1, 2. Petrus okwa li i inekela kutya aantu yomuKapernaum otaye ki inyenga ngiini sho taya pulakene kuJesus, ihe oshike sha ningwa po?

PETRUS okwa li ta tongolola a limbililwa iipala yaapulakeni yaJesus. Oya li mosinagoga muKapernaum. Egumbo lyaPetrus omo lya li mondoolopa moka, ongeshefa ye yoohi nayo omo ya li moka komunkulofuta gwokuumbangalantu wEfuta lyaGalilea, oyendji yomookuume ke, aatseyikile ye naanangeshefa mboka e shi, nayo omo ya li ya kala. Petrus okwa li i inekela kutya aantu muKapernaum otaya ka dhimbulula wo Jesus kutya oye Mesiasa notaya ka kala ya nyanyukwa okwiilonga kombinga yUukwaniilwa waKalunga kOmulongi Omunenenene a shiga ko. Ihe shoka inashi ningwa.

² Aantu oyendji oya li ye etha po okupulakena. Yamwe oya li taya ngungutula mokule, inaaya hokwa etumwalaka lyaJesus. Shoka osha li shu uvitha Petrus nayi unene, oshoka yamwe yomuyo oya li aalongwa yaJesus. Kaya li we ya nyanyukilwa oshili ompe ndjoka Jesus e ya longo. Ngashingeyi oya li ya yemata noya geya nokuli. Yamwe oya ti kutya oohapu dhaJesus oonkunkutu. Molwaashoka kaya li we ya hala okupulakena oya zi mo mosinagoga e taye etha okulandula Jesus. —  Lesha Johannes 6:60, 66.

3. Petrus eitaalo lye olya li lye mu kwathele a ninge shike lwiikando?

³ Olya li ethimbo edhigu kuPetrus naayapostoli ooyakwawo. Petrus ka li u uvite ko nawa shoka Jesus a li a popi esiku ndyoka. Otashi vulika a li e wete kutya omolwashike oohapu ndhoka tashi vulika dhi geyithe yamwe ngele inadhi fatululwa. Petrus okwa li ta ka ninga po shike? Kasha li oshikando shotango uudhiginini we tawu makelwa nokasha li shahugunina. Natu tale nkene eitaalo lyaPetrus lya li lye mu kwathele a sinde omashongo ngoka nokukala omudhiginini.

4, 5. Jesus okwa li a katuka ngiini momukalo gu li ompinge naashoka aantu ya li ya tegelela?

⁴ Oohapu niilonga yaJesus oya li hayi kumitha Petrus olundji. Omathimbo gamwe Omuwa gwe okwa li ha katuka nokupopya momukalo ngoka tagu tsu ompinge naashoka aantu ya li ya tegelela. Esiku lya tetekela, Jesus okwa paluthile aantu omayuvi pashikumithalonga.  Opo nduno oya li ya hala oku mu ninga omukwaniilwa. Ihe okwa li a kumitha oyendji sho e ya fadhuka po e ta lombwele aalongwa ya ye mowato ya ye kuKapernaum. Sho aalongwa ya li taya dhugu owato uusiku mboka, Jesus okwa li ishewe e ya kumitha sho e ya te ende kombanda yomeya gEfuta lyaGalilea ndyoka lya li lya pindjala, nokwa li a longo Petrus oshiilongomwa sha simana kombinga yeitaalo.

⁵ Esiku lya landula oya mono kutya oongundu dhaantu odha li dhe ya landulile handiya yetale. Ihe aantu kaya li ye ya molwaashoka ya sa ondjala yopambepo, ihe omolwaashono ya li ya hala okumona Jesus, opo e ya paluthe pashikumithalonga. Jesus okwa li e ya ganda omolwombepo yawo yokuhola omaliko. (Joh. 6:25-27) Oonkundathana ndhoka odha ka tsikila mosinagoga muKapernaum moka Jesus a li a popi oshinima inaashi tegelelwa nelalakano lyokulonga aantu oshili ya simana nonando kaya li ompu okuuva ko.

