Iilonga yaayapostoli 8:1-40
8 Saulus okwa li a panda okudhipagwa kwaStefanus.
Okuza esiku ndyoka, egongalo lyomuJerusalem olya kala tali hepekwa noonkondo. Kakele owala kaayapostoli, aalongwa ayehe oya li ya ihanena moshitopolwa shaJudea noshaSamaria.
2 Nena aalumentu aatilikalunga oya kutha po omudhimba gwaStefanus, ye ke gu fumvike, noya li ye mu lili noonkondo.
3 Ihe Saulus okwa tameke okuponokela egongalo nonyanya. Okwa li ha ponokele momagumbo gawo, ta kookolola mo aalumentu naakiintu, noku ya tulitha mondholongo.
4 Nonando ongawo, aalongwa, mboka ya li ya ihanena moshitopolwa shaJudea noshaSamaria, oya kala taya uvitha onkundana ombwanawa yoohapu dhaKalunga miitopolwa moka.
5 Nena Filippus okwa yi moshilando shomuSamaria, nokwa tameke okuuvithila aantu kombinga yaKristus.
6 Oongundu dhaantu odha li tadhi gandja eitulomo kwaashoka Filippus ta popi, nodha li tadhi tala kiikumithalonga, mbyoka ta longo.
7 Oyendji oya li ye na oombepo dha nyata, nodha li hadhi igidha mokule e tadhi zi mo muyo. Kakele kaashono, oyendji, mboka ya sa ombanda nosho wo iilema, oya li ya aludhwa.
8 Onkee ano moshilando shoka omwa li enyanyu enene.
9 Moshilando shoka omwa li omulumentu gwedhina Simon, ngoka ha kumitha Aasamaria nuumpulile we, nokwa li wo ha ti kutya ye omuntu a simana.
10 Aantu ayehe, aanenentu naadhinwa oya li haya gandja eitulomo kuye, nohaya ti: “Omulumentu nguka oku na oonkondo oonene dha za kuKalunga.”
11 Onkee ano oya kala haya gandja eitulomo kuye, molwaashoka okwa kala he ya kumitha nuumpulile we uule wethimbo.
12 Ihe sho ya itaale shoka Filippus a ti, ngoka a li te ya uvithile onkundana ombwanawa yUukwaniilwa waKalunga nosho wo kombinga yedhina lyaJesus Kristus, aalumentu naakiintu oya ninginithwa.
13 Simon naye okwa ningi omwiitaali, nokonima sho a ninginithwa, okwa kala pamwe naFilippus. Okwa li a kuminwa iikumithalonga niilongankondo, mbyoka a mono Filippus ta longo.
14 Sho aayapostoli, mboka ya li muJerusalem, ya uvu kutya Aasamaria oya taamba ko oohapu dhaKalunga, oya tumu kuyo Petrus naJohannes;
15 naasho Petrus naJohannes ya yi kuyo, oye ya galikanene, ya pewe ombepo ondjapuki.
16 Oshoka kapwa li nando ogumwe gwomuyo ngoka e yi pewa, ihe oya li owala ya ninginithwa medhina lyOmuwa Jesus.
17 Opo nduno Petrus naJohannes oye ya tenteke iikaha yawo e taya pewa ombepo ondjapuki.
18 Sho Simon a mono kutya aantu oya pewa ombepo ondjapuki, sho ya tentekwa iikaha kaayapostoli, okwa li a hala okupa aayapostoli iimaliwa,
19 ta ti: “Nangame pii ndje wo oonkondo ndhoka, opo kehe, ngoka tandi ka tenteka iikaha yandje, a pewe ombepo ondjapuki.”
20 Ihe Petrus okwa ti kuye: “Iimaliwa* yoye nayi hanagulwe po pamwe nangoye, oshoka oto dhiladhila kutya oto vulu okulanda omagano gaKalunga niimaliwa.
