1, 2. Openi tatu vulu okwaadha egameno kunena?

KALA ando wa fa wu iwete to ende mombepo yoshikungulu. Egulu olya luudha, ko oku na oombadhi nomindundumo. Nziya omvula oya tameke okuloka. Sho to kambadhala okukonga ehala lyokwoondama, ito ka kala tuu wu uvite nawa ngele owi itsu po ehala li li nawa nolya gamenwa!

² Otu li monkalo ya faathana kunena. Oonkalo dhuuyuni otadhi ende tadhi nayipala. Otashi vulika wu kale to ipula kutya ‘openi to vulu okwaadha egameno?’ Omupisalomi gumwe okwa nyola kombinga yaJehova a ti: “Ongoye omupopili nomugameni gwandje. Ongoye Kalunga kandje, nde ku inekela.” (Episalomi 91:2) Jehova ota vulu oku tu kwathela momaupyakadhi getu. Ote tu pe wo etegameno ewanawa lyonakuyiwa.

3. Ongiini tatu vulu okuninga Jehova egameno lyetu?

³ Ongiini Jehova ta vulu oku tu gamena? Ota vulu oku tu kwathela tu ungaunge nuupyakadhi kehe. Oku na oonkondo e vule kehe gumwe ngoka ta kambadhala oku tu etela uupyakadhi. Nonando otu ningilwe oshinima oshiwinayi shi thike peni ngashingeyi, otu shi shi kutya Jehova ote ke shi kutha po monakuyiwa. Ombiimbeli otayi tu ladhipike tu “ikaleke mohole yaKalunga.” (Judas 21) Otwa pumbwa okukala popepi naJehova, opo e tu kwathe momathimbo omadhigu. Ongiini tatu vulu oku shi ninga?

4, 5. Ongiini Jehova e tu ulukila ohole?

⁴ Opo tu kale popepi naJehova, otu na okutseya kutya  oku tu hole noonkondo. Otu na okudhiladhila kukehe shimwe shoka e tu ningila. Okwe tu pa evi ewanawa li na iimeno niinamwenyo nosho wo iikulya nomeya. Okwe tu longa edhina lye nomaukwatya ge omawanawa okupitila mOmbiimbeli. Kakele kaayihe mbyono, opu na oshinima shilwe sha simanenena. Oshinima shoka osho ohole ye ndjoka e tu ulukila, sho a tumu Omwana, Jesus, kombanda yevi, opo e tu sile. (Johannes 3:16) Omolwekuliloyambo lyaJesus otu na etegameno ewanawa lyonakuyiwa.

⁵ Jehova okwa dhika po Uukwaniilwa wopaMesiasa, epangelo lyomegulu ndyoka tali ka hulitha po okumona iihuna akuhe. Uukwaniilwa mboka otawu ka ninga evi oparadisa, moka aantu ayehe taya kala ye na ombili noya nyanyukwa sigo aluhe. (Episalomi 37:29) Jehova okwe tu ulukila ohole, sho e tu longa nkene tu na okukala nonkalamwenyo ombwanawa ngashingeyi. Ote tu hiya wo tu mu galikane. Okwi ilongekidha okuyamukula omagalikano getu. Oku ulukila kehe gumwe gwomutse ohole.

6. Ohole yaJehova ohayi tu inyengitha tu ninge shike?

⁶ Ohole yaJehova ohayi tu inyengitha tu ninge shike? Ohayi tu inyengitha tu mu pandule molwiinima ayihe mbyoka e tu ningila. Aantu oyendji kunena kaye na olupandu. Oya faathana naamboka ya li ko pethimbo Jesus a li kombanda yevi. Oshikando shimwe, Jesus okwa li a aludha aanashilundu omulongo, ihe gumwe owala e mu pandula. (Lukas 17:12-17) Otwa hala okukala twa fa omulumentu ngoka a pandula Jesus. Aluhe otwa hala okupandula Jehova.

7. Otu na okukala tu hole Jehova ngiini?

⁷ Otu na okuulika kutya otu hole Jehova. Jesus okwa lombwele aalongwa ye kutya oye na okuhola Jehova nomutima gwawo aguhe, nomwenyo gwawo aguhe nonomadhiladhilo  gawo agehe. (Lesha Mateus 22:37.) Mbela shoka osha hala okutya shike?

8, 9. Ongiini tatu vulu okuulika kutya otu hole Jehova?

⁸ Mbela osha gwana okupopya owala kutya otu hole Jehova? Aawe. Ngele otu hole Jehova nomutima gwetu aguhe, nomwenyo gwetu aguhe nonomadhiladhilo getu agehe, otatu ke shi ulika miilonga yetu. (Mateus 7:16-20) Ombiimbeli otayi ti kutya ngele otu hole Kalunga, otatu ka vulika kiipango ye. Mbela oshidhigu okuvulika kuyo? Aawe, “iipango ye kayi shi iidhigu.” —  Lesha 1 Johannes 5:3.

