1-3. (a) Oshili yini itaayi vulu okupatanekwa Ombiimbeli tayi popi? (b) Ongiini tatu vulu okupanga uukuume naamboka taye ke tu nwetha mo nawa?

AANTU otaya vulu okufaathanithwa nomafulafula, molwaashoka oye na egamo okutaamba ko omukalo kehe ngoka gu li momudhingoloko gwawo ngaashi omafulafula haga thipi po omeya. Oshi li oshipu noonkondo okutaamba ko iikala, omithikampango nosho wo omaukwatya gaamboka tu na ekwatathano nayo lyopothingo, nokuli manga inaatu shi tseya.

² Ombiimbeli otayi popi oshili ndjoka itaayi vulu okupatanekwa tayi ti: “Enda pamwe naanawino, u likole owino, ihe ngoka ta kala paagoya, ota likola uuwinayi.” (Omayel. 13:20) Eyeletumbulo ndika itali popi kombinga yekwatathano lyopokathimbo. Uutumbulilo “enda pamwe” otawu ulike keendathano tali tsikile. Embo limwe tali fatulula Ombiimbeli otali popi kombinga yovelise ndjika tali ti: “Okweenda pamwe nomuntu gwontumba otashi ti owu mu hole.” Mbela ito shi zimine kutya otu na egamo okuholela mboka tu hole? Molwaashoka otu na ekwatathano lyopothingo naamboka tu hole, otaya vulu oku tu nwetha mo, kutya nduno onawa nenge onayi.

³ Opo tu kale mohole yaKalunga, osha simana tu kale nookuume mboka taye tu nwetha mo nawa. Ongiini tatu vulu oku shi ninga? Oku shi popya paunathangwa, shika otatu vulu oku shi ninga mokukala tu hole mboka Kalunga e hole,  sha hala okutya, okupanga uukuume nookuume ke. Dhiladhila kwaashika: Mbela oolye taya vulu okukala ookuume ye li nawa kaaye shi aantu mboka ye na omaukwatya ngoka ga hokiwa kuJehova? Opo nduno natu taleni kutya Kalunga oku hole aantu ya tya ngiini. Ngele otwa kala tu shi na momadhiladhilo, otashi ke tu kwathela tu pange uukuume nookuume mboka ye li na.

4. Omolwashike Jehova e na uuthemba okuhogolola kutya oolye ta panga uukuume nayo, nomolwashike a li i ithana Abraham “kuume” ke?

⁴ Jehova iha panga uukuume nakehe gumwe. Mbela oku na uuthemba oku shi ninga? Eeno. Ye oku li Omuwa Omunamapangeloagehe, nokupanga uukuume naye oku li uuthembahenda dhingi. Oha panga uukuume noolye? Oha hedha popepi naamboka ye mu inekela noye mu itaala nomutima aguhe. Pashiholelwa, dhiladhila shi na ko nasha natatekulululwa Abraham, omulumentu ngoka a tseyika nawa omolweitaalo lye lya dhenga mbanda. Oshi li emakelo enene noonkondo kuhe gwopantu ngele ta pulwa a yambe po omwanamati eyambo. * Ihe nando ongaaka, Abraham okwa li “a gandja omwana Isak,” i itaala nomutima aguhe kutya ‘Kalunga ota vulu oku mu yumudha kuusi.’ (Heb. 11:17-19) Molwaashoka Abraham okwa li e na eitaalo lya tya ngaaka noha vulika, Jehova okwa li e mu ithana nohole “kuume” ke. — Jes. 41:8; Jak. 2:21-23.

5. Jehova okwa tala ko ngiini mboka haya vulika nuudhiginini kuye?

⁵ Jehova okwa lenga mboka haya vulika kuye nuudhiginini. Oku hole mboka ya hala okukala aadhiginini kuye komeho gaayihe. (Lesha 2 Samuel 22:26.) Ngaashi twe shi mona mOntopolwa 1 yembo ndika, Jehova oha hokwa noonkondo  mboka haya vulika kuye omolwohole. Omayeletumbulo 3:32 (OB-1954) otaga ti: ‘Aayuuki oye na oonkundathana dhuukuume naye.’ Jehova mboka haya gwanitha po iitegelelwa ye nuudhiginini ote ya hiya nombili ya kale aayenda “metsali” lye, sha hala okutya, taye mu longele notaye mu galikana ethimbo kehe. — Eps. 15:1-5, OB-1954.

