OSHITOPOLWA SHOKUKONAKONWA 12
EIMBILO 119 Natu kale tu na eitaalo
Tsikila okweenda meitaalo
‘Otatu ende molweendo lweitaalo, haandoka lwokumona.’ — 2 KOR. 5:7.
SHOKA TATU KA ILONGA
Otatu ka ilonga nkene tu na okutsikila okweenda meitaalo, uuna tatu ningi omatokolo ga simana.
1. Omolwashike omuyapostoli Paulus, a li a nyanyukwa okutala kunkene a longitha onkalamwenyo ye?
POMPITO yimwe, omuyapostoli Paulus, okwa li e shi kutya otaka dhipagwa, ihe okwa li a nyanyukwa okutala kunkene a longitha onkalamwenyo ye. Sho a tala konkalamwenyo ye monakuziwa, okwa ti: “Onda matuka oshinano ashihe, onda dhiginina eitaalo.” (2 Tim. 4:6-8) Paulus, okwa ninga omatokolo gopandunge muukalele we nokwa li e na uushili kutya Jehova okwe mu nyanyukilwa. Natse otwa hala wo okuninga omatokolo omawanawa nokukala twa hokiwa kuKalunga. Ongiini tatu vulu oku shi ninga?
2. Okweenda meitaalo, osha hala okutya shike?
2 Paulus, okwa popi kombinga ye nosho wo yAakriste yalwe aadhiginini a ti: ‘Otatu ende molweendo lweitaalo, haandoka lwokumona.’ (2 Kor. 5:7) Paulus, okwa li a hala okutya shike? Mombiimbeli, oshitya ‘enda,’ omathimbo gamwe ohashi ukithwa komukalo moka omuntu a hogolola okulongitha onkalamwenyo ye. Aantu mboka kaaye na eitaalo muJehova, ohaya ningi omatokolo ga kankamena owala kwaashoka haya mono, haya uvu noye uvite. Mepingathano naashoka, uuna omuntu ta ende meitaalo, oha ningi omatokolo ngoka ga kankamena keinekelo lye muJehova Kalunga. Oonkatu dhe otadhi ulike kutya okwa tompwa kutya Kalunga ote ke mu yambeka nota ka mona mo uuwanawa moku landula omayele gaJehova ngoka taga adhika mOmbiimbeli. — Eps. 119:66; Heb. 11:6.
3. Mbela uuwanawa wuni hawu zi mokweenda meitaalo? (2 Aakorinto 4:18)
3 Odhoshili kutya atuheni ohatu ningi omatokolo gamwe ga kankamena kwaashoka hatu mono, hatu uvu notu uvite. Otashi vulika tu ki iyadhe momaupyakadhi, ngele otwa kala owala hatu ningi omatokolo miinima ya simana sha ikolelela kwaashoka hatu mono, nenge hatu uvu. Omolwashike mbela? Omolwaashoka, shoka hatu mono nenge hatu uvu, omathimbo gamwe otashi vulika shi tu pukithe. Nonando shoka inashi ningwa, ngele otwa kala owala hatu ende sha ikolelela kwaashoka hatu mono, otashi vulika tu ipwililikile ehalo lyaJehova nenge omayele ge. (Omuuv. 11:9; Mat. 24:37-39) Ihe uuna tatu ende meitaalo, otatu ka ninga omatokolo ngoka ga “opalela Omuwa.” (Ef. 5:10) Okulandula omayele gaKalunga otashi ke tu pa ombili yokomutima notatu ka kala twa nyanyukwa shili. (Eps. 16:8, 9; Jes. 48:17, 18) Ngele otwa tsikile okweenda meitaalo, otatu ka kala nomwenyo sigo aluhe. — Lesha 2 Aakorinto 4:18.
4. Ongiini omuntu ta vulu okumona ngele ota ende meitaalo, nenge ota ende shi ikolelela kwaashoka e wete?
4 Ongiini tatu vulu okumona kutya otatu ende meitaalo, nenge otatu ende shi ikolelela kwaashoka hatu mono? Oshi li mpano kutya, mbela iinima yini hayi tu wilike, uuna tatu ningi omatokolo? Mbela ohatu wilikwa owala kiinima mbyoka hatu vulu okumona? Nenge ohatu wilikwa kokwiinekela muJehova nosho wo momayele ngoka ga za kuye? Natu ka taleni nkene tatu vulu okutsikila okweenda meitaalo momikalo ndatu dha simana tadhi landula: uuna tatu kongo iilonga, uuna tatu hogolola kuume kopandjokana nosho wo uuna tatu taamba ko ewiliko ndyoka tali zi kehangano lyetu. Monkalo kehe, otatu ka tala kiinima mbyoka tu na okudhiladhila kuyo, opo tu ninge omatokolo omawanawa.
