1, 2. Etango otali ulike ngiini oonkondo dhaJehova dhokushita?

OSHIKE ho ningi ngele to huhulukwa pomulilo kongulohi ku na uutalala? Oho yalaleke iikaha yoye komulilo oshinano she eleka opo wu uve uupyu. Ngele owa hedha mugo unene otagu ku fike. Ngele owa hedha unene kokule nago, ombepo ontalala yokongulohi otayi ku sitha uutalala.

² Opu na “omulilo” ngoka hagu tu pupyaleke esiku kehe. “Omulilo” ngoka ogwo etango ndyoka li li kokule natse uule wookilometa omamiliyona 150. * Etango oli na oonkondo oonene nohatu vulu okuuva uupyu walyo nando oli li kokule natse. Ihe evi ohali dhingoloka onzo ndjoka yuupyu li li kokule nalyo oshinano she eleka. Ando evi olya li unene popepi netango, ando omeya otaga pwine po nziya, niishewe ando olya li kokule nalyo, ando omeya otaga ningi iikangwa. Onkee ano, ando etango olya li unene kokule nevi nenge popepi unene nalyo, ando kevi itaku vulu okukala oshinima shi na omwenyo. Kakele owala kokukaleka iinima yi na omwenyo kombanda yevi nokukala lihokitha, uuyelele walyo owa yela nawa nohawu minikile nawa.—Omuuvithi 11:7.

3. Etango otali koleke oshili ya simana yini?

³ Nonando aantu oye na omwenyo omolwetango, oyendji oye li tala ko li li oshinima showala. Kungawo, oya nyengwa okumona shoka etango tali tu longo. Ombiimbeli otayi popi kombinga yaJehova tayi ti: “Owa tula ko etango nomwedhi.” (Episalomi 74:16) Eeno, etango otali simanekitha Jehova “omushiti gwegulu nogwevi.” (Episalomi 19:1, 146:6) Etango  oli li owala limwe lyomomaminikilo ogendjigendji ngoka tage tu longo kombinga yoonkondo oonene dhaJehova dhokushita. Natu konakoneni nawa omaminikilo gamwe ngoka nokugandja eitulomo kopulanete yetu, evi nokiinamwenyo mbyoka yi li ko.

4, 5. Etango oli na oonkondo nuunene wu thike peni, noli thike peni oku li yelekanitha noonyothi dhilwe?

⁴ Etango nalyo onyothi nohali monika lya fa enene li vule oonyothi ndhoka hatu mono uusiku, molwaashoka oli li popepi oku li yelekanitha noonyothi oonkwawo. Oli na oonkondo dhi thike peni? Ehuku lyalyo oli na uupyu wu thike poodigili Celsius omamiliyona 15. Ando owa li to vulu okukutha okapambu kehuku lyetango ke thike pokamutse kokanetse e to ka tula kombanda yevi, ito ka vula okuthikama oshinano shookilometa 140 okuza mpoka ke li. Osekonde kehe, ohali gandja oonkondo dhi thike pomitopelo dhoomboma dholute omamiliyona omathele ogendji.

⁵ Etango enene noonkondo noopulanete dhi li 1 300 000 dhi  thike pevi otadhi vulu okugwana mulyo. Mbela etango enene li vule oonyothi adhihe? Aawe, aanongononi yoonyothi otaya ti kutya etango oli vulike koonyothi dhilwe. Omuyapostoli Paulus okwa nyola kutya ‘mokati koonyothi omu na omayooloko.’ (1 Aakorinto 15:41) Otashi vulika a li kee uvite ko uushili woohapu ndhoka dha nwethwa mo. Opu na onyothi onenenene ndjoka ngele owe yi tula mpoka pu na lela etango, evi otali ka kala meni lyayo. Natango, opu na onyothi yilwe onenenene ndjoka ngele oya tulwa mpoka pu na etango, otayi adha mpoka pu na opulanete Saturn ndjoka yi li kokule noonkondo nevi. Osha li sha kutha oshitukimbepo shoka sha li tashi tuka kondapo yi thike pwaandjoka yoshikuti shondjembo oomvula ne opo shi thike ko.