6. Ongiini tatu vulu okuulika kutya otu hole Jesus, na Jehova oku uvite ngiini shi na ko nasha naamboka ye hole Omwana?

⁶ Jehova oku hole mboka ye hole Jesus, Omwana gwe Epona. Jesus okwa ti: “Oongoka e hole ndje, ota vulika koohapu dhandje. Tate ota kala e mu hole, otse naTate notatu ya kuye e tatu kala muye.” (Joh. 14:23) Ongiini tatu vulu okuulika kutya otu hole Jesus? Omokuvulika kiipango ye, mwa kwatelwa elombwelo lyokuuvitha onkundana ombwanawa nokuninga aantu aalongwa. (Mat. 28:19, 20; Joh. 14:15, 21) Ohatu ulike wo kutya otu hole Jesus ngele tatu ‘landula ondjila ndjoka a li e yi ende,’ moku mu holela moohapu nomiilonga ngaashi tatu vulu tu li aantu inaaya gwanenena. (1 Pet. 2:21) Jehova okwa hokwa oonkambadhala ndhoka tadhi ningwa kwaamboka ohole yawo yokuhola Omwana tayi yi inyengitha ya landule ondjila ndjoka a li e ende.

7. Omolwashike shi li pandunge okupanga uukuume nookuume kaJehova?

⁷ Omaukwatya ngoka Jehova a tegelela ga kale ge niwe kwaamboka ye li ookuume ke, ogo eitaalo, uudhiginini, evuliko nohole yokuhola Jesus nomithikampango dhe. Oshi li nawa ngele kehe gumwe gwomutse ti ipula ngeyi: ‘Mbela omaukwatya ngaka ogi iwetikile mwaamboka ye li ookuume kandje? Mbela onda panga uukuume naamboka ye li ookuume kaJehova?’ Oshi li pandunge oku shi ninga. Oohandimwe mboka ye na omaukwatya gopakalunga nohayu uvitha onkundana ombwanawa yUukwaniilwa nuulaadhi otaya vulu oku tu nwetha mo pamukalo omwaanawa tu kale patokolotoko lyetu okunyanyudha Kalunga. — Tala oshimpungu “ Kuume e li nawa oongoka e li ngiini?” pepandja 29.

8. Oshike wa panda kombinga yekwatathano pokati (a) kaNaemi naRut? (b) kaagundjuka yatatu Aahebeli? (c) nopokati kaPaulus naTimoteus?

⁸ MOmanyolo omu na iiholelwa oyindji yaamboka ya mona uuwanawa mokuhogolola okupanga uukuume nookuume ye li nawa. Oto vulu okulesha kombinga yekwatathano pokati kaNaemi noshitenya she Rut, pokati kaagundjuka yatatu Aahebeli mboka ya li muBabilonia nopokati kaPaulus naTimoteus. (Rut 1:16; Dan. 3:17, 18; 1 Kor. 4:17; Fil. 2:20-22) Ihe natu taleni koshiholelwa shimwe sha dhenga mbanda shuukuume mboka wa li pokati kaDavid naJonatan.

9, 10. Uukuume mboka wa li pokati kaDavid naJonatan owa li wa kankamena koshike?

⁹ Ombiimbeli otayi ti kutya konima sho David a dhipaga Goliat, ‘Jonatan okwa panga uukuume wa kola naDavid nokwa li e mu hole, ngaashi i ihole ye mwene.’ (1 Sam. 18:1) Kungawo oya tameke okukala ye na uukuume ihaawu tengauka nonando Jonatan okwa li omukuluntu kokule kuDavid, nuukuume wawo mboka owa tsikile sigo Jonatan a sile molugodhi. * (2 Sam. 1:26) Uukuume wawo wopothingo owa li wa kankamena koshike?

¹⁰ David naJonatan oya li ya mangelwa kumwe kohole yawo yokuhola Kalunga nosho wo kehalo lyawo lya kola okukala aadhiginini kuye. Aalumentu mboka yaali oya li ya hanganithwa kehalo lyawo okukala ya hokiwa kuKalunga. Kehe gumwe gwomuyo okwa li e na omaukwatya ngoka ga li ge mu hokithitha mukwawo. Osha yela kutya Jonatan okwa li a panda omukumo nuulaadhi womugundjuka ngoka a popile edhina lyaJehova nopwaahe na uumbanda. Nopwaahe na omalimbililo, David okwa li a simaneka Jonatan ngoka a li omukuluntu kuye molwokuyambidhidha kwe nuudhiginini  omalongekidho gaJehova nomolwokupititha kwe uuwanawa waDavid komeho wowe. Pashiholelwa, dhiladhila shoka sha ningwa sho David a li a teka omukumo noonkondo e li ontauki mombuga ta yi ondapo ondjahi yomukwaniilwa e li nayi Saul, he yaJonatan. Jonatan okwa li u ulike uudhiginini wa dhenga mbanda sho ‘a li a yi kuDavid e te mu tsu omukumo noku mu yelithila egameno lyaKalunga.’ (1 Sam. 23:16) David  ka li tuu e uvite nawa sho kuume ke kopothingo a li e ya oku mu tsa omukumo! *