UUNA TATU KONGO IILONGA
5. Oshike tu na okutala kusho, uuna tatu kongo iilonga?
5 Atuheni otwa hala okugwanitha po oompumbwe dhetu nosho wo dhoyaandjetu. (Omuuv. 7:12; 1 Tim. 5:8) Iilonga yimwe ohayi futu nawa. Ohayi pitike omuniilonga a mone oshimaliwa sha gwana, a sile oshimpwiyu oompumbwe dhakehe esiku nokuli nokupungula. Ihe iilonga yimwe, ohayi futu owala omuniilonga iimaliwa ya gwana okugwanitha po oompumbwe dhesiku kehe. Odhoshili kutya uuna tatu hogolola ngele otatu ka taamba ko iilonga yontumba nenge hasho, ohatu dhiladhila kutya otatu ka mona ingapi. Ihe ngele oshinima shoka osho owala hatu gandja eitulomo kusho, nena otatu wilikwa owala kwaashoka hatu mono.
6. Ongiini tatu vulu okweenda meitaalo, uuna tatu kongo iilonga? (Aahebeli 13:5)
6 Ngele otatu ende meitaalo, otatu ka dhiladhila wo nkene iilonga yontumba tayi vulu okuguma uukuume wetu naJehova. Otatu vulu okwiipula kutya: ‘Mbela iilonga mbyoka otayi ka ningitha ndje ndi ninge shoka Jehova e tonde?’ (Omayel. 6:16-19) ‘Mbela otayi ka guma okulongela kwandje Jehova, nenge tashi vulika yi fale ndje kokule noyaandjetu uule wethimbo?’ (Fil. 1:10) Ngele eyamukulo komapulo ngoka oeeno, otashi ka kala shi li pandunge kaatu taambe ko iilonga mbyoka, nokuli nonando oshidhigu okumona iilonga. Molwaashoka ohatu ende meitaalo, ohatu ningi omatokolo ngoka taga ulike kutya otwa tompwa kutya Jehova ote ke tu sila oshimpwiyu. — Mat. 6:33; lesha Aahebeli 13:5.
7-8. Ongiini omumwatate gumwe gwokoSouth Amerika, a ende meitaalo? (Tala wo ethano.)
7 Ndhindhilika nkene omumwatate Javier, a gwokoSouth Amerika, a mono nkene sha simana okweenda meitaalo. Okwa ti: “Onda li nda tula mo eindilo lyiilonga mbyoka tayi ka futa ndje iimaliwa oyindji okuyelekanitha niilonga mbyoka nda li ndi na, notandi ke yi nyanyukilwa noonkondo.” Ihe Javier, okwa li a halelela okukokola ondjila. Okwa tsikile ko ta ti: “Onda li ndi na oku ka pulwapulwa komuhona, kombinga yiilonga. Manga inaandi pulwapulwa, onda pula ekwatho kuJehova megalikano, nda tompwa kutya oku shi shoka sha dhenga mbanda kungame. Onda li nda hala okuhuma komeho miilonga yandje, ihe kanda li nda hala okutaamba ko iilonga mbyoka, ngele itayi ka kwathela ndje ndi adhe omalalakano gandje gopambepo.”
8 Javier, okwa ti ishewe: “Pethimbo lyomapulapulo, omuhona okwa lombwele ndje kutya otandi ka kala handi longo omalutayima pandjigilile. Onde mu lombwele nombili kutya itandi vulu okulonga olutayima omolwuukalele wandje.” Onkene Javier, okwa tokola kaa taambe ko iilonga mbyoka. Konima yiiwike iyali, okwa tameke okukokola ondjila. Lwanima, omumvo ogo tuu ngoka, okwa mono po iilonga yomalupita. Okwa ti: “Jehova oku uvu omagalikano gandje nokwa kwathele ndje ndi mone iilonga mbyoka tayi pitike ndje ndi kokole ondjila. Onda nyanyukwa shili, sho ndi na iilonga mbyoka hayi pitike ndje ndi kale ndi na ethimbo olindji ndi longele Jehova nokukwathela aamwatate.”
