PaLukas 18:1-43
18 Opo nduno Jesus okwa lombwele aalongwa ye ethaneko kombinga yankene sha simana ya kale haya galikana aluhe nokaaya teke omukumo,
2 ta ti: “Moshilando shontumba omwa li omupanguli ihaa tila Kalunga, noina simaneka aantu.
3 Moshilando moka omwa li wo omuselekadhi, ngoka a kala ha yi kuye, ta ti: ‘Shilipaleka kutya onda uthilwa pauyuuki moshipotha, shoka shi li pokati ketu nomutamaneki gwandje.’
4 Uule wethimbo, omupanguli ngoka ka li a hala, ihe konima yethimbo, okwa ipopile ta ti, ‘Nonando ihandi tila Kalunga, noinandi simaneka nando omuntu,
5 otandi shilipaleke kutya omuselekadhi, nguka ha piyaganeke ndje unene, okwa uthilwa pauyuuki, opo kaa kale we te ya kungame, a kenyaneke ndje.’”
6 Opo ihe Omuwa okwa ti: “Ndhindhilikeni shoka omupanguli ngoka a ti, nonando ke shi omuyuuki.
7 Onkee ano mbela Kalunga ita ka ningitha aahogololwa ye, mboka haye mu ithana omutenya nuusiku, ya uthilwe pauyuuki noku ya idhidhimikila?
8 Ngame otandi mu lombwele, ota ka ningitha ya uthilwe pauyuuki meendelelo. Nonando ongawo, sho Omuna gwomuntu te ke ya, mbela kombanda yevi ota ka adha ko ngaa aantu ye na eitaalo lyashili?”*
9 Okwa lombwele wo yamwe, mboka ya li yi ishi uuyuuki, noya dhina yakwawo, ethaneko tali ti:
10 “Aalumentu yaali oya yi motempeli ya ka galikane. Gumwe Omufarisayi, nagulwe omufendelithi.
11 Omufarisayi okwa thikama e ta tameke okugalikana ta ipopi ta ti: ‘Kalunga, otandi ku pandula sho inaandi fa aantu yamwe, ngaashi aayugi, aakaanuuyuuki, aahondeli, nokuli naasho inaandi fa omufendelithi nguka.
12 Ohandi idhilike iikulya lwaali moshiwike; ohandi gandja oshitimulongo shiinima ayihe, mbyoka nda likola.’
13 Ihe omufendelithi, ngoka a li a thikama kokule naye, ka li nokuli ta vulu okuligamena kegulu, ihe okwa kala ta idhenge montulo ta ti: ‘Kalunga, sila ndje ohenda, oshoka ngame omulunde.’
14 Ngame otandi mu lombwele, omulumentu nguka okwa shuna kegumbo omuyuuki momeho gaKalunga e vule Omufarisayi. Oshoka kehe ngoka ta inenepeke ota ka shonopekwa, ihe ngoka ta ishonopeke ota ka nenepekwa.”
15 Aantu oya li taya eta wo uuhanona wawo kuJesus, e wu gume,* ihe sho aalongwa ye shi mono, oya tameke oku ya keelela.
16 Ihe Jesus okwa ithana uuhanona kuye ta ti: “Etheni aanona ye ye kungame, inamu ya keelela ko, oshoka Uukwaniilwa waKalunga owaamboka ye ya fa.
17 Oshili tandi mu lombwele, kehe ngoka itaa taamba ko Uukwaniilwa waKalunga ongokanona, ita ka ya mo muwo.”
18 Opo nduno gumwe gwomaapangeli okwe mu pula ta ti: “Muhongi omwaanawa, ondi na okuninga shike, opo ndi ka mone omwenyo gwaaluhe?”
