Ontiyali kAakorinto 7:1-16
7 Onkee ano, aaholike, molwaashoka otu na omauvaneko ngoka, natu iyogeni kehe shoka tashi nyateke olutu, nenge omwenyo,* opo tu kale aayapukeelela, notu kale tu na etilokalunga.
2 Tu taambii ko nomutima aguhe. Inatu ningila nando omuntu gumwe uuwinayi, inatu pukitha nando omuntu gumwe, noinatu ningilila mo nando omuntu gumwe.
3 Shoka inandi shi popya ndi mú pangule. Ihe ngaashi nde shi popya nale, kutya nduno otashi pula omwenyo, nenge eso, tse otu mú hole nomutima aguhe.
4 Ngame ondi na emanguluko lyokupopya nane. Ohandi itanga omolweni. Onda hekelekwa noonkondo; onda nyanyukwa noonkondo, nonando ohatu tsakaneke omaudhigu ogendji.
5 Sho nokuli twa thiki muMakedonia, inatu mona nando ompito yokuvululukwa po, ihe otwa kala tu li momaudhigu ogendji taga tsikile. Opwa li omapataneko ga kwata miiti, notwa li tu na omaipulo momitima dhetu.
6 Ihe Kalunga, ngoka ha hekeleke mboka ya gwililwa po, okwe tu hekeleka okupitila metalelopo lyaTitus;
7 hakupitila owala metalelopo lye, ihe ehekeleko, ndyoka mwe mu hekeleka nalyo, olye tu hekeleka wo. Okwe tu lombwela kombinga yankene mwa halelela okumona ndje, nkene mwa nika oluhodhi noonkondo, naasho tamu ipula nangame. Onkee ano shoka osha nyanyudha ndje noonkondo.
8 Oshoka nokuli nonando ontumwafo yandje oye mú nikitha oluhodhi, inandi ipa uusama, sho nde yi nyola (nonando petameko, onda li nda ipe uusama, sho nda mono kutya onde mú nikitha oluhodhi montumwafo ndjoka, oluhodhi lweni olwa li owala lwopakathimbo),
9 ngashingeyi onda nyanyukwa, hamolwaashoka mwa yemata, ihe omolwaashoka okuyemata kweni kwe mú ningitha mu itedhulule. Oshoka omwa li mwa nika oluhodhi momukalo, ngono tagu nyanyudha Kalunga, nomolwaashono shoka twe mú lombwele inaashi mú etela oshiponga shasha.
10 Oshoka okunika oluhodhi momukalo, ngono tagu nyanyudha Kalunga, ohaku ningitha omuntu a itedhulule, opo a ka hupithwe, noiha kala ta ipe uusama; ihe okunika oluhodhi ngaashi aantu yomuuyuni otaku fala meso.
11 Osha yela kutya omwa nika oluhodhi ngaashi Kalunga a hala, nomolwetompelo ndyoka omwa ningi oonkambadhala mwa mana mo mu longe shoka shi li mondjila. Omwa yelitha omadhina geni, omwa li mu uvitile nayi iinima ya puka, mbyoka mwa ninga, omwa li mu na etilokalunga, omwa li mwa hala okwiitedhulula, omwa longele Kalunga nomutima aguhe, nomwa opaleke omapuko, ngoka mwa ninga. Iinima ayihe mbyoka oya ningwa, opo uupyakadhi mboka wu kandulwe po.
12 Nonando onde mú nyolele, inandi shi ninga omolwangoka a yona, nenge molwangoka a uvithwa nayi keyono lyaangoka a yona, ihe onde shi ningi, opo ndi mone nkene tamu ulike montaneho yaKalunga kutya omwa hala okupulakena kutse;
13 naashono oshe tu hekeleka.
Ihe kakele kokuhekelekwa kwetu, otwa nyanyukwa noonkondo sho twa mono Titus naye a nyanyukwa, molwaashoka amuhe omwe mu tsa omukumo.
14 Oshoka ngele onde mú itangele kuTitus, itashi ka sitha ndje ohoni. Ihe ngaashi owala iinima ayihe, mbyoka twe mú lombwela, yi li paushili, osho wo okwiitanga kwetu kuTitus ku li paushili.
15 Shimwe ishewe, oku mú hole unene, nota dhimbulukwa sho amuhe hamu vulika, nankene mwe mu taamba ko nesimaneko enene.*
16 Ondi na einekelo lya kola kutya kehe shoka tamu ningi oshi li mondjila, naashoka ohashi nyanyudha ndje.
