Ontopolwa 30

Jesus ta yamukula aatamaneki ye

SHO aawiliki yelongelokalunga lyOshijuda taya lundile Jesus kutya okwa yona Esabati, ote ya yamukula ta ti: “Tate ota longo sigo ongashingeyi, nangame wo otandi longo.”

Nonando Aafarisayi taya popi, iilonga yaJesus hayo mbyoka yi indikwa kompango yEsabati. Iilonga ye yeuvitho noyokwaaludha oyo oshilonga e shi pewa kuKalunga, nomokuholela oshiholelwa shaKalunga, ota tsikile noku shi ninga esiku kehe. Ihe eyamukulo lye otali geyitha nokuli unene Aajuda shi vulithe nale, notaya kambadhala ye mu dhipage. Omolwashike?

Omolwashoka ngashingeyi itaya dhiladhila owala kutya Jesus ota yono Esabati, ihe oya tala ko okupopya kwe kutya ye Omwana gwaKalunga oko eshekokalunga. Ihe Jesus ina tila note ya yamukula natango shi na ko nasha nekwatathano lye lyi ikalekelwa naKalunga. Ota ti: “Oshoka He e hole Omwana note mu ulukile ayihe mbyoka te yi longo.”

Jesus ota tsikile ta ti: “Ngaashi He ta yumudha aasi . . . osho tuu nOmwana ta tula omwenyo oomboka a hala.” Dhoshili, Omwana okwa yumudha nale aasi pamukalo gwopambepo! “Oongoka tu uvu oohapu dhandje noti itaale nguka a tumu ndje,” Jesus ta ti, “okwa za mo meso nokwa yi momwenyo.” Eeno, ota tsikile ta ti: “Ethimbo tali ya nolye ya nokuli, aasi otaa uvu ewi lyOmuna gwaKalunga, naamboka taye li uvu, otaa kala ye na omwenyo.”

Nonando kapu na sha tashi ulike kutya Jesus okwa yumudha nale omuntu kuusi, ye ota hokololele aatamaneki ye kutya eyumuko lyaasi lyolela lya tya ngaaka otali ka ningwa. “Inamu shi kuminwa,” osho ta ti, “oshoka ethimbo tali ya, nena ayehe mboka ya kala [moombiladhimbuluko, NW], otaa uvu ewi lye, e [taya] holoka mo.”

Osha yela kutya Jesus ina hokolola nando onale montaneho iilonga ye ya simana noonkondo melalakano lyaKalunga komukalo gwa yela nogwothaathaa. Ihe aatamaneki yaJesus oye na oshindji kaashi shi owala uunzapo we kombinga yiinima mbika. Jesus ote ya dhimbulukitha ta ti: “One mwa tumine kuJohannes, oye nokwa hokolola dhoshili.”

Nale, pwa pita owala oomvula mbali, Johannes Omuninginithi okwa lombwelele aawiliki yelongelokalunga lyOshijuda mbaka kombinga yaaNgoka te ke ya konima ye. Jesus ote ya dhimbulukitha okusimaneka noonkondo kwawo Johannes ngoka ngashingeyi e li mondholongo, ta ti: “One kwi mwa hala okunyanyukilwa [muuyelele] we okathimbo okashona kowala.” Jesus ote ya dhimbulukitha shika netegameno lyoku ya kwatha, eeno, oku ya hupitha. Ihe ita popi i ikolelela kuunzapo waJohannes.

“Iilonga mbika tandi yi longo [mwa kwatelwa oshikumithalonga shoka opo a longo], oyo tayi hokolola ndje, Tate a tuma ndje.” Ihe kakele kaashono, Jesus ota tsikile, ta ti: ‘Tate ngu a tuma ndje, oye a hokolola ndje.’ Pashiholelwa, Kalunga okwa gandja uunzapo kombinga yaJesus peninginitho lye ta ti: “Nguka Omumwandje omuholike.”

Dhoshili, aatamaneki yaJesus kaye na eipopilo lyoku mu ekelahi. Omanyolo ogo tuu ngoka taya ti otaya konakona, ogo tage mu hokolola! Jesus ota hulitha ta ti: “Ando mwi itaala Moses, ando mwi itaala ndje, oshoka okwa shanga nokuhokolola ndje. Ihe ngele inaamu itaala iishangwa ye, otamu itaale ngiini oohapu dhandje?” Johannes 5:17-47; 1:19-27; Mateus 3:17.

▪ Omolwashike iilonga yaJesus kaayi shi mbyoka tayi yono Esabati?

▪ Jesus ota hokolola ngiini iilonga ye ya simana noonkondo melalakano lyaKalunga?

▪ Opo u ulike kutya ye Omwana gwaKalunga, okuunzapo walye Jesus tu ulike?