1, 2. Oshike tatu vulu okuninga, opo tu ikaleke mohole yaKalunga?

ATUHENI otwa hala okukala tu na oonkondo nosho wo uukolele. Onkene ohatu kambadhala okulya iikulya tayi tungu, ohatu ningi omadhewo pandjigilile nohatu sile oshimpwiyu omalutu getu. Nonando ohashi pula oonkambadhala, ohashi tu etele uuwanawa, nomolwaashono ohatu tsikile oku shi ninga. Ihe otwa pumbwa wo okukala tu na oonkondo nosho wo uukolele momukalo gulwe.

² Nonando ngashingeyi otwa tseya Jehova, otwa pumbwa okutsikila okukala tu na ekwatathano lyopothingo naye. Sho Judas a ladhipike Aakriste yi “ikaleke mohole yaKalunga,” okwe ya yelithile nkene taya vulu oku shi ninga. Okwe ya lombwele a ti: “Itungileni kekankameno lyeitaalo lyeni eyapuki.” (Judas 20, 21) Ongiini tatu vulu okukoleka eitaalo lyetu?

3-5. (a) Satana okwa hala wu kale wu uvitile ngiini omithikampango dhaJehova? (b) Owu uvitile ngiini oompango nomakotampango gaJehova?

³ Osha simana okukala wa tompwa kutya omithikampango dhaJehova odho dhingi. Satana okwa hala wu dhiladhile kutya oshidhigu noonkondo okukala metsokumwe nomithikampango dhaKalunga. Okwa hala wo wu dhiladhile  kutya oto ka kala wa nyanyukwa, ngele oho tokola ngoye mwene shoka shi li mondjila naashoka sha puka. Okuza ngaa koshikunino shaEden, Satana okwa kala ta kambadhala i itaalithe aantu iifundja mbyoka. (Genesis 3:1-6) Kunena onkee ngaa ta tsikile oku shi ninga.

⁴ Mbela Satana oku li ngaa mondjila? Mbela omithikampango dhaJehova odha ngambeka unene aantu? Aawe. Natu shi thaneke ngeyi: Natu tye nduno oto ende moparka ombwanawa lela. Opo wu li po, owu wete ondhalate onde ndjoka ya topola ko ombinga yimwe. Otashi vulika wu ipule to ti: ‘Ondhalate ndjino oyashike?’ Opo ihe, owu uvu onime tayi kumbu handiyaka yondhalate. Mbela ondhalate ndjono oto ka kala wu yi uvitile ngiini? Osha yela kutya oto ka kala wa pandula, sho ye ku gamena kuu like po konime ndjoka. Omakotampango gaJehova oge li ngaashi ondhalate ndjoka, omanga Ondiyapoli yi li ngaashi onime. Oohapu dhaKalunga otadhi tu londodha tadhi ti: “Kotokeni ne mu tonate! Oshoka omutondi gweni Satana ohe mu kundukidha, ta ndunduma a fa onime, ta kongo ngoka, te mu ninagula po.” — 1 Petrus 5:8.

⁵ Jehova okwa hala tu kale tu na onkalamwenyo ya dhenga mbanda. Ina hala tu pukithwe kuSatana. Onkee ano, Jehova okwe tu pa oompango nomakotampango, opo e tu gamene notu kale twa nyanyukwa. (Aaefeso 6:11) Jakob okwa nyola a ti: “Ngoka ti italele mompango ya gwana yokumangulula, te yi pulakene noite yi dhimbwa . . . oye ota yambekwa moku shi ninga.” — Jakob 1:25.

6. Oshike tashi ke tu tompa kutya omithikampango dhaJehova kaku na we?

⁶ Uuna tatu vulika komalombwelo gaJehova, onkalamwenyo yetu ohayi hwepopala nuukuume wetu naye ohawu kolo. Pashiholelwa, ohatu mono uuwanawa, uuna tatu mu galikana pandjigilile, ngaashi e tu lombwela. (Mateus 6: 5-8; 1 Aatessalonika 5:17) Ohashi tu nyanyudha, ngele tatu vulika kelombwelo ndyoka e tu pa, tu gongale pamwe notu tsaathane omukumo, nuuna tatu ningi oshindji miilonga yokuuvitha noyokulonga aantu. (Mateus 28:19, 20; Aagalati 6:2; Aahebeli 10:24, 25) Uuna tatu dhiladhila nkene iinima mbyoka ye tu kwathela tu kale tu na eitaalo lya kola, otatu ka kala twa tompwa kutya omithikampango dhaJehova kaku na we.