11. Moshiholelwa shaDavid naJonatan owi ilongo mo shike shi na ko nasha nuukuume?

¹¹ Mbela moshiholelwa shaDavid naJonatan otatu ilongo mo shike? Komeho gaayihe, otatu ilongo mo kutya oshinima sha simanenena kookuume osho okukala ye na omithikampango dhopambepo. Uuna tatu hedha popepi naamboka ye na eitaalo lya fa lyetu, omithikampango dhopamikalo dha fa dhetu nehalo  lya fa lyetu okukala aadhiginini kuKalunga, otatu vulu okulombwelathana omadhiladhilo getu, omaiyuvo getu nosho wo iimoniwa yetu mbyoka tayi tu ladhipike notayi tu tungu. (Lesha Aaroma 1:11, 12.) Ookuume mboka ye na ohokwe miinima yopambepo ohaya monika mokati kaalongelikalunga ooyakwetu. Ihe shika otashi ti mbela kutya kehe gumwe ngoka te ya kokugongala pOshinyanga shUukwaniilwa oku li kuume e li nawa? Hasho aluhe shi li ngawo.

12, 13. (a) Omolwashike tu na okukala hatu tala nawa mokuhogolola ookuume nokuli nomokati kAakriste ooyakwetu? (b) Uupyakadhi washike wa li momagongalo gomethelemumvo lyotango, nowa li wi inyengitha Paulus a gandje elondodho lini lya kwata miiti?

¹² Nokuli nomegongalo otu na okutala nawa mokuhogolola ookuume ketu ngele otwa hala ya kale mboka taya vulu oku tu tunga pambepo. Mbela shika oshi na oku tu kumitha? Hasho naanaa. Molwaashoka Aakriste yamwe megongalo otashi vulika shi ya pule ethimbo ele opo ya kale ya pyokoka pambepo, ngaashi naanaa iiyimati yimwe komuti nayo hayi kutha ethimbo ele opo yi pye. Onkee ano, megongalo kehe otatu adha mo Aakriste ye na uupambepo wa yoolokathana. (Heb. 5:12–6:3) Odhoshili kutya ohatu tala onteni mboka aape nenge aankundi notu ya hole, molwaashoka otwa hala oku ya kwatha ya koke pambepo. — Rom. 14:1; 15:1.

¹³ Omathimbo gamwe megongalo otashi vulika mu holoke onkalo ndjoka tayi pula tu tale kutya oolye tatu endathana nayo. Yamwe otashi vulika yi ihumbate nayi. Yalwe otashi vulika ya kale ye na ombepo yokugeya mbala nenge yokungongota. Momagongalo gomethelemumvo lyotango E.N. namo omwa li mu na aantu ye na iikala ya fa yaamboka. Nonando aakwanegongalo oyendji oya li aadhiginini, yamwe oya li yi ihumbata nayi. Molwaashoka yamwe megongalo lyomuKorinto kaya li haya dhiginine omalongo gopaKriste, omuyapostoli Paulus okwa li e ya londodha a ti: “Inamu pukithwa. ‘We ende nombudhi, nangoye oto ningi ombudhi.’” (1 Kor. 15:12, 33) Paulus okwa li a londodha Timoteus kutya nokuli nomokati  kAakriste ooyakwawo otamu vulu mu kale yamwe mboka kaaye na omikalo omiwanawa. Okwa li a lombwele Timoteus a kale i iyoolola ko kwaamboka ye li nayi, kaa pange uukuume nayo. — Lesha 2 Timoteus 2:20-22.

