1, 2. Omagano ge na ondilo ga za kuKalunga geni tage tu kwathele unene tuu kunena, nomolwashike?

TATE yetu gwomegulu okwe tu pa oshinima shi na ondilo, osho omagano gomwenyo tu li aantu aanandunge mboka taya vulu okuholela omaukwatya ge. (Gen. 1:27) Omolwomagano ngaka ge na ondilo, otatu vulu okulongitha omakotampango gOmbiimbeli ngoka taga vulu oku tu etela uuwanawa. Ngele otwa tula miilonga omakotampango ngoka, otatu vulu okukala twa pyokoka pambepo, tu hole Jehova notu li mboka yi “ilonga noyi igilila okuyoolola shoka shu uka nenge sha puka.” — Heb. 5:14.

² Okukala tu uvite ko omakotampango gOmbiimbeli osho oshinima sha simana kunena, molwaashoka ngashingeyi muuyuni omu na oonkalo dha kitakana, moka kaapu na oompango dha gwana dhokondandalunde ndhoka tadhi tu lombwele kutya oshike tu na okuninga mukehe onkalo monkalamwenyo yetu. Edhiladhilo ndika otali ulikwa nawa muunongononi wopaunamiti, unene tuu ngele tashi ya piilongomwa ya za mombinzi nopomilandu dhopaunamiti dha kwatela mo ombinzi. Oshinima shika osha gwana okupewa eitulomo kwaayehe mboka ya hala okuvulika kuJehova. Ihe nando ongaaka, ngele otu shi omakotampango gOmbiimbeli ngoka tago opalele, otatu ka vula okuninga omatokolo ge li pandunge ngoka taga ka mbilipaleka eiyuvo lyetu notage ke tu kwathela tu ikaleke mohole yaKalunga. (Omayel. 2:6-11) Natu kundathaneni gamwe gomugo.

3, 4. Uunake Omanyolo gu ulike oshikando shotango kutya ombinzi ondjapuki, nuuyapuki wombinzi owi ikolelela komakotampango geni?

³ Konima yokathimbo sho Kain a dhipaga Abel, Jehova okwa li u ulike kutya omwenyo nombinzi oya pambathana thiluthilu nonokutya  oyi li iiyapuki. Okwa li a lombwele Kain a ti: “Ombinzi yomumwanyoko otayi kugile ndje mevi.” (Gen. 4:10) Jehova pataloko lye, ombinzi yaAbel oya li yi lile po omwenyo gwe ngoka Kain a hulitha po sho e mu dhipaga nonyanya. Onkee ano, otaku vulu okutiwa kutya ombinzi yaAbel oya li tayi kugu kuKalunga a geele ngoka e yi tilahi. — Heb. 12:24.

⁴ Konima yEyelu lyaNoowa, Kalunga okwa li a lombwele aantu ya kale taya li iinamwenyo, ihe okwa li e yi indike okulya ombinzi. Okwa li a ti: “Onyama yi na omwenyo, yi na ombinzi, inamu yi lya. Ombinzi yeni yene otandi yi geyelele nda sa ondjahi.” (Gen. 9:4, 5, OB-1954) Oshipango shika otashi longo koluvalo aluhe lwaNoowa sigo opethimbo lyetu. Otashi koleke eityo lyoohapu ndhoka Kalunga a li a lombwele Kain kutya omwenyo gwiishitwa ayihe ogu lilwe po kombinzi. Oshipango shoka osha yelitha wo kutya Jehova, Oluthithiya lwomwenyo ota ka geela aantu ayehe mboka ihaa simaneke omwenyo nombinzi. — Eps. 36:9.

5, 6. Ompango yaMoses oya li yu ulike ngiini kutya ombinzi ondjapuki noyi na ondilo? (Tala wo oshimpungu  ”Natu simaneke omwenyo gwiinamwenyo.”)

⁵ Ooshili ndhika dhopaali dha simanenena odha li wo tadhi adhika mOmpango yaMoses. Levitikus 17:10, 11 ota ti: “Ngele oku na Omuisraeli nenge omukwiilongo . . . ta li [ombinzi, OB-1954], OMUWA ote mu geele, nota dhimwa mo maantu yaKalunga. Omwenyo gwomomayulu ogwa kala mombinzi. Omolwaashoka OMUWA a gandja oshipango tashi ti, ombinzi ayihe nayi tilwe koshiyambelo, yi yoge po oondjo dhoshigwana, ombinzi ndjoka yi na omwenyo, otayi yogo po oondjo.” * — Tala oshimpungu “ Oonkondo dhombinzi dhokuyoga po oondjo.”

