omwiinekelwa. * Oto vulu wo okunyola omaiyuvo goye.

• ● Konga ekwatho lyopaunamiti.

  Shoka Ombiimbeli tayi ti: “Aandjolowele itaa pumbwa omwaaludhi, ihe aavu tuu ayeke.” — Mateus 9:12.

  Shoka enyolo tali ti: Otu na oku ka konga ekwatho lyopaunamiti, uuna tatu ehama.

  Omadhiladhilo gokwiikutha omwenyo, otaga vulu okukala endhindhiliko lyuuwehame wopamadhiladhilo nenge wopamaiyuvo. Ngaashi owala uuwehame wopalutu, inatu pumbwa okukala twa sa ohoni uuna tu na uuwehame wopamadhiladhilo. Uuwehame wopamadhiladhilo nowopamaiyuvo, ohawu vulu okupangwa.

  Kambadhala okuninga shika: Konga ekwatho kundohotola ngoka a pyokoka, nziya ngaashi tashi vulika.

• ● Dhimbulukwa kutya Kalunga oku na ko nasha nangoye.

  Shoka Ombiimbeli tayi ti: “Omanza gatano itaga landithwa po nani nando uupeni uyali auke? Ihe kaku na nando olimwe lya dhimbiwa kuKalunga. . . . Ano inamu tila: one mu vule omanza ogendji.” — Lukas 12:6, 7.

  Shoka enyolo tali ti: Owu na ongushu momeho gaKalunga.

  Otashi vulika wu kale wu uvite kutya kapu na ngoka e na ko nasha nangoye, ihe Kalunga oha kala e wete uudhigu mboka wu li muwo. Oku na ko nasha nangoye, nokuli nuuna wa hala okusa. Episalomi 51:17 otayi ti: “Omutima gwi itedhulula ito gu ekelehi.” Kalunga okwa hala wu kale nomwenyo, molwaashoka oku ku hole.

  Kambadhala okuninga shika: Konakona uumbangi mboka wu li mOmbiimbeli, mboka tawu ulike kutya Kalunga oku ku hole. Pashiholelwa, tala ontopolwa 24 yembo Hedha popepi naJehova.

• ● Galikana kuKalunga.

  Shoka Ombiimbeli tayi ti: “[Kalunga] mu tsikeni iimpwiyu yeni ayihe, oshoka oye omusilishimpwiyu gweni.” — 1 Petrus 5:7.

  Shoka enyolo tali ti: Kalunga okwa hala tu mu lombwele nkene lela tu uvite nosho wo shoka tatu ipula nasho.

  Kalunga ota vulu oku ku pa ombili yokomwenyo nosho wo oonkondo, opo wu pule komeho. (Aafilippi 4:6, 7, 13) Pamukalo nguka, oha gandja oonkondo kumboka taye mu galikana nomutima aguhe. — Episalomi 55:22.

  Kambadhala okuninga shika: Galikana kuKalunga nena. Tumbula edhina lye, Jehova, e to mu lombwele nkene wu uvite. (Episalomi 83:18) Mu pula e ku kwathele wu pule komeho.

• ● Tedhatedha ketegameno lyonakuyiwa, ndyoka lya popiwa mOmbiimbeli.

  Shoka Ombiimbeli tayi ti: “Etegameno ndika lyetu olya kwata lya dhiginina oomwenyo dhetu.” — Aahebeli 6:19.

  Shoka enyolo tali ti: Otashi vulika wu kale wu uvite siku nawa siku nayi ngaashi osikepa yi li mokati koshikungulu, ihe etegameno ndyoka lya popiwa mOmbiimbeli otali vulu oku ku kwathela wu idhidhimike.

  Etegameno ndyoka kali shi ondjodhi yowala, ihe oli ikolelela keuvaneko lyaKalunga li na ko nasha noku ka hulitha po iinima ayihe mbyoka hayi tu yemateke. — Ehololo 21:4.

  Kambadhala okuninga shika: Ilonga oshindji kombinga yetegameno ndyoka lya popiwa mOmbiimbeli, mokulesha oshileshwa 5 mokambo Onkundana ombwanawa ya za kuKalunga.

• ● Ninga oshinima shoka wu hole.

  Shoka Ombiimbeli tayi ti: “Omutima gwa nyanyukwa otagu eta uundjangandjele.” — Omayeletumbulo 17:22.

  Shoka enyolo tali ti: Ngele otwa kala twi ipyakidhila niinima mbyoka hayi tu etele enyanyu, otashi vulika shi tu kwathele tu kale twa pepelelwa pamadhiladhilo nopamaiyuvo.

  Kambadhala okuninga shika: Ninga oshinima shoka ho tyapula okuninga. Pashiholelwa, pulakena komusika ombwanawa, lesha oshinima tashi tsu omukumo nenge wu kuthe okathimbo wu ninge sha shilwe shoka wu hole. Oto ka gwedha ko wo kenyanyu lyoye, ngele owa kwathele yalwe moku ya ningila oshinima shontumba, nokuli nonando oshishona. — Iilonga 20:35.

