1. Aantu inaaya gwanenena ohaya yulwa nuupu komwigo gwomonanguwi guni?

OMUTOTI gwuutewo ngoka a li ko methelemimvo eti-19 okwa popi oshiponga shokulongitha oonkondopangelo nayi a ti: “Opu na omwigo gwomonanguwi ngoka hagu yulu ayehe mboka ye na oonkondopangelo.” Molwaashoka atuheni inatu gwanenena, ohatu vulu okuya momwigo ngoka nuupu. Ondjokonona ayihe oye shi ulika kutya ‘omuntu oha pangele mukwawo noku mu pangelela oshiponga.’ (Omuuvithi 8:9, OB-1954) Aantu oyendji otaya mono iihuna kunena molwaashoka mboka ye na oonkondopangelo itaye dhi longitha pahole.

2, 3. (a) Oshike oshindhindhilikwedhi shi na ko na sha nankene Jehova ha longitha oonkondo dhe? (b) Oonkondo dhetu otashi vulika dhi kale dha kwatela mo shike, notu na oku dhi longitha ngiini?

² Mbela kashi shi oshindhindhilikwedhi sho Jehova Kalunga ngoka e na oonkondo inaadhi ngambekwa, he dhi longitha aluhe nawa? Ngaashi twe shi mona moontopolwa dha tetekele, ohe dhi longitha okushita, okuhanagula, okugamena nokutungulula, naayihe mbika oyi li metsokumwe nelalakano lye. Uuna tatu tedhatedha nkene he dhi longitha otashi ke tu inyengitha tu hedhe popepi naye. Shoka otashi tu ladhipike wo tu ‘holele Kalunga’ mokulongitha oonkondo dhetu. (Aaefeso 5:1) Ihe mbela tse tu li aantu yowala, otu na oonkondo dhi thike peni?

³ Natu dhimbulukwe kutya aantu otwa shitwa ‘oshifetha shaKalunga.’ (Genesis 1:26, 27) Natse otu na oonkondo, ihe odha ngambekwa. Oonkondo dhetu otashi vulika dhi kale dha kwatela mo okupondola miinima yontumba, okulonga, okupangela yalwe, okunwetha mo yalwe, unene tuu mboka ye tu hole notashi vulika wo dhi kale dha kwatela mo oonkondo dhopalutu nenge iiniwe yetu. Omupisalomi okwa popi Jehova a ti:  “Ongoye oluthithiya lwomwenyo.” (Episalomi 36:9) Jehova oye onzo yoonkondo ndhoka tu na, kutya nduno otu shi shi nenge katu shi shi. Onkee ano, otwa hala oku dhi longitha momukalo ngoka tagu mu nyanyudha. Ongiini tatu vulu oku shi ninga?

4, 5. (a) Opo tu longithe nawa oonkondo dhetu otwa pumbwa uukwatya wa simana wuni, na Jehova okwe tu tulila po oshiholelwa shini moshinima shika? (b) Ohole ohayi tu kwathele ngiini tu longithe nawa oonkondo dhetu?

⁴ Otwa pumbwa ohole opo tu longithe nawa oonkondo dhetu. Kalunga okwe tu tulila po oshiholelwa moshinima shika. Dhimbulukwa omaukwatya ge ngoka ga popiwa mOntopolwa 1 ngaashi oonkondo, uuyuuki, uunongo nohole. Uukwatya wuni womomaukwatya ngoka gane wa dhenga mbanda? Ohole. Johannes gwotango 4:8 ota ti: “Kalunga oye ohole.” Eeno, ohole oyo uukwatya we wa simanenena nohawu nwetha mo kehe shimwe shoka ta ningi. Ohole oyo hayi mu inyengitha a longithe nawa oonkondo dhe naashika ohashi etele mboka ye mu hole uuwanawa.

⁵ Ohole ohayi tu kwathele wo tu longithe oonkondo dhetu momukalo gu uka. Ombiimbeli otayi tu lombwele kutya ohole oyi na “olukeno,” yo “ihayi kongo shayo yene.” (1 Aakorinto 13:4, 5) Onkee ano, ohole itayi ke tu pitika tu ungaunge nonyanya naamboka ye li mepangelo lyetu. Pehala lyaashoka, otu na okuungaunga nayalwe nesimaneko nokupititha komeho oompumbwe dhawo.—Aafilippi 2:3, 4.

6, 7. (a) Etilokalunga oshike, nomolwashike tali tu kwathele tu henuke okulongitha nayi oonkondo dhetu? (b) Yelitha eyooloko pokati kokuyemateka Kalunga nohole yoku mu hola.

