PaJohannes 9:1-41
9 Sho Jesus a li ta ende, okwa mono omulumentu a valwa omuposi.
2 Opo nduno aalongwa ye oye mu pula taya ti: “Muhongi,* olye a yona, sho omulumentu nguka a valwa omuposi? Oye, nenge aavali ye?”
3 Jesus okwa yamukula ta ti: “Omulumentu nguka, nenge aavali ye inaya yona, ihe shika osha ningwa, opo oonkondo* dhaKalunga dhi hololwe okupitila muye.”
4 Otu na okulonga iilonga yaangoka a tuma ndje, manga omutenya. Oshoka ngele uusiku owe ya, kapu na omuntu ta vulu okulonga sha.
5 Manga ndi li muuyuni, ongame uuyelele wuuyuni.”
6 Konima sho Jesus a popi oohapu ndhoka, okwa hiyile omayeye pevi, nokwe ga lungile mumwe nevi e ta gwayeke enono ndyoka pomeho gomulumentu ngoka,
7 nokwa ti kuye: “Inda wu ka iyoge mondama yaSiloa” (shoka tashi ti, “Omeya taga fuluka okuza mevi”). Opo nduno okwa yi e ta ka iyoga nokwa zi ko e wete ko.
8 Nena aashiinda she naamboka ya li haye mu mono ta hehela oya tameke taya ti: “Omulumentu nguka haye a li ha kala a kuutumba ta hehela?”
9 Yamwe oya li taya ti: “Oye.” Omanga yalwe ya li taya ti: “Aawe, ota monika owala e mu fa.” Ihe omulumentu ngoka okwa kala ta ti: “Ongame.”
10 Onkee ano oye mu pula taya ti: “Owa tsikuluka nduno ngiini?”
11 Okwe ya yamukula ta ti: “Omulumentu gumwe, ha ithanwa Jesus, okwa lungile omayeye mumwe nevi e ta gwayeke enono ndyoka pomeho gandje, nokwa lombwele ndje ta ti: ‘Inda kuSiloa, wu ka iyoge.’ Onkee ano onda yi e tandi iyogo, nonda tsikuluka.”
12 Opo ihe oya ti kuye: “Omulumentu ngoka oku li peni?” Okwa ti: “Kandi shi wo.”
13 Opo nduno oya fala omulumentu, ngoka a li nale omuposi, kAafarisayi.
14 Esiku ndyoka, Jesus a lungu enono e ta tsikulula omeho gomulumentu ngoka, olya li Esabati.
15 Onkee ano Aafarisayi nayo oya tameke oku mu pula kutya osha ende ngiini, opo a tsikuluke. Okwa ti kuyo: “Okwa gwayeke ndje enono pomeho e tandi iyogo, nongashingeyi ondi wete ko.”
16 Nena Aafarisayi yamwe oya tameke taya ti: “Omulumentu ngoka ina za kuKalunga, oshoka iha dhiginine Esabati.” Yalwe oya ti: “Omulumentu omulunde ota vulu ngiini okulonga iikumithalonga ya tya ngaaka?” Onkee ano mokati kawo omwa holoka etopoko.
17 Natango, oya pula omulumentu ngoka a li omuposi ya ti: “Ngoye oto ti ngiini kombinga ye, sho e ku tsikulula?” Omulumentu ngoka okwa ti: “Oye omuhunganeki.”
18 Nonando ongawo, Aajuda kaya li ya itaala kutya omulumentu ngoka okwa li omuposi nokwa tsikuluka, sigo oosho ya ithana aavali yomulumentu ngoka e wete ko ngashingeyi.
19 Opo nduno oye ya pula taya ti: “Nguka oye omwanamati gweni, ngoka tamu ti okwa valwa omuposi? Osha ende ngiini, opo ngashingeyi a kale e wete ko?”
