Ontopolwa 19

Omukiintu Omusamaria ta longwa

MONDJILA yawo okuza kuJudea yu uka kuGalilea, Jesus naalongwa ye otaye ende moshitopolwa shaSamaria. Ya vulwa kolweendo, moshanga shomutenya lwaampono otaya tula pomuthima gu li popepi noshilando Sikar ya vululukwe po. Omuthima nguka ogwa hupwa po kuJakob omathelemimvo ga piti, nopo gu li nokuli sigo onena, popepi noshilando shono pethimbo lyetu hashi ithanwa Nablus.

Manga Jesus ta vululukwa po mpaka, aalongwa ye otaya yi koshilando ya ka lande iikulya. Sho omukiintu Omusamaria e ya okuteka omeya, Jesus ote mu indile: “Pe ndje, ndi nwe mo.”

Olundji Aajuda nAasamaria ihaye endathana molwokayoya hoka okawinayi noonkondo. Onkee ano omukiintu ta pula a kumwa ta ti: “Ongoye to indile ndje ngiini okunwa, ongoye Omujuda, ngame omukiintu Omusamaria?”

“Andola wa tseya,” Jesus ta yamukula, “olye ta ti kungoye: Pe ndje okunwa, ando ongoye to mu indile, noye e ku pe omeya omanamwenyo.”

“Omuwa,” ye ta ti, “ongoye waa na oshiyuma shokuteka mo, nomuthima omule; omeya omanamwenyo u ga na openi andola? Ongoye omunene nani u vule tate Jakob, oongoka e tu pa omuthima nguka, oye mwene kwa li ha nu mo noyana niimuna ye?”

“Shaa ngoka ta nu momeya ngaka, ota ka sa enota ishewe,” Jesus osho ta ti. “Ihe ngoka ta nu momeya ngoka tandi ge mu pe, ke na mpoka ta ka sa enota sigo aluhe; ihe omeya ngoka tandi ge mu pe, otaga ningi muye oluthithiya lwomeya taga fulukile momwenyo gwaaluhe.”

“Omuwa, pe ndje wo omeya ngoka, ndaa se we enota, ngaye ndaa ye, ndi teke nkuka,” omukiintu osho ta yamukula.

Ngashingeyi Jesus ote mu lombwele: “Inda, u ki ithane ko omulumentu gwoye e to ya nkuka.”

“Kandi na omulumentu,” ta yamukula.

Jesus ota koleke epopyo lye. “Eeno, wa popi dhoshili: kandi na omulumentu, oshoka ongoye wa li u na aalumentu yatano, naanguka u mu na ngashingeyi, ke shi omulumentu gwoye.”

“Omuwa, ondi ku wete, ngoye omuprofeti,” omukiintu ta popi nonkumwe. Ota holola ohokwe ye miinima yopambepo nota ti kutya Aasamaria “oya galikanene kondundu ndjika [Garisim, ndjoka yi li popepi mpoka]; ihe ne [Aajuda] ohamu ti, Jerusalem oyo epandja lyokugalikanena mo.”

Ihe Jesus otu ulike kutya ehala lyokugalikanena mo halyo oshinima sha simana. Ota ti: ‘Ethimbo otali ya, uuna aagalikani yashili taa galikana Tate mombepo nomoshili; oshoka Tate okwa hala mboka taye mu galikana, ya kale ya tya ngeyi. Kalunga oye Ombepo; naamboka taye mu galikana, oyo ye na okugalikana mombepo nomoshili.’

Omukiintu okwa kumwa noonkondo. “Ondi shi shi, Messias nokutya, Kristus, ote ke ya,” osho ta ti. “Oye nge te ya, ote tu hololele ayihe.”

“Ongame tuu nguka te popi nangoye,” Jesus ta ti. Dhiladhila owala kwaashika! Omukiintu nguka e ya okuteka omeya moshanga shomutenya, tashi vulika opo a yande ekwatathano naakiintu yomomukunda mboka ye mu dhina omolwonkalamwenyo ye, okwa hokiwa kuJesus pamukalo omukumithi. Ote mu hokololele shu ukilila shoka inee shi hokololela nando ogumwe montaneho. Iilanduliko oshike mbela?