7, 8. Oshike tashi ke tu kwathela kaatu kale tatu ipula nomayeleko ngoka tashi vulika ge ke tu adhe monakuyiwa?

⁷ Otashi vulika tu kale tatu ipula kutya monakuyiwa, eitaalo lyetu otali ka yelekwa noonkondo. Ngele oho kala wu uvite ngawo, dhimbulukwa oohapu dhaJehova ndhoka tadhi ti: “Ongame Omuwa Kalunga koye, ngoka tii ku [‘longo,’ NW] shoka she ku opalela noku ku ulukila ondjila u na okweenda nayo. Ando to pulakene shili iipango yandje, andola omayambeko otage ku kungulukile ga fa omulonga  tagu tondoka omeya, nuuyuuki otau tondokele kungoye wa fa omakuthikuthi gomefuta.” — Jesaja 48:17, 18.

⁸ Ngele otwa kala hatu vulika kuJehova, ombili yetu otayi ka kala ngaashi omulonga ngoka ihaagu pwine, nuuyuuki wetu otawu ka kala wa fa omakuthikuthi gefuta. Otatu vulu okukala aadhiginini kutya nduno otu ningilwe shike monkalamwenyo yetu. Ombiimbeli oyu uvaneka tayi ti: “Uudhigu woye u fala kOmuwa, oye te ku popile; ihe etha aayuuki ya sindike.” — Episalomi 55:22.

9, 10. Uutumbulilo uukuluntu wopaKriste, otawu ti shike?

⁹ Sho to ende to koleke ekwatathano lyoye naJehova, kungawo oto ‘lalakanene uukuluntu’ wopaKriste. (Aahebeli 6:1) Uutumbulilo uukuluntu wopaKriste, otawu ti shike?

¹⁰ Uukuluntu wopaKriste inawu ikolelela kuuwindji womimvo dhetu. Opo tu koke pambepo, otu na okupanga uukuume wopothingo naJehova nokutala ko iinima ngaashi he yi tala ko. (Johannes 4:23) Paulus okwa nyola a ti: ‘Mboka haa kala pahalo lyuuntu wawo, ohaa dhiladhila ngaashi uuntu wawo wa hala. Ihe mboka haa kala ngaashi ombepo tayi ya lombwele, ohaa dhiladhila ngaashi ombepo ye shi hala.’ (Aaroma 8:5) Omukriste ngoka a koka pambepo, iha lalakanene omainyanyudho nenge iinima yopamaliko. Pehala lyaashono, oha lalakanene okulongela Jehova noha ningi omatokolo gopandunge monkalamwenyo ye. (Omayeletumbulo 27:11; lesha Jakob 1:2, 3.) Iha etha a longe shoka sha puka. Oku shi shoka shi li mondjila nohe shi tula miilonga.

11, 12. (a) Paulus okwa ti shike kombinga yOmukriste ngoka e na ‘oondunge dha dheulwa’? (b) Okuninga Omukriste a koka pambepo, okwa faathana ngiini nokukala omumatuki a dheuka?

¹¹ Ohashi pula oonkambadhala, opo omuntu a koke pambepo. Omuyapostoli Paulus okwa nyola a ti: ‘Iikulya ya  kola oyaakuluntu, mboka oondunge dhawo dha dheulwa okuyoolola shoka shu uka nenge sha puka.’ (Aahebeli 5:14, yelekanitha NW.) Oshitya “dheulwa” otashi tu ningitha tu dhiladhile komadhewo ngoka omumatuki ha ningi.

¹² Uuna tu wete omumatuki a dheuka e li methigathano, ohatu kala tu shi kutya oshe mu pula ethimbo nokwiidheula, opo a kale a dheuka. Ina valwa e shi okumatuka. Uuna okanona ka valwa, ihaka kala ke shi okulongitha omaako nomagulu gako. Ihe mokweendela ko kwethimbo, ohaki ilongo nkene ke na okukwata iinima nokweenda. Opo ka ka ninge omumatuki, oka pumbwa okwiidheula. Sha faathana, ohashi pula ethimbo nokwiidheula, opo tu kale Aakriste ya pyokoka.

