•  Omatyokosha gopetameko 2

•  Omaliko okuza mOohapu dhaKalunga 3-5

  •  Oshipopiwa 3

  •  Omaliko gomOmbiimbeli 4

  •  Elesho lyOmbiimbeli 5

•  Uvitha nuulaadhi muukalele 6-14

  •  Tameka oonkundathana 7

  •  Ninga omaishunoko 8

  •  Ninga aantu aalongwa 9

  •  Yelithila yalwe eitaalo lyoye 10

  •  Oshipopiwa 11

  •  Oshikalimo 12

  •  Omikalo dhokuuvitha 13

  •  Okulongitha uuvidio niileshomwa 14

•  Onkalamwenyo yopaKriste 15-16

  •  Ekonakonombiimbeli lyEgongalo 16

•  Omatyokosha gopehulilo 17

•  Okupandula nokugandja omayele 18

•  Ethimbo 19

•  Etalelopo lyomutonatelishikandjo 20

•  Oshiwike shoshigongi shoshikandjo nenge shoshitopolwa 21

•  Oshiwike shEdhimbuluko 22

•  Omutonateli gwokugongala Onkalamwenyo yopaKriste niilonga yokuuvitha 23

•  Omunashipundi gwokugongala Onkalamwenyo yopaKriste niilonga yokuuvitha 24

•  Omugandjimayele omutiyali 25

•  Osikola ontiyali 26

•  Uuvidio 27

1. Omalombwelo ngaka otaga ka kwathela ayehe mboka ye na iitopolwa pokugongala Onkalamwenyo yopaKriste niilonga yetu yokuuvitha. Oye na okulesha omalombwelo ngoka ge na ko nasha niitopolwa yawo, mbyoka yi li mokafo Onkalamwenyo yopaKriste niilonga yetu yokuuvitha, manga inaaye yi ilongekidha. Aauvithi ayehe oye na okuladhipikwa, opo ya kale haya gandja iipopiwa. Yalwe mboka haya gongala aluhe pamwe natse, otaya vulu okugandja iipopiwa ngele otaya tsu kumwe noshili yOmbiimbeli nongele onkalamwenyo yawo oyi li metsokumwe nomakotampango gopaKriste. Omutonateli gwokugongala Onkalamwenyo yopaKriste niilonga yokuuvitha, oku na okukundathana iitegelelwa yi na ko nasha nosikola yaauvithi nagumwe ngoka kee shi omuuvithi, ngoka a hala okukutha ombinga mosikola. Opo ihe, te mu tseyithile ngele okwa gwana nenge hasho. Shoka oshi na okuningwa pu na ngoka ha konakona naye Ombiimbeli (nenge pu na omuvali gwe, ngoka e li Onzapo). Iitegelelwa mbyoka oya faathaana naambyoka yomuntu ngoka a hala okuninga omuuvithi inaa ningithwa. — od-KY ontop. 8, okat.  8.

2. Omunute gumwe. Oshiwike kehe konima yeimbilo negalikano, omunashipundi ota ka popya shoka tashi ka kundathanwa. Oku na okugandja unene eitulomo kiitsa mbyoka tayi tungu egongalo.

  3. Oshipopiwa: Ominute omulongo. Oshipalanyolo nosho wo uuyelele wiitsa iyali nenge itatu ya simanenena, otayi adhika mokafo Onkalamwenyo yopaKriste niilonga yetu yokuuvitha. Oshipopiwa shika oshi na okugandjwa komukuluntugongalo nenge komuyakuligongalo. Ngele otatu tameke okulesha embo epe lyOmbiimbeli moshiwike shono, otapu ka ulikwa okavidio hoka taka ningi efalomo kombinga yalyo. Omupopi oku na okupopya nkene shoka sha ulikwa mokavidio tashi tsu kumwe noshipalanyolo shoshipopiwa. Ihe oku na wo okukundathana iitsa mbyoka yi li mokafo. Ngele ethimbo otali shi pitike, oku na ishewe okulongitha omathano ngoka ge li mo, molwaashoka oga tulwa mo, opo nago ga kwatelwe mo muuyelele mboka wu na okukundathanwa. Ota vulu wo okukwatela mo uuyelele wulwe, ngele otawu tsu kumwe noshikundathanwa.

