KAagalati 6:1-18
6 Aamwatate, ngele gumwe okwa katuka kaashi li pandunge inee shi nongela, ne mboka mwa pyokoka pambepo,* mu pukululeni nombili.* Ihe itonateleni ne yene, opo nane wo kaamu makelwe mu longe shoka sha puka.
2 Tsikileni okukwathelathana mokuhumbata omitenge dhayalwe, mokuninga ngawo, otamu gwanitha po ompango yaKristus.
3 Oshoka ngele opu na gumwe ta dhiladhila kutya oye sha,* nonando ke shi sha, ota ifundjaleke.
4 Kehe gumwe na konakone iilonga ye mwene kutya oya tya ngiini, ihe ina iyelekanitha nayalwe, pehala lyaashono, na itangele* iilonga ye mwene.
5 Oshoka kehe gumwe oku na okuhumbata omutenge gwe mwene.
6 Kakele kaashono, kehe ngoka a longwa oohapu dhaKalunga na topole iinima ye ayihe iiwanawa, mbyoka e na, naangoka e mu longa.
7 Inamu ifundjaleka: Kalunga iha nyekelwa. Oshoka kehe shoka omuntu ta kunu, osho wo ta ka teya;
8 molwaashoka ngoka ta kunu panyama ota ka teya eyonuko monyama ye, ihe ngoka ta kunu pambepo ota ka mona* omwenyo gwaaluhe omolwombepo ondjapuki.
9 Ano inatu vulweni okulonga uuwanawa, oshoka ngele inatu vulweni,* otatu ka teya iiyimati, uuna ethimbo lya thiki.
10 Onkee ano manga tu na ompito,* natu longeleni aantu ayehe uuwanawa, ihe unene tuu mboka ye tu pamba meitaalo.
11 Taleni, onde mú nyolela noshikaha shandje mwene noondanda dha tsa.
12 Ayehe mboka ya hala okupandika kaantu oyo taya kambadhala oku mú thiminika mu kenkwe, notaye shi ningi, opo owala ya yande okuhepekwa omolwomuti gwomahepeko* gwaKristus.
13 Oshoka nokuli naamboka taya kenkwa ihaya dhiginine Ompango, ihe oya hala oku mú kenkitha, opo ya itangele shoka sha ningilwa omalutu geni.
14 Ihe ngame inandi hala okwiitanga nandonando, okuninga shila tandi itangele omuti gwomahepeko* gwOmuwa gwetu, Jesus Kristus, ngoka pataloko lyandje eso lye lya ningitha uuyuni wu tokolelwe eso, ihe pataloko lyuuyuni, ongame nda tokolelwa eso.
15 Okukenkwa, nenge okwaakenkwa hako kwa simana, ihe okushitululwa kuKalunga oko kwa simana.
16 Ayehe mboka haya kala metsokumwe nompango ndyoka, sha hala okutya, Israeli shaKalunga, ombili nesilohenda nayi kale pamwe nayo.
17 Okuza ngashingeyi, inapu kala nando ogumwe ta etele ndje uudhigu, oshoka olutu lwandje olu na iiyadhi, mbyoka tayi ulike kutya ngame omupiya gwaJesus.
18 Aamwatate, uuwanawahenda wOmuwa gwetu Jesus Kristus, nawu kale pamwe nane omolwombepo ombwanawa, ndjoka hamu ulike. Amen.
Omanyolo gopevi
^ Nenge “hamu wilikwa kombepo ondjapuki.”
^ Nenge “nonge.”
^ Nenge “okwa simana.”
^ Nenge “nyanyukilwe.”
^ Eln., “teya.”
^ Nenge “sa uunye.”
^ Eln., “euthwathimbo.”
^ Tala Omafatululo giitya.
^ Tala Omafatululo giitya.