⁶ Ngele ombinzi yoshinamwenyo shoka sha dhipagwa kaya li tayi ka longithwa koaltali oya li yi na okutilwahi mevi. Kungawo omwenyo ogwa li hagu shunithwa kOmugandji gwagwo. (Deut. 12:16; Hes. 18:4) Ihe ndhindhilika kutya Aaisraeli kaya li ye na okulandula omilandu dha kitakana opo ya kuthe mo ombinzi ayihe monyama yoshinamwenyo. Omwiisraeli okwa li ta vulu okulya onyama  neiyuvo lya yela, shampa owala oshinamwenyo sha li sha dhipagwa momukalo gu uka nosha za ombinzi, molwaashoka omukalo gwa tya ngaaka ogwa li tagu simanekitha Omugandji gwomwenyo.

7. David okwa li u ulike ngiini kutya okwa simaneka uuyapuki wombinzi?

⁷ David omulumentu ngoka Kalunga a li ‘e mu hokwa,’ okwa li u uvu ko omakotampango hoka kwa kankamena ompango yaKalunga  yi na ko nasha nombinzi. (Iil. 13:22) Pompito yimwe sho a li a sa enota unene, yatatu yomaakwiita ye oya li ya yi montanda yaatondi yawo e taya teke omeya momuthima e taye ge mu etele. David okwa li i inyenge ngiini? Okwa ti: “Itandi vulu oku ga nwa! Onda fa tandi nu ombinzi yaalumentu mbaka ya hupula oomwenyo dhawo.” Pataloko lye, omeya ngoka oga li ga fa lela ombinzi yaakwiita ye mboka ya li ya tula oomwenyo dhawo moshiponga. Nonando David okwa li a sa enota, omeya ngoka okwa li e ga “tile pevi omayambo kOMUWA.” — 2 Sam. 23:15-17.

8, 9. Mbela etaloko lyaKalunga li na ko nasha nombinzi olya lunduluka sho pwa totwa egongalo lyopaKriste? Shi yelitha.

⁸ Konima yoomvula 2 400 lwaampono sho Noowa a lombwelwa oshipango shi na ko nasha nombinzi nokonima yoomvula 1 500 sho ehangano lyOmpango lya totwa po, Jehova okwa li a nwetha mo olutuwiliki lwegongalo lyopaKriste li nyole tali ti: “Tse otwa tokola mewiliko lyOmbepo Ondjapuki, twaa mú tsike we nando omutenge gulwe. Omalombwelo getu ge na oshilonga ogo ngaka: Inamu lya iikulya mbyoka ya yambelwa iikalunga, ombinzi nonyama yoshinamwenyo shoka sha pondwa ne mu idhilike oluhondelo.” — Iil. 15:28, 29.

⁹ Osha yela kutya olutuwiliki lwonale olwa li lwe shi uva ko kutya ombinzi ondjapuki nonokutya osha puka oku yi longitha nayi ngaashi owala okulongela iikalunga nenge okuya moluhondelo. Aakriste yashili kunena nayo oya taamba ko omuthikampango nguka. Kakele kaashono, otaya vulu okunyanyudha Jehova ngele taya ningi omatokolo ge na ko nasha nokulongithwa kwombinzi, molwaashoka ohaye ga ningi gi ikolelela komakotampango gOmbiimbeli.

10, 11. (a) Oonzapo dhaJehova ohadhi tala ko ngiini okutulwa ombinzi ayihe nosho wo iitopolwa yayo iinene? (b) Mbela omiinima yini yi na ko nasha nombinzi Aakriste tashi vulika ya kale ye na omataloko ga yoolokathana?

¹⁰ Oonzapo dhaJehova odha tseya kutya ‘okwaalya ombinzi’ otashi ti okwaatulwa ombinzi, okwaahe yi gandja yi ka tulwe aantu yamwe nenge oku yi pungula opo wu ke yi tulwe monakuyiwa. Molwaashoka ohadhi vulika kompango ndjoka yaKalunga, ihadhi zimine okutulwa iitopolwa ine yombinzi iinene, ngaashi  oosele oontiligane naandhoka oontokele, oplatelets nosho wo oplasma.

