IITOPOLWA YI IKOLELELA KOSHIPALANYOLO SHOKOMBANDA | AASI OTAYA KA YUMUKA NGAA?
Oshike hashi ningilwa omuntu ngele a si?
Omulumentu gwedhina Lionel okwa ti: “Onda li ndi shi oku na omahala gatatu moka omuntu ha vulu okuya ngele a si: megulu, moheli nenge momulilo gweyogolitho. Onda li ndi shi kutya kandi shi lela omuyuuki nokuya megulu, ngame kandi shi omukolokoshi ye mwenemwene ndi ye moheli. Ihe kanda li ndi uvite ko nawa kutya oshike hashi yi momulilo gweyogolitho. Edhiladhilo ndika inandi li mona mo mOmbiimbeli. Aantu owala haye li popi.”
Omulumentu gwedhina Fernando okwa ti: “Onda li nda longwa kutya aantu ayehe otaya yi megulu konima ngele ya si, ihe kanda li nde shi itaala. Onda li handi dhiladhila kutya ngele omuntu a si opuwo ngawo, ke na we etegameno lyasha.”
Mbela owi ipula nale to ti: ‘Oshike hashi ningwa po ngele omuntu a si? Mbela oonakusa oye li taya mono iihuna mehala lyontumba? Otatu ke ya mona ngaa ishewe? Uushili wuni tu na?’ Tala shoka Ombiimbeli tayi ti. Tango natu taleni kutya otayi ti ngiini kombinga yeso. Opo ihe, otatu ka taleni kutya etegameno lini Ombiimbeli tayi tu pe.
Aasi oye li monkalo ya tya ngiini?
SHOKA OMBIIMBELI TAYI TI: “Aanamwenyo otaa tseya kutya oye na okusa, ihe aasi itaa tseya sha nando, nokaa na we ondjambi yasha, oshoka ondhimbulukilo yawo otayi dhimbiwa. Longa ashihe to vulu niikaha yoye, shi longa noonkondo dhoye, oshoka kaku na iilonga, ompangela, uunongo nenge owino moshaasi, moka noka ya mo.” * — Omuuvithi 9:5, 10.
Oshaasi otashi popiwa shi li ehala moka hamu yi oonakusa. Oshi li ehala lyopathaneko nenge onkalo yokwaaha shi sha nenge yokwaaha longa sha moka oonakusa ye li. Omulumentu omudhiginini Job okwa li a tala ko oshaasi ngiini? Job okwa li a kanitha iiniwe ye ayihe noyana mesiku limwe alike. Okwa li wo u umbwa iitumbuka olutu aluhe. Okwa galikana Kalunga a ti: “Andola u langeke ndje ashike muusi, u holeke ndje.” (Job 1:13-19; 2:7; 14:13) Osha yela kutya Job ka li a tala ko oshaasi kutya osho omulilo gwoheli, nenge ehala moka aantu haya mono iihuna. Pehala lyaashono, okwa li e shi tala ko ehala moka aasi haya kala ya mwena.
Opu na omukalo gulwe moka tatu vulu okwiilonga kombinga yonkalo yoonakusa. Oguni mbela? Ogwo okukonakona ondjokonona ndjoka yi li mOmbiimbeli tayi popi kombinga yaantu yahetatu mboka ya yumudhwa. — Tala oshimpungu “Omayumuko gahetatu ngoka ga popiwa mOmbiimbeli.”
Tala ngele mboka yahetatu ya popiwa mo oya li megulu, nenge omomulilo gwoheli. Andola aantu mboka ya yumudhwa oya li mehala lya tya ngaaka sho ya si, mbela ando inaye shi popya? Ando inashi nyolwa ngaa mOmbiimbeli, opo aantu ayehe ye shi leshe? MOmbiimbeli inashi popiwa mo. Aantu yahetatu mboka ya yumudhwa osha yela kutya inaya popya sha kombinga yaashoka. Omolwashike mbela? Omolwaashoka oya li kaaye shi mpoka ye li noya li ya fa omuntu a kotha oomposi dhoshitula. Omathimbo gamwe Ombiimbeli ohayi longitha oshitya oomposi pathaneko, uuna tayi popi eso. Pashiholelwa, oya popya kutya aalumentu aadhiginini, David naStefanus, oya “kotha po” nenge oya “ka lala.” — Iilonga 7:60; 13:36, OB-1954.
Oonakusa oye na ano etegameno lini? Mbela otaya ka penduka ngaa?
^ okat. 7 Ombiimbeli yOshiingilisa, yo-New World Translation of the Holy Scriptures, oya toloka oshitya shOshihebeli “Sheol” noshitya shOshigreka “Hades” tayi ti kutya “oshaasi.” Omatoloko gOombiimbeli gamwe oga longitha oshitya “oheli,” ihe edhiladhilo kutya aasi ohaya hepekwa momulilo inali popiwa mo mOmbiimbeli.
