1, 2. (a) Monale, aapiya yaJehova oya li haye mu galikanene peni? (b) Jesus okwa li u uvitile ngiini otempeli yaJehova ndjoka ya li muJerusalem? (c) Otatu ki ilonga shike moshitopolwa shika?

AAPIYA yaJehova yonale noyokunena, oya kala aluhe ye na omahala gokulongela Kalunga. Pashiholelwa, sho Abel a yambele Jehova omayambo, otashi vulika a li a tungu oshiyambelo. (Genesis 4:3, 4) Noa, Abraham, Isak, Jakob naMoses nayo oya li ya