Ngele owa pewa ondondo yopombanda kiilonga, mbela ehogololo lyoye ota li ka ulika ngaa kutya owa tompwa kutya Jehova oku shi shoka sha dhenga mbanda kungoye? (Tala okatendo 7-8)
9. Oshike to ilongo koshimoniwa shaTrésor?
9 Ongiini ngele otwa ndhindhilike kutya iilonga mbyoka tu na ngashingeyi ihayi tu pitike tu ende meitaalo? Natu taleni koshimoniwa shaTrésor, ngoka a za koCongo. Okwa ti: “Iilonga yandje oya li oshinima shoka nda kala aluhe nda hala. Onda li handi futwa iimaliwa oyindji lela okuyelekanitha niilonga yandje yonale, nonda li nda simanekwa lela.” Ihe Trésor, okwa li ha faula okugongala pandjigilile omolwokulonga olutayima. Okwa li wo ha thiminikwa a popye iifundja, opo aantu kaaya tseye kombinga yaashoka ongeshefa ya ninga. Trésor okwa li a hala oku etha po iilonga mbyoka, ihe okwa li ta ipula kombinga yokukala kee na we iilonga. Oshike she mu kwathele? Okwa ti: “Habakuk 3:17-19, okwa kwathela ndje ndi uve ko kutya nokuli nonando ondi kanithe iiniwe yandje, Jehova ota ka sila ndje oshimpwiyu. Onkene onda etha po iilonga yandje.” Pehulilo okwa ti: “Aaniilonga oyendji mboka ye na iilonga hayi futu nawa, ohaya dhiladhila kutya omuntu otaka yamba po kehe shimwe, mwa kwatelwa aanegumbo lye nosho wo omaipyakidhilo gopambepo. Onda nyanyukwa sho nda gamene ekwatathano lyandje naJehova nosho wo naanegumbo yandje. Konima yomumvo gumwe, Jehova okwa kwathele ndje ndi mone iilonga yi li nawa, mbyoka hayi kwathele ndje ndi i sile oshimpwiyu nokukala ndi na ethimbo olindji momaipyakidhilo gopaKriste. Uuna twa pititha Jehova komeho, otashi vulika omathimbo gamwe tu kale tu na iimaliwa iishona, ihe ote ke tu sila oshimpwiyu.” Eeno, ngele otwa kala twa inekela momayele nomomauvaneko gaJehova, otatu ka tsikila okweenda meitaalo note ke tu laleka nuuyamba.
UUNA TO KONGO KUUME KOPANDJOKANA
10. Oshike tashi vulu oku tu ningitha tu ende sha ikolelela kwaashoka hatu mono, uuna tatu hogolola kuume kopandjokana?
10 Ondjokana omagano ga za kuJehova, noshi li paunshitwe omuntu a kale a hala okuya mondjokana. Ngele tashi ya pokukonga kuume kopandjokana, omumwameme otashi vulika a tale komaukwatya gomumwatate, keholokopo lye, nkene aantu ye mu tala ko, kiiniwe ye, kiinakugwanithwa ye megumbo nosho wo ngele ohe mu ningitha a kale a nyanyukwa. b Iinima mbyoka oya simana. Ihe ngele omumwameme okwa tala owala kiinima mbyono, nena otashi vulika ta gandja eitulomo kiinima mbyoka hayi monika.
11. Ongiini tatu vulu okweenda meitaalo, uuna tashi ya pokuhogolola kuume kopandjokana? (1 Aakorinto 7:39)
11 Jehova oha kala e uvite uuntsa ngele aamwatate naamwameme taya landula omayele ge, uuna taya hogolola kuume kopandjokana. Pashiholelwa, ohaya landula ekumagidho lyOmbiimbeli ya tegelele sigo ya piti “mepipi lyuugundjuka,” manga inaaya dhiladhila okuya mondjokana. (1 Kor. 7:36) Ohaya kongo kuume kopandjokana ta opalele, sha ikolelela komaukwatya ngoka Jehova a ti omusamane, nenge omukulukadhi omwaanawa ogo a pumbwa oku kala e na. (Omayel. 31:10-13, 26-28; Ef. 5:33; 1 Tim. 5:8) Ngele ngoka kee shi Ombangi yaJehova oku ulike ohokwe muyo, ohaya vulika komayele ngoka taga ti kutya oye na okuhokana “mOmuwa,” taga adhika mAakorinto yotango 7:39. (Lesha.) Ohaya tsikile okweenda meitaalo, ye na einekelo kutya Jehova ote ke ya tonatela pamaiyuvo, e vule omuntu kehe. — Eps. 55:22.