⁹ Uuna tatu vulika kuJehova, otatu kala twa nyanyukwa notu na onkalamwenyo yi li nawa. (Jesaja 48:17, 18) Oshike tashi tu kwathele tu kale popepi naJehova? Natu tale kutya oshike tashi tu kwathele.

10. Omolwashike wa pumbwa okutsikila okwiilonga kombinga yaJehova?

¹⁰ Ongiini to vulu okuninga kuume kaJehova? Okukonakona Ombiimbeli okwe ku kwathela wu tseye nawa Jehova nowu pange uukuume naye. Uukuume weni naye owa fa omulilo. Ngele owa hala omulilo gu kale gwa tema, owa pumbwa okutula po iikuni. Sha faathana, owa pumbwa okutsikila okwiilonga kombinga yaJehova, opo wu koleke uukuume weni naye. —  Omayeletumbulo 2:1-5.

11. Ombiimbeli otayi vulu oku ku guma ngiini?

¹¹ Sho to tsikile okukonakona Ombiimbeli, oto ki ilonga iinima mbyoka tayi gumu omutima gwoye. Tala nkene aalongwa yaali yaJesus ya li yu uvite, sho Jesus e ya fatululile omahunganeko gOmbiimbeli. Oya ti: “Katwa li tuu tu na ehwamo moomwenyo dhetu, sho a popi natse mondjila nokwe tu fatululile Omanyolo!” —  Lukas 24:32.

12, 13. (a) Oshike tashi vulu okuningilwa ohole yetu yokuhola Kalunga? (b) Ongiini tatu vulu okukaleka ohole yetu yokuhola Jehova ya kola?

 ¹² Ngaashi owala aalongwa ya li ya gumwa komitima, sho yu uvu ko omanyolo, nangoye oto ka kala wu na uulaadhi uuna wu uvite ko Ombiimbeli. Shoka otashi ku kwathele wu tseye Jehova, wu kale wu mu hole, noito ka kala wa hala ohole ndjoka yi talale. —  Mateus 24:12.

¹³ Uuna wa ningi kuume kaKalunga, owa pumbwa okulonga nuudhiginini, wu koleke uukuume weni naye. Owu na okutsikila okwiilonga kombinga ye noyaJesus. Dhiladhila kombinga yaashoka to ilongo nonkene to vulu oku shi tula miilonga. (Johannes 17:3) Uuna to lesha nenge to konakona Ombiimbeli, ipula to ti: ‘Shika otashi longo ndje shike kombinga yaJehova Kalunga? Omolwashike ndi na okukala ndi mu hole nomutima gwandje aguhe nonomwenyo gwandje aguhe?’ —  1 Timoteus 4:15.

14. Egalikano otali koleke ngiini ohole yetu yokuhola Jehova?

 ¹⁴ Ookuume kopothingo ohaya popi aluhe, naashika ohashi koleke uukuume wawo. Momukalo gwa faathana, uuna tatu popi naJehova aluhe megalikano, otashi koleke ohole yetu yoku mu hola. (Lesha 1 Aatessalonika 5:17.) Egalikano omagano ge na ondilo ga za kuTate yetu gwomegulu. Otu na aluhe okukala hatu galikana tashi zi komutima. (Episalomi 62:8) Katu na okwiilonga omagalikano momutse, ihe otu na okupopya tashi zi komutima. Ngele otwa tsikile okukonakona Ombiimbeli, ohole yetu yokuhola Jehova otayi kolo.

15, 16. Owa tala ko ngiini iilonga yokuuvitha?

¹⁵ Ngele otwa hala okukala popepi naJehova, otu na wo okukala hatu lombwele aantu shoka twi itaala. Oshi li uuthembahenda uunene okulombwela aantu kombinga yaJehova. (Lukas 1:74) Oshinakugwanithwa shika Jesus okwe shi pa Aakriste ayehe. Atuheni otu na okuuvitha onkundana ombwanawa kombinga yUukwaniilwa waKalunga. Mbela owe shi ninga nale? —  Mateus 24:14; 28:19, 20.

¹⁶ Omuyapostoli Paulus okwa li u uvite kutya oshilonga shokuuvitha oshi na ongushu lela. Okwa li e shi ithana “uuyamba.” (2 Aakorinto 4:7) Okulombwela aantu kombinga yaJehova nelalakano lye, oshilonga sha simanenena. Oshi li omukalo omwaanawa gwoku mu longela nokwa lenga shoka ho mu ningile. (Aahebeli 6:10) Okuuvitha otaku vulu wo oku ku etela uuwanawa nosho wo mboka taye ku pulakene. Otaku mu kwathele wo amuhe mu hedhe popepyeelela naJehova ne mu ka mone omwenyo gwaaluhe. (Lesha 1 Aakorinto 15:58.) Mbela opu na ngaa iilonga yilwe tayi vulu oku ku etela enyanyu yi vule okuuvitha?

