EPULO 3
Ongiini tandi vulu okukala handi popi naavali yandje?
OTO KA NINGA PO SHIKE?
Dhiladhila konkalo ndjika: MEtitatu kongulohi, Geoffrey ngoka e na oomvula 17, okwa mana iilonga ye, e ta ka fudha po. Okwa tema otiivii e ta mbwata moshipundi she shoka e hole.
Manga ngaa ta fudha po, He okwe ya po e ta thikama posheelo, a geya.
Okwe mu ithana ta ti: “Geoffrey! Omolwashike to hepitha ethimbo sho to tala owala otiivii, pehala lyokukwathela okamwanyokomati niilonga yako yosikola? Iho ningi nando shoka wa lombwelwa.”
Geoffrey okwa popi newi lyopevi ta ti: “Oh! aaye wani.”
He okwa hedha puye, e ta ti: “To ti ngiini?”
Geoffrey okwa fudha muule nomeho taga wangauka, e ta ti: “Inandi tya sha tate.”
He okwa geye noonkondo, e ta ti: “Ongaye to yamukula ngawo?”
Ando ongoye wa li Geoffrey, ando owa yanda ngiini okwaauvathana hoka?
MWENA PO E TO DHILADHILA
Okupopya naavali yoye okwa faathana nokuhinga ohauto. Ngele owa adha ondjila ya patwa, oto vulu okukutha ondjila yilwe.
TALA KOSHIHOLELWA SHIKA:
Omukadhona gwedhina Leah ota ti: “Ohandi mono oshidhigu okupopya natate. Omathimbo gamwe shampa owala nda popi naye uule wokathimbo, ye ota ti: ‘Ombili, ano oto popi nangaye?ʼ’’
LEAH OTA VULU OKUHOGOLOLA PIINIMA MBIKA ITATU.
-
Ota vulu okuganda he.
Leah okwa ganda he a ti: “Owu na okupulakena! Oshinima shika tandi popi osha simana.”
-
Ota vulu okukala inaa popya we nahe.
Leah ina lombwela we he uupyakadhi we.
-
Ota vulu okutegelela pu holoke ompito ombwanawa, opo a popye naye ishewe.
Konima yethimbo Leah okwa popi nahe, nenge okwe mu nyolele ontumwafo tayi popi kombinga yuupyakadhi we.
Ehogololo lini mbela to ka lombwela Leah a ninge?
DHILADHILA KWAASHIKA: Otashi vulika he yaLeah a li i ipyakidhila nasha, onkene ka li e wete kutya Leah oku uvite nayi. Ngele Leah okwa hogolola ehogololo lyotango, ando he ina tseya kutya omolwashike te mu ganda. Ando osha ningitha he a kale inaa hala okupulakena kwaashoka ta popi. Ando oshe ku ulika wo kutya Leah ina simaneka he nokwe mu dhina. (Aaefeso 6:2) Osha yela kutya ando kapu na ngoka a mona mo uuwanawa mehogololo ndyoka.
Ngaashi owala to vulu okukutha ondjila yilwe, ngele owa adha ondjila ya patwa, oto vulu okukonga omukalo gulwe ngoka tagu ku kwathele wu kale ho longele kumwe naavali yoye
Nonando ehogololo etiyali ewanawa, kali li pandunge. Omolwashike mbela? Omolwaashoka, opo Leah a vule okuungaunga nuupyakadhi we, okwa pumbwa okupopya nahe. Opo he a vule oku mu kwathela, okwa pumbwa okutseya kutya oku na uupyakadhi washike. Ando Leah okwa mwenene, ando inashi ke ya etela uuwanawa.
Ngele Leah okwa hogolola ehogololo etitatu, ita ka kala inaa popya nahe. Ota ka kambadhala okupopya nahe kombinga yuupyakadhi we pethimbo lilwe. Ngele okwa hogolola okunyolela he ontumwafo, otashi vulika a kale u uvite a pepelelwa.
Okunyolela he ontumwafo nako ando okwe mu kwathele a nyole naanaa shoka a hala okupopya. Sho he te yi lesha, ota ka mona kutya Leah okwa li a hala oku mu lombwela shike. Shoka otashi vulika ando she mu kwathele u uve ko uupyakadhi we. Ehogololo etitatu otali kwathele Leah nosho wo he. Kutya nduno Leah okwa nyolele ontumwafo nenge okwa popile nahe, ehogololo ndika oli li metsokumwe nekumagidho lyopaMbiimbeli ndyoka tali ti kutya natu ‘lalakanene aluhe mbyoka tayi tu kaleke tu na ombili nooyakwetu.’ — Aaroma 14:19.
Ehogololo lini Leah ta vulu ishewe okuninga?
Tala ngele oto vulu okudhiladhila po limwe. Dhiladhila kutya uuwanawa wuni to ka mona, ngele owe li hogolola.
YAMUKULA AAVALI YOYE NAWA
Dhimbulukwa kutya aavali yoye otashi vulika yu uve ko papuko shoka wa popi.
TALA KOSHIHOLELWA SHIKA:
Aavali yoye otashi vulika ye ku pule kutya omolwashike to monika wa fa kuu na ombili. Otashi vulika wu tye: “Inandi hala okupopya kombinga yasho.”
Ihe aavali yoye otashi vulika ya kale yu uvite wa fa to ti: “Inandi mu inekela, opo ndi mu lombwele uupyakadhi wandje. Otandi ke wu lombwela ookuume kandje, ihe hane.”
Natu tye ando owu na uupyakadhi, naavali yoye oya hala oku ku kwathela. Ihe owa yamukula to ti: “Ino ipula nasho. Otandi vulu okuungaunga nawo mwene.”
-
Aavali yoye otashi vulika ya kale yu uvite wa fa to ti ngiini?
-
Omukalo omwaanawa gwokuyamukula oguni?
Opu na ishewe uuyelele mbuka
SHOKA OOMAKULA HAYA TI
Ongiini tandi vulu okupopya naavali yandje?
Otashi vulika wu ka mone mo uuwanawa owundji mboka waa li inoo tegelela.