21 Moshinima shika, ku na mo ombinga, noito pewa sha, oshoka omutima gwoye inagu uka koshipala shaKalunga.
22 Onkee ano igaluluka kuuwinayi woye e to indile Jehova, ngele otashi vulika, e ku dhimine po omolwomadhiladhilo omawinayi gomomutima gwoye.
23 Oshoka ondi wete kutya ngoye uuzigo uululu,* nowu li omupika gwuulunde.”
24 Simon okwa ti kuyo: “Galikanenii ndje kuJehova, opo kaandi ningilwe nando oshimwe shomiinima mbyoka mwa popi.”
25 Ano sho ya popi oohapu dhaJehova, noya gandja uumbangi nawanawa, oya shuna kuJerusalem, noya ende taya uvitha onkundana ombwanawa momikunda odhindji dhomuSamaria.
26 Ihe omuyengeli gwaJehova okwa lombwele Filippus ta ti: “Thikama, e to yi kondjila yokuumbugantu, ndjoka ya za kuJerusalem ya uka kuGaza.” (Ondjila ndjoka oya enda mombuga.)
27 Opo ihe Filippus okwa thikama, nokwa yi. Ihe tala, elenga* lyokuEtiopia, ndyoka lya li li na ondondo ya simana mepangelo lyaKandake, omukwaniilwakiintu gwaEtiopia, nohali tonatele eliko lye alihe, olya li lya ya kuJerusalem li ka longele* Kalunga,
28 naasho lya li tali shuna kegumbo, olya kuutumba metemba lyalyo, tali lesha mokule oohapu dhomuhunganeki Jesaja.
29 Onkee ano Kalunga okwa lombwele Filippus okupitila mombepo ye ondjapuki ta ti: “Inda popepi netemba ndyoka.”
30 Opo nduno Filippus okwa matukile ko, nokwa uvu elenga tali lesha muule oohapu dhomuhunganeki Jesaja e ta ti kulyo: “Owu uvite ko ngaa shili shoka to lesha?”
31 Elenga olya ti: “Otandi vulu ngiini oku shi uva ko, ngele kapu na ngoka ta yelithile ndje?” Opo ihe olya lombwele Filippus a londe, a kuutumbe pulyo.
32 Olya li tali lesha oshitopolwa shenyolo ndyoka tali ti: “Okwa li a fa onzi, tayi falwa yi ka dhipagwe, noina makula nando okana kwe, ngaashi owala onzi hayi kala ya mwena, uuna tayi kululwa.
33 Inaya ungaunga naye pauyuuki pethimbo a li ta shekwa. Ihe molwaashoka ota ka dhipagwa, olye ta ka popya kombinga yonakuziwa ye?”
34 Opo nduno elenga* olya pula Filippus tali ti: “Lombwela ndje, omuhunganeki nguka ota popi kombinga yalye? Okombinga ye mwene, nenge okombinga yagulwe i ili?”
35 Filippus okwa tameke okuuvithila elenga ndyoka onkundana ombwanawa kombinga yaJesus, ta longitha enyolo ndyoka.
36 Manga ye li mondjila taya yi, oye ya pehala pu na omeya, nelenga olya ti: “Tala, omeya ogo ngaka, oshike tashi imbi ndje ndi ninginithwe?”
37 ——
38 Elenga olya gandja elombwelo, etemba li thikame, lyo naFilippus e taya zi mo, noya yi momeya, Filippus e te li ninginitha.
39 Sho ya zi mo momeya, ombepo yaJehova oya kutha po Filippus nziya, nelenga kalya li we li mu wete, ihe olya tsikile nondjila yalyo lya nyanyukwa.
40 Filippus okwa ka iyadha kuAsdod, nokwa tsikile okuuvitha onkundana ombwanawa miilando ayihe, sigo okuKesarea.
Omanyolo gopevi
^ Nenge “oshisiliveli.”
^ Eln., “onyango ondulu.”
^ Nenge “omuthonwantu.”
^ Nenge “galikane.”
^ Nenge “omuthonwantu.”