¹¹ Kunena okupitila momilandu dhontumba, iitopolwa iinene yombinzi olundji ohayi topolwa muutopolwa uushona mboka hawu longithwa momikalo dhi ili nodhi ili. Mbela Omukriste ota vulu okutulwa uutopolwa mboka? Mbela oku na oku wu tala ko wu li “ombinzi”? Kehe gumwe oku na okutokola kuye mwene moshinima shika. Niishewe kehe gumwe oku na okutokola ngele tashi ya pokupangwa hoka kwa kwatela mo eshina lyokwoopaleka ombinzi yomuntu (hali ithanwa hemodialysis), omulandu gwokuhampula ombinzi (hagu ithanwa hemodilution) nosho wo eshina lyokuthipa po ombinzi yomuntu mwene pethimbo lyetando (hali ithanwa cell salvage), ngele inayi kala ya pungulwa uule wethimbo. — Tala Oshigwedhelwako “Uutopolwa uushona wa za mombinzi nomilandu dhetando

12. Otu na okutala ko nokuungaunga ngiini niinima mbyoka ya kwatela mo eiyuvo?

¹² Mbela iinima moka tu na okuninga omatokolo pauhandimwe  inayi simana kuJehova? Itashi ti ngawo, molwaashoka Jehova oku na ohokwe mwaashoka tatu dhiladhila nosho wo momainyengotompelo getu. (Lesha Omayeletumbulo 17:3; 24:12.) Onkee ano, konima yokupula ewiliko kuJehova okupitila megalikano nokukonga omauyelele nuukeka shi na ko nasha nepango lyontumba, otu na okupulakena keiyuvo lyetu lya dheulwa kOmbiimbeli. (Rom. 14:2, 22, 23) Odhoshili kutya yamwe kaye na oku tu thindila omatokolo gawo, ihe kakele kaashono katu na okupula yalwe tatu ti: “Ando ongoye wa li monkalo ya fa yandje, ando oto ningi po shike?” Miinima ya tya ngawo, Omukriste kehe oku na ‘okuhumbata omutenge gwe.’ * — Gal. 6:5; Rom. 14:12; tala oshimpungu “ Mbela ohandi tala ko ngaa ombinzi kutya ondjapuki?”

13. Oompango nosho wo omakotampango gaJehova otaga holola shike shi na ko nasha naye? Gandja oshiholelwa.

¹³ Oompango nosho wo omakotampango ngoka ge li mOmbiimbeli otagu ulike kutya Jehova oku li Omugandjimpango nomunandunge naHe omunahole ngoka e na ko nasha shili nonkalonawa yoyana. (Eps. 19:7-11) Pashiholelwa, nonando oshipango shi na ko nasha ‘nokwaalya ombinzi’ nenge oku yi idhilika kasha li sha gandjwa nelalakano lyokukaleka po uukolele waantu, otashi tu gamene komaupyakadhi ngoka hage etithwa kokutulwa ombinzi. (Iil. 15:20) Aantu oyendji mboka ye li miikondo yuunamiti oya tala ko okutanda kaapu na ombinzi ku li “omukalo gwa dhenga mbanda” gwepango lyoshinanena. Shoka otashi ulukile Aakriste kutya Jehova omunongo a dhenga mbanda nomunahole. — Lesha Jesaja 55:9; Joh. 14:21, 23.

14, 15. (a) Ohole yaKalunga yokuhola oshigwana shaIsraeli oya li yi iwetikile moompango dhini? (b) Ongiini to vulu okutula miilonga omakotampango hoka kwa li kwa kankamena oompango ndhoka dhi na ko nasha negameno?

¹⁴ Oompango odhindji ndhoka Kalunga a li a pe oshigwana she muIsraeli shonale otadhi ulike kutya okwa li e na ko nasha nonkalonawa yasho. Pashiholelwa, okwa li e shi lombwela kutya  ngele tashi tungu ongulu kontala yayo nashi tungile ko omushigo, molwaashoka kombanda yongulu okwa li haku longelwa iilonga oyindji. (Deut. 22:8; 1 Sam. 9:25, 26; Neh. 8:16; Iil. 10:9) Kalunga okwa li wo e shi lombwela kutya nashi tonatele oongombe ndhoka dha nika oshiponga. (Eks. 21:28, 29) Ngele omuntu okwi ipwililike iipango mbyoka, okwa li hashi ulike kutya ina simaneka onkalonawa yayalwe nosha li tashi vulu okweetitha ondjo yombinzi.