 4. Omaliko gomOmbiimbeli: Ominute omulongo. Oshitopolwa shika oshomapulo nomayamukulo, sho kashi na efalomo nenge ehulitho lyasha. Ohashi gandjwa komukuluntugongalo nenge komuyakuligongalo. Oku na okupula aapulakeni omapulo agehe ngoka ga kwatelwa moshitopolwa shika. Oye wo e na okutokola ngele oovelise adhihe ndhoka dhe etwa momapulo, otadhi leshwa nenge hasho. Mboka taya gandja omayamukulo oye na oku shi ninga meni lyoosekonde 30.

 5. Elesho lyOmbiimbeli: Ominute ne. Oshipopiwa shika oshi na okugandjwa komulumentu. Sho ta lesha ina pumbwa okuninga efalomo nenge ehulitho lyasha. Uuna omunasikola ta lesha, omunashipundi na pulakene nawa, a tale ngele omunasikola ota lesha nawa noneuvoko. Na tale ngele ota lesha iitya tayi kunguluka nawa nota tsu omuthindo omautumbulilo ga simanenena. Na tale wo ngele ota lundulula ewi, ta tula mpoka sha pumbiwa nota lesha paunshitwe. Oshipopiwa shelesho lyOmbiimbeli shimwe ohashi kala shi na oovelise oonshona, omanga shimwe shi na oovelise odhindji. Onkee ano, omutonateli gwokugongala Onkalamwenyo yopaKriste niilonga yetu yokuuvitha oku na okukaleka momadhiladhilo okuvula kwomunasikola, uuna ta ningi elandulathano.

6. Ominute 15. Oshitopolwa shika shokugongala osha nuninwa ayehe mboka haya kutha ombinga muukalele, opo ya hwepopaleke uunkulungu wawo, ngele tashi ya pokuuvitha nokulonga aantu. Ngele otashi wapa, aakuluntugongalo nayo otaya vulu okukala haya kutha ombinga mosikola. Omunasikola kehe oku na okulongela koshitsa shontumba, kutya nduno osha za mokambo Okulonga aantu nenge Kala wu hole aantu, shoka shi li piitopolwa yawo mokafo Onkalamwenyo yopaKriste niilonga yetu yokuuvitha. Omathimbo gamwe, otamu ka kala mu na oshitopolwa shoonkundathana. Oshitopolwa shono, oshi na okukwatelwa komeho komukuluntugongalo nenge komuyakuligongalo. — Tala  okatendo 15, opo wu mone nkene to vulu okukwatela komeho oshitopola shoonkundathana naapulakeni.

 7. Tameka oonkundathana: Oshitopolwa shika otashi vulu okuningwa komulumentu nenge komukiintu. Ngoka te mu kwathele na kale guukashike kookantu wa fa we nenge he, yina nenge omumwayina. Otaya vulu oku shi ninga ya kuutumba nenge ya thikama. — Opo wu mone uuyelele owundji kombinga yoshikalimo nosho wo omukalo gwokuuvitha gwa pamba oshitopolwa shika, tala  okatendo 12 no  13.

 8. Ninga omaishunoko: Oshitopolwa shika otashi vulu okuningwa komulumentu nenge komukiintu. Ngoka te mu kwathele na kale guukashike kookantu wa fa we. (km-E 5/97 ep. 2) Otaya vulu oku shi ninga ya kuutumba nenge ya thikama. Omunasikola oku na okuulika nkene eishunoko li na okuningwa. — Opo wu mone uuyelele owundji kombinga yoshikalimo nosho wo omukalo gwokuuvitha gwa pamba oshitopolwa shika, tala  okatendo 12 no  13.