⁶ Ohole oya pambathana netilokalunga, uukwatya mboka hawu tu kwathele kaatu longithe nayi oonkondo dhetu. Etilokalunga olya simana shi thike peni? Omayeletumbulo 16:6 otaga ti: ‘Omolwetilo okutila OMUWA, omuntu ota gamuka kuuwinayi.’ Okulongitha nayi oonkondo oku li omukalo omwiinayi gwomomikalo ndhoka tu na okuhenuka. Etilokalunga otali vulu oku tu keelela twaaha ninge nayi mboka ye li mepangelo  lyetu. Ngiini mbela? Otu shi kutya otatu ki ihokolola kuKalunga shi na ko nasha naantu mboka ye li mepangelo lyetu. (Nehemia 5:1-7, 15) Ihe etilokalunga olya kwatela mo oshindji shi vulithe mpoka. Uutumbulilo “tila” melaka lyopetameko olundji owa longithwa okuulika esimaneko lyomuule netilokalunga. Ombiimbeli oya kwatakanitha etilo nohole yokuhola Kalunga. (Deuteronomium 10:12, 13) Etilosimaneko ndika olya kwatela mo okwaaha yemateka Kalunga, hamolwaashoka owala twa tila iilanduliko, ihe omolwaashoka tu mu hole shili.

⁷ Oku shi thaneka: Dhiladhila kombinga yekwatathano ewanawa ndyoka hali kala pokati kokamati nahe. Okamati ohaka kala ke wete kutya he oku na ko nasha nako shili noku ka hole. Ihe ohaka kala wo ke shi kutya he okwa hala ka ninge shike, nonokutya ngele oki ihumbata nayi ote ke ka geela. Okamati hoka ihaka kala ka tila he nuumbanda wokukakama. Mepingathano naashoka, oke hole lela he. Ohaka kala ka nyanyukwa okulonga shoka sha hokiwa kuhe. Shika osha faathana netilokalunga. Molwaashoka otu hole Tate yetu gwomegulu, Jehova, ohatu kala twa tila okulonga shoka tashi mu uvitha “nayi.” (Genesis 6:6) Pehala lyaashono, ohatu kala twa halelela okuninga shoka tashi mu nyanyudha. (Omayeletumbulo 27:11) Shika osho molwaashoka hatu kala twa hala okulongitha oonkondo dhetu momukalo gu uka. Natu konakoneni nkene tatu vulu oku shi ninga.

8. (a) Aasamane oye na oonkondopangelo dhini muukwanegumbo, noye na oku dhi longitha ngiini? (b) Omusamane ohu ulike ngiini kutya okwa simaneka omukulukadhi gwe?

⁸ Tango natu kundathaneni kombinga yuukwanegumbo. Aaefeso 5:23 otaya ti: “Omulumentu oku na epitikilo okupangela omukiintu gwe.” Omusamane oku na okulongitha ngiini oonkondopangelo ndhoka a pewa kuKalunga? Ombiimbeli otayi lombwele aasamane kutya mokukalathana kwawo naakiintu yawo, oye na okutseya kutya ‘oya fa iiyuma yeloya, onkee oye na oku ya simaneka.’ (1 Petrus 3:7) Oshityadhina shOshigreka sha tolokwa ‘simaneka’ otashi ti ‘ondilo, ongushu nosho  wo etumbalo.’ Iitya yimwe mbyoka yi na eityo lyoshitya shoka oya tolokwa “omagano” nosho wo “oshilonga oshinene.” (Iilonga 28:10; 1 Petrus 2:7) Omusamane ngoka a simaneka omukulukadhi gwe ite ke mu dhenga nando noite ke mu shundula nenge a kale e mu dhina shoka tashi mu ningitha a kale e uvite kee na oshilonga. Ihe ota ka kala e mu lenga nokwe mu simaneka. Ote ke shi ulika montaneho moohapu nomiilonga nongele ye li oyo ayeke kutya oku na oshilonga kuye. (Omayeletumbulo 31:28) Omusamane ngoka ita ka kala owala e holike nokusimanekwa komukadhi, ihe Kalunga ota ka kala wo e mu hokwa.

9. (a) Omukulukadhi oku na oonkondo dhini muukwanegumbo? (b) Oshike tashi ka kwathela omukulukadhi a longithe uunkulungu we okukwathela omusamane gwe, noshizemo otashi ka kala shike?