14. Ongiini tatu vulu okutula miilonga ekotampango ndyoka lya kwatelwa melondodho lyaPaulus kombinga yookuume?

¹⁴ Ongiini tatu vulu okutula miilonga ekotampango ndyoka lya kwatelwa melondodho lyaPaulus? Omokuyanda okupanga uukuume nakehe gumwe ngoka ta vulu oku tu nwetha mo nayi, kutya nduno omegongalo nenge opondje yalyo. (2 Tes. 3:6, 7, 14) Otu na okugamena uupambepo wetu. Dhimbulukwa kutya ngaashi efulafula, ohatu nwethwa mo kiikala nokomikalo dhookuume ketu. Ngaashi naanaa itaatu vulu okutula efulafula momahooli e tatu tegelele shoka lya thipa mo shi kale omeya, osho natse itatu vulu okupanga uukuume naamboka ye na enwethomo ewinayi e tatu tegelele ye tu nwethe mo nawa. — 1 Kor. 5:6.

15. Oshike tatu vulu okuninga opo tu imonene ookuume mboka ye na uupambepo uuwanawa?

¹⁵ Lago enene, otatu vulu okwiimonena ookuume ye li nawa mokati kaalongelikalunga ooyakwetu. (Eps. 133:1) Ongiini tatu vulu okumona ookuume mboka ye na uupambepo uuwanawa megongalo? Kapu na omalimbililo kutya ngele owu na omaukwatya nomikalo dhopakalunga, yalwe mboka nayo ya hala okuhokiwa kuye, otaya ka nanenwa kungoye. Otashi vulika wa pumbwa wo okukatuka oonkatu dhontumba dhi na oshilonga opo wu pange uukuume nayalwe. (Tala oshimpungu “ Nkene twa panga uukuume nookuume mboka ye li nawa,” pepandja 30.) Konga mboka ye na omaukwatya ngoka wa hala nangoye okukala wu na. Pulakena komayele gOmbiimbeli ngoka taga ti kutya otu na ‘okweegulula omitima dhetu’ mokuninga uukuume nooitaali ooyakwetu kashi na nduno mbudhi kutya oyomomuhoko guni, oyomoshigwana shini nenge oyomeputuko lini. (2 Kor. 6:13; lesha 1 Petrus 2:17.) Ookuume ketu inaya kala owala mboka yepipi lyetu. Natu dhimbulukwe kutya Jonatan okwa li omukuluntu kokule kuDavid. Aakuluntu oyendji ohaya kala ye na uukuume wu li nawa molwaashoka yo oye na owino nuunongo.

16, 17. Ngele aalongelikalunga ooyakwetu taye tu uvitha nayi momukalo gwontumba, omolwashike kaatu na okukala ihaatu yi we kokugongala?

¹⁶ Omathimbo nomathimbo megongalo otamu vulu okuholoka omaupyakadhi, molwaashoka omu na aantu ye na omaukwatya gi ili nogi ili noya za nomaputuko ga yoolokathana. Omwiitaali omukwetu otashi vulika a popye sha nenge a ninge sha shoka tashi tu uvitha nayi. (Omayel. 12:18) Omathimbo gamwe omaupyakadhi otaga hwahwamekwa komaukwatya ga yoolokathana, kokwaauvathana nenge kokwaatsakumwe. Mbela omaupyakadhi ga tya ngaaka otage ke tu pundukitha noku tu ningitha tu kale ihaatu yi we kokugongala? Aawe, itashi ke tu ningilwa ngele otu hole shili Jehova notu hole mboka e hole.

¹⁷ Molwaashoka Jehova oye Omushiti gwetu nOmugandji gwomwenyo, otwa gwana okukala tu mu hole noku mu longela  oye awike. (Eh. 4:11) Niishewe, otu na okuyambidhidha nuudhiginini ehangano lye. (Heb. 13:17) Ano ngele omulongelikalunga omukwetu te tu uvitha nayi nenge te tu yemateke pamukalo gwontumba, itatu kala ihaatu yi kokugongala opo tu ulike kutya otu shi uvitile nayi. Itashi vulika nando tu ninge ngawo. Jehova haye e tu ninga nayi. Ohole yetu yokuhola Jehova itayi vulu nando oku tu pitika tu mu pilamene pamwe noshigwana she. — Lesha Episalomi 119:165.

18. (a) Oshike tatu vulu okuninga opo tu humithe komeho ombili megongalo? (b) Okudhimina po mpoka pu na etompelo ewanawa lyoku shi ninga ohaku eta omalaleko nuuyamba geni?