 9. Ninga aantu aalongwa: Omunasikola ota vulu okukala omulumentu nenge omukiintu. Ngoka te mu kwathele na kale guukashike kookantu wa fa we. (km-E 5/97 ep. 2) Otaya vulu oku shi ninga ya kuutumba nenge ya thikama. Oshipopiwa shika oshi na okuningwa momukalo moka ekonakonombiimbeli lya fa li li nale metifa. Omunasikola ina pumbwa okuninga efalomo nenge ehulitho, kakele shila ngele ota longele kushimwe shomiitsa mbyoka. Uuyelele awuhe mboka wa gandjwa inawu pumbwa okuleshwa, ihe mpoka sha pumbiwa nawu leshwe.

 10. Yelithila yalwe eitaalo lyoye: Ngele oshitopolwa shika oshi li momukalo gwoshipopiwa, oshi na okugandjwa komulumentu. Ngele oshi li molupe lweuliko, otashi vulu okugandjwa komulumentu nenge komukiintu. Ngoka te mu kwathele na kale guukashike kookantu wa fa we nenge he, yina nenge omumwayina. Omunasikola oku na okuyamukula epulo momukalo gwa yela nononge, ta longitha uuyelele mboka a pewa. Ota vulu okutokola ngele ota tumbula oshileshomwa moka mwa za uuyelele mboka nenge hasho.

 11. Oshipopiwa: Oshitopolwa shika oshi na okuningwa komumwatate noshi na okugandjwa momukalo gwoshipopiwa. Ngele oshipopiwa osha kankamena koshitsa sha za moshigwedhelwako A shokambo Kala wu hole aantu, omunasikola oku na okutsa omuthindo nkene oovelise tadhi vulu okulongithwa muukalele. Pashiholelwa, ota vulu okuyelitha kutya uunake ovelise tayi vulu okulongithwa, eityo lyayo nosho wo nkene yi na okulongithwa, uuna ta tompathana nomuntu. Ngele oshipopiwa osha kankamena kushimwe shomiitsa yomiileshwa yomokambo Kala wu hole aantu, omunasikola oku na okugandja eitulomo kunkene shi na okutulwa miilonga muukalele. Ota vulu okutsa omuthindo oshiholelwa shoka shi li moshitsa shotango shoshileshwa nenge a tse omuthindo enyolo lyontumba lyomwaangoka ga gwedhwa po, ndyoka li li moshileshwa, ngele otali opalele.

   12. Oshikalimo: Uuyelele mbuka wu li mokatendo haka nosho wo hoka ka landula ko, owa nuninwa oshitopolwa “Tameka oonkundathana” nosho wo “Ninga omaishunoko.” Elalakano lyomunasikola okukundathana oshili yOmbiimbeli nomuntu shi ikolelela konkalo ye, te shi ningi momukalo gu li paunathangwa nokuninga oshilage a galuke, okuninga shila a lombwelwa a ninge shimwe shi ili. Omunasikola oku na okuhogolola oshikundathanwa shoka shi li pethimbo notashi opalele moshitopolwa shawo. Ota vulu okuhogolola a gandje oshileshomwa nenge a ulike okavidio okuza mOkaketha ketu kiilongitho yokulonga aantu nenge kee shi ninge. Pehala aanasikola ya kopele shoka taya ka popya, oye na okwiidheula nkene ye na okulongitha omikalo dhokukundathana dha yoolokathana, ngaashi okuulika ohokwe nokupopya paunshitwe.

   13. Omikalo dhokuuvitha: Omunasikola oku na okugandja oshitopolwa she ta longitha omukalo gwokuuvitha ngoka gu li mokafo, te shi ningi shi ikolelela konkalo yomoshitopolwa shawo. Pashiholelwa:

1.  (1) Egumbo negumbo: Omukalo nguka ogwa kwatela mo okuuvitha egumbo negumbo kutya nduno oto shi ningi oshipala noshipala, pangodhi nenge mokunyola oontumwafo, nokuninga eishunoko lya kankamena kwaashoka mwa kundathanene, sho wa li to uvitha egumbo negumbo.