17. Omolwashike iilonga yokuuvitha ye endelela?

 ¹⁷ Iilonga yokuuvitha oye endelela. Otu na ‘okuuvitha nuudhiginini.’ (2 Timoteus 4:2) Aantu oya pumbwa okuuva kombinga yUukwaniilwa waKalunga. Ombiimbeli otayi ti: “Esiku enene lyOmuwa oli li popepi —  popepilela notali ya tali endelele.” (Sefanja 1:14; Habakuk 2:3) Ehulilo itali “dhikala.” Masiku Jehova ota ka hanagula po uuyuni waSatana. Manga shoka inaashi ningwa, aantu oya pumbwa okulondodhwa, opo ya hogolole okulongela Jehova.

18. Omolwashike tu na okulongela Jehova pamwe nAakriste ooyakwetu?

¹⁸ Jehova okwa hala tu mu longele pamwe nAakriste ooyakwetu yashili. Ombiimbeli otayi ti: “Tu silathaneni oshimpwiyu, tu kwathathaneni mokuholathana nomokulongelathana uuwanawa. Inatu etha po okugongala pamwe, ngaashi yamwe haa ningi. Ihe natu kumagidhathaneni, unene sho tu wete esiku lyOmuwa tali hedha popepi.” (Aahebeli 10:24, 25) Otu na okukambadhala tu kale hatu kala pokugongala. Okugongala ohaku tu pe ompito yokuladhipikathana nokutsaathana omukumo.

19. Oshike tashi vulu oku tu kwathela tu kale tu hole ooitaali ooyakwetu?

¹⁹ Ngele oho kala pokugongala, oto ka mona ookuume ye li nawa mboka taye ke ku kwathela wu longele Jehova. Oto ka tsakanena ko nooitaali ooyakweni mboka taya ningi oonkambadhala dhokulongela Jehova. Nayo ohaya ningi omapuko ngaashi ngoye. Uuna ye ga ningi, ya dhimina po. (Lesha Aakolossa 3:13.) Kala aluhe ho tala komaukwatya gawo omawanawa. Ngele to shi ningi, otashi ke ku kwathela wu kale wu ya hole nowu hedhe popepyeelela naJehova.

20, 21. “Okukalamwenyo kwashili” oshike?

²⁰ Jehova okwa hala ookuume ke ayehe ya kale nonkalamwenyo ombwanawa. Ombiimbeli otayi tu lombwele kutya onkalamwenyo monakuyiwa otayi ka kala ya yooloka ko thiluthilu kwaandjoka yokunena.

²¹ Monakuyiwa otatu ka kala nomwenyo sigo aluhe. Itatu ka kala ko owala oomvula 70 nenge 80. Otatu ka nyanyukilwa “omwenyo gwaaluhe” moparadisa ombwanawa, tu na ombili, uukolele nenyanyu. Ombiimbeli otayi shi ithana “okukalamwenyo kwashili.” Jehova okwe tu uvanekela oku tu pa okukalamwenyo kwashili. Otu na okuninga oonkambadhala, opo tu ku ‘imonene.’ —  1 Timoteus 6:12, 19.

22. (a) Ongiini tatu vulu “okwiimonena okukalamwenyo kwashili”? (b) Omolwashike omwenyo gwaaluhe itaatu vulu oku gu mona owala ngeya?

²² Ongiini tatu vulu “okwiimonena okukalamwenyo kwashili”? Otu na “okulonga uuwanawa” ‘nokuninga aayamba yiilonga iiwanawa.’ (1 Timoteus 6:18) Shoka otashi ti kutya otwa pumbwa okutula miilonga shoka tatu ilongo mOmbiimbeli. Okukalamwenyo kwashili itatu ku mono owala ngeya nenge koonkondo dhetu yene. Oku li omagano ga za kuJehova, ngoka ta pe aapiya ye aadhiginini ‘kesilohenda lye.’ (Aaroma 5:15) Tate yetu gwomegulu okwa hala lela oku ga pa aapiya ye aadhiginini.

23. Omolwashike wa pumbwa okuninga ehogololo li li mondjila ngashingeyi?

²³ Ipula ngeyi: ‘Mbela ohandi longele ngaa Kalunga momukalo ngoka a hokwa?’ Ngele owa mono kutya owa pumbwa okuninga omalunduluko, ga ninga nziya. Uuna twi inekela Jehova nohatu ningi ngaashi tatu vulu tu vulike kuye, ota ka kala Omugameni gwetu. Ota ka gamena aapiya ye aadhiginini pomasiku gahugunina guuyuni waSatana.  Ota ka shilipaleka tu kale nomwenyo sigo aluhe moparadisa, ngaashi e shi uvaneka. Oto vulu okumona okukalamwenyo kwashili, ngele owa ningi ehogololo li li mondjila ngashingeyi.