PaLukas 14:1-35
-
Omulumentu ngoka e na oshizinda a aludhwa mEsabati (1-6)
-
Kala omuyenda omwiishonopeki (7-11)
-
Hiya mboka itaaya vulu oku ku galulila sha (12-14)
-
Ethaneko kombinga yaahiywa mboka ya tindi okuya (15-24)
-
Shoka tu na okuninga opo tu ninge aalongwa yaJesus (25-33)
-
Omongwa ngoka gwa kanitha omulyo (34, 35)
14 Pompito yilwe, Jesus okwa li ta li megumbo lyagumwe gwomaawiliki yAafarisayi mesiku lyEsabati, naamboka ya li mo oya li ye mu tala taye mu konenene.
2 Ihe tala, omulumentu gumwe e na oshizinda okwa li a thikama komeho gaJesus.
3 Onkee ano Jesus okwa pula mboka ye shi Ompango nawa nosho wo Aafarisayi, ta ti: “Osha pitikwa ngaa pampango okwaaludha mEsabati?”
4 Ihe oya kala owala ya mwena. Opo ihe Jesus okwa gumu omulumentu ngoka e te mu aludha, nokwe mu laleke a ye.
5 Opo nduno okwa ti kuyo: “Olye gwomune, ngele omwanamati, nenge ongombe ye ya gwile mondungu mesiku lyEsabati, itee ke yi hila mo nziya?”
6 Ihe oya li ya nyengwa oku mu yamukula.
7 Okuza mpono, sho Jesus a mono aalumentu, mboka ya hiywa, taya ihogololele iipundi yokomeho, okwe ya lombwele* ta ti:
8 Uuna gumwe e ku hiya koshituthihango, ino kuutumba kiipundi yokomeho, oshoka otashi vulika gumwe, ngoka a simana e ku vule, naye a hiywa,
9 naangoka e mu hiya kee ye kungoye ta ti: ‘Oshipundi shika oshomulumentu nguka,’ e to zi po wu ka kuutumbe kiipundi yokonima wa sa ohoni.
10 Ihe uuna wa hiywa, inda wu ka kuutumbe kiipundi yokonima, opo uuna ngoka e ku hiya ngele e ya, e ku lombwele ta ti: ‘Kuume kandje, inda wu ka kuutumbe kiipundi yokomeho,’ naashoka otashi ke ku simanekitha montaneho yaayenda ooyakweni ayehe.
11 Oshoka kehe ngoka ta inenepeke ota ka shonopekwa, nakehe ngoka ta ishonopeke ota ka nenepekwa.”
12 Jesus okwa lombwele ishewe omulumentu, ngoka e mu hiya, a ti: “Uuna to hiya yamwe komwiha, nenge kuulalelo, ino hiya ookuume koye, nenge aamwanyoko aalumentu, nenge aakwanezimo yoye, nenge aashiinda shoye, mboka aayamba, oshoka ngele owa ningi ngawo, nayo otashi vulika ye ke ku hiye mu ka lye pamwe nayo, naashoka otashi ka kala ongofuto kungoye.
13 Ihe uuna to ningi oshituthi, hiya oohepele, iitiningili, iilema naaposi.
14 Opo nduno oto ka kala wa nyanyukwa, oshoka kaye na sha shoku ku pa, noto ka mona ondjambi, uuna aayuuki taya ka yumudhwa.”
15 Sho gumwe gwomaayenda e shi uvu, okwa ti kuJesus: “Ngoka ta li* mUukwaniilwa waKalunga okwa nyanyukwa.”
16 Opo nduno Jesus okwa ti kuye: “Opwa li pu na omulumentu, ngoka a li ta longekidha oshituthi oshinene, nokwa li a hiya aantu oyendji.
17 Ethimbo lyoshituthi sho lya thiki, okwa lombwele omupiya gwe a ka lombwele mboka ya hiywa ta ti: ‘Ileni, oshoka ayihe oya pwa nale okulongekidhwa.’
