Amushangandjayi gwIigwana ya Hangana, António Guterres, okwa popi kombinga yomaponokelo ngoka ga ningilwa Israeli, kuIran mOlyomakaya yo 13 Apilili 2024, a ti: “Ngashingeyi olyo ethimbo lyokukutha omasipa pokati koombwa, nokukwathela onkalo yi kale ya ngungumana. Ngashingeyi olyo ethimbo lyokweegeka omatati.”

 Ombepo yomalugodhi ndjoka tayi pepe miilonga yomUuzilo woPokati, oyi li muuyuni awuhe.

 Mo 26 Januali 2023, Olata yEgameno yIigwana ya Hangana, oya tile: “Mongashingeyi kongonga yevi oku na omalugodhi ogendji, ge vulithe kokule ngoka ga li ko pethimbo lyIita Iitiyali yUuyuni. Aantu oobiliyona 2 muuyuni, sha hala okutya, omuntu gumwe gwomaantu yane ota mono iihuna omolwiita.”

 Iitopolwa moka mu na aantu taya mono iihuna noonkondo omolwiita oyo: Israeli, Gaza, Syria, Azerbaijan, Ukraine, Sudan, Etiopia, Niger, Myanmar nosho wo Haiti. a

 Uunake omalugodhi taga ka hula po? Mbela aaleli yuuyuni otashi vulika ngaa ya ka ete po ombili? Ombiimbeli otayi ti ngiini?

 Omakuyunguto ngoka ge li muuyuni awuhe kunena, otaga ulike kutya masiku iita otayi ka hula po sigo aluhe. Iita mbyoka yi li muuyuni otayi gwanitha po ehunganeko lyOmbiimbeli kombinga yethimbo ndyoka tu li mulyo ngashingeyi. Ombiimbeli otayi li ithana kutya ‘omasiku gahugunina guuyuni mbuka.’ — Mateus 24:3.

•   Ombiimbeli otayi ti: “Otamu ka uva iita nosho wo oonkundana kombinga yiita. . . . Iigwana otayi ka kondjithathana, nomaukwaniilwa otaga ka ponokelathana.” — Mateus 24:6, 7.

 Lesha oshitopolwa: “What Is the Sign of ‘the Last Days,’ nenge ‘End Times’?,” wu mone nkene iita mbyoka yi li muuyuni kunena tayi gwanitha po ehunganeko lyOmbiimbeli.

 Ombiimbeli oya hunganeka kutya omakuyunguto agehe ngoka ga etithwa kaantu muuyuni, otaga ka hulithwa po. Shoka otashi ka ningwa ngiini? Mbela aantu kombanda yevi oyo taye ke ga hulitha po? Aawe, ihe elunduluko ndyoka otali ka etithwa ‘kiita mesiku enene lyaKalunga Omunankondoadhihe,’ mbyoka hayi ithanwa Armagedon. (Ehololo 16:14, 16) Iita mbyoka otayi ka pala ondjila, opo Kalunga a gwanithe po euvaneko lye, aantu ya kale nombili sigo aluhe ya nyanyukwa. — Episalomi 37:10, 11, 29.

 Opo wu mone uuyelele wa gwedhwa po kombinga yankene Kalunga ta ka hulitha po iita ayihe muuyuni, lesha oshitopolwa: “What Is the Battle of Armageddon?”