13. Oshike tashi ke tu kwathela tu ilonge okudhiladhila ngaashi Jehova?

¹³ Membo ndika, otwa konakona nkene tatu vulu okudhiladhila ngaashi Jehova, nokutala ko iinima ngaashi ye. Otwi ilonga mo wo nkene tu na okupandula omithikampango dhaJehova nokukala tu dhi hole. Uuna tatu ningi omatokolo, ohatu ipula tatu ti: ‘Oompango nenge omakotampango gOmbiimbeli geni taga longo moshinima shika? Ongiini tandi vulu oku ga tula miilonga? Jehova okwa hala ndi ninge shike?’ — Lesha Omayeletumbulo 3:5, 6; Jakob 1:5.

14. Ngele otwa hala okukoleka eitaalo lyetu, oshike tu na okuninga?

¹⁴ Okukoleka eitaalo lyetu muJehova oshinima tashi tsikile. Ngaashi owala okulya iikulya tayi tungu haku koleke omalutu getu, okwiilonga kombinga yaJehova ohaku tu kwathele tu koleke eitaalo lyetu. Sho twa tameke okukonakona Ombiimbeli, otwi ilongo oshili yopetameko kombinga yaJehova nosho wo yomithikampango dhe. Ihe mokweendela ko kwethimbo, otwa pumbwa okuuva ko iinima yomuule. Shoka osho Paulus a li ta popi, sho a ti: “Iikulya  ya kola oyaakuluntu.” Ohatu mono uunongo, ngele tatu tula miilonga iinima mbyoka tatu ilongo. Ombiimbeli otayi ti: “Oshinima shotango osho okulikola owino.” — Omayeletumbulo 4:5-7; 1 Petrus 2:2.

15. Okukala tu hole shili Jehova nosho wo aamwatate naamwameme, okwa simana shi thike peni?

¹⁵ Omuntu otashi vulika a kale e na oonkondo nuukolele, ihe opo a tsikile okukala ngawo, oku na okukala ti isile oshimpwiyu. Sha faathana, Omukriste ngoka a koka pambepo, oku shi kutya okwa pumbwa okulonga nuudhiginini, opo a kaleke ekwatathano lye naJehova lya kola. Paulus ote tu dhimbulukitha ta ti: “Ikonakoneni, ne mu iyeleke, opo mu tale, ngele omu li tuu meitaalo.” (2 Aakorinto 13:5) Mbela osha gwana okukala owala tu na eitaalo lya kola? Aawe. Ohole yetu yokuhola Jehova nosho wo aamwatate naamwameme nayo oyi na okutsikila okukoka. Paulus okwa ti: “Nando ondi kale ndi na . . . owino, . . . nando ondi kale ndi na eitaalo tali vulu okudhikula po oondundu, ihe kandi na ohole, ongame oshinima showala.” — 1 Aakorinto 13:1-3.

16. Satana okwa hala tu kale tu uvite ngiini?

¹⁶ Satana okwa hala tu dhiladhile kutya itatu vulu nando okunyanyudha Jehova. Okwa hala tu teke omukumo, notu dhiladhile kutya omaupyakadhi getu kapu na siku ga kandulwe po. Ina hala tu kale twi inekela Aakriste ooyakwetu, ye ina hala tu kale twa nyanyukwa. (Aaefeso 2:2) Satana oku shi kutya omadhiladhilo omawinayi otaga vulu oku tu teya po nosho wo ekwatathano lyetu naKalunga. Ihe Jehova okwe tu pa sha shoka tashi tu kwathele tu kondjithe omadhiladhilo omawinayi. Okwe tu pa etegameno.

17. Etegameno olya simana shi thike peni?

¹⁷ MAatessalonika yotango 5:8, Ombiimbeli otayi  yelekanitha etegameno lyetu negala lyosheela, ndyoka hali gamene omutse gwomukwiita molugodhi. Otayi li ithana ‘etegameno lyehupitho.’ Etegameno momauvaneko gaJehova, otali vulu okugamena omadhiladhilo getu notali tu kwathele tu kondjithe omadhiladhilo omawinayi.

18, 19. Etegameno olya li lya kwathele ngiini Jesus?

