Jehova okwa li u uvanekele Jakob kutya ote ke mu gamena ngaashi naanaa a li a gamene Abraham naIsak. Jakob osho ihe a thiki muHaran. Sho e li muHaran okwa hokana, e ta vala aanona oyendji. Okwa li a ningi wo omuyambeelela.

Konima yethimbo, Jehova okwa lombwele Jakob a ti: ‘Shuna koshilongo sheni.’ Sho a lombwelwa, Jakob naanegumbo lye oyi idhenge olweendo olule. Manga ye li mela lyondjila, oya tsakanekwa kaantu yamwe mboka ya lombwele Jakob ya ti: ‘Omumwanyoko Esau oku li mondjila te ya e ku tsakaneke e li naalumentu omathele gane.’ Jakob okwa li u uvite ngiini sho e shi uvu? Okwa li a tila, ta dhiladhila kutya Esau ote ke mu dhenga nokuponokela aanegumbo ye mboka oyendji. Jakob okwa li a galikana kuJehova a ti: “Hupitha ndje miikaha yomumwameme Esau.” Esiku lya landula ko, Jakob okwa tumine Esau omagano. Okwe mu tumine iimuna oyindji ngaashi oonzi, iikombo, oongombe, oongamelo nuusino.

Uusiku sho Jakob e li oye awike, okwa mono omuyengeli. Oya kondjo sigo eluwa tali tende. Omuyengeli okwa li e ehameke Jakob monto, ihe Jakob okwa tsikile owala nolugodhi. Omuyengeli okwa ti: “Etha ndje, ndi ye,” ihe Jakob okwa yamukula a ti: “Itandi ku etha, manga inoo yambeka ndje.”

Omuyengeli osho ngaa a ka laleka Jakob nuuyamba. Okuza mpono Jakob okwa li e shi kutya Jehova ita ka pitika Esau e mu dhenge.

 Sho kwa shi, Jakob okwa mono Esau ta zi kokule e li pamwe naalumentu 400. Jakob okwa yi komeho yaanegumbo lye, e ti inyongamene lwiikando iheyali koshipala shomumwayina. Esau okwa matukile Jakob e te mu papatele. Ayehe oya tameke okulila noya panga ombili. Mbela Jehova okwa li u uvitile ngiini omukalo moka Jakob a li u ungaunga nonkalo ndjoka?

Konima yethimbo, Esau okwa shuna kegumbo lye, na Jakob okwa yi. Jakob okwa li e na oyanamati yangapi? Oya li 12, nomadhina gawo oyo Reuben, Simeon, Levi, Juda, Dan, Naftali, Gad, Aser, Issaskar, Sebulon, Josef naBenjamin. Opo Jehova a hupithe oshigwana she shaIsraeli, okwa li a longitha Josef. Mbela owu shi nkene sha li she ende? Natu shi taleni.