SHA oshitilithi osha ningwa po. Johannes Omuninginithi opo owala a dhipagwa. Herodias, omukiintu gwomukwaniilwa, kakwa li e mu hole. Nokwa ningitha omukwaniilwa a tetithe ko omutse gwaJohannes.

Sho Jesus te shi uvu, ye ota yemata noonkondo. Ye ota yi oye awike kehala lyi ikalela. Ihe aantu otaye mu landula. Sho Jesus ta mono oongundu dhaantu, ye ote dhi uvitile ohenda. Ano ye ota popi nayo kombinga yUukwaniilwa waKalunga nota aludha aavu.

Uusiku owo tuu mboka aalongwa ye otaye ya kuye notaa ti: ‘Okwa toka nale, nolyo ehala lyi ikalela. Tuma aantu ya ye opo yo ya vule oku ki ilandela iikulya muulando wopopepi mpoka.’

‘Yo inashi pumbiwa ya ye,’ Jesus ta yamukula. ‘Ya peni sha shokulya.’ Jesus ota pungulukile kuFilippus nota pula: ‘Openi tatu vulu okulanda iikulya tayi gwana okupalutha aantu ayehe mbaka?’

‘Otashi ka pula iimaliwa oyindji noonkondo okulanda iikulya oyindji ya gwanena opo kehe gumwe a vule okumona okashona kowala,’ Filippus ta yamukula. Andreas ota ti: ‘Omumati nguka, ngoka a humbata iikulya yetu, oku na iikwiila itano noohi mbali. Ihe itayi gwana nando aantu ayehe mbaka.’

‘Lombwela aantu ya kuutumbe pomwiidhi,’ Jesus ta ti. Opo nduno ye ota pandula Kalunga molwiikulya note yi pambula muupambu. Konima aalongwa otaa topolele aantu iikwiila noohi. Opu na aalumentu 5 000, nosho wo aakiintu naanona omayuvi. Yo ayehe otaa li sigo yo ya kuta. Nuuna aalongwa taa toola iikulya mbyoka ya hupu po, otayi udha oontungwa 12!

Ngashingeyi Jesus ota londeke aalongwa ye mowato ya ye handiyaka yEfuta lyaGalilea. Uusiku oshikungulu oshinene otashi ya, nomakuthikuthi otaga undulile owato hwiya naahwiyaka. Aalongwa oya tila noonkondo. Opo nduno mokati kuusiku otaa mono nkene gumwe te ende kombanda yomeya te ya kuyo. Yo otayi igidha kuumbanda, oshoka yo kaye shi wo shoka yo ye wete.

‘Inamu kala mwa tila,’ Jesus ta ti. ‘Ongame!’ Yo natango itaa vulu oku shi zimina. Ano Petrus ota ti: ‘Omuwa, ngele ongoye shili, lombwela ndje nduno ndi ye kungoye tandi ende kombanda yomeya.’ Jesus ota yamukula: ‘Ila!’ Petrus nota londoloka mo note ende kombanda yomeya! Opo nduno ye ota tila nota tameke okuningina, ihe Jesus ote mu hupitha.

Konima Jesus ota palutha ishewe aantu omayuvi. Oshikando shika ye ote shi ningi niikwiila iheyali noohi dhimwe oonshona. Notayi gwanene natango ayehe. Nkene Jesus ha sile aantu ayehe oshimpwiyu kashi shi mbela oshikumithi? Uuna ye ta pangele oye omukwaniilwa gwaKalunga, tse katu na nando okwiipula kombinga yasha!