6. Jesus okwa li a longitha ethaneko lini, naapulakeni ye oya li yi inyenge ngiini?

⁶ Jesus ka li a hala aantu ye ye kuye molwaashoka a li ta vulu oku ya palutha. Okwa li a hala ya mone kutya Kalunga ote ke ya pa owala omwenyo gwaaluhe ngele oye na eitaalo mekuliloyambo lyaJesus nohaya landula oshiholelwa she. Okwa li i iyeleke nOmanna, oshikwiila shoka sha li sha kuluka megulu pethimbo lyaMoses. Yamwe sho ye shi tindi, okwa longitha eudhi lya yela nawa, ta yelitha kutya osha pumbiwa ya lye onyama ye nokunwa ombinzi ye, opo ya kale nomwenyo. Sho e dhi popi, aantu oya geye noonkondo. Yamwe oya ti: “Elongo ndika ekukutu unene, olye ta vulu oku li pulakena?” Aalongwa ye oyendji inaya enda we pamwe naye. * —  Joh. 6:48-60, 66.

7, 8. (a) Oshike Petrus a li kee uvite ko kombinga yoshinakugwanithwa shaJesus? (b) Petrus okwa li a yamukula ngiini epulo ndyoka Jesus a pula aayapostoli?

⁷ Petrus okwa li ta ka ninga po shike? Otashi vulika naye a li a kumithwa koohapu dhaJesus. Ka li i itaala natango kutya Jesus oku na okusa, opo a gwanithe po ehalo lyaKalunga. Mbela Petrus okwa li a makelwa kaa landule we Jesus ngaashi aalongwa ooyakwawo mboka haya tengauka ya li ye etha po Jesus esiku ndyoka? Hasho nando, Petrus okwa li e na uukwatya wa simana mboka wa li we mu ningitha a kale a yooloka ko kuyakwawo.

⁸ Jesus okwa tala aayapostoli ye e ta ti: “Ne inamu hala okuya?” (Joh. 6:67) Okwa li ta popi naalongwa ayehe 12, ihe Petrus oye a yamukula, oshoka olundji oye a li ha popi tango manga yakwawo inaaya yamukula. Otashi vulika Petrus oye a li omukuluntu kuyakwawo.  Kutya nduno okwa li ha yamukula molwaashoka oye a li omukuluntu nenge hasho, oye a li ha popile ko ongundu noka li ha kakadhala okupopya shoka ta dhiladhila. Oshikando shino, okwa li ta dhiladhila oohapu ndhika oombwanawa noondhindhilikwedhi, ndhoka tadhi ti: “Omuwa, otatu yi kulye? Ngoye ou na oohapu ndhoka tadhi gandja omwenyo gwaaluhe.” —  Joh. 6:68.

9. Petrus okwa li u ulike ngiini kuJesus kutya ye omudhiginini?

⁹ Mbela oohapu ndhoka inadhi ku guma komutima? Molwaashoka Petrus okwa li i itaala muJesus oshe mu kwathele a kale omudhiginini, uukwatya mboka wa simana noonkondo. Petrus okwa li a mono kutya Jesus oye owala Omuhupithi ngoka Jehova a gandja, noohapu dhe dhi na ko nasha nUukwaniilwa waKalunga otadhi vulu okuhupitha. Petrus okwa li e shi shi kutya nonando opu na iinima mbyoka a li kee uvite ko, ka li e na mpoka ta vulu okuya ngele okwa hala okukala a hokiwa kuKalunga noku ka mona omwenyo gwaaluhe.

10. Otatu vulu okuulika ngiini kunena kutya tse aadhiginini ngaashi Petrus?

¹⁰ Mbela nangoye osho ho kala wu uvite ngaaka? Shinikitha oluhodhi, oyendji kunena ohaya ti oye hole Jesus, ihe ihaye shi ulike. Ngele otwa hala okuulika kutya tse aadhiginini kuKristus, otu na okukala tu hole omalongo ge ngaashi Petrus a li e ga hole. Otu na oku gi ilonga, oku gu uva ko nokuvulika kugo, nonando otage tu kumitha molwaashoka katu ga uvite ko nenge tu wete itaage tu opalele. Otatu ka mona owala omwenyo gwaaluhe ngoka Jesus e tu halela, ngele otu ulike kutya tse aadhiginini. —  Lesha Episalomi 97:10.

