OSHITOPOLWA 1
Omushiti okwa li a shitile aantu eviparadisa
Kalunga okwa shiti uuyuni niinima ayihe yi na omwenyo kombanda yevi. Okwa shiti wo omulumentu nomukiintu ya gwanenena, okwe ya tula moshikunino oshiwanawa nokwe ya pe iipango mbyoka ye na okuvulika kuyo
OMBIIMBELI oya tameke noohapu ndhika dha simanenena ndhoka dha tseyika apuhe tadhi ti: “Petameko Kalunga okwa shiti egulu nevi.” (Genesis 1:1) Noohapu ndhika oompu nodhi hokitha, Ombiimbeli otayi tu tseyithile Omuntu ngoka a simanenena mOmanyolo Omayapuki, Jehova Kalunga omunankondo adhihe. Ovelise yotango yOmbiimbeli otayi ulike kutya Kalunga oye Omushiti gwewangandjo enenenene, mwa kwatelwa evi hoka tu li. Oovelise ndhoka tadhi landula ko, otadhi tu yelithile kutya momukokomoko gwethimbo ele ndyoka lya li lyi ithanwa pathaneko omasiku, Kalunga okwa li a tameke oku tu longekidhila evi tu kale ko nokwa shitile ko iinima ayihe iikumithi.
Omuntu oye oshishitwa sha simanenena meshito lyaKalunga alihe lyokombanda yevi. Oshishitwa shika osha shitwa oshifetha shaKalunga, shi na omaukwatya ga fa gaKalunga, ngaashi ohole nuunongo. Kalunga okwa shiti omuntu montsi yevi. Okwe mu luku Adam nokwe mu tula moparadisa, sha hala okutya, oshikunino shaEden. Kalunga oye a toto po oshikunino shoka nokwa menithile mo omiti hadhi imi iiyimati iiwanawa yokuliwa.
Kalunga okwa mono kutya omulumentu okwa pumbwa kuume kopandjokana. Kalunga okwa longitha olupati lwaAdam oku mu shitila omukiintu nokwe eta omukiintu nguka kuAdam a kale omukiintu gwe, nokonima yethimbo Adam omukiintu nguka okwe mu luku Eva. Molwaashoka Adam okwa li a tuntukwa noonkondo sho a pewa omukulukadhi, okwa li a toto okatewo moka a popi ta ti: “Ndika esipa lyomomasipa gandje nonyama yomonyama yandje.” Kalunga okwe shi yelitha a ti: “Omolwashoka omulumentu oku na okuthiga po he nayina e ta kwatathana nomukadhi, oyo notaa ningi onyama yimwe.”—Genesis 2:22-24; 3:20.
Kalunga okwa li a pe Adam naEva iipango iyali. Shotango, okwa li e ya lombwele ya longe evi noku li sila oshimpwiyu, nohugunina oku li udhitha noluvalo lwawo. Oshitiyali, okwe ya lombwele kaaya lye oshiyimati shokomuti gumwe gwomomiti dhomoshikunino shoka oshinenenene, “omuti gwokutseya uuwanawa nuuwinayi.” (Genesis 2:17) Ngele oya kala inaaya vulika, oya li taya ka sa. Kalunga okwa li a pe omulumentu nomukiintu ngoka ompito moku ya pa iipango mbyoka opo yu ulike kutya oye mu taamba ko e li Omupangeli gwawo. Okuvulika kwawo okwa li wo taku ku ulika ohole nolupandu lwawo. Oya li ye na omatompelo ogendji okutaamba ko epangelo lye lyombili. Aantu mboka oya li ya gwanenena kaaye na nando okapuko kasha. Ombiimbeli otayi tu lombwele tayi ti: “Kalunga okwa tala eshito lye alihe nokwe li mono lyo opala lela.”—Genesis 1:31.
