OSHIGWEDHELWAKO
Nkene ehunganeko lyaDaniel lya hunganeke okuya kwaMesiasa
OMUPOLOFETI Daniel okwa li ko pwa pita oomvula dhi vulithe po 500 manga Jesus inaa valwa. Nonando ongaaka, Jehova okwa li a hololele Daniel uuyelele mboka wa li tau ka vulitha aantu ya tseye kutya uunake Jesus a li ta ka gwayekwa e li Mesiasa nenge Kristus. Daniel okwa li a lombwelwa taku ti: “Ndhindhilika shika noku shi uva ko: Okuza pethimbo ndyoka elombwelo tali gandjwa lyokutungulula Jerusalem sigo omuwiliki omuhogololwa [“omugwayekwa,” OB-1954] gwaKalunga te ke ya, otaku piti iiwike iheyali. . . , notashi ka kala po iiwike omilongo hamano niiyali.”—Daniel 9:25.
Opo tu mone kutya Mesiasa okwe ya uunake, tango otwa pumbwa okutseya etameko lyethimbo ndyoka tali fala sigo opokuya kwe. Pahunganeko ndika, ethimbo ndyoka olya tameka “okuza pethimbo ndyoka elombwelo tali gandjwa lyokutungulula Jerusalem.” Uunake “elombwelo” ndyoka lya li lya popiwa? Pamunyoli gwOmbiimbeli Nehemia, elombwelo lyokutungulula omakuma gaJerusalem olya li lya popiwa ‘momumvo omutimilongombali gwelelo lyomupangeli Artakserkses.’ (Nehemia 2:1, 5-8) Aanandjokonona otaya koleke kutya epangelo lyaArtakserkses olya tameke mo 475 K.E.N. Onkee ano, omumvo omuti-20 gwelelo lye ogwa li mo 455 K.E.N. Ehunganeko lyaDaniel li na ko nasha naMesiasa olya tameke okugwanithwa momumvo ngoka 455 K.E.N.
Daniel oku ulike kutya ethimbo ndyoka lya fala sigo opokuya ‘kwomuwiliki omugwayekwa gwaKalunga’ olya li tali ka kala ele shi thike peni. Ehunganeko olya tumbula ‘iiwike iheyali niiwike omilongo hamano niiyali,’ ayihe kumwe iiwike 69. Ethimbo ndyoka oli na uule u thike peni? Oshiwike kehe oshi lile po omimvo heyali. (Tala enyolo lyopevi mOmbiimbeli yOshindonga yomo-1986 li na ko nasha novelise ndjika.) Edhiladhilo ndika lyiiwikemimvo olya li lya tseyika kAajuda yomethimbo lyonale. Pashiholelwa, oya li haya dhana omumvo gwEsabati momumvo kehe omutiheyali. (Eksodus 23:10, 11) Onkee ano, iiwike 69 yopahunganeko oyi li oomvula 7 dhi indjipalekwa lwo-69, sha hala okutya, oomvula 483.
Shoka tu na okuninga ngashingeyi osho okuyalula. Ngele otwa yalula oomvula 483 okuza mo 455 K.E.N., otashi tu fala sigo omomumvo 29 E.N. Ngoka ogwo naanaa gwa li omumvo moka Jesus a ninginithwa nokwa ninga Mesiasa. * (Lukas 3:1, 2, 21, 22) Mbela shoka kashi shi egwanitho endhindhilikwedhi lyehunganeko lyOmbiimbeli?
^ okat. 2 Okuza mo 455 K.E.N. sigo omomumvo 1 K.E.N. opu na oomvula 454. Okuza momumvo 1 K.E.N. sigo omomumvo 1 E.N. omumvo gumwe. Okuza momumvo 1 E.N. sigo omo 29 E.N. opu na oomvula 28. Okutula kumwe omiyalu ndhoka ndatu (454 + 1 + 28) otaku tu pe oomvula 483. Jesus okwa li a “dhipagwa” mo 33 E.N., pethimbo lyoshiwikemimvo oshiti-70. (Daniel 9:24, 26) Tala embo Pay Attention to Daniel’s Prophecy!, ontopolwa onti-11 nosho wo embo 2 lyo-Insight on the Scriptures, epandja 899-901. Agehe oga nyanyangidhwa kOonzapo dhaJehova.