⁹ Aakulukadhi oye na wo oonkondo muukwanegumbo. Ombiimbeli otayi popi kombinga yaakulukadhi aatilikalunga mboka ya li ya simaneka uukwamutse waasamane yawo moku ya kwathela ya yande okuninga omatokolo kaage li pandunge. (Genesis 21:9-12; 27:46–28:2) Omukulukadhi otashi vulika a kale ha dhiladhila nawa e vulu omusamane gwe nenge a kale e na uunkulungu wulwe mboka omusamane kee na. Ihe nonando ongaaka, omukulukadhi oku na ‘okuvulika’ komusamane gwe ngaashi ha “vulika kOmuwa.” (Aaefeso 5:22, 33) Ngele oku na elalakano okunyanyudha Kalunga otashi ke mu kwathela a longithe nawa oondunge dhe okwaambidhidha omusamane gwe, pehala lyokukala e mu dhina nenge he mu pangela. ‘Owino yomukiintu’ ohayi mu kwathele a kale ta longele kumwe nomulume nokutunga uukwanegumbo. Omukulukadhi a tya ngaaka oha kala e na ekwatathano ewanawa naKalunga.—Omayeletumbulo 14:1.

10. (a) Kalunga okwa pa aavali oonkondopangelo dhini? (b) Oshitya ‘eputudho’ otashi ti shike, nongiini li na okugandjwa? (Tala wo enyolo lyopevi.)

¹⁰ Aavali nayo oya pewa oonkondopangelo kuKalunga. Ombiimbeli otayi ti: “Aakuluntu, inamu hinda aana yeni noku ya geyitha, ihe ya putudheni ne mu ya kumagidhe paukriste.” (Aaefeso 6:4) PaMbiimbeli oshitya ‘okuputudha’ otashi ti wo “okulonga,  okudheula nokupukulula.” Aanona oya pumbwa eputudho, ewiliko nosho wo okutulilwa po omangambeko opo ya kale nonakuyiwa tayi ti sha. Ombiimbeli oya kwatakanitha oshitya okuputudha nenge okupukulula noshitya ohole. (Omayeletumbulo 13:24) Onkee ano, “olunwa” kalu na nando okulongithwa nonyanya okweehameka okanona pamaiyuvo nenge palutu. * (Omayeletumbulo 22:15; 29:15) Ngele omuvali ta gandja eputudho nonyanya nenge nokwaahe na ohole nena ota longitha nayi oonkondopangelo dhe notashi vulu okudhenga pevi omutima gwomwana. (Aakolossa 3:21) Mepingathano naashono, eputudho li li pandjele tali gandjwa momukalo gu uka otali shilipaleke okanona kutya aavali yako oye ka hole noye na ko nasha nako.

11. Ongiini aanona taya vulu okulongitha nawa oonkondo dhawo?

¹¹ Ongiini aanona taya vulu okulongitha nawa oonkondo dhawo muukwanegumbo? Omayeletumbulo 20:29 otaga ti: “Uulenga waagundjukamati owo oshitima shawo.” Okulongela “Omushiti” oko omukalo dhingi moka aagundjuka taya vulu okulongitha oonkondo dhawo nomatha. (Omuuvithi 12:1) Aagundjuka oye na okudhimbulukwa kutya eihumbato lyawo otali ka guma omaiyuvo gaavali yawo. (Omayeletumbulo 23:24, 25) Ngele aanona ohaya vulika kaavali yawo aatilikalunga nokweenda mondjila yu uka, otaya nyanyudha omitima dhawo. (Aaefeso 6:1) Eihumbato lya tya ngaaka olyo “opalela Kalunga.”—Aakolossa 3:20.

12, 13. (a) Aakuluntugongalo oye na okutala ko ngiini oonkondopangelo ndhoka ye na? (b) Gandja ethaneko nkene aakuluntugongalo taya vulu okuungaunga nonge noshigunda.

¹² Jehova okwa langeka po aakuluntugongalo ya kwatele  komeho megongalo lyopaKriste. (Aahebeli 13:17) Aalumentu mbaka ya pyokoka oye na okulongitha oonkondo ndhoka Kalunga e ya pa mokukwathela nokuhumitha komeho onkalonawa yoshigunda. Mbela okukala omukuluntugongalo otashi ti owu na okupangela ooitaali ooyakweni? Aawe. Aakuluntugongalo oya pumbwa okukala ye na ondjele naaifupipiki. (1 Petrus 5:2, 3) Ombiimbeli otayi ya lombwele tayi ti: “Litheni egongalo lyaKalunga ndyoka e li ilikolele neso lyOmwana.” (Iilonga 20:28) Ndika olyo etompelo lya simana okuungaunga nonge noshilyo kehe shoshigunda.