Aasamaria oyendji tayi itaale

Aalongwa mokugaluka niikulya kuSikar, oya adha Jesus pomuthima gwaJakob mpoka ye mu thigile, nopo mpoka e li ngashingeyi ta popi nomukiintu Omusamaria. Sho aalongwa taya thiki mpoka, omukiintu ota zi po nota thigi po oshuma she shomeya, e ta shuna koshilando.

Nohokwe onene yiinima mbyoka Jesus e mu hokololele, ota lombwele aalumentu yomoshilando ta ti: “Ileni, mu tale omulumentu a lombwele ndje ayihe nde yi ningi.” Opo a penduthe okapulekonawa kawo, ota pula ano ta ti: “Pamwe oye Kristus?” Epulo otali adha elalakano lyalyo—aalumentu otaya yi ye ki imonene ko yo yene.

Pethimbo opo tuu mpoka, aalongwa otaya lombwele Jesus a lye iikulya mbyoka ye mu etele okuza koshilando. Ihe ote ya yamukula ta ti: “Ongame ndi na iikulya yokulya mwaa yi shi.”

“Pamwe pe na ngoka e mu etele iikulya?” aalongwa taya pulathana. Jesus ote ya yelithile ta ti: “Iikulya yandje oyo mbika, ndi longe ehalo lyaanguka a tumu ndje, ngame ndi tsakanithe oshilonga she. One itamu ti: Onkene ku na oomwedhi ne, eteyo manga inaali thikana?” Ihe Jesus otu ulike keteyo lyopambepo ta ti: “Tala, otandi mú lombwele: yelutheni omeho geni, ne mu tale omapya, nkene ga tiliganene eteyo. Ngashingeyi nokuli omuteyi ta mono ofuto, noomuma ote dhi gongele momwenyo gwaaluhe, opo omukuni a nyanyukwe pamwe nomuteyi.”

Otashi vulika Jesus e wete nale kutya metsakaneno lye nomukiintu Omusamaria otamu zi oshizemo oshiwanawa—kutya oyendji otaye ke mu itaala omolwokugandja uunzapo kwe. Okwa gandja uunzapo kaantu yomomukunda, ta ti: “Oye a lombwele ndje ayihe nde yi ningi.” Onkee ano sho aalumentu yokuSikar ye ya kuye pomuthima, oye mu pula a kale puyo noku ya hokololele oyindji. Jesus ote shi zimine e ta kala po omasiku gaali.

Sho Aasamaria ya pulakene kuJesus, oyendji noonkondo oye mu itaale. Opo nduno otaya lombwele omukiintu taya ti: “Inatu itaala we omolwoohapu dhoye, oshoka otse yene tu uvu notu shi shi, oye shili Omukulili [gwuuyuni].” Dhoshili, omukiintu Omusamaria okwa tula po oshiholelwa oshiwanawa shankene tatu vulu okugandja uunzapo kombinga yaKristus mokupendutha okapulekonawa kaapulakeni opo ya tsikile nokukonga!

Dhimbulukwa kutya oku na oomwedhi ne opo eteyo li thike—sha yela kutya eteyo lyiilya, ndyoka hali tewa muPalestina poshitemamvula. Onkee ano otashi vulika ngashingeyi osho Novomba nenge Desemba. Shika otashi ti kutya Jesus naalongwa ye konima yOpaasa yomo 30 E.N., oya kala oomwedhi hetatu muJudea, moka ya kala taya longo aantu noku ya ninginitha. Ngashingeyi otaya yi koshitopolwa shaandjawo, kuGalilea. Oshike mbela she ya tegelela hoka? Johannes 4:3-43.

▪ Omolwashike omukiintu Omusamaria a kumwa sho Jesus a popi naye?

▪ Oshike Jesus te mu longo kombinga yomeya omanamwenyo naampono pu na okugalikanenwa?

▪ Jesus ote mu ihololole ngiini kutya oye olye, nomolwashike eihololo ndino ekumithi unene?

▪ Uunzapo washike omukiintu Omusamaria ta gandja noshilanduliko oshike?

▪ Ongiini iikulya yaJesus yi na ekwatathano neteyo?

▪ Ongiini tatu vulu okumona kutya uukalele waJesus muJudea owa kala uule wethimbo li thike peni konima yOpaasa yomo 30 E.N.?