OMUGUNDJUKA Daniel ngoka e na uudhiginini uundhindhilikwedhi okwa li a falwa muupongekwa kuBabilonia manga Jerusalem sha li inaashi hanagulwa po. Daniel nAajuda yakwawo yatatu mboka ya li ya falwa muupongekwa sho uukwaniilwa waJuda wa li wa sindika, oya li ya pewa emanguluko miinima yontumba kepangelo lyaBabilonia. Muule wethimbo alihe ndyoka Daniel a kala muBabilonia, Kalunga okwa li e mu laleka nuuyamba, okwa li nokuli e mu hupitha mekololo lyoonime nokwa li e mu monitha emoniko lyaashoka sha li tashi ka ningwa monakuyiwa. Ehunganeko lyaDaniel lya simanenena olya li tali tsu omuthindo kuMesiasa nepangelo Lye.

Daniel okwa li a lombwelwa kutya uunake Mesiasa te ke ya. Daniel okwa li a lombwelwa kutya uunake oshigwana shaKalunga shi na okukala sha tegelela okuya ‘kwomuwiliki omuhogololwa.’ Shoka osha li tashi ka ningwa konima yiiwikemimvo 69 okuza sho elombwelo lyoku ka tungulula omadhingililokuma gaJerusalem lya gandjwa. Oshiwike shimwe oshi na omasiku gaheyali; omanga oshiwikemimvo shi na oomvula heyali. Elombwelo ndyoka olya li lya gandjwa konima yokusa kwaDaniel mo 455 K.E.N. “Iiwike” 69 oya li ya tameke okukala po okuza mo 483 e ta yi hulile mo 29 E.N. Moshitopolwa tashi landula shoshileshomwa shika, otatu ka mona kutya oshike sha li sha ningwa po momvula ndjoka. Daniel okwa li wo a mono memoniko kutya Mesiasa okwa li ta ka “dhipagwa” opo a kulile aantu muulunde. — Daniel 9:24-26.

Mesiasa okwa li ta ka ninga Omukwaniilwa megulu. Daniel okwa li a mono memoniko ekumithi Mesiasa ngoka ta popiwa mOmbiimbeli “a fa omuntu” ta yi poshipangelapundi shaJehova. Jehova okwa li e mu pe “epangelo, esimano noonkondo dhuukwaniilwa.” Uukwaniilwa mboka otawu ka kala po sigo aluhe. Daniel okwa li wo a mono uuyelele wutuntula kombinga yUukwaniilwa wopaMesiasa kutya Omukwaniilwa ngoka ota ka pangela pamwe nayalwe mboka taya popiwa ye li “aantu yaKalunga gwokombandambanda.” — Daniel 7:13, 14, 27.

Uukwaniilwa mboka otawu ka hanagula po omapangelo agehe gokombanda yevi. Kalunga okwa li a pe Daniel oonkondo opo a vule okufatulula ondjodhi ndjoka ya li ya ngwangwaneke Nebukadnesar, omukwaniilwa gwaBabilonia. Omukwaniilwa okwa li a mono oshiyelekela oshinenenene shi na omutse gwoshingolielela, ontulo nomaako gasho oshisiliveli, oshiya noombwetelo dhasho oshikushu, omagulu gasho osheela oshiluudhe noompadhi dhasho iiyela ya kwatakanithwa mumwe neloya. Emanya enene olya pambuka kondundu e tali dhenge oshiyelekela koompadhi ndhoka dha li inaadhi kola e tali shi nyanyagula po. Daniel okwa yelitha kutya iitopolwa yoshiyelekela otayi thaneke omapangelo omanankondo guuyuni ngoka ga kala nokulandulathana okuza kepangelo lyaBabilonia ngoka ta thanekwa komutse gwoshingoli. Daniel okwa li wo a mono memoniko kutya omapangelo ngoka taga ka pangela hugunina uuyuni mbuka wa kolokosha, otaga ka katukilwa onkatu kUukwaniilwa waKalunga. Uukwaniilwa mboka otawu ka nyanyagula po omapangelo agehe gomuuyuni mbuka. Opo nduno otawu ka pangela sigo aluhe. — Daniel ontopolwa 2.

Daniel ngoka a li a kulupa noonkondo, okwa li a kala nomwenyo sigo ta mono okuteka po kwaBabilonia. Omukwaniilwa Kores okwa li a ponokele oshilando ngaashi naanaa aapolofeti ya li ye shi hunganeke. Konima yethimbo efupi, Aajuda oya li ya mangululwa mo muupongekwa pethimbo tuu mpoka konima yoomvula 70 ndhoka dha li dha hunganekwa kutya odho dhi na okupita po okuza sho oshilongo shawo sha mbugalekwa. Konima yaashoka Aajuda oya li ya tungulula Jerusalem nokuningulula otempeli yaJehova kohi yewiliko lyaapangeli, aasaaseri nosho wo aapolofeti aadhiginini. Ihe nando ongaaka, oshike sha li tashi ka ningwa po pehulilo lyoomvula ndhoka 483?

— Uuyelele moshitopolwa shika owa kankamena kembo lyaDaniel.