11. Jesus okwa li a fala aalongwa ye peni? (Tala wo enyolo lyopevi.)

¹¹ Konima yiiningwanima mbyoka, Jesus okwa yi naayapostoli ye nosho wo yamwe yomaalongwa ye molweendo olule yu uka kuumbangalantu. Ondungu yondundu yaHermon ndjoka ya li hayi kala ya siikilwa kolumi yi li kuumbangalantuelela wEvi lyEuvaneko, omathimbo gamwe oya li hayi vulu okumonika nokomuntu e li pEfuta lyaGalilea. Kashona nakashona, Jesus naalongwa ye oya li taye ende yu uka komikunda dhopopepi naKesarea Filippi noya thiki popepi nondundu yaHermon. * Jesus okwa li a pula aalanduli ye epulo lya simana sho ye li pehala ndika ewanawa mpoka omuntu a li ta vulu okukala e wete oshitopolwa oshinene shokuumbugantu wEvi lyEuvaneko.

12, 13. (a) Omolwashike Jesus a li a pula kutya aantu otaya ti kutya oye lye? (b) Oohapu ndhoka Petrus a lombwele Jesus otadhi ulike ngiini kutya oku na eitaalo lyashili?

¹² Okwa li e ya pula a ti: “Aantu otaa tile ndje ngiini, ongame  lye?” Kala ando wa fa wu wete Petrus a tala nawa Jesus momeho, nokwa li e wete nkene Omuwa gwe e li omunahenda, omunankondo nomunandunge. Jesus okwa li a hala okuuva kutya aantu otaya ti oye lye. Aalongwa ye oye mu yamukula, taya endulula omipopyo dha puka ndhoka tashi vulika ya li hayu uvu kombinga ye. Ihe Jesus okwa li a hala okuuva oshindji. Mbela naalanduli ye yopothingo osho ya li ye mu tala ko ngawo? “Ne otamu tile ndje ngiini, ongame lye?” —  Luk. 9:18-20.

¹³ Natango Petrus oye a yamukula tango. Okwa li a popi sha yela nonuulaadhi shoka sha li shi itaalwa koyendji mboka ya li po. Okwa ti: “Ongoye Omugwayekwa gwaKalunga.” Otashi vulika Jesus a li a nyanyukilwa Petrus nokwa li e mu pandula. Jesus okwa li a dhimbulukitha Petrus kutya Jehova Kalunga oye ha hololele mboka ye na eitaalo lyashili oshili ndjoka ya simana, ihe hamuntu. Petrus okwa li a kwathelwa u uve oshili yimwe ya simana ndjoka Jehova a li e mu hololele kutya Mesiasa nenge Kristus ngoka a kala u uvanekwa nale olye. —  Lesha Mateus 16:16, 17.

14. Jesus okwa li a pe Petrus oshinakugwanithwa shini sha simana?

¹⁴ Kristus oye a popiwa momahunganeko gonale kutya oye emanya ndyoka aatungi ye ekelehi. (Eps. 118:22; Luk. 20:17) Jesus okwa li e na ehunganeko ndyoka momadhiladhilo sho a holola kutya kemanya ndyoka Petrus a popi oko Jehova a li ta ka dhika egongalo. Okwa li a pe Petrus omauthembahenda gontumba ga simana noonkondo megongalo moka. Ka li a pe Petrus ondondo yopombanda yi vule yaayapostoli ooyakwawo, ihe okwa li e mu pe iilonga nenge iinakugwanithwa. Okwa li a pe Petrus “iipatululo yOshilongo” nenge yUukwaniilwa. (Mat. 16:19) Okwa li a pewa uuthembahenda wokupa oongundu ndatu dha yoolokathana etegameno lyokuya mUukwaniilwa waKalunga. Tango Aajuda, taku landula Aasamaria nokonima Aapagani nenge mboka kaaye shi Aajuda.