¹⁵ Ongiini tatu vulu okutula miilonga omakotampango hoka kwa li kwa kankamena oompango ndhika? Oto vulu okukonakona onkalo yoshihauto shoye, omukalo gwoye gwokuhinga, iinamwenyo yoye, egumbo lyoye, ehala moka ho longele nosho wo omainyanyudho goye. Miilongo yimwe aagundjuka oyendji ohaya sile miiponga mbyoka hayi etithwa olundji kokwaahenakonasha kwawo. Ihe aagundjuka mboka ya hala okwiikaleka mohole yaKalunga oya simaneka omwenyo, nomolwaashono ihayi inyanyudha niinima mbyoka ya nika oshiponga. Ihayi ifundju mokudhiladhila kutya aagundjuka ihaya mono oshiponga. Pehala lyaashono, ohaya nyanyukilwa uugundjuka wawo mokuyanda iinima mbyoka tayi ya etele oshiponga. — Omuuv. 11:9, 10.

16. Ekotampango lyOmbiimbeli lini tali ulike kutya osha puka okwiikutha ela? (Tala wo enyolo lyopevi.)

¹⁶ Nokuli nomwenyo gwokanona hoka inaaka valwa nago ogu na ondilo koshipala shaKalunga. MuIsraeli shonale ngele omuntu okwa monitha oshiponga omukiintu e li metegelelo e ta si nenge okanona ke, Kalunga okwa li ha tala ko omuntu ngoka e etitha oshiponga e li omudhipagi, nomuntu a tya ngaaka okwa li e na okufuta ‘omwenyo nomwenyo.’ * (Lesha Eksodus 21:22, 23.) Onkee ano, dhiladhila kunkene Jehova ha kala e uvite ngele e wete aanona oyendji inaaya valwa natango taya si omolwaantu mboka hayi ikutha omala owina omvula kehe, noyendji ohaye shi ningi owala omolwuuwanawa wawo yene nenge molwaashoka ya hala okukala ya manguluka okuya momilalo.

17. Ongiini to vulu okuhekeleka omuntu ngoka a li i ikutha ela manga inaa tseya oshili yOmbiimbeli?

 ¹⁷ Ongiini shi na ko nasha nomukiintu ngoka a li i ikutha ela manga inaa tseya oshili yOmbiimbeli? Mbela shino osha hala  okutya Jehova ite mu sile we ohenda? Hasho nando. Omuntu ngoka i iyela ombedhi shili ota vulu okudhiminwa po kuJehova pakankameno lyombinzi yaJesus ya tika. (Eps. 103:8-14; Ef. 1:7) Dhoshili, Kristus okwa ti: “Inandi ya okwiithana mboka yi iwete aayuuki, ihe aalunde tuu, yi itedhulule.” — Luk. 5:32.

18. Ombiimbeli otayi popi ngiini kombinga yosheetithi oshinene shetiko lyombinzi?

¹⁸ Kakele kokwaaningila yamwe uuwinayi, Jehova okwa hala wo tu kuthe mo uutondwe momitima dhetu mboka hawu etitha olundji etiko lyombinzi. Omuyapostoli Johannes okwa nyola a ti: “Kehe ngoka e tonde mukwawo, oye omudhipagi.” (1 Joh. 3:15) Omuntu a tya ngaaka ke tonde owala omumwahe, ihe oha kala wo a hala omumwahe ngoka a se. Uutondwe we otawu vulu okwiimonikila mokulundila omumwahe nomalundilo omanyanyalithi ngoka ando oga li goshili ando taga vulu okupangulitha omumwahe kuJehova. (Lev. 19:16; Deut. 19:18-21; Mat. 5:22) Inashi simana tuu okukutha mo uutondwe mboka tashi vulika wa mena omidhi momitima dhetu! — Jak. 1:14, 15; 4:1-3.