6. Ombiimbeli otayi ulike ngiini kutya aantu itaya vulu okuyalula oonyothi?

⁶ Kakele kuunene woonyothi, shimwe ishewe shoka tashi  kumitha omwaalu gwadho. Ombiimbeli otayi popi oshili kutya oonyothi itadhi vulu okuyalulwa, ngaashi owala “ehekevi lyomooha dhefuta” ihaali vulu okuyalulwa. (Jeremia 33:22) Oohapu ndhika otadhi ulike kutya opu na oonyothi odhindji, dhi vulithe pwaandhoka hatu mono. Andola omunyoli gwOmbiimbeli Jeremia okwa li a tala kegulu uusiku nokukambadhala okuyalula oonyothi ndhoka e wete, ando okwa yalula owala oonyothi 3 000 lwaampono molwaashoka odho owala omuntu ta vulu okumona. Omwaalu ngoka otagu vulu owala okuyelekanithwa nomawe gehekevi ga kamininwa meke komuntu. Oshili oyo kutya omwaalu gwoonyothi, evi to yele. * Olye ta vulu oku dhi yalula?

7. (a) Momulalawili gwetu gwekaladhidhi omu na oonyothi ngapi, noshike tashi ulike kutya omwaalu ngoka ogundji? (Tala enyolo lyopevi.) (b) Omolwashike shi li oshidhigu kaanongononi yoonyothi okuyalula omilalawili, naashika otashi tu longo shike kombinga yoonkondo dhaJehova dhokushita?

⁷ Jesaja 40:26 ota yamukula ta ti: “Tala owala utale kegulu! Olye a shiti oonyothi ndhoka wa tala? Oye ngoka te dhi enditha dha fa etangakwiita. Adhihe okwe dhi tseya nawa, nokehe yimwe ote yi tumbula kedhina lyayo!” Episalomi 147:4 otali ti: “Otu utha omwaalu gwoonyothi.” “Omwaalu gwoonyothi” ogu thike peni? Epulo ndyoka edhigu okuyamukulwa. Aanongononi yoonyothi oya tengeneka kutya momulalawili gwetu hagu ithanwa ekaladhidhi omu na oonyothi dhi vulithe pomabiliyona 100. * Ihe omulalawili gwetu ogwo owala gumwe gwomomilalawili odhindji, nodhindji dhomudho odhi na nokuli oonyothi omikimiki. Omilalawili odhi li ngapi? Aanongononi  yoonyothi yamwe oya tengeneka kutya odhi li omabiliyona 50. Yamwe oya yalula kutya otashi vulika dhi thike pomabiliyona 125. Ngele aantu oya nyengwa okuyalula kutya omilalawili moka mu na oonyothi odhi li naanaa ngapi, itaya ka vula okuyalula oonyothi omabiliyona ndhoka dhi li mudho. Ihe Jehova omwaalu ngoka oku gu shi. Kakele kaashono, onyothi kehe okwe yi luka edhina.

8. (a) Omilalawili odhi na uunene wu thike peni? (b) Jehova oha wilike ngiini omainyengo gomaminikilo gokegulu?

⁸ Etilosimaneko lyetu otali koko ngele ohatu tedhatedha kuunene womilalawili. Uuyelele ohawu ende kondapo yi thike pookilometa 300 000 mowili. Ihe otashi pula uuyelele mboka omimvo 100 000 okutaakana omulalawili gwetu. Omilalawili dhimwe ominenenene. Ombiimbeli otayi ti kutya Jehova okwa “yala” omagulu omanenenene ngaashi othaila. (Episalomi 104:2) Oye ha wilike omainyengo giinima mbyoka. Iinima ayihe iishona ngaashi ontsi yomewangandjo nosho wo omilalawili ominenenene ohayi inyenge koompango ndhoka dha tulwa po kuKalunga. (Job 38:31-33) Aanongononi ohaya faathanitha okwiinyenga kwomaminikilo gokegulu naandanisi yoongalo omanyakwa. Dhiladhila kOmushiti gwiinima mbyoka. Mbela iho kala wa kumwa sho Kalunga e na oonkondo dhokushita dhi thike mpoka?

9, 10. Oonkondo dhaJehova odhi iwetikile ngiini metango nomoopulanete ndhoka dhi li momudhingoloko gwalyo, Jupiter, evi nomwedhi?

