Iilonga yaayapostoli 16:1-40
16 Sho Paulus a yi kuDerbe nosho wo kuListra, okwa adha ko omulongwa gwedhina Timoteus, a valwa komukiintu omwiitaali Omujuda, ihe he Omugreka.
2 Aamwatate yomuListra noyomuIkonium oya li taya popile Timoteus muuwanawa.
3 Paulus okwa li a halelela okuya pamwe naTimoteus, nokwa yi pamwe naye e te ke mu kenkitha omolwAajuda yomiilando mbyoka, oshoka ayehe oya li ye shi kutya he Omugreka.
4 Sho ya li taya ende niilando, oya lombwele aamwatate ya dhiginine shoka sha tokolwa kaayapostoli nokaakuluntugongalo muJerusalem.
5 Opo nduno omagongalo oga tsikile nokukolekwa meitaalo, nomwaalu gwooitaali ogwa ende tagu indjipala esiku nesiku.
6 Kakele kaashono, oya piti muFrigia nomuGalatia, molwaashoka ombepo ondjapuki oye ya keelele, kaaya uvithe oohapu dhaKalunga moshitopolwalongo shaAsia.
7 Sho ye ya muMisia, oya ningi oonkambadhala ya ye kuBitinia, ihe ombepo yaJesus oye ya keelele ko.*
8 Onkee ano oya piti muMisia ya uka kuTroas.
9 Uusiku, Paulus okwa mono memoniko omulumentu Omumakedonia, a thikama komeho ge, te mu indile ta ti: “Taagulukila muMakedonia, wu tu kwathele!”
10 Nziya, sho Paulus a mono emoniko ndyoka, otwa kambadhala okuya kuMakedonia, oshoka otwa li tatu dhiladhila kutya Kalunga oye te tu tumu, tu ke ya uvithile onkundana ombwanawa.
11 Onkee ano okuza muTroas, otwa yi nosikepa twa ukilila kuSamotrake, ihe esiku lya landula ko, otwa yi kuNeapolis;
12 nokuza hoka otwa yi kuFilippi, oshilando sha simanenena shomuMakedonia, shoka sha li kohi yepangelo lyaRoma. Moshilando moka, otwa kala mo uule womasiku gontumba.
13 Opo ihe otwa zi mo mesiku lyEsabati twa uka komulonga, hoka twa li tatu dhiladhila kutya oku na ehala lyokugalikanena, notwa kuutumba e tatu tameke okupopya naakiintu, mboka ya li ya gongala mpoka.
14 Opo nduno omukiintu gwedhina Lidia, a za koshilando shedhina Tiatira, ngoka a li ha landitha oonguwo oontiliganembwilili, noha longele Kalunga, okwa li a pulakena, na Jehova okwa patulula omutima gwe, opo a gandje eitulomo kwaashoka Paulus a li ta popi.
15 Sho Lidia a ninginithwa pamwe naanegumbo lye, okwe tu indile ta ti: “Ngele omu wete kutya ngame omudhiginini kuJehova, ileni, mú ka kale megumbo lyandje.” Opo nduno okwe tu ningitha tu ye kaandjawo.
16 Esiku limwe, manga twa li tatu yi kehala lyokugalikanena, otwa tsakanekwa komukadhona omupiya, ngoka a li e na ombepo ya nyata, ano ondemoni, ndjoka ya li hayi mu ningitha a anekele. Okwa li ha likolele ooyene ye oshimaliwa oshindji mokuninga ngawo.*
17 Omukadhona ngoka okwa kala te tu landula ta igidha ta ti: “Aalumentu mbaka aapiya yaKalunga Omukombandambanda, notaye mú uvithile nkene tamu vulu okuhupithwa.”
18 Okwa kala te shi ningi uule womasiku ogendji. Hugunina, oshinima shoka osha vulitha Paulus e ta punguluka, nokwa lombwele ondemoni ta ti: “Otandi ku lombwele medhina lyaJesus Kristus, za mo muye!” Nena ondemoni oya zi mo muye pethimbo olyo tuu ndyoka.
19 Sho ooyene ye ya mono kutya ita vulu we oku ya likolela oshimaliwa, oya kwata Paulus naSilas e taye ya kookololele komahala gomalandithilo, kwaamboka ye na oonkondopangelo.