15. Oshike sha ningitha Petrus a gande Jesus, nokwa li e mu ganda ta ti ngiini?

¹⁵ Ihe Jesus konima yethimbo okwa ti kutya mboka ya pewa oshindji otaya ka pulwa oshindji naPetrus oye gumwe gwomwaamboka taya popiwa. (Luk. 12:48) Jesus okwa tsikile okuholola oshili kombinga yaMesiasa, mwa kwatelwa okuhepekwa kwe neso lye kuJerusalem. Iinima mbyoka oya li yu uvitha Petrus nayi. Petrus okwa kutha Jesus paantu nokwe mu ganda a ti: “Omuwa, shi valelwe, u ningwe ngaaka!” —  Mat. 16:21, 22.

16. Jesus okwa li a pukulula ngiini Petrus, nomayele geni taga kwathele tatu vulu okumona atuheni moohapu dhaJesus?

 ¹⁶ Petrus okwa li e shi ota kwathele Jesus, nomolwaashono tashi vulika eyamukulo lyaJesus lya li lye mu kumitha. Jesus okwa pilamene Petrus e ta taalele kaalongwa yalwe mboka nayo tashi vulika ya li taya dhiladhila sha faathana e ta ti: “Za po pungame, Satana! Ongoye omwigo gwandje, oshoka ito dhiladhila shoka shopaKalunga, ihe ooshoka shopantu.” (Mat. 16:23; Mark. 8:32, 33) Oohapu dhaJesus odhi na omayele tage tu kwathele atuheni. Oshipu komuntu okweetha omadhiladhilo gopantu ga pite komeho ngoka gopaKalunga. Ngele otwe shi ningi nonando otwa li tatu ti otatu ya kwathele, otashi vulika tu ki iyadhe tatu ladhipike omuntu a ninge oshinima shoka tashi nyanyudha Satana pehala lyokunyanyudha Kalunga. Petrus okwa li nduno i inyenge ngiini?

17. Jesus okwa li a hala okutya shike sho a lombwele Petrus a ‘ze po’ puye?

¹⁷ Petrus otashi vulika a li e shi kutya Jesus ka li te mu ula Satana Ondiapoli meityo lyolela. Jesus ka li e etha po omuyapostoli ngoka a li a mono uuwanawa muye, ihe okwa li a pukulula etaloko lye lya puka moshinima shika. Petrus okwa li e na okweetha po okuya Jesus moshipala nokwa li a pumbwa okukala te mu yambidhidha.

18. Petrus okwa li u ulike ngiini uudhiginini, nongiini tatu vulu oku mu holela?

¹⁸ Mbela Petrus okwa li a nyenyeta, a geya nenge a nkunyanana? Aawe, okwa li a taamba ko epukululo neifupipiko. Kungawo, okwa li u ulike ishewe uudhiginini. Ayehe mboka haya landula Kristus otaya ka kala ya pumbwa epukululo omathimbo gamwe. Ekwatathano lyetu naJesus Kristus nosho wo naHe, Jehova Kalunga, otali ka tsikila owala okukoka ngele otwa taamba ko epukululo neifupipiko nokwiilonga sha mulyo. —  Lesha Omayeletumbulo 4:13.

19. Jesus okwa li a popi oohapu dhini tadhi halukitha, nomolwashike tashi vulika Petrus a li a kumwa?

¹⁹ Konima Jesus okwa ka popya oohapu dhimwe tadhi halukitha tadhi ti: “Otandi mú lombwele: Opu na yamwe mwaambaka ya thikama mpaka itaa makele eso, sigo taa mono okugaluka kwOmuna gwOmuntu, te ya omukwaniilwa.” (Mat. 16:28) Kapu na omalimbililo kutya Petrus okwa li a hokwa oohapu ndhoka. Otashi vulika Jesus a li a hala okutya shike? Otashi vulika Petrus a li ti ipula kutya epukululo  ndyoka a li opo a pewa otali ti kutya ita pewa we uuthembahenda wi ikalekelwa.

