paMarkus 11:1-33
11 Sho Jesus naalongwa ye ya li ye li pokuthika muJerusalem, oye ya pOndundu yOoholivi, hoka kwa li omukunda gwaBetfage naBetania, nokwa tumu aalongwa ye yaali
2 e te ya lombwele ta ti: “Indeni komukunda ngoka gu li komeho geni. Nziya, ngele mwa thiki ko, otamu adha ko okasinogona ka mangwa, hoka inaaka kayilwa nando onale komuntu. Ka mangululeni e tamu ka eta huka.
3 Ihe ngele opu na gumwe ngoka te mu pula: ‘Omolwashike tamu ka mangulula mo?’ tyeni: ‘Omuwa okwe ka pumbwa, note ke ka galulila huka nziya.’”
4 Onkee ano oya yi, noya adha okasinogona ka mangelwa posheelo shegumbo, popepi nondjila, noye ka mangulula mo.
5 Ihe aantu yamwe mboka ya li ya thikama mpoka oya ti kuyo: “Otamu ka mangululile mo shike?”
6 Oye ya yamukula ngaashi Jesus e ya lombwele, noye ya etha ya ye.
7 Opo nduno oya eta okasinogona kuJesus, noya yala ko oonguwo dhawo dhokombanda, opo ihe okwa londo kuko.
8 Aantu oyendji oya yala wo oonguwo dhawo dhokombanda mondjila, omanga yakwawo ya tete iitayi yiihwa iitalala mooha dhondjila.
9 Ihe mboka ya li komeho ge nosho wo mboka ya li taya zi konima ye oya kala taya igidha taya ti: “Otatu galikana a hupithwe; na lalekwe nuuyamba ngoka te ya medhina lyaJehova!
10 Na lalekwe nuuyamba ngoka te ya okupangela mUukwaniilwa watate yetu David! Otatu galikana wu mu hupithe, ngoye ngoka wu li pombandambanda!”
11 Sho Jesus a thiki muJerusalem, okwa yi motempeli nokwa tala iinima ayihe, ihe molwaashoka okwa li kwa toka, okwa yi kuBetania naayapostoli ye 12.
12 Opo nduno mesiku lya landula ko, sho ya li taya zi muBetania, Jesus okwa li a sa ondjala.
13 Omanga Jesus e li kokule, okwa mono omukwiyu gu na omafo, nokwa yi kugo a ka tale ngele ota adha ko oonkwiyu. Ihe sho a thiki pugo, ina adha ko sha, kakele owala komafo, oshoka kalya li ethimbo lyoonkwiyu.
14 Onkee ano okwa ti kugwo: “Kaku na we nando ngoka ta li ko iiyimati kungoye.” Aalongwa ye nayo oya li ya uvu shoka a popi.
15 Okuza mpono, oya yi kuJerusalem. Sho ye li hoka, Jesus okwa yi motempeli, nokwa tameke okutidha mo mboka ya li taya landithile mo notaya landa. Okwa undula po wo iitaafula yaapingakanithi yiimaliwa niipundi yaamboka ya li taya landitha oonguti,
16 noina pitika nando omuntu a pitile motempeli, a humbata sha.
17 Okwa li ta longo aantu noku ya lombwela ta ti: ‘Mbela inaku nyolwa nani kutya egumbo lyandje otali ka ithanwa egumbo lyokugalikanena kiigwana ayihe?’ Ihe ne omwe li ninga ekololo lyaayugi.
18 Opo nduno sho aayambi aakuluntu naalongimpango ye shi uvu, oya tameke okupangela ompangela ye mu dhipage; oshoka oya li ye mu tila, molwaashoka ongundu ayihe yaantu oya li ya kuminwa elongo lye.
19 Sho kwa toko, Jesus naalongwa ye oya zi mo moshilando.
20 Ihe ongula onene sho ya li taya piti pomukwiyu ngoka, oya mono kutya ogwa sa nale sigo okomidhi dhagwo.
21 Ihe sho Petrus e gu dhimbulukwa, okwa ti kuJesus: “Muhongi,* tala, omukwiyu ngoka wa thingi ogwa sa.”
22 Jesus okwe ya yamukula a ti: “Kaleni mu na eitaalo muKalunga.
23 Oshili tandi mu lombwele, ngoka ta lombwele ondundu ndjika, ‘Itumba po e to iyumbile mefuta,’ noina limbililwa, ihe oku na eitaalo kutya shoka a popi otashi ningwa, otashi mu ningilwa shili.
24 Onkee ano otandi mu lombwele: Iinima ayihe, mbyoka tamu yi indile nokugalikana mu na eitaalo kutya otamu yi mono, otamu yi pewa.
25 Uuna tamu galikana, dhiminii po kehe ngoka e mu ninga nayi, opo Ho ngoka e li megulu naye wo e mu dhimine po omayono geni.”
26 ——
27 Jesus naalongwa ye oya shuna ishewe kuJerusalem. Ihe sho Jesus a li ta ende motempeli, aayambi aakuluntu, aalongimpango naakuluntu yoshigwana oye ya kuye,
28 noya ti: “Okoonkondo dhalye ho longo iinima mbika? Nenge olye e ku pe oonkondo dhokulonga iinima mbika?”
29 Jesus okwa ti kuyo: “Nangame onda hala wo oku mu pula epulo limwe. Ngele omwa yamukula ndje, opo owala nangame tandi ke mu lombwela kutya okoonkondo dhalye handi longo iinima mbika.
30 Eninginitho, ndyoka lya ningwa kuJohannes, olya za kuKalunga,* nenge olya za kaantu?* Yamukulii ndje!”
31 Opo ihe oya tameke okutompathana mokati kawo taya ti: “Ngele otwa ti, ‘okuKalunga,’* nena ota ti: ‘Omolwashike nduno inaamu mu itaala?’
32 Ongiini ngele otwa tyeni, ‘Okaantu’?” Oya li ya tila ongundu yaantu, oshoka aantu ayehe oya li ya tala ko Johannes kutya okwa li omuhunganeki shili.
33 Onkee ano oya yamukula Jesus ya ti: “Katu shi wo.” Opo ihe Jesus okwa ti kuyo: “Nangame wo itandi mu lombwele kutya okoonkondo dhalye handi longo iinima mbika.”
Omanyolo gopevi
^ Nenge “Rabbi.”
^ Eln., “megulu.”
^ Nenge “olya totwa po kaantu.”
^ Eln., “omegulu.”