2.  (2) uunzapo wontukuluka: Omukalo nguka ohagu ku pe ompito yokulundululila oonkundathana dhiinima yakwalukehe mokugandja uunzapo. Ogwa kwatela mo wo okuuvithila aaniilonga pamwe nangoye, aanasikola ooyakweni, aashiinda shoye, mboka to tsakanene nayo mosheenditho shaayehe nenge kehe tuu pamwe, sho wi ipyakidhila niilonga yoye yakehe esiku.

3.  (3) Uunzapo womontaneho: Omukalo nguka otagu vulu okukala gwa kwatela mo okuuvitha to longitha okatemba, okudhengela aantu momahala goongeshefa, okuuvitha mepandaanda, momahala gaayehe, momahala gokupaakinga iiyenditho nenge kehe tuu mpoka aantu taya adhika.

 14. Okulongitha uuvidio niileshomwa: Omunasikola ota vulu okuhogolola a dhane okavidio nenge a gandje oshileshomwa, shi ikolelela konkalo. Ngele oshitopolwa she osha kwatela mo okavidio nenge oye mwene a hogolola oku ka kwatela mo, naye ka kundathane, ihe ine ka dhana.

15. Konima yeimbilo, mominute 15 ndhoka tadhi landula ko, otamu ka kundathanwa oshitopolwa shimwe nenge iyali mbyoka tayi kwathele aapulakeni ya tule miilonga Oohapu dhaKalunga. Oshitopolwa shoka otashi vulu okupewa omukuluntugongalo nenge omuyakuligongalo. Ngele oshitopolwa shoka oompumbwe dhegongalo, nashi pewe omukuluntugongalo. Ngele oshitopolwa oshi li momukalo gwoonkundathana, omupopi ota vulu okupula omapulo ga gwedhwa po. Efalomo lye oli na okukala paufupi, opo a kale e na ethimbo lya gwana okukundathana iitsa ya simana, naapulakeni ya vule okukutha ombinga. Ngele oshitopolwa osha kwatela mo omapulapulo, ngoka ta pulwapulwa oku na okuya komeho, pehala lyokukala miipundi, ngele otashi wapa.

  16. Ekonakonombiimbeli lyEgongalo: Ominute 30. Oshitopolwa shika oshi na okupewa omukuluntugongalo. (Aayakuligongalo otaya vulu wo oku shi ninga ngele megongalo omu na aakuluntugongalo aashona.) Olutu lwaakuluntugongalo olu na okutokola kutya oolye ya gwana okukwatela komeho Ekonakonombiimbeli lyEgongalo. Mboka ya gwana naya kale taya vulu oku shi ninga momukalo omwaanawa, opo ekonakono li pwe pethimbo. Oye na okutsa omuthindo omanyolo ngoka ge na enenedhiladhilo nokukwathela aapulakeni ya mone mo uuwanawa muuyelele mboka tawu kundathanwa. Mboka ya gwana otaya ka mona mo uuwanawa, ngele oya lesha omalombwelo ge na ko nasha nankene ye na okukwatela komeho iitopolwa yomapulo nomayamukulo. (w23.04 ep. 24, oshimpungu) Ngele uuyelele woshitopolwa shoka mu uthilwa omwe wu kundathana nawa awuhe e taku hupu ethimbo, ngoka ta kwatele komeho ina pumbwa e ende kashona nenge a kale ta ningi omatyokosha ga gwedhwa po. Mpoka tashi vulika, oshiwike kehe nali kwatelwe komeho komuntu i ili, ye omuleshi naye na kale i ili. Ngele omunashipundi okwa pula ekonakono li fupipikwe, ngoka ta kwatele komeho oye e na okutala nkene te ke shi enda. Otashi vulika a tokole uutendo wumwe wu leshwe, wo wumwe ta pula owala omapulo.