⁹ Oonkondo dhaJehova dhokushita odhi iwetikile momukalo moka a shiti evi. Okwe li tula nuukeka pehala mpoka tali opalele eshito alihe. Aanongononi yamwe otaya ti kutya komilalawili odhindji itatu vulu okukala ko ngaashi hatu kala kopulanete yetu, evi. Osha yela kutya momulalawili gwetu itamu vulu okukala iinima yi na omwenyo, molwaashoka pokati kago opu udha oonyothi odhindji noonkondo. Opu na uunene oonte dhetango neipumomumwe lyoonyothi olindji. Omilalawili odhindji kadhi na iinima mbyoka ya pumbiwa  okukaleka po onkalamwenyo. Etango noopulanete ndhoka dhi li momudhingoloko gwalyo oyi li pokuma tapu opalele.

¹⁰ Oshi li nawa sho evi li li kokule netango opo li vule okugamenwa kopulanete hayi ithanwa Jupiter. Oyi vule evi lwiikando omayovi noyi na oonkondo oonene hadhi hili iinima mewangandjo. Oshizemo? Ohayi thipi nokunana iinima mbyoka hayi tuka mewangandjo kondapo onene. Aanongononi oye shi mona kutya andola kapwa li o-Jupiter, ando oonyothi odhindji ndhoka hadhi tokoka kegulu nodha nika oshiponga ando ohadhi gwile kevi lwiikando yi vulithe 10 000. Eminikilo limwe ishewe ndyoka li li popepi nevi, omwedhi. Ogu hokitha okutala nohagu “minikile uusiku” nokukwathela evi li kale tali dhingoloka mondjila yalyo nopwaahe na okutengauka. Shoka osho hashi ningitha omathimbo ga kale taga lunduluka omumvo kehe, nohashi ningitha kevi ku kale iinima yi na omwenyo.

11. Ewangandjombepo ohali gamene ngiini evi koonte dhetango?

¹¹ Oonkondo dhaJehova dhokushita odhi iwetikile miinima ayihe yi li kombanda yevi. Dhiladhila owala kewangandjombepo ndyoka hali tu gamene. Oonte dhetango dhimwe oombwanawa nadhimwe odha nika oshiponga. Ohapi mewangandjombepo ndyoka lya shiga kegulu ohayi lundululile oonte ndhoka dha nika oshiponga mo-ozone opo kaadhi thike kevi. Ohapi ohayi kutha oonte ndhoka dha nika oshiponga oonkondo. Odhoshili kutya opulanete yetu oyi na oshiyalo shoku yi gamena.

12. Edhingoloko lyomeya otali ulike ngiini kutya Jehova oku na oonkondo dhokushita?

¹² Ngoka ogo owala omukalo gumwe moka ewangandjombepo ndyoka lya thikama po momiku odhindji dha yoolokathana hali gamene iishitwa yokevi nenge mbyoka yi li popepi nevi. Omukalo moka omeya hagi idhingoloka otagu kumitha noonkondo. Omumvo kehe etango ohali kutha omeya mefuta ngoka haga lundulukile momuku tagu udha andola ondama yuule wookilometa dhi vulithe 70 okuuka pombanda, momutamo nomoshinano. Omuku ngoka ohagu ningi  iikogo mbyoka hayi falwa kokule kombepo yomewangandjo. Omeya ngoka ga dhindwa noga yela nawa ogo haga galukile kevi molupe lwomvula, lwolumi niikangwameya opo tu kale natango tu na omeya. Oshi li naanaa ngaashi Omuuvithi 1:7 ta ti: “Omilonga adhihe otadhi tondokele mefuta, ihe efuta itali udha nando; kehala hoka omilonga tadhi tondokele, otadhi tondokele ko aluhe.” Jehova oye owala ta vulu okushita edhingoloko lyomeya lya tya ngaaka.

13. Iimeno mbyoka tu wete kevi otayi tu ulukile ngiini kutya Omushiti oku na oonkondo?

¹³ Iinima mbyoka yi na omwenyo otayi ulike kutya Omushiti oku na oonkondo. Oonkondo dhaJehova dhokushita otadhi imonikila momiti omileeleka dhi vulithe etungo lyomala 30 ga londothana ndhoka a shita nomuumeno uushonashona womefuta hawu monika owala nethano lyokunenepeka mboka hawu tu pe ohapi. Mevi omu na uuyoka, omagege noombakiteli, niinima mbyoka ohayi longele kumwe momikalo dha kitakana opo yi kwathele iimeno yi koke. Oshe eleka sho Ombiimbeli tayi popi kutya evi ohali kutitha nenge oli na oonkondo dhokumenitha.—Genesis 4:12.