¹³ Otatu vulu oku shi thaneka ngeyi. Natu tye kuume koye kopothingo okwe ku pula wu tonatele eliko lye ndyoka a lenga. Owu shi kutya okwe li futa iimaliwa oyindji. Mbela ito ku ungaunga nalyo nuukeka? Sha faathana, Kalunga okwa pa aakuluntugongalo oshinakugwanithwa shokutonatela eliko lye ndyoka a lenga, sha hala okutya, egongalo lye ndyoka iilyo yalyo tayi faathanithwa noonzi. (Johannes 21:16, 17) Jehova oku hole oonzi dhe noonkondo, molwaashoka okwe dhi landa nombinzi yi na ondilo yOmwana epona, Jesus Kristus. Jehova okwa futa ondilo omolwoonzi dhe. Aakuluntugongalo aaifupipiki ohaya kaleke oshinima shoka momadhiladhilo nohayu ungaunga nawa noonzi dhe.

14. Elaka oli na oonkondo okuninga shike?

¹⁴ Ombiimbeli otayi ti: “Eso nomwenyo oya kala moonkondo dhelaka.” (Omayeletumbulo 18:21) Odhoshili kutya elaka ohali vulu okweehameka noonkondo. Olye gwomutse inu ulwa nale elaka ewinayi nenge tali mu sitha ohoni? Ihe elaka ohali vulu wo okwaaludha. Omayeletumbulo 12:18 otayi ti: “Elaka lyaanawino olyo ealudho.” Eeno, oohapu oombwanawa notadhi tsu omukumo odha fa omuti tagu aludha omutima. Natu taleni kiiholelwa yimwe.

15, 16. Omomikalo dhini tatu vulu okulongitha elaka tu tse yalwe omukumo?

¹⁵ Jesaja 61:2 (KB) ote tu ladhipike tu “hekeleke ayehe mboka  ya polimana.” Nokuli naapiya yaJehova aadhiginini omathimbo gamwe ohaya vulu okukwatwa kepolimano. Ongiini tatu vulu oku ya kwathela? Oku ya pandula kondandalunde otashi ya kwathele ya mone kutya oye na ongushu momeho gaJehova. Kundathana nayo Omanyolo gOmbiimbeli ngoka tagu ulike kutya Jehova oku na ko nasha naamboka “ya dhengwa pevi” noku hole mboka “ya kanitha etegameno.” (Episalomi 34:18) Uuna tatu longitha oonkondo dhelaka lyetu okuhekeleka yalwe, otatu holele Kalunga ketu ngoka “ha hekeleke oonakupolimana.”—2 Aakorinto 7:6, KB.

¹⁶ Otatu vulu wo okulongitha oonkondo dhelaka lyetu okuladhipika yalwe. Ongiini ngele omwiitaali omukwetu okwa silwa gumwe ngoka e hole? Okupopya oohapu dhohenda ndhoka tadhi ulike kutya otu na ko nasha nayalwe, otaku vulu okuhekeleka ngoka a nika oluhodhi. Mbela opu na omwiitaali a kulupa ngoka e wete kee niwe naye? Otatu vulu oku mu lombwela kutya otu mu hole nohatu pandula oonkambadhala dhe. Mbela opu na gumwe ta kondjo nuuvu woshinamenena? Okupopya naye oohapu dhohenda okupitila mongodhi nenge oshipala noshipala otashi ke mu tsa omukumo. Omushiti gwetu oha  kala a nyanyukwa uuna tatu popi oohapu “oombwanawa tadhi tungu.”—Aaefeso 4:29.

17. Omomukalo guni gwa simana tatu vulu okulongitha elaka lyetu, nomolwashike twa pumbwa oku shi ninga?

¹⁷ Okulongitha elaka lyetu okutseyithila aantu onkundana ombwanawa yUukwaniilwa waKalunga oko omukalo gwa simana noonkondo. Omayeletumbulo 3:27 otaga ti: “Omuntu ino mu tindila eyakulo ewanawa ndyoka to vulu oku li mu yakulitha.” Otu na oshinakugwanithwa shokutseyithila aantu onkundana ombwanawa ndjoka tayi hupitha oomwenyo. Inashu uka tu ngungunine etumwalaka lye endelela ndyoka Jehova e tu pa nehalo ewanawa. (1 Aakorinto 9:16, 22) Mbela Jehova okwa tegelela tu longe iilonga mbika shi thike peni?