19 Jesus okwa ti kuye: “Omolwashike to ithana ndje Muhongi omwaanawa? Kaku na ngoka omwaanawa, kakele kuKalunga awike.
20 Iipango owu yi shi: ‘Ino hondela, ino dhipaga, ino yaka, ino fundja, simaneka ho nanyoko.’”
21 Opo nduno omupangeli ngoka okwa ti: “Iinima ayihe mbyoka onda kala tandi vulika kuyo okuza kuugundjuka wandje.”
22 Sho Jesus e shi uvu, okwa ti kuye: “Opu na ishewe oshinima shimwe, shoka wa pumbwa okuninga. Ka landithe po iinima yoye ayihe, iimaliwa e to yi pe oohepele, noto kala wu na eliko megulu, opo nduno to ya wu landule ndje.”
23 Sho omupangeli ngoka e shi uvu, okwa tameke okukala a nika oluhodhi unene, oshoka okwa li omuyamba lela.
24 Jesus okwa tala kuye, nokwa ti: “Kashi shi tuu oshidhigu kwaamboka aayamba okuya mUukwaniilwa waKalunga!
25 Odhoshili kutya oshipu kongamelo okupita meyulu lyonane shi vulithe okuya kwomulumentu omuyamba mUukwaniilwa waKalunga.”
26 Mboka ye shi uvu oya ti: “Olye ano nduno ta vulu okuhupithwa?”
27 Okwa ti: “Shoka aantu ya tala ko itaashi wapa okuningwa itashi nyenge Kalunga.”
28 Ihe Petrus okwa ti: “Tala, otwa thiga po iinima yetu e tatu ku landula.”
29 Jesus okwa ti kuyo: “Oshili tandi mu lombwele, kapu na ngoka a thiga po egumbo lye, nenge omukulukadhi gwe, nenge aamwayinamati, nenge aavali ye, nenge oyana, omolwUukwaniilwa waKalunga,
30 ta kala ando inaa mona oshindji ngashingeyi, nomuuyuni tawu ya,* omwenyo gwaaluhe.”
31 Opo nduno Jesus okwa ithana po aalongwa ye 12, nokwa ti kuyo: “Taleni, otatu yeni kuJerusalem, niinima ayihe, mbyoka ya nyolwa kaahunganeki kombinga yOmuna gwomuntu, otayi ka gwanithwa.
32 Pashiholelwa, ota ka gandjwa miikaha yaantu yomiigwana, ta ka shekwa, ta ka ungaungiwa naye nonyanya, nokuhiyilwa omayeye.
33 Opo ihe konima ngele ye mu dhenge noongola, otaye ke mu dhipaga, ihe mesiku etitatu, ota ka yumudhwa.”
34 Ihe aayapostoli kaya li ye uvite ko eityo lyoohapu ndhoka, oshoka oya li ye li holekwa.
35 Sho Jesus a li e li pokuthika muJeriko, omulumentu gumwe omuposi okwa li a kuutumba pooha dhondjila ta hehela.
36 Sho a uvu ongundu yaantu tayi ende po, okwa tameke okupula kutya oshike tashi ningwa po.
37 Aantu oye mu lombwele ya ti: “OJesus Omunasareti ta ende po!”
38 Opo nduno okwa igidha ta ti: “Jesus, Omuna gwaDavid, sila ndje ohenda!”
39 Opo ihe aantu, mboka ya li komeho ge, oye mu ganda a kale a mwena, ihe okwa tsikile owala ta igidha ta ti: “Omuna gwaDavid, sila ndje ohenda!”
40 Onkee ano Jesus okwa thikama e ta lombwele aantu ya ete omulumentu ngoka kuye. Sho a thiki puye, Jesus okwe mu pula ta ti:
41 “Owa hala ndi ku ningile shike?” Okwa ti: “Omuwa, tsikulula ndje.”
42 Onkee ano Jesus okwa ti kuye: “Tsikuluka! Eitaalo lyoye olye ku aludha.”
43 Nziya, omeho ge oga tsikuluka, nokwa tameke oku mu landula ta hambelele Kalunga. Shimwe ishewe, sho aantu ayehe ye shi mono, oya tameke okutanga Kalunga.
Omanyolo gopevi
^ Nenge “eitaalo lya fa ndika.”
^ Sha hala okutya, e wu yambeke.
^ Eln., “nomonkalelo yiinima yuuyuni tawu ya.” Tala Omafatululo giitya.