14. Oatoma oyi na oonkondo dhi thike peni?

¹⁴ Osha yela kutya Jehova okwa “shiti evi koonkondo dhe.” (Jeremia 10:12) Oonkondo dhe odhi iwetikile wo nomuunima uushonashona mboka a shita, ngaashi ooatoma. Pashiholelwa, ooatoma omamiliyona nando odhi yalwe dha tegama, uunene wadho itawu ka thika pefufu lyomuntu. Nokuli nonando oatoma oya nenepekwa e tayi kala yi thike petungo lyomala 14 ga londathana, ehuku lyayo otali ka kala li thike owala pewe lyomongwa li li pela etiheyali lyetungo ndyoka. Ihe nando onshona ngaaka oyi na oonkondo oonene hadhi vulu okutopitha iikondjitho yopalute.

15. Jehova okwa longo Job shike sho e mu lombwele iinamwenyo mbyoka ihaayi tekulwa?

¹⁵ Iinamwenyo oyindji mbyoka yi li kombanda yevi otayi ulike wo kutya Jehova oku na oonkondo dhokushita. Episalomi  148 otali popi iinamwenyo oyindji mbyoka hayi hambelele Jehova, novelise 10 otayi popi “iiyamakuti ayihe niimuna.” Opo Jehova u ulike kutya omuntu oku na okusimaneka Omushiti gwe, okwa li a lombwele Job kombinga yiinamwenyo ngaashi onime, ongolo, ompugulu, evukule (nenge ondjambameya) nosho wo Leviatan (nenge ongandu). Oshike Jehova a li a hala okutsa omuthindo? Ngele omuntu oha kala a kuminwa iishitwa mbika iinankondo, iitilithi nohayi nyengana okutekulwa momagumbo, mbela ke na okukala a tila noonkondo Omushiti gwayo?—Job ontopolwa 38-41.

16. Oshike tashi ku kumitha kombinga yiikwamawawa yimwe mbyoka Jehova a shita?

¹⁶ Episalomi 148:10 otali popi wo ‘oondhila.’ Dhiladhila owala komaludhi goondhila. Jehova okwa lombwele Job ompo ndjoka hayi “yolo onkambe nomukayili.” Ompo ihayi tuka noyi na uule woometa 2,5 nohayi vulu okumatuka oshinano shookilometa 65 mowili, nelaalela lyenta lyayo limwe oli na uule woometa 4,5. (Job 39:13, 18) Oondhila dhomomeya dhimwe ohadhi kala tadhi tengele uule wethimbo mombepo kombanda yefuta. Ondhila kehe oyi na omawawa ge na uule woometa 3 lwaampono. Ohadhi vulu okutengela uule woowili tadhi ifaalele noinaadhi papama. Kakele koondhila ndhoka, opu na alweela mongongo okadhila kamwe komuudhila mboka uushona muuyuni. Opu na alweela gumwe e na uule woosendimeta 5. Alweela oha vulu okupapama lwiikando 80 mosekonde. Oha adhima noha vulu okutengela mombanda a fa edhagadhaga noha vulu wo okutuka ta shuna monima.

17. Ekiipolosa oli na uunene wu thike peni, notu na okuthika pehulithodhiladhilo lini sho tatu tedhatedha kiinamwenyo mbyoka Jehova a shita?

¹⁷ Episalomi 148:7 otali ti kutya “iikwameya iinene” nayi hambelele Jehova. Aantu oyendji oyi itaala kutya ekiipolosa (blue whale) olyo oshinamwenyo oshinene shi vule iinamwenyo ayihe muuyuni. ‘Oshikwameya’ shika oshi na uule woometa 30 nenge dhi vulithe po. Oshiviha shohi ndjika oshi thike poondjamba 30. Elaka lyayo oli na oshiviha shi thike pondjamba yimwe. Omutima gwayo ogu thike pokatuukala. Omutima  gwayo ohagu dhenge owala lwiikando omugoyi momunute gumwe, inagu fa gwaalweela ngoka hagu dhenge lwiikando 1 200 momunute. Ohi ndjoka oyi na omuthipa gumwe gwombinzi omunene moka okanona okashona taka vulu okukookaya. Omitima dhetu otadhi tu inyengitha tu popye oohapu dhEpisalomi ndhoka tadhi ti: “Shaa shoka shi na omwenyo, hambelela OMUWA!”—Episalomi 150:6.