19. Omuntu ngoka ha wilikwa komakotampango gOmbiimbeli oha tala ko ngiini omanyolo ngaashi Episalomi 11:5 nosho wo Aafilippi 4:8, 9?

¹⁹ Mboka ya simaneka omwenyo ngaashi Jehova noya hala okwiikaleka mohole ye ohaya yanda wo elongitho lyoonkondo lyoludhi kehe. Episalomi 11:5 otali ti: ‘Jehova oku tonde unene okakombwiilitha [nenge “elongitho lyoonkondo,” NW].’ Enyolo ndyoka itali popi owala kombinga yuukwatya waKalunga, ihe mulyo omu na ekotampango ndyoka li na oku tu nwetha mo monkalamwenyo yetu ayihe. Oli na okwiinyengitha mboka ye hole Kalunga ya yande omainyanyudho goludhi kehe ngoka tashi vulika taga humitha komeho elongitho lyoonkondo. Niishewe enyolo ndyoka tali ti kutya Jehova oye ‘Kalunga kombili’ ohali inyengitha aapiya ye yu udhithe omadhiladhilo gawo nomitima dhawo niinima mbyoka yihokitha, iiwanawa, ya gwana okusimanekwa noyo opala. — Lesha Aafilippi 4:8, 9.

20-22. Aakriste ohayi ihumbata ngiini sha yooloka ko kuuyuni mbuka, nomolwashike?

²⁰ Pataloko lyaKalunga uuyuni auhe waSatana owu na ondjo yombinzi. Onkalelo yawo yopapolotika ndjoka ya popiwa mOmanyolo pathaneko yi li iilikama iihahu, oya dhipagitha aantu omamiliyona ogendji, mwa kwatelwa aapiya yaJehova oyendji. (Dan. 8:3, 4, 20-22; Eh. 13:1, 2, 7, 8) Omahangano gopangeshefa nogopaunongononi ngoka oga kala nokulongela kumwe nomahangano gopapolotika ga fa iilikama mokutota po iikondjitho ya nika oshiponga, nokungawo otaga likola iimaliwa oyindji. Shoka itashi ulike tuu shili kutya “uuyuni auhe ou li mepangelo lyomuhindadhi”! — 1 Joh. 5:19.

²¹ Molwaashoka aalanduli yaJesus kaye shi “yomuuyuni” noihaya kutha ombinga nandonando mopolotika nomiita, ohaya yanda okukala nondjo yombinzi pauhandimwe nosho wo muulipamwe moka ye li. * (Joh. 15:19; 17:16) Mokuholela Kristus ihaya galulile  yamwe uuwinayi ngele taya hepekwa. Pehala lyaashono, oye hole aatondi yawo nohaye ya galikanene nokuli. — Mat. 5:44; Rom. 12:17-21.

²² Komeho gaayihe, Aakriste yashili ohaya yanda okwiimbwanga mumwe ‘naBabiloni oshinene,’ uukwaniilwa wuuyuni womalongelokalunga giifundja, shoka shi na ondjo onene yombinzi. Oohapu dhaKalunga otadhi ti: “Musho omwa adhika ombinzi yaantu ayehe mboka ya dhipagwa kombanda yevi.” Onkee ano, otatu londodhwa taku ti: “Zii mo mokati kawo, one aantu yandje!” — Eh. 17:6; 18:2, 4, 24.

23. Okuza muBabiloni Oshinene okwa kwatela mo shike?

²³ Okuza muBabiloni Oshinene okwa kwatela mo oshindji kaashi shi owala okudhimitha mo edhina lyoye. Okwa kwatela mo wo okutonda iilonga iiwinayi mbyoka ya taambwa ko komalongelokalunga giifundja nenge mbyoka haga yambidhidha, ngaashi oluhondelo, okwiidhopa mopolotika nokulalakanena uuyamba molwolwiho. (Lesha Episalomi 97:10; Eh. 18:7, 9, 11-17) Iilonga ya tya ngaaka olundji ohayi etitha etiko lyombinzi.

24, 25. (a) Okekankameno lyashike Kalunga ha sile ohenda omuntu ngoka e na ondjo yombinzi, ihe okwi iyela ombedhi? (b) Shika otashi tu dhimbulukitha elongekidho lini lyopethimbo lyOmbiimbeli?