20 Sho ye ya fala kaapangeli, oya ti: “Aalumentu mbaka, Aajuda, otaya piyaganeke oshilando shetu unene,
21 notaya longo aantu omikalo dhontumba, ndhoka inaatu pitikwa pampango, tu taambe ko, nenge tu landule, nonando oye shi kutya tse Aaroma.”
22 Opo nduno ongundu yaantu oya ungaunga nayo nonyanya, nokonima sho aapangeli ya tuulitha oonguwo dhawo, oya gandja elombwelo ya dhengwe noongola.
23 Konima sho ye ya dhenge nayi noonkondo, oye ya tula mondholongo, noya lombwele omulangeli gwondholongo e ya tonatele nawa.
24 Sho a lombwelwa ngawo, okwe ya edhilile mokandunda ke li meni lyondholongo, nokwa tula oompadhi dhawo meti.
25 Ihe mokati kuusiku, Paulus naSilas oya li taya galikana, notaya imbile Kalunga omaimbilohambelelo, naanandholongo oya li ya pulakena kuyo.
26 Ohaluka, opwa ningwa ekakamo lyevi enene, nolya kakamitha omakankameno gondholongo. Opo nduno nziya, omiyelo adhihe dhondholongo odha eguluka, nomalyenge gaanandholongo ayehe oga manguluka.
27 Sho omulangeli gwondholongo a penduka, okwa mono kutya omiyelo dhondholongo odha eguluka, nokwa pweya mo egongamwele lye, opo andola a idhipage, ta dhiladhila kutya aanandholongo ayehe oya iyaka mo.
28 Ihe Paulus okwa igidha a ti: “Ino iningila uuwinayi washa, oshoka atuhe omo tu li!”
29 Onkee ano omulangeli okwa pula a pewe oolamba e ta endelele, a ye mo, nokwa tsu oongolo komeho gaPaulus naSilas ta kakama.
30 Opo ihe okwe ya pititha mo, nokwa ti kuyo: “Aasimanekwa, ondi na okuninga shike, opo ndi hupithwe?”
31 Oye mu yamukula ya ti: “Itaala mOmuwa Jesus, opo wu hupithwe pamwe naanegumbo lyoye.”
32 Opo nduno oye mu uvithile oohapu dhaJehova pamwe naanegumbo lye ayehe.
33 Nena omulangeli okwa yi nayo uusiku owo tuu mboka, nokwa yogo iilalo yawo. Okuza mpono, ye naanegumbo lye ayehe oya ninginithwa nopwaa na okukakadhala.
34 Konima yaashoka, okwa fala Paulus naSilas kegumbo lye e te ya longekidhile iikulya, nokwa li a nyanyukwa noonkondo pamwe naanegumbo lye ayehe, sho ngashingeyi a itaala muKalunga.
35 Sho kwa shi, aapangeli oya tumu aambala* ya ka lombwele omulangeli gwondholongo taya ti: “Aalumentu mboka ya mangululii mo.”
36 Omulangeli gwondholongo okwa lombwele Paulus oohapu ndhoka, ta ti: “Aapangeli oya tuma aalumentu yamwe kungame, opo ne yaali ndi mú mangulule. Onkee ano pitii mo ngashingeyi, mú ye nombili.”
37 Ihe Paulus okwa ti kuyo: “Oye tu dhengitha montaneho yaantu inaaye tu pangula, nonando tse Aaroma, noye tu tulitha mondholongo. Omolwashike ngashingeyi ya hala oku tu mangulula mo meholamo? Aawe, itashi vulika nando! Naye ye yo yene ye tu pitithe mo.”
38 Aambala* oya yi ya ka lombwele aapangeli oohapu ndhoka. Opo nduno oya tila, sho ya uvu kutya Paulus naSilas Aaroma.
39 Onkee ano oya yi kuyo e taye ya pe ombili, nokonima sho ye ya pititha mo, oye ya lombwele ya ze mo moshilando.
40 Sho ya zi mo mondholongo, oya yi kegumbo lyaLidia; opo ihe sho ya mono aamwahe, oye ya tsu omukumo e taya yi.
Omanyolo gopevi
^ Sha hala okutya, Jesus okwe ya keelele ko okupitila mombepo ondjapuki.
^ Nenge “mokuhunganeka onakuyiwa.”
^ Nenge “aanambelewa.”
^ Nenge “aanambelewa.”