18, 19. Iinima mbyoka Jehova a shita yi na omwenyo oya yoolokathana ngiini, neshito otali tu longo shike kombinga yuunamapangelo we?

¹⁸ Oshike tatu ilongo kunkene Jehova ha longitha oonkondo dhe dhokushita? Ohashi tu kumitha okutala kiishitwa yaJehova ya yoolokathana. Omupisalomi gumwe okwa ti: “OMUWA, owa shiti iinima oyindji! . . . Evi olyu udha iishitwa yoye.” (Episalomi 104:24) Oohapu ndhoka odhoshili. Aanongononi yiinima yi na omwenyo yamwe oya ti kutya kevi oku na iishitwa ya konda pomamiliyona 10, yamwe oya ti omamiliyona 30 nenge yi vulithe po. Omapopyo gawo itaga tsu kumwe. Aantu oonkulungu ohashi vulika ya vulwe okutota po iinima iipe. Mepingathano naashoka, Jehova oku na oonkondo okutota po nokushita iinima iipe ya yoolokathana.

¹⁹ Omukalo ngoka Jehova ha longitha oonkondo dhe dhokushita otagu tu longo kombinga yuunamapangelo we. Oshitya “Omushiti” otashi mu yoolola ko kiinima ayihe mbyoka yi li  meshito, molwaashoka ayihe ‘iishitwa.’ Nokuli mOmbiimbeli Omwana epona lyaJehova ngoka a longo e li “engomba” pethimbo lyeshito, ina popiwa mo nando e li Omushiti nenge e thike puye. (Omayeletumbulo 8:30; Mateus 19:4) Pehala lyaashoka, oye ‘omutango gwiishitwa ayihe.’ (Aakolossa 1:15) Jehova oku na uuthemba wokupangela iishitwa ayihe molwaashoka oye Omushiti gwayo.—Aaroma 1:20; Ehololo 4:11.

20. Omeityo lini Jehova a vululukwa po sho a mana okushita evi?

²⁰ Mbela Jehova okwa mana okulongitha oonkondo dhe dhokushita? Ombiimbeli otayi popi kutya sho a mana iilonga ye yokushita mesiku etihamano, ‘okwa vululukwa mesiku etiheyali kiilonga ye ayihe yeshito.’ (Genesis 2:2) Paulus oku ulike kutya “esiku” etiheyali otali ka kala uule woomvula eyovi, molwaashoka oli na okutsikila sigo opethimbo lye. (Aahebeli 4:3-6) Ihe mbela oshitya ‘evululuko’ otashi ti kutya Jehova okwa li e etha okulonga thiluthilu? Hasho, ye iha mana okulonga. (Episalomi 92:4; Johannes 5:17) Onkee ano, okuvululukwa kwe hoka taku popiwa otaku ulike kehulilo lyiilonga ye sho a mana okushita evi. Iilonga ye yokugwanitha po elalakano lye otayi tsikile nopwaahe na okuyiwa moshipala. Iilonga mbyoka oya kwatela mo Omanyolo Omayapuki ga nwethwa mo. Oya kwatela mo wo ‘eshito epe’ ndyoka tali ka kundathanwa mOntopolwa 19.—2 Aakorinto 5:17.

21. Ongiini oonkondo dhaJehova dhokushita tadhi kala nokukumitha aantu aadhiginini sigo aluhe?

²¹ Ngele esiku lyaJehova lyokuvululukwa lya thiki, ota ka vula okutya iilonga ye ayihe kombanda yevi oyo “opala,” ngaashi e shi popile pehulilo lyesiku etihamano sho a li ta shiti. (Genesis 1:31) Omukalo moka ta ka longitha oonkondo dhe oonenenene dhokushita otatu ke gu mona monakuyiwa. Natu kale nuushili kutya oonkondo dhe dhokushita onkene ngaa tadhi kala noku tu kumitha. Otatu ki ilonga oshindji kombinga yaJehova okupitila meshito sigo aluhe. (Omuuvithi 3:11) Shi thike ngaa mpoka tatu ilongo kombinga yOmushiti gwetu Omunenenene, opo ngaa pu thike etilosimaneko lyetu tali koko nokuhedha kwetu lela popepi naye.