17. Ominute ndatu. Omunashipundi gwokugongala ota ka ninga eendululo, a tse omuthindo iitsa ya simana mbyoka ya popiwa pokugongala. Ota ka popya wo shoka tashi ka kundathanwa mokugongala kwoshiwike tashi landula. Ngele ompito otayi shi pitike, na tumbule omadhina gaamboka ye na iitopolwa moshiwike tashi landula. Ngele opu na omatseyitho gasha nenge oontumwafo dhontumba ndhoka dha pumbwa okuleshwa, omunashipundi ne shi ninge, kakele shila ngele opu na omalombwelo gasha. Omatseyitho giinima mbyoka hayi ningwa pandjigilile, ngaashi elongekidho liilonga yomomapya nosho wo okwoopaleka Oshinyanga shUukwaniilwa, kage na okuningwa komutuni, ihe oge na okutulwa kekatha lyegongalo. Ngele omunashipundi ita vulu okuninga omatseyitho nenge okulesha oontumwafo methimbo ndyoka a pewa, na shilipaleke kutya ethimbo olya kwatwa nawa nenge a pule aamwatate mboka ye na iitopolwa ya fupipike iitopolwa yawo ngaashi tashi vulika. (Tala  okatendo 16 no  19.) Okugongala oku na okuhulithwa neimbilo nosho wo negalikano.

18. Konima ngele omunasikola kehe a gandja oshipopiwa she, omunashipundi na longithe omunute gumwe e mu pandule noku mu pa omayele ga kankamena koshitsa hoka ta longele. Uuna omunashipundi ta tseyitha aanasikola mboka ye na iipopiwa, ina pumbwa okupopya iitsa hoka taya ka longela. Ngele omunasikola a mana okugandja oshipopiwa she, omunashipundi ne mu pandule e ta popi oshitsa hoka a longela. Na popye mpoka omunasikola e shi enditha nawa nenge a popye momukalo omwaanawa mpoka a pumbwa okuninga omalunduluko. Omunashipundi ota vulu okugandja omayele ga gwedhwa po komunasikola, tashi vulika kombinga yaashoka tashi mu etele uuwanawa nenge yashimwe shi ili. Ota vulu oku shi ninga, ta longitha okambo Kala wu hole aantu, Okulonga aantu nenge embo Ofikola yOukalele, ye li oyo ayeke, konima yokugongala nenge pethimbo lilwe. Ota vulu oku mu pa omayele kombinga yoshitsa hoka a longela nenge kombinga yoshitsa shilwe. — Opo wu mone uuyelele wa gwedhwa po shi na ko nasha niinakugwanithwa yomunashipundi gwokugongala Onkalamwenyo yopaKriste niilonga yokuuvitha noyomugandjimayele omutiyali, tala  okatendo 19,  24 no  25.

19. Oshitopolwa kehe oshi na okupwa pethimbo, nomunashipundi oku na okulongela kethimbo ndyoka a pewa pompito kehe. Nonando piitopolwa yomokafo Onkalamwenyo yopaKriste niilonga yetu yokuuvitha opu na nale ethimbo ndyoka lya uthwa, omupopi ina pumbwa okumana ko ominute adhihe, ngele oshitopolwa she okwe shi mana meni lyethimbo ndyoka a pewa. Ngele okwa longithwa ethimbo lya pitilila miitopolwa yokugongala, omunashipundi gwokugongala Onkalamwenyo yopaKriste niilonga yokuuvitha nenge omugandjimayele omutiyali oku na okupa mboka ya gandja iitopolwa mbyoka omayele ye li po oyo ayeke. (Tala  okatendo 24 no  25.) Okugongala akuhe mwa kwatelwa omaimbilo negalikano, oku na okupwa muule wowili nominute 45.