20, 21. (a) Hokolola emoniko ndyoka Petrus a li a mono. (b) Ongiini oonkundathana ndhoka dha li dha ningwa kaantu mboka ya holokele Jesus dha li dha pukulula Petrus?

²⁰ Konima yoshiwike lwaampono, Jesus okwa li a kutha Jakob, Johannes naPetrus e taa yi “kondundu ondeendeka” tashi vulika Ondundu yaHermon mpoka tashi vulika pwa li pu na ookilometa 25. Osha fa sha li uusiku, molwaashoka aalumentu mbaka yatatu oya li taya kondjo noomposi. Ihe sho Jesus ta galikana, opwa ningwa sha shoka she ya pendutha. —  Mat. 17:1; Luk. 9:28, 29, 32.

²¹ Jesus okwa tameke okulunduluka montaneho yawo. Oshipala she osha tameke tashi adhima, tashi geta sigo sha ningi uuyelele wa fa wetango. Noonguwo dhe odha li dha ningi oontokele to. Opo nduno puJesus opwa holoka aantu yaali gumwe okwa li e lile po Moses nomukwawo oElia. Oya kundathana naye nkene “ta ka tsakanitha  ehalo lyaKalunga, sho ta ka sa muJerusalem” naasho ta ka yumudhwa. Petrus okwa li a mono kutya okwa li a puka sho a li ta dhiladhila kutya Jesus ita ka monithwa iihuna nokudhipagwa. —  Luk. 9:30, 31.

22, 23. (a) Ongiini Petrus a li u ulike ehwamo nosho wo ohole? (b) Ongulohi ndjoka Petrus, Jakob naJohannes oya li ya mono ishewe uuwanawa wuni?

²² Petrus okwa li a hala okukutha ombinga memoniko ndyoka ekumithi, noka li a hala lya hula. Osha li tashi monika sha fa Moses naElia ta ya thigi po Jesus. Onkee ano, Petrus okwa popi a ti: “Muhongi, opwe tu opalela mpaka okukala. Otatu ka dhikila po omatsali gatatu, limwe olyoye, limwe olyaMoses nalimwe olyaElia.” Aantu mbaka ye lile po aapiya yaali yaJehova mboka ya sa nale inaya pumbwa omatsali. Petrus ka li a dhiladhila muule omanga inaa popya. Nonando ongaaka, mbela ino gumwa kuulaadhi nokohole yomulumentu nguka? —  Luk. 9:33.

²³ Ongulohi ndjoka, Petrus, Jakob naJohannes oya li ya mono uuwanawa wulwe. Sho ye li kondundu, oshikogo osha holoka noshe ya siikile. Musho omwa zi ewi, ewi lyaJehova Kalunga. Okwa ti: “Nguka oye Omumwandje, ngoka nde mu hogolola, mu uveni.” Opo nduno emoniko olya hulu naJesus okwa li oye awike kondundu. —  Luk. 9:34-36.

24. (a) Emoniko lyeshituluko olya li lya kwathele Petrus ngiini? (b) Emoniko lyeshituluko otali vulu oku tu kwathela ngiini?

²⁴ Emoniko lyeshituluko kali shi tuu omagano dhingi kuPetrus nosho wo kutse! Konima yoomvula omilongo okwa ka nyola kombinga yuuthembahenda mboka a li a pewa wokumona emoniko lyaJesus e li Omukwaniilwa a simana megulu ‘nokumona nomeho ge mwene uunenesimano we.’ Emoniko ndyoka olya li lya koleke omahunganeko ogendji ngoka ga popiwa mOohapu dhaKalunga nolya li lya koleke eitaalo lyaPetrus a vule oku ka sinda omashongo ngoka ga li tage ke ya. (Lesha 2 Petrus 1:16-19.) Otali vulu wo okukoleka eitaalo lyetu momahunganeko kombinga yaJesus nokombinga yUukwaniilwa waKalunga. Otatu ka vula okumona omayambeko ngoka tage ke etwa kUukwaniilwa mboka ngele otwa kala twi inekela Jesus, hatu longwa kuye, hatu pulakene komayele ge nohatu mu landula aluhe.