12. Oshike to ilongo koshiholelwa shaRosa?
12 Natu taleni koshimoniwa shaRosa, ngoka e li omukokolindjila moKolombia. Iilonga ye oye mu ningitha a kale ha kwatathana lwiikando nomulumentu ngoka kee shi Ombangi yaJehova, ngoka a li a tameke okuulika ohokwe muye. Rosa, okwa li wo a hokwa omulumentu ngoka. Okwa ti: “Okwa li ta monika a fa omulumentu omwaanawalela. Okwa li ha iyamba moshitopolwa shawo nokwa li e na onkalamwenyo yi li nawa. Onda li ndi hole nkene ha ungaunga nangame. Okwa li e na omaukwatya agehe ngoka nda hala momusamane, ihe ka li Ombangi yaJehova.” Okwa tsikile ko tati: “Osha li oshidhigu oku mu lombwela kutya inandi hala okweendelathana naye, molwaashoka oshinima shoka onda li nde shi pumbwa pamaiyuvo. Pethimbo ndyono, onda li ndi uvite ndi li ongame awike nonda li nda hala okuhokanwa, ihe kanda li nda vulu okumona omulumentu ngoka e li moshili.” Nonando ongawo, Rosa, ka li owala a gandja eitulomo kwaashoka e wete. Okwa li a dhiladhila kunkene etokolo ndyoka ta li ka guma uukuume we naJehova. Onkene okwa hulitha po okukala nekwatathano nomulumentu ngoka nokukala i ipyakidhila niilonga yaJehova. Nziya konima yaashono, okwa hiywa kOsikola yAauvithi yUukwaniilwa nongashingeyi oku li omukokolindjila i ikalekelwa. Rosa okwa ti: “Jehova okwa pa ndje omalalekonuuyamba ogendji, ngoka ga etela ndje lela enyanyu.” Nonando otashi vulika kaa shi kale oshipu okweenda meitaalo miinima mbyoka tu hole unene, ohashi tu etele aluhe uuwanawa.
UUNA TO PEWA EWILIKO OKUZA KEHANGANO LYETU
13. Oshike tashi vulu oku tu inyengitha tu ende sha ikolelela kwaashoka hatu mono, uuna twa pewa ewiliko okuza kehangano lyetu?
13 Olundji ohatu pewa ewiliko okuza kehangano lyetu, okupitila maakuluntugongalo yomoshitopolwa, maatonatelishikandjo, miitayimbelewa nenge kOlutuwiliki, ndyoka hali tu wilike tu longele Jehova. Ihe mbela ongiini ngele omathimbo gamwe katu uvite ko etompelo lyewiliko ndyoka twa pewa? Otashi vulika owala tu mone uuwinayi mboka tashi vulika ewiliko ndyoka li tu etele. Otashi vulika nokuli tu gandje eitulomo kokwaagwanenena kwaamwatate mboka ya gandja ewiliko ndyoka.
14. Oshike tashi ke tu kwathela tu ende meitaalo, uuna twa pewa ewiliko okuza kehangano lyetu? (Aahebeli 13:17)
14 Uuna tatu ende meitaalo, ohatu kala tu na einekelo kutya Jehova oye ta wilike ehangano lye noku shi oonkalo dhetu. Oshizemo, ohatu vulika nziya nohatu shi ningi nehalo ewanawa. (Lesha Aahebeli 13:17.) Uuna twa vulika, ohatu kaleke egongalo lyetu muukumwe. (Ef. 4:2, 3) Otu na einekelo kutya nokuli nonando aamwatate mboka taya kwatele komeho inaya gwanenena, Jehova ote ke tu laleka nuuyamba ngele otwa vulika. (1 Sam. 15:22) Pethimbo lyo opala, ota ka pukulula kehe shimwe shoka sha pumbwa shili okupukululwa. — Mika 7:7.