18. Jehova okwa tegelela shike kutse?

¹⁸ Ohole yetu yokuhola Jehova ohayi tu inyengitha tu kuthe ombinga pakuudha miilonga yopaKriste. Jehova okwa tegelela tu ninge shi thike peni? Opu na oshinima shimwe shoka a hala tu ningeni atuheni kutya nduno otu li moonkalo dha tya ngiini. Ombiimbeli oye shi popya tayi ti: “Shaa shoka tamu shi longo, shi longeni nomwenyo aguhe.” (Aakolossa 3:23) Jesus okwa popi oshipango oshinene a ti: “Hola Omuwa Kalunga koye komutima gwoye aguhe nokomwenyo gwoye aguhe nokomadhiladhilo goye agehe nonoonkondo dhoye adhihe.” (Markus 12:30) Jehova okwa tegelela kehe gumwe gwomutse a kale e mu hole noku mu longela nomutima aguhe.

19, 20. (a) Ngele omwenyo ogwa kwatela mo omutima, omadhiladhilo noonkondo, omolwashike uukwatya mbuka wa tumbulwa muMarkus 12:30? (b) Okulongela Jehova nomutima aguhe otashi ti shike?

¹⁹ Okulongela Kalunga nomwenyo aguhe osha hala okutya ngiini? Omwenyo otagu ulike komuntu aguhe nokoonkondo dhe adhihe dhopalutu nodhopamadhiladhilo. Ngele omwenyo ogwa kwatela mo omutima, omadhiladhilo noonkondo, omolwashike uukwatya mbuka wa tumbulwa muMarkus 12:30? Natu tale kethaneko. Pethimbo lyOmbiimbeli omuntu okwa li ha vulu okwiilanditha po e li omupika, nokungawo okwa landitha po omwenyo gwe. Ihe omupika otashi vulika kaaha longele mwene gwe nomutima aguhe, tashi vulika a kale itaa longo noonkondo dhe adhihe nonomadhiladhilo ge agehe opo a humithe komeho iinima yamwene gwe. (Aakolossa 3:22) Jesus okwa tumbula omaukwatya galwe ngaka opo a tse omuthindo kutya katu na okweetha po okulongela Kalunga. Okulongela Kalunga nomwenyo aguhe otashi ti kutya okwiigandja tse yene, okulongitha oonkondo dhetu pakuudha ngaashi tatu vulu miilonga ye.

²⁰ Mbela oku mu longela nomutima aguhe otashi ti kutya atuhe otu na okulongitha ethimbo noonkondo dhi thike pamwe muukalele? Hasho nando, molwaashoka oonkalo dhaantu inadhi faathana nosho wo oonkondo dhawo kadhi thike pamwe.  Pashiholelwa, omugundjuka ngoka e na uukolele wopalutu otashi vulika a longithe ethimbo olindji miilonga yokuuvitha e vule omukokele. Omuntu ngoka kee na uukwanegumbo ota vulu okulonga oshindji e vule ngoka e na uukwanegumbo. Natu kale tu na olupandu ngele otu na oonkondo noonkalo dhetu otadhi tu pitike tu longe ethimbo lya gwana muukalele. Inatu hala nando okukala tu na ombepo yokungongota nokwiiyelekanitha nayalwe. (Aaroma 14:10-12) Pehala lyaashono, natu longithe oonkondo dhetu okuladhipika yalwe.

21. Omukalo omwaanawa nogwa simanenena okulongitha oonkondo dhetu oguni?

²¹ Jehova okwe tu tulila po oshiholelwa kamana shokulongitha oonkondo momukalo gu uka. Tu li aantu inaatu gwanenena otwa hala okuninga ngaashi tatu vulu opo tu mu holele. Otatu vulu okulongitha oonkondo dhetu nawa mokuungaunga nesimaneko naamboka ye li mepangelo lyetu. Kakele kaashono, otwa hala okulonga nomwenyo aguhe iilonga yokuhupitha oomwenyo mbyoka Jehova e tu pa. (Aaroma 10:13, 14) Jehova oha kala a nyanyukwa ngele tatu mu longele nomwenyo aguhe. Mbela omutima gwoye ohagu ku inyengitha ngaa wu ninge ngaashi to vulu sho to longele Kalunga omunahole ngoka e shi omangambeko goye? Nguka ogwo awike omukalo omwaanawa nogwa simanenena tatu vulu okulongitha oonkondo dhetu.