18 Ihe ayehe oya tameke okuninga omaipopilo. Gwotango okwa ti kuye, ‘Onda landa epya, nonda pumbwa okuya ndi ke li tale. Ombili, itandi vulu okuya.’
19 Opo nduno gulwe okwa ti: ‘Onda landa oonani omulongo,* notandi yi ndi ke dhi tale, nkene tadhi longo. Ombili, itandi vulu okuya.’
20 Mukwawo ishewe okwa ti: ‘Opo owala nda hokana, onkee itandi vulu okuya.’
21 Onkee ano omupiya ngoka okwe ya e ta hokololele mwene gwe iinima mbyoka. Opo nduno mwene gwegumbo okwa geye, nokwa lombwele omupiya gwe ta ti: ‘Endelela wu ye komapandaanda nokoondjila dhoshilando e to eta oohepele, iitiningili, aaposi niilema.’
22 Sho omupiya a galuka, okwa ti: ‘Onda ningi ngaashi wa lombwele ndje, ihe natango megumbo omu na ehala.’
23 Onkee ano mwene gwomupiya ngoka okwa ti: ‘Inda koondjila nokomapola e to indile aantu ye ye, opo megumbo lyandje mu kale mwa udha.
24 Oshoka ngame otandi mu lombwele, kapu na nando ogumwe gwomaalumentu, mboka nda hiyile, ta ka makela iikulya yandje.’”
25 Ongundu onene yaantu oya li molweendo pamwe naJesus, nokwa piluka e ta ti kuyo:
26 “Ngele opu na ngoka a hala okuninga omulongwa gwandje, oku na okukala e hole ndje shi vulithe he, yina, omukulukadhi gwe, oyana, aamwayinamati, aamwayinakadhona, eeno, nokuli nomwenyo gwe. Ngele hasho, ita vulu okuninga omulongwa gwandje.
27 Kehe ngoka itaa humbata omuti gwe gwomahepeko* e ta landula ndje, ita vulu okuninga omulongwa gwandje.
28 Pashiholelwa, olye gwomune, uuna a hala okutunga oshungo, itaa kuutumba tango, a yalule kutya otayi pula shi thike peni e ta tala ngele oku na iitungitho* ya gwana, opo e yi tunge, sigo ya pu?
29 Ngele hasho, otashi vulika a tunge ekankameno lyayo, ihe e ta nyengwa oku yi mana, naantu ayehe, mboka taye shi mono, otaya ka tameka oku mu sheka,
30 taya ti: ‘Omulumentu nguka okwa tameke okutunga, ihe ina vula okumana.’
31 Nenge ngele omukwaniilwa okwa hala oku ka kondjitha omukwaniilwa omukwawo, mbela ita kuutumba tango e ta kundathana naagandjimayele ye, ngele ota vulu ngaa okuya kiita naakwiita 10 000, opo a sinde omukwaniilwa, ngoka te ya naakwiita 20 000?
32 Ihe ngele ita vulu oku mu sinda, ota tumu aakalelipo ye komukwaniilwa ngoka manga e li kokule, opo ya pange ombili.
33 Sha faathana, ngele opu na ngoka a hala okuninga omulongwa gwandje, na thige po iinima ye ayihe.
34 “Omongwa omwaanawa; ihe ngele ogwa kanitha omulyo,* otagu toyalekwa we nashike?
35 Aantu ohaye gu ekelehi, oshoka itagu vulu we okuvundakanithwa mumwe nevi, nenge nuuhoho. Ngoka e na omakutsi, na uve ko.”
Omanyolo gopevi
^ Eln., “okwe ya lombwele ethaneko.”
^ Eln., “ta li oshikwiila.”
^ Eln., “oondjoko ntano dhoongombe.”
^ Tala Omafatululo giitya.
^ Nenge “iimaliwa.”
^ Nenge “gwa hakuka.”