15-16. Oshike sha kwathele omumwatate a ende meitaalo nonando okwa li e na omalimbililo kombinga yewiliko ndyoka a pewa? (Tala wo ethano.)
15 Natu taleni koshimoniwa shoka tashi ulike uuwanawa mboka hawu zi mokweenda meitaalo. MoPeru, nonando Oshispania osho ha shi popiwa mo unene, aantu oyendji ohaya popi omalaka gomoshitopolwa. Limwe lyomomalaka ngoka Oshiquechua. Uule womimvo odhindji, aamwatate naamwameme mboka haya popi Oshiquechua, oya kala nokukonga aantu mboka haya popi elaka ndyoka moshitopolwa. Ihe opo tu simaneke oompango ndhoka dha tulwa po kepangelo, opwa ningwa omalunduluko ge na ko nasha nomukalo gokuya hoka ku na aantu. (Rom. 13:1) Oshizemo, yamwe oya li ye na omalimbililo ngele otashi kaya moshipala iilonga yokuuvitha moshitopolwa. Molwaashoka aamwatate oya vulika kelunduluko ndyoka, Jehova okwa li a yambeke oonkambadhala dhawo, opo ya mone oyendji mboka haya popi Oshiquechua.
16 Kevin, omukuluntugongalo megongalo lyOshiquechua, okwa li gumwe gwomwaamboka ye na omalimbililo. Okwi ipula tati: “Ngashingeyi otatu ka mona ngiini aantu mboka haya popi Oshiquechua?” Mbela Kevin, okwa ningi po shike? Okwa ti: “ Onda dhimbulukwa Omayeletumbulo 3:5.” Onda li wo ndi ipula kombinga yaMoses. Okwa li ta ka wilika oshigwana shaIsraeli, sho tashi zi mo muEgipiti. Oya ende nondjila ndjoka ya fa aantu yu uka kokwena kwa thita, shoka sha li tashi ke shi ningitha oshipu ketangakwiita lyaEgipiti li ya ponokele. Nonando ongawo, Moses, okwa vulika naJehova okwe mu yambeke momukalo omukumithi. (Eksodus 14:1, 2, 9-11, 21, 22) Kevin, okwa li e na ehalo a lundulule omukalo gumwe gwokuuvitha. Oshizemo? Okwa ti: “Onda li nda kuminwa omukalo moka Jehova e tu yambeka.” Nale, otwa li hatu endaenda olundji muukalele nomathimbo gamwe otwa li owala hatu mono omuntu gumwe, nenge yaali mboka haya popi Oshiquechua. Ngashingeyi, ohatu gandja eitulomo kiitopolwa mbyoka yina aantu oyendji mboka haya popi Oshiquechua. Noshizemo, ohatu tameke oonkundathana naantu oyendji, otu na omaishunoko nomakonakonombiimbeli ogendji. Omwaalu gwaamboka haya kala pokugongala ogwi indjipala. Odhoshili kutya uuna tatu ende meitaalo, Jehova ohe tu pe aluhe ondjambi.
Aamwatate oya li ya tsakanene naantu oyendji, mboka ye ya pukulula pomahala mpoka taya vulu okwaadha aantu mboka haya popi elaka lyOshiquechua moshitopolwa (Tala okatendo 15-16)
17. Oshike wi ilonga moshitopolwa shika?
17 Otwa kundathana omikalo ndatu dha simana nkene tatu vulu okutsikila okweenda meitaalo. Ihe otwa pumbwa okutsikila okweenda meitaalo miinima ayihe monkalamwenyo yetu, ngaashi uuna tatu hogolola omainyanyudho nosho wo uuna tatu ningi omatokolo kombinga yelongo, nenge kombinga yokuputudha aanona. Etokolo kehe tatu ningi, inatu pumbwa owala okuwilikwa kwaashoka hatu vulu okumona ihe okekwatathano wo lyetu naJehova, komayele ge nosho wo keuvaneko lye kutya ote ke tu sila oshimpwiyu. Ngele otwe shi ningi, otatu ka vula ‘okulongela nokuvulika kOmuwa Kalunga ketu aluhe sigo aluhe.’ — Mika 4:5.
EIMBILO 156 Molweeitaalo
