Yotango kAatessalonika 4:1-18
4 Hugunina, aamwatate, otwe mú lombwela nale nkene mu na okweenda momukalo, ngono tagu nyanyudha Kalunga, ngaashi owala mwa kala tamu shi ningi, notatu mú ladhipike medhina lyOmuwa Jesus, mu tsikile okuninga ngaaka shi vulithe shito.
2 Oshoka omalombwelo, ngoka twe mú pe okupitila mOmuwa Jesus, omu ga shi.
3 Oshoka ehalo lyaKalunga olyo ndika kutya omu na okukala aayapuki, nomu na okwiikaleka kokule nomilalo dha nyata.*
4 Kehe gumwe gwomune na kale e shi okupangela olutu lwe,* opo a kale a yogoka, nokwa hokiwa kuKalunga,
5 ihe haku kala nolwiho nosho wo nomahalo gopamilalo ga pitilila, ngaashi aantu yomiigwana, mboka kaaye shi Kalunga.
6 Inapu kala nando ogumwe ta longo shoka inaashi uka nokuyemateka omumwahe, molwaashoka Jehova ota ka geela kehe ngoka ta longo iilonga ya tya ngaaka, ngaashi owala twe mú lombwela nale, notwe mú londodha lela.
7 Oshoka Kalunga ine tu ithanena okwaanuuyogoki,* ihe otu kale aayapuki.
8 Onkee ano ngoka ta dhini oshinima shika ita dhini aantu, ihe oKalunga, ngoka he mú pe ombepo ye ondjapuki.
9 Ihe shi na ko nasha nohole yuumwayinathana, inatu pumbwa oku mú nyolela, oshoka ne yene omwa longwa kuKalunga mu kale mu holathane.
10 Shoka osho nokuli hamu ningile aamwatate ayehe yomuMakedonia ashihe. Ihe, aamwatate, otatu mú ladhipike mu tsikile oku shi ninga shi vulithe shito.
11 Shi ningeni elalakano lyeni, mu kale nonkalamwenyo ya gundjila, nokaamu idhope miinima yayalwe, nokukala hamu longo niikaha yeni, ngaashi owala twe mú lombwela,
12 opo mu kale mu na eihumbato ewanawa momeho gaamboka yokondje,* nokaamu kale mwa pumbwa sha.
13 Kakele kaashono, aamwatate, inatu hala mu kale kaamu shi sha kombinga yaamboka ya sa, opo kaamu kale mwa nika oluhodhi mwa fa mboka kaaye na etegameno.
14 Oshoka ngele otu na eitaalo kutya Jesus okwa sile e ta yumudhwa, otu na wo eitaalo kutya Kalunga ota ka yumudha mboka ya sa ye li aalanduli ye, opo ya ka kale pamwe naJesus.
15 Oshoka shono osho twe mú lombwela metsokumwe noohapu dhaJehova kutya mboka ya sa otaya ka yumudhwa ya ye megulu tango kutse, tse mboka tatu ka adhika momwenyo pokukala po kwOmuwa;
16 molwaashoka Omuwa ye mwene ota ka ithana okuza megulu newi lya kola lyomuyengeli omukuluntu nosho wo nenkuma lyaKalunga, opo nduno mboka ya sa ye li muukumwe naKristus otaya ka yumudhwa tango.
17 Konima yaashono, tse, mboka tatu ka adhika tu li momwenyo, otatu ka falwa miikogo, tu ka kale pamwe naamboka ya yumudhwa tango, tu ka tsakaneke Omuwa mewangandjo; kungeyi, otatu ka kala aluhe pamwe nOmuwa.
18 Onkee ano kaleni tamu hekelekathana noohapu ndhika.
Omanyolo gopevi
^ MOshigreka, porneia. Tala Omafatululo giitya.
^ Eln., “oshiyuma she.”
^ Nenge “iilonga inaayi yogoka.”
^ Nenge “mboka kaaye shi ooitaali.”