20. Ngele egongalo otali talelwa po komutonatelishikandjo, okugongala oku na okuningwa ngaashi shi li mokafo Onkalamwenyo yopaKriste niilonga yetu yokuuvitha. Pethimbo lyetalelopo, Ekonakonombiimbeli lyEgongalo oli na okupingenwa po noshipopiwa shiilonga yokuuvitha shominute 30 shoka tashi gandjwa komutonatelishikandjo. Manga oshipopiwa inaashi gandjwa, omunashipundi na endulule shoka sha popiwa pokugongala, ye na popye wo shoka tashi ka kundathanwa moshiwike tashi landula. Na ninge omatseyitho ngoka ge li po nenge a leshe oontumwafo ndhoka dhi na okuleshwa, opo ihe ta tseyitha edhina lyomutonatelishikandjo noshipalanyolo shoshipopiwa she. Konima yoshipopiwa shiilonga yokuuvitha, omutonatelishikandjo ota ka popya eimbilo ndyoka a hogolola li imbwe pehulilo lyokugongala. Ota vulu okuhiya omumwatate gulwe a hulithe negalikano. Osikola ontiyali melaka ndyoka hali popiwa megongalo kayi na okuningwa moshiwike shetalelopo. Ongundu yelaka lilwe otayi vulu okuninga okugongala kwayo akuhe, nokuli nuuna omutonatelishikandjo ta talele po egongalo moka yi li. Ongundu ndjoka oyi na okuwayimina egongalo moka yi li, sho omutonatelishikandjo ta gandja oshipopiwa shiilonga yokuuvitha.

21. Moshiwike moka mu na oshigongi oshishona nenge oshinene, ihamu kala okugongala. Egongalo oli na okudhimbulukithwa kutya kehe gumwe ni ilongekidhe iitopolwa yokugongala yomoshiwike shoka paumwene nenge ye li uukwanegumbo.

22. Ngele esiku lyEdhimbuluko olya gwile mokati koshiwike, nena okugongala Onkalamwenyo yopaKriste niilonga yokuuvitha kaku na okuningwa.

23. Olutu lwaakuluntugongalo olwo lu na okuhogolola kutya omukuluntugongalo guni e na okukala omutonateli gwokugongala Onkalamwenyo yopaKriste niilonga yokuuvitha. Omutonateli oku na okushilipaleka kutya okugongala okwa unganekwa nawa notaku ningwa metsokumwe nomalombwelo ngaka. Oku na okukala ta longele kumwe nomugandjimayele omutiyali. Shampa okafo Onkalamwenyo yopaKriste niilonga yetu yokuuvitha ka piti, omutonateli gwokugongala Onkalamwenyo yopaKriste niilonga yokuuvitha na ninge elandulathano liitopolwa ayihe, lyuule woomwedhi mbali ndhoka dhi li kokafo. Shoka osha kwatela mo iitopolwa mbyoka kaayi shi yaanasikola, aanashipundi mboka ya pitikwa kolutu lwaakuluntugongalo nosho wo iitopolwa yaanasikola. (Tala  okatendo 3-16 no  24.) Uuna ta ningi elandulathano liitopolwa yaanasikola, oku na okukaleka momadhiladhilo omimvo dhawo, owino nosho wo ngele otaya vulu oku yi gandja ya manguluka. Oku na okuninga sha faathana, ngele tashi ya wo piitopolwa yilwe yokugongala. Iitopolwa ayihe mbyoka oyi na okugandjwa komeho yethimbo, manga ku na iiwike itatu. Iipopiwa yaanasikola oyi na okugandjwa taku longithwa okafooloma kedhina Oshitopolwa shoye pokugongala onkalamwenyo yopaKriste niilonga yetu yokuuvitha (S-89). Omutonateli gwokugongala kwOnkalamwenyo yopaKriste niilonga yokuuvitha oku na okushilipaleka kutya elandulathano alihe liitopolwa olya tulwa kekatha. Olutu lwaakuluntugongalo otalu vulu okuhogolola omukuluntugongalo gulwe nenge omuyakuligongalo e mu kwathele. Nonando ongawo, aakuluntugongalo oyo owala ya pitikwa okuninga elandulathano liitopolwa mbyoka kaayi shi yaanasikola.

