Aawe. Sho kwa yelekanithwa omanyolo gonale ogu ulika kutya Ombiimbeli inayi lundululwa, nonando oya kala nokunyolululwa uule womayuvimimvo miinima mbyoka hayi yonuka po.

Opwa monika omanyolo gonale gOmbiimbeli omayovi. Momanyolo ngoka omwa monika omayooloko gontumba, ngoka taga ulike kutya opwa ningwa omapuko mokunyolululwa kwOmbiimbeli. Omapuko ogendji gomugo omashona lela noinaga lundulula eityo lyaashoka tashi popiwa. Nonando ongawo, opwa monika wo omapuko omanene ngoka ga ningilwe nalenale. Gamwe otaga monika ga fa ga ningwa nelalakano lyokukambadhala okulundulula etumwalaka lyOmbiimbeli. Tala kiiholelwa iyali tayi landula:

1. MuJohannes gwotango 5:7, omatoloko gOombiimbeli gamwe oge na oohapu tadhi landula: “megulu omu na He, Ohapu nosho wo Ombepo ondjapuki: ayehe mbaka yatatu omuntu gumwe.” Ihe omanyolo gOmbiimbeli gopetameko ngoka ge shi okwiinekelwa, ogu ulika kutya oohapu ndhoka kadha li mo. Odha ka gwedhwa mo owala lwanima. * Onkee ano, omatoloko gOombiimbeli gokunena ngoka ge shi okwiinekelwa, inaga kwatela mo oohapu ndhoka.

2. Edhina lyaKalunga lyopaumwene, olya holoka mo momanyolo gopetameko gOmbiimbeli iikando omayovi ogendji. Nonando ongawo, omatoloko ogendji gOombiimbeli oga pingena po edhina lyaKalunga nomadhinasimaneko ngaashi “Omuwa” nenge “Kalunga.”

Pethimbo ndika, opwa monika iinyolwa oyindji yopetameko noshe shi ningitha oshipu okumona mo omapuko shi vulithe nale. * Okuyelekanithwa kwiinyolwa mbika otaku ulike shike shi na ko nasha nuushili wOmbiimbeli ndjoka tu na kunena?

• Omulongwantu William H. Green okwa popi kombinga yOmanyolo gopaKriste gOshihebeli (Etestamendi Ekulu), a ti: “Ota ku vulu okutiwa kutya kapu na we iinima yopethimbo lyonale ya kala nokwaandjaganekwa yi li paushili ngaashi Ombiimbeli.”

• Shi na ko nasha nOmanyolo gopaKriste gOshigreka nenge tu tye “Etestamendi Epe,” omulongwantu gwOmbiimbeli Frederick F. Bruce, okwa nyola a ti: “Uuyelele wiinima yetu mbyoka ya nyolwa mEtestamendi Epe owa yela nawa, wu vule uuyelele wiinima oyindji mbyoka ya nyolwa kaanyoli yopethimbo lyonale, mboka kaaku shiwike ngele owu li tuu mondjila.”

• Omulumentu gwedhina, Sir Frederic Kenyon, ngoka a li onkulungu ya tseyika nawa miinyolwa yopaMbiimbeli, okwa popi kutya “ota vulu okukala e na Ombiimbeli meke lye nokupopya kee na uumbanda nenge noita kakadhala okupopya kutya oku na shili Oohapu dhaKalunga, ndhoka e dhi gandja komapipi nomapipi muule womathelemimvo. Ihe inamu kuthwa sha nando sha simana.”

• Aajuda nosho wo Aakriste, oya kaleke po omahokololo ngoka ya nyolulula taga popi omapuko ga kwata miiti ngoka ga ningwa koshigwana shaKalunga. * (Numeri 20:12; 2 Samuel 11:2-4; Aagalati 2:11-14) Sha faathana oya kaleke po wo omahokololo ngoka taga popi okwaavulika kwoshigwana shAajuda naangoka wo ga aneke pomutenya omalongo gopantu. (Hosea 4:2; Maleaki 2:8, 9; Mateus 23:8, 9; 1 Johannes 5:21) Sho ya nyolulula omahokololo ngaka ge li paushili, aanyolululi mboka oya li yu ulike kutya oye li aainekelwa noya lenga Oohapu dhaKalunga.

• Mbela kashi li pandunge sho Kalunga a nyolitha Oohapu dhe dha nwethwa mo noku dhi kaleka po dhi li paushili? * (Jesaja 40:8; 1 Petrus 1:24, 25) Komeho gaayihe, ine dhi nyolitha owala dhi etele aantu yopethimbo lyonale uuwanawa, ihe natse otadhi tu kwathele wo kunena. (1 Aakorinto 10:11) Odhoshili kutya “ashihe shoka sha nyolwa mOmanyolo, osha nyolwa shi tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” — Aaroma 15:4.

• Jesus naalanduli ye oya li ya totha okuza mOmanyolo gOshihebeli nokaa ye na omalimbililo ga sha ge na ko nasha nuushili womanyolo ngoka gonale. — Lukas 4:16-21; Iilonga 17:1-3.