²⁴ Manga twa li inaatu taamba ko elongelokalunga lyashili, kehe gumwe gwomutse okwa li ha yambidhidha onkalelo yaSatana momukalo gwontumba nogwongandi nokungawo otwa li tu na ondjo yombinzi. Ihe molwaashono otwa lundulula omikalo dhetu, otu na eitaalo mekuliloyambo lyaKristus notwi iyapulila Kalunga, Kalunga okwe tu sila ohenda nohe tu gamene pambepo. (Iil. 3:19) Egameno ndyoka otali tu dhimbulukitha iiholamenolando yopethimbo lyOmbiimbeli. — Num. 35:11-15; Deut. 21:1-9.

²⁵ Elongekidho ndyoka olya li hali longo ngiini? Ngele Omwiisraeli a li a dhipaga omuntu omukwawo kaashi shi owina, okwa li e na okuya ondapo kushimwe shomiiholamenolando. Ngele aapanguli mboka ye na owino oya ningi etokolo li na ko nasha naashono, omuntu ngono a dhipaga mukwawo kaashi shi owina okwa li e na okukala moshiholamenolando moka a ya, sigo ooshono omusaaseri omukuluntu a si. Opo nduno konima yaashono omuntu ngoka okwa li ta vulu okukala shaa mpoka a hala. Shika kashi li tuu oshiholelwa sha dhenga mbanda shohenda yaKalunga  noshokuulika kutya ye okwa lenga noonkondo omwenyo gwomuntu! Iiholamenolando kunena otayi faathanithwa nesiloshimpwiyu lyaKalunga ndyoka lya kankamena kekuliloyambo lyaKristus oku tu gamena keso ngele twa yona iipango yaKalunga yuuyapuki womwenyo nombinzi kaashi shi owina. Mbela ngoye owa simaneka ngaa esiloshimpwiyu ndyono? Ongiini to vulu oku shi ulika? Omukalo gumwe moka to vulu oku shi ulika ogwo okuhiya yamwe ya taambe ko esiloshimpwiyu lyaJehova lyoku tu gamena, unene tuu sho “uudhigu uunene” tawu hedha popepi noonkondo. — Mat. 24:21; 2 Kor. 6:1, 2.

26-28. Ongiini onkalo yetu ya faathana naandjoka yomupolofeti Hesekiel, nongiini tatu vulu okwiikaleka mohole yaKalunga?

²⁶ Onkalo yoshigwana shaJehova kunena otayi tu dhimbulukitha omupolofeti gwonale Hesekiel ngoka a li a tumwa kuJehova e ku uvithile Aaisraeli omalondodho ge, e li omulangeli gwawo gwopambepo. Jehova okwa li a ti kuye: “Ou na oku ya lombwela omalondodho ngoka nde ku pe.” Ando Hesekiel okwe ethele oshilonga shono, ando okwa kala e na ondjo yombinzi yaamboka ya li ya dhipagwa sho Jerusalem sha li sha hanagulwa po. (Hes. 33:7-9) Ihe Hesekiel okwa li a vulika nokungawo ka li e na ondjo yasha.

²⁷ Kunena otwa tegelela ehulilo lyuuyuni auhe waSatana. Onkee ano, Oonzapo dhaJehova odha tala ko iilonga yokuuvitha ‘esiku lyondjahi’ yaKalunga nosho wo etumwalaka lyUukwaniilwa yi li oshinakugwanithwa noyi li uuthembahenda. (Jes. 61:2; Mat. 24:14) Mbela ngoye oho kutha ngaa ombinga pakuudha miilonga mbyoka ya simana? Omuyapostoli Paulus okwa li a gwanitha po iilonga ye yokuuvitha nuudhiginini. Nomolwaashono a li a popi a ti: “Ngame inandi thiga ko nando osha, ihe onde mú tseyithile ashihe shoka Kalunga a hala oku shi mú ningila.” (Iil. 20:26, 27) Shika kashi shi tuu oshiholelwa oshiwanawa shoka twa hala okuholela!

²⁸ Opo tu ikaleke mohole yaTate yetu Jehova, inashi pumbiwa tu tale ko owala omwenyo nombinzi ngaashi he yi tala ko. Otu na wo okukala twa yogoka nenge tu li aayapuki koshipala she ngaashi tatu ke shi kundathana montopolwa tayi landula.