24. Oshiwike kehe omukuluntugongalo gumwe na ninge omunashipundi gwokugongala. (Ngele kapu na aakuluntugongalo ya gwana, aayakuligongalo nayo otaya vulu okulongithwa.) Oku na okwiilongekidha omatyokosha gopetameko neendululo. Oye e na okuninga efalomo lyomupopi kehe ngoka ta landula ko. Ngele megongalo omu na aakuluntugongalo aashona, omunashipundi naye ota vulu okuninga po iitopolwa yimwe, unene tuu mbyoka ya kwatela mo owala okuulika okavidio hoka inaaka pumbwa okukundathanwa. Omatyokosha ngoka taga ningwa pokati kiipopiwa, naga kale paufupi. Olutu lwaakuluntugongalo olwo lu na okutokola kutya aakuluntugongalo yeni taya vulu okukala aanashipundi. Omathimbo nomathimbo, aakuluntugongalo otaya vulu okuninga omalufo gokukala aanashipundi. Shi ikolelela konkalo yegongalo, omutonateli gwokugongala oku na okukala ha ningwa omunashipundi lwiikando shi vulithe aakuluntugongalo yalwe. Ngele omukuluntugongalo oha kwatele komeho Ekonakonombiimbeli lyEgongalo, poompito odhindji oha kala a gwana okuninga omunashipundi. Omukuluntugongalo ngoka e li omunashipundi, oku na okukala ha pandula noha gandja omayele taga tungu mpoka sha pumbiwa kwaamboka taya kutha ombinga mosikola. Omunashipundi oku na wo okushilipaleka kutya okugongala otaku pu pethimbo. (Tala  okatendo 17 no  19.) Ngele komutuni oku na ehala lya gwana, omunashipundi ota vulu okukala e na embako lyi ili, opo a vule okupopya oshitopolwa tashi landula ko, omanga omupopi ngoka ta landula ko a thikama nale pembako ekwawo. Omunashipundi ota vulu okukuutumba poshitaafula komutuni, sho elesho lyOmbiimbeli tali ningwa nosho wo pethimbo sho oshitopolwa Uvitha nuulaadhi muukalele tashi ningwa. Okuninga ngawo, otashi ka hupitha ethimbo.

25. Ngele otashi vulika, hogololeni omukuluntugongalo ngoka e li omupopi omunekeka oye a ninge omugandjimayele omutiyali. Oshinakugwanithwa she oshokugandja omayele kaakuluntugongalo nokaayakuligongalo paumwene. Otashi vulika ya pewe omayele ge na ko nasha niitopolwa mbyoka haya gandja pokugongala kwOnkalamwenyo yopaKriste niilonga yokuuvitha, iipopiwa yomontaneho, okukwatela komeho nenge okulesha Oshungolangelo nosho wo okukwatela komeho Ekonakonombiimbeli lyEgongalo. (Tala  okatendo 19.) Ngele megongalo omu na aakuluntugongalo ya gwana, ye li aapopi naalongi ya pyokoka, omumvo kehe otamu vulu okuhogolola omukuluntugongalo gulwe a ninge omugandjimayele omutiyali. Inashi pumbiwa omugandjimayele omutiyali a kale ha gandja omayele kombinga yoshipopiwa kehe sha gandjwa.

26. Ngele egongalo oli na aauvithi oyendji, otali vulu okukala li na osikola ontiyali. Oyi na okukala yi na omugandjimayele a pyokoka, unene tuu na kale omukuluntugongalo. Ngele osha pumbiwa, omuyakuligongalo naye ota vulu okupewa oshinakugwanithwa shoka. Olutu lwaakuluntugongalo nalu hogolole ngoka ta vulu okupewa oshinakugwanithwa shoka nosho wo kutya ngele otashi kala hashi ipewa omalufo. Omugandjimayele oku na okulandula uuyelele mboka wu li  mokatendo 18. Aanasikola oye na okuya mosikola ontiyali konima yoshitopolwa Omaliko gomOmbiimbeli. Oshitopolwa shoka oshi li kohi yoshipalanyolo Omaliko okuza mOohapu dhaKalunga. Konima yaashono, oye na okuwayimina ishewe egongalo, uuna iitopolwa yaanasikola ya pu.

27. Opu na uuvidio mboka tawu kala hawu ulikwa pokugongala huka. Uuvidio wokugongala kwomokati koshiwike, otawu adhika kopolohalama JW Library® notawu vulu wo okudhanwa to longitha iikwaelektronika yi ili noyi ili.

© 2023 Watch Tower Bible and Tract Society of Pennsylvania

S-38-OD 11/23