¹⁸ Etegameno olya li lya kwathele Jesus i idhidhimike. Uusiku we wahugunina sho e li pokudhipagwa, okwa li a ungaunga noonkalo oondhigu kepaya taku zi. Okwa li a kengelelwa kukuume ke kopothingo. Ye gulwe okwa li e mu ikala kutya ke mu shi. Omanga yalwe ya li ye mu fadhuka po. Aajuda ooyakwawo oye mu tsile ondumbo, e taya pula nokuli a alelwe komuti gwomahepeko. Oshike sha li she mu kwathele i idhidhimikile iinima ayihe mbyoka? Ombiimbeli otayi ti: “Oye ina hulila ondjilakati, ihe omolwenyanyu ndyoka lya li lye mu tegelela okwi idhidhimikile esheko nokwa si eso [‘lyokomuti gwomahepeko,’ NW]. Ngashingeyi  okwa kuutumba kolulyo lwoshipangelapundi shaKalunga.” — Aahebeli 12:2.

¹⁹ Jesus okwa li e shi kutya ngele okwa kala omudhiginini, ota ka simanekitha He, nota ka aneka pomutenya iifundja yaSatana. Etegameno ndyoka, olya li lye mu nyanyudha noonkondo. Okwa li wo e shi kutya masiku ota ka hangana ishewe naHe megulu. Etegameno ndyoka, olya li lye mu kwathele i idhidhimike. Onkee ano, natse natu gandje eitulomo ketegameno lyetu, ngaashi Jesus. Otali ke tu kwathela tu idhidhimike kutya nduno otashi pula shike.

20. Oshike tashi vulu oku ku kwathela wu kale wu na etaloko ewanawa?

²⁰ Jehova oku wete eitaalo lyoye neidhidhimiko lyoye. (Jesaja 30:18; lesha Maleaki 3:10.) Oku uvaneka kutya ote “ku pe shoka wa yuulukwa.” (Episalomi 37:4) Onkee ano, kala to gandja eitulomo ketegameno lyoye. Satana okwa hala wu kale kuu na etegameno nowu kale wu uvite kutya  omauvaneko gaJehova kage na siku ga gwanithwe. Ihe ino etha omadhiladhilo omawinayi ga tya ngaaka ga mene omidhi momutima gwoye. Ngele owu wete wa fa wa limbililwa etegameno lyoye, pula Jehova e ku kwathele. Dhimbulukwa oohapu ndhoka dhi li mAafilippi 4:6, 7, tadhi ti: “Inamu kala mu na nando oshimpwiyu shasha, ihe oompumbwe dheni dhi tseyithileni Kalunga momagalikano geni agehe. Ihe indileni aluhe nomwenyo gu udha ehambelelo. Nombili yaKalunga, ndjoka yi vule uunongo auhe wopantu, otayi gamene oomwenyo dheni nomadhiladhilo geni muKristus Jesus.”

21, 22. (a) Elalakano lyaJehova li na ko nasha nevi olini? (b) Owa tokola toko okuninga shike?

²¹ Kala ho kongo ethimbo wu tedhatedhe konakuyiwa ombwanawa. Masiku, kombanda yevi otaku kala owala mboka haya longele Jehova. (Ehololo 7:9, 14) Dhiladhila owala konkalamwenyo muuyuni uupe! Otayi ka kala ya dhenga mbanda. Satana, oompwidhuli dhe nosho wo aakolokoshi ayehe, itaya ka kala po we. Ito ka ehama we noito ka sa. Pehala lyaashono, esiku kehe oto ka kala ho penduka wu na oonkondo nowa nyanyukwa. Aantu ayehe otaya ka longela kumwe, ya ninge evi oparadisa. Ayehe otaya ka kala ye na iikulya iiwanawa nomahala gokukala ga gamenwa. Aantu itaya ka kala we ye na onyanya nenge aageyentu, ihe otaya ka kala ye na ombili nooyakwawo. Mokweendela ko kwethimbo, aantu ayehe kombanda yevi otaya ka kala “memanguluko nomeadhimo lyaana yaKalunga.” — Aaroma 8:21.

²² Jehova okwa hala wu kale kuume ke kopothingo. Onkee ano, ninga ngaashi to vulu wu vulike kuye nowu hedhe popi lela naye, esiku kehe. Atuheni natu ikalekeni mohole yaKalunga sigo aluhe. — Judas 21.