• ● Isila oshimpwiyu palutu.

  Shoka Ombiimbeli tayi ti: “Eidheulo lyopalutu oli na ekwatho.” — 1 Timoteus 4:8.

  Shoka enyolo tali ti: Ohatu mono uuwanawa mokuninga omadhewo, mokukotha sha gwana nomokulya iikulya yi na uukolele.

  Kambadhala okuninga shika: Inda wu ke ende mo kashona wu dhengwe kombepo, nokuli nando ominute owala 15.

• ● Dhimbulukwa kutya omaiyuvo ngoka nosho wo iinima yilwe, ohayi lunduluka monkalamwenyo.

  Shoka Ombiimbeli tayi ti: “Kamu shi wo, ngele ngula omutse otagu ka kala kumwe nothingo!” — Jakob 4:14.

  Shoka enyolo tali ti: Uupyakadhi mboka wu na, nokuli nonando owa fa itaawu vulu okukandulwa po, otawu vulu okukala wopakathimbo.

  Kutya nduno onkalo yoye oyi kale ya tya ngiini nena, ngula otayi vulu okulunduluka. Onkee ano, konga omikalo moka to vulu okuungaunga nuupyakadhi mboka. (2 Aakorinto 4:8) Onkalo yoye otashi vulika yi lunduluke mokweendela ko kwethimbo, ihe ngele owi ikutha omwenyo, ku na siku wu gu galule we.

  Kambadhala okuninga shika: Lesha omahokololo gOmbiimbeli kombinga yaantu mboka ya li ya teka omukumo noya li ya hala ya se. Tala wo nkene mokweendela ko kwethimbo ya ka kala ye li hwepo, nokuli momukalo moka ya li inaaya dhiladhila. Natu tale kiiholelwa yimwepo.

Eeno. Ombiimbeli otayi tu lombwele kombinga yaantu yamwe mboka ya li ya ti: “Onda hala okusa.” Kalunga ka li e ya ganda, ihe okwa li e ya kwathele. Nangoye ota vulu oku ku kwathela.

Elia

• ● Okwa li lye? Elia okwa li omuhunganeki ependa. Nonando ongawo, shoka itashi ti kutya ka li ha teka omukumo. Jakob 5:17 otayi ti: “Elia wo okwa li omuntu e tu fa.”

• ● Omolwashike a li a hala okusa? Pompito yimwe, Elia okwa li e uvite uuwike, a tila nokee na oshilonga. Onkee okwa li i indile Jehova a ti: “Omuwa, kutha ndje omwenyo gwandje.” — 1 Aakwaniilwa 19:4.

• ● Oshike sha li she mu kwathele? Elia okwa li a mbumbulile Kalunga omutima gwe. Kalunga okwa li e mu tsu ngiini omukumo? Kalunga okwa li e mu ulukile kutya oku na ko nasha naye nonokutya oku na oonkondo dhoku mu kwathela. Okwa li wo a shilipaleke Elia kutya natango okwa pumbiwa, nokwa li e mu kwathele pahole.

• ▸ Lesha kombinga yaElia: 1 Aakwaniilwa 19:2-18.

Job

• ● Okwa li lye? Job okwa li omulumentu omuyamba noku na uukwanegumbo uunene, ngoka a li ha longele Kalunga kashili nuudhiginini.

• ● Omolwashike a li a hala okusa? Job okwa li a adhika kuudhigu uunene monkalamwenyo ye. Okwa li a kanitha eliko lye alihe. Oyana ayehe oya li ya sile moshiponga. Okwa li a kwatwa kuuwehame uunene. Hugunina, okwa li a lundilwa nokutamanekwa nonyanya kutya oye i iyetele uupyakadhi. Job okwa ti: “Onda vulwa okukala nomwenyo; itandi kala nagwo sigo aluhe.” — Job 7:16.

• ● Oshike sha li she mu kwathele? Job okwa li a galikana Kalunga nokwa li a popi nayalwe. (Job 10:1-3) Okwa li a tsuwa omukumo kukuume ke omwiinekelwa, Elihu, ngoka a li e mu kwathele a tale ko onkalo ye momukalo gwi ili. Shoka sha simanenena, Job okwa li a taamba ko omayele gaKalunga nosho wo ekwatho lye.

• ▸ Lesha kombinga yaJob: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Moses

• ● Okwa li lye? Moses okwa li omuwiliki gwoshigwana shaIsraeli shonale nokwa li omuhunganeki omudhiginini.

• ● Omolwashike a li a hala okusa? Moses okwa li e na iinakugwanithwa oyindji, okwa kala nokupewa uusama nokwa li a vulwa noonkondo. Onkee okwa kugile Kalunga a ti: “Sila ndje ohenda u dhipage ndje.” — Numeri 11:11, 15.

• ● Oshike sha li she mu kwathele? Moses okwa li a lombwele Kalunga nkene e uvite. Kalunga okwa li a kwathele Moses mokuyulula ko kiinakugwanithwa ye, opo kaa kale a gwililwa po.

• ▸ Lesha kombinga yaMoses: Numeri 11:4-6, 10-17.