¹⁸ Ohole yokuhola aalongelikalunga ooyakwetu otayi tu inyengitha tu humithe komeho ombili megongalo. Jehova ina tegelela mboka e hole ya kale ya gwanenena, natse katu na okutegelela ya kale ya gwanenena. Ohole otayi tu kwathele tu ya dhimine po omapuko gawo omashona nosho wo okudhimbulukwa kutya atuheni inatu gwanenena nohatu ningi omapuko. (Omayel. 17:9; 1 Pet. 4:8) Ohole ohayi tu kwathele tu kale ‘nokudhiminathana po.’ (Kol. 3:13) Kashi shi aluhe oshipu okutula omayele ngaka miilonga. Ngele tatu etha omaiyuvo omawinayi ge tu sinde, otatu vulu okukala negamo okukwatela onkone, tashi vulika tatu dhiladhila kutya okugeya kwetu oko omukalo gwokugeela ngoka e tu uvitha nayi. Ihe muushili wo wene, okukala nonkone okwa nika oshiponga kutse. Okudhimina po yalwe ngele pu na etompelo ewanawa lyoku shi ninga ohaku eta omalaleko nuuyamba. (Luk. 17:3, 4) Otaku tu pe ombili yopamadhiladhilo noyokomutima, otaku kaleke ombili megongalo nokomeho gaayihe otaku gamene ekwatathano lyetu naJehova. — Mat. 6:14, 15; Rom. 14:19.

19. Oonkalo dhini tashi vulika dhi holoke po ndhoka tadhi shi ningi sha pumbiwa opo twaa endathane we nagumwe?

¹⁹ Omathimbo gamwe osha pumbiwa tu ethe po okweendathana nagumwe ngoka a li nale megongalo. Onkalo ndjika ohayi holoka po ngele omuntu ngoka a yona ompango yaKalunga nokwaaiyela ombedhi a kondwa nenge ngele gumwe e etha po oshili e ta kala ta longo aantu omalongo giifundja  nenge i iteta ko ye mwene kegongalo. Oohapu dhaKalunga otadhi tu lombwele sha yela twaa ‘kwatathane’ nomuntu a tya ngaaka. * (Lesha 1 Aakorinto 5:11-13; 2 Joh. 9-11) Otashi vulu shi kale oshidhigu noonkondo okwaaendathana we nagumwe ngoka tashi vulika a li nale kuume koye nenge e li omupambele. Mbela otatu ka katuka onkatu ya tya ngaaka twa tokola toko shoka tashi ulike kutya ohatu simaneke Jehova nuudhiginini nosho wo oompango dhe dhi li pauyuuki komeho gaayihe? Dhimbulukwa kutya Jehova okwa lenga mboka haya vulika kuye nuudhiginini.

20, 21. (a) Omolwashike okukonda megongalo omuyoni ngoka ini iyela ombedhi ku li elongekidho lyopahole? (b) Omolwashike sha simana okuhogolola noondunge ookuume ketu?

²⁰ Okukonda megongalo omuyoni ngoka ini iyela ombedhi oku li lela elongekidho lyopahole lya tulwa po kuJehova. Omolwashike tatu tile ngawo? Okukonda mo omuyoni ngoka ini iyela ombedhi otaku ulike ohole yokuhola edhina lyaJehova eyapuki nomithikampango dhe. (1 Pet. 1:15, 16) Elongekidho ndika ohali gamene egongalo. Aakwanegongalo aadhiginini ohaya kala ya gamenwa kenwethomo ewinayi lyaangoka a yonena owina nohaya vulu okutsikila nokulongela Kalunga ye shi kutya egongalo olyo ehala lyegameno muuyuni mbuka wa kolokosha. (1 Kor. 5:7; Heb. 12:15, 16) Egeeloputudho ndyoka lya kwata miiti ohali ulike kutya ngoka a yona oku holike. Otashi vulika olyo owala a pumbwa opo a mone kutya oku na okulundulula iikala ye nokukatuka oonkatu dha pumbiwa okugalukila kuJehova. — Heb. 12:11.

²¹ Itatu vulu oku shi pataneka kutya ookuume ketu otaya vulu oku tu nwetha mo noonkondo. Onkee ano osha simana opo tu kale hatu hogolola noondunge ookuume ketu. Ngele tatu panga uukuume naamboka ye li ookuume kaJehova notatu kala tu hole mboka e hole, otatu ka kala tu na ookuume ye li nawa lela. Shoka taye tu nwetha mo nasho otashi ke tu kwathela tu kale metsokumwe netokolotoko lyetu okunyanyudha Jehova.