Ontopolwa 62

Oshiilongomwa kombinga yeifupipiko

KONIMA yokwaaludha omumati ngoka e niwe kompwidhuli momudhingoloko gwaKesarea Filippi, Jesus okwa hala okushuna kegumbo kuKapernaum. Ihe okwa hala a ye molweendo pamwe naalongwa ye oyo ayeke opo a vule oku ka tsikila noku ya longekidhila eso lye niinakugwanithwa yawo konima yaashono. “Omuna gwOmuntu ota ka gandjwa miikaha yaantu,” osho te ya yelithile, “noyo otaye mu dhipaga, ihe esiku etitatu ota yumuka.”

Nokuli nonando Jesus shika okwe shi popile nale, nononando yatatu yomaayapostoli ye oya mona eadhimitho lye pethimbo “okuza po” kwe kwa li taku kundathanwa, natango aalanduli ye itaya vulu oku shi uva ko. Nonando kapu na gumwe gwomuyo ta kambadhala okutinda kaa ka dhipagwe, ngaashi Petrus e shi ningi nale, yo oya tila okutsikila noku mu pula kombinga yaashono.

Lwahugunina otaya thiki muKapernaum, moka mwa li mwa fa omo maandjawo yaJesus pethimbo lyuukalele we. Omo wo mondoolopa yopaandjawo yaPetrus nosho wo aayapostoli yalwe ooyakwawo. Moka, aalumentu mboka taya pula iimaliwa yotempeli otaye ya kuPetrus. Tashi vulika taya kambadhala okuningitha Jesus a yone komukalo gwontumba, notaya pula taya ti: “Omulongi gweni [oha futu tuu, OB-1986] iimaliwa yotempeli [iidrakma iyali]?”

“Oha futu,” Petrus ta yamukula.

Jesus ngoka tashi vulika opo a thiki pegumbo okathimbo okafupi konima yaashono, ota tseya shoka sha ningwa po. Nokuli manga Petrus inaa vula okupopya oshinima shika, Jesus ota pula ta ti: “Oto ti ngiini, Simon? Aakwaniilwa yokombanda yevi ohaa pula kulye oompale niifuta, okoyana nenge okaathigona?”

“Okaathigona,” Petrus ta yamukula.

“Ano oyana ihaa futu sha,” Jesus ta ti. Molwashoka He yaJesus oye Omukwaniilwa gweshito alihe, Ngoka ha longelwa motempeli ndjoka, kashi li lela oshitegelelwa shopaveta opo Omwana gwaKalunga a fute iimaliwa yotempeli. “Ihe, opo twaaye ya geyithe,” Jesus ta ti, “inda ano komunkulo gwefuta, ngu umbile mo olungona. Kutha ohi ndjika to yi yulu tango, nonge wa makula okana kayo, oto mono mo oshimaliwa oshisilveri [iidrakma ine]. Shi kutha mo, ngu u shi ya pe omolwetu nangoye.”

Sho aalongwa taya gongala konima yokugaluka kwawo kuKapernaum, tashi vulika pegumbo lyaPetrus, otaya pula taya ti: “Omukuluntu e vule ooyakwawo [muukwaniilwa wokegulu, KB], olye?” Jesus oku shi shoka tashi ya pulitha epulo lyawo, molwashoka oku shi shoka ya li taya kundathana mondjila yokushuna okuza kuKesarea Filippi sho ya li konima ye. Omolwashono ta pula ta ti: “Omwa kundathanene shike mondjila?” Aalongwa oya mwena ya sa ohoni, oshoka oya tsu omaludhi kombinga yaangoka ta ka kala omukuluntu e vule ooyakwawo.

Konima yokulongwa kwaalongwa kuJesus uule woomvula ndatu lwaampono, otashi monika mbela itaashi vulu okwiitaalwa sho taya tsu omaludhi kombinga yoshinima sha tya ngawo? Sho shene otashi ulike enwethomo li na oonkondo lyokwaahagwanenena kwopantu nosho wo eputuko lyopalongelokalunga. Elongelokalunga lyAajuda moka aalongwa ya putukila olya li lya popi nomuthindo ondondo nenge omuthika moombinga adhihe dhonkalamwenyo. Kakele kaashono, Petrus otashi vulika a li e uvite kutya ye oku vule ooyakwawo molweuvaneko lyaJesus kutya ye ota ka pewa “iipatululo” yUukwaniilwa. Jakob naJohannes nayo wo otashi vulika ya li ye na omadhiladhilo ga tya ngaaka molwashoka oya li ya silwa ohenda okutalithwa eadhimitho lyaJesus.

Kutya nduno onkalo oyi li ngiini, Jesus ota ningi eulikilo tali gumu omutima mokukambadhala okwoopaleka iikala yawo. Oti ithana okanona, te ka thikameke mokati kawo, te ka kwata komapepe e ta ti: “Ngele itamu itedhulula notamu ningi ngaanona, kamu na mpoka tamu ka ya [muukwaniilwa womegulu]. Onkee ano, oongoka ti ifupipike ngokanona nkaka, oye omukuluntu e vule ooyakwawo [muukwaniilwa womegulu]. Naangoka ta [taamba] okanona ka tya ngeyi medhina lyandje, oye ota [taamba] ndje.”—Yelekanitha KB.

Ina longitha tuu omukalo omukumithi okupukulula aalongwa ye! Jesus ine ya geela noina tya kutya yo oye na uuntsa, olwiho nenge oye na ehalo lyokusimanekwa. Aawe, ihe ota yelitha elongo lye tali pukulula mokulongitha oshiholelwa shaanona aashona, mboka haya ndhindhilikwa keishonopeko lyawo nolundji kaye na ehalo lyokusimanekwa nokukala ye li gumwe omunene e vule ooyakwawo. Ano Jesus otu ulike kutya aalongwa ye oye na okukokeka omaukwatya ngaka gaanona aaifupipiki. Ngaashi Jesus ta ti lwahugunina: “Ngoka gwomokati keni omudhinwa kwaayehe, oye [omukuluntu, OB-1986].” Mateus 17:22-27; 18:1-5; Markus 9:30-37; Lukas 9:43-48.

▪ Mokushuna kuKapernaum, elongo lini Jesus te endulula, nongiini tali taambwa ko?

▪ Omolwashike Jesus kee li kohi yoshinakugwanithwa shokufuta iimaliwa yotempeli, ihe omolwashike he yi futile?

▪ Oshike tashi vulika osho she etitha omaludhi gaalongwa, nongiini Jesus te ya pukulula?