PaMateus 28:1-20
28 Konima yEsabati, mesiku lyotango lyoshiwike, sho eluwa tali tende, Maria Magdalena naMaria mukwawo oye ya ya tale ombila.
2 Ihe tala! opwa holoka ekakamo lyevi enene, oshoka omuyengeli gwaJehova okwa kuluka okuza megulu, nokwe ya e ta undula po emanya lyombila e ta kala a kuutumba kulyo.
3 Okwa li ta adhima a fa olwaadhi, noonguwo dhe odha li dha toka dha fa olumi.
4 Molwaashoka aalangeli yombila oya li ye mu tila, oya li taya kakama noya si onkumamuthika.
5 Ihe omuyengeli okwa ti kaakiintu: “Inamu tila, oshoka ondi shi kutya otamu kongo Jesus, ngoka a li a alelwa komuti.
6 Ke po mpaka, oshoka okwa yumudhwa, ngaashi owala a tile. Ileni mu tale mpoka a li a langekwa
7 e tamu yi nziya mu ka lombwele aalongwa ye kutya okwa yumudhwa kuusi, oshoka taleni! ote mu tetekele kuGalilea. Oko tamu ke mu mona hoka. Dhimbulukweni shoka nde mu lombwela.”
8 Onkee ano oya zi po nziya pombiladhimbuluko ya tila, ihe oya nyanyukwa unene e taya yi taya matuka, ye ke shi lombwele aalongwa ye.
9 Ihe tala! Jesus okwe ya tsakaneke e te ya popitha ta ti: “Mwa lala po!” Opo nduno oya hedha kuye e taya gumu oompadhi dhe noye mu inyongamene.
10 Opo ihe Jesus okwa ti kuyo: “Inamu tila; indeni mu ka lombwele aamwatate ya ye kuGalilea, naahoka oko taya ka mona ndje.”
11 Sho aakiintu mboka ya li mondjila taya yi, aalangeli yamwe oya yi moshilando e taya lombwele aayambi ashihe shoka sha ningwa po.
12 Konima sho ye shi uvu, oya gongala pamwe naakuluntu yoshigwana ye shi kundathane e taya pe aalangeli mboka iimaliwa yiisiliveli oyindji,
13 noya ti kuyo: “Tyeni, ‘Aalongwa ye oye ya uusiku e taye mu yaka mo manga twa li twa kotha.’
14 Opo nduno ngele ngoloneya okwe shi uvu, otatu ke shi mu yelithila,* noitamu pumbwa okukala mwa tila.”
15 Onkee ano oya taamba iimaliwa yiisiliveli mbyoka e taya ningi ngaashi ya lombwelwa, nehokololo ndyoka olya taandele mokati kAajuda, sigo okesiku ndika.
16 Ihe aalongwa 11 oya yi kuGalilea, kondundu hoka Jesus e ya lombwela a ka tsakanene nayo.
17 Sho ye mu mono, oye mu inyongamene, ihe yamwe oya li ya limbililwa.
18 Jesus okwa hedha kuyo, nokwe ya lombwele ta ti: “Onda pewa oonkondopangelo adhihe megulu nokombanda yevi.
19 Indeni ano, ka ningeni aantu yomiigwana ayihe aalongwa, moku ya ninginitha medhina lyaHe, nolyOmwana, nolyombepo ondjapuki
20 nosho wo moku ya longa iinima ayihe mbyoka nde mu lombwela. Ihe taleni! otandi kala pamwe nane aluhe, sigo omasiku gahugunina guuyuni mbuka.”*
Omanyolo gopevi
^ Eln., otatu ke shi mu itaalitha.
^ Nenge “gonkalelo yiinima yuuyuni mbuka.” Tala Omafatululo giitya.
