Timoteus gwotango 2:1-15
2 Tangotango, otandi mú kumagidha, mu ninge omaindilo kuKalunga, omagalikano, okupula ekwatho kuye, noku mu pandula shi na ko nasha naantu yomaludhi agehe,
2 naakwaniilwa nosho wo ayehe, mboka ye na oondondo dhopombanda,* opo tu vule okutsikila okukala twa ngungumana, tu na esimanekokalunga thiluthilu, noku mu longela neitulomo.
3 Shika osha uka, nosha opala momeho gaKalunga, Omuhupithi gwetu,
4 ngoka shi li ehalo lye, aantu yomaludhi agehe ya hupithwe, noya mone ontseyo yi li mondjila kombinga yoshili.
5 Oshoka oku na owala Kalunga gumwe awike, nopokati kaKalunga naantu opu na owala omupokati gumwe, omulumentu, ano Kristus Jesus,
6 ngoka i igandja a ninge iikulila yaantu ayehe.* Aantu otaya ka tseyitha kombinga yoshinima shoka pethimbo lya opala;
7 nomolwaashono Kalunga a hogolola ndje ndi ninge omuuvithi nomuyapostoli, opo ndi vule okulonga oshili mboka kaaye shi Aajuda, ya kale ye na eitaalo. Shoka tandi popi oshoshili; itandi fundju.
8 Onkee ano onda hala aalumentu ayehe aadhiginini kehe pamwe ya tsikile okugalikana ya yelutha iikaha yawo pombanda, nopwaa na okugeya nokupatana.
9 Aakiintu naya zale wo oonguwo tadhi opalele,* dhi shi okutalwa, nodhi li pandjele, noinaya pandwa momukalo gwa kitakana, nenge ya zale iinima ya longwa moshingoli, nenge momagwe,* nenge oonguwo dhondilo unene,
10 ihe nayi iyopaleke momukalo, ngoka tagu ulike kutya oye li aatilikalunga, nokulonga iilonga iiwanawa.
11 Omukiintu na kale a mwena* sho ta longwa, nokuvulika thiluthilu.*
12 Itandi pitike omukiintu a ninge omuhongi, nenge a pangele omulumentu, ihe na kale a mwena.*
13 Oshoka Adam oye a shitwa tango e taku landula Eva.
14 Shimwe ishewe, Adam haye a pukithwa, ihe omukiintu oye a li a pukithwa thiluthilu e ta yono.
15 Nonando ongawo, omukiintu ota kala a gamenwa omolwokuvala aanona, ihe ongele owala a tsikile okukala e na eitaalo, e na ohole, e li omuyapuki, noha dhiladhila pandunge.*
Omanyolo gopevi
^ Nenge “mboka ye na oonkondopangelo.”
^ Nenge “yaantu yomaludhi agehe.”
^ Nenge “dhi shi okusimanekwa; dhi li pandjele.”
^ Omagwe ngaka ohaga zi moonkosa dhomefuta.
^ Nenge “a ngungumana.”
^ Sha hala okutya, megongalo.
^ Nenge “a ngungumana; a tya thilu.”
^ Nenge “noku na oondunge dhokuyoolola.”