20 Aavali ye oye ya yamukula ya ti: “Odhoshili kutya nguka omwana gwetu, nokwa valwa omuposi.
21 Ihe katu shi kutya osha ende ngiini, opo ngashingeyi a kale e wete ko, nenge kutya olye e mu tsikulula. Mu puleni ne yene. Ye omukuluntu, nota vulu okupopya ye mwene.”
22 Aavali ye oya popi ngaaka, molwaashoka oya li ya tila Aajuda, oshoka Aajuda oya adhika ya uvathana kutya kehe ngoka ta ti Jesus oye Kristus oku na okukondwa mo mosinagoga.
23 Shoka osho sha ningitha aavali ye ya tye: “Ye omukuluntu, mu puleni ye mwene.”
24 Onkee ano oya ithana omulumentu ngoka omuposi oshikando oshitiyali, noya ti kuye: “Popya oshili koshipala shaKalunga;* otu shi kutya omulumentu nguka omulunde.”
25 Okwe ya yamukula ta ti: “Kandi shi wo ngele omulumentu ngoka omulunde. Shoka ndi shi osho kutya onda li omuposi, ihe ngashingeyi ondi wete ko.”
26 Opo nduno oya ti kuye: “Okwe ku ningi shike? Okwe ku tsikulula ngiini?”
27 Okwe ya yamukula ta ti: “Onde mu lombwela nale, ihe inamu hala okupulakena. Omolwashike ishewe mwa hala oku shi uva? Ano nane omwa hala okuninga aalongwa ye?”
28 Opo ihe oye mu lombwele ye mu sa uunye taya ti: “Ngoye omulongwa gwomulumentu ngoka, ihe tse aalongwa yaMoses.
29 Tse otu shi shi kutya Kalunga okwa popile naMoses, ihe katu shi kutya omulumentu nguka okwa za peni.”
30 Omulumentu ngoka okwe ya yamukula ta ti: “Oshikumithi shili sho kaamu shi kutya omulumentu ngoka okwa za peni, ihe okwa tsikulula ndje.
31 Otu shi shi kutya Kalunga iha pulakene kaalunde, ihe kehe ngoka he mu tila noha longo ehalo lye, ote mu uvu.
32 Okuza konalenale, inatu uva nando omuntu a tsikulula omuntu a valwa omuposi.
33 Andola omulumentu ngoka okwa li inaa za kuKalunga, ando ke na shoka ta vulu okuninga.”
34 Oye mu yamukula ya ti: “Ngoye owa valelwa lela muulunde, ihe owa hala oku tu longa? Opo nduno oye mu umbu mo mosinagoga.”
35 Jesus okwa uvu kutya oye mu umbu mo mosinagoga, naasho e mu mono, okwa ti kuye: “Owu na ngaa eitaalo mOmuna gwomuntu?”
36 Omulumentu ngoka okwe mu yamukula ta ti: “Omusimanekwa, Omuna gwomuntu olye, opo ndi mu itaale?”
37 Jesus okwa ti kuye: “Owe mu mona, nokuli oye nguka ta popi nangoye.”
38 Okwa ti kuye: “Omuwa, onde mu itaala.” Opo nduno okwe mu inyongamene.*
39 Jesus okwa ti: “Onde ya muuyuni mbuka, opo uuyuni wu pangulwe; opo mboka kaaye wete ko ya vule okumona ko, naamboka ye wete ko ya ninge aaposi.”
40 Sho Aafarisayi, mboka ya li puye, ya uvu oohapu ndhoka, oye mu pula ya ti: “Mbela natse aaposi?”
41 Jesus okwa ti kuyo: “Andola ne omwa li aaposi, ando kamu na ondjo yasha, ihe ngashingeyi otamu ti: ‘Otu wete ko.’ Onkee ano oondjo dheni itadhi dhimwa po.”
Omanyolo gopevi
^ Nenge “Rabbi.”
^ Eln., “iilonga.”
^ Eln., “simaneka Kalunga.”
^ Nenge “okwe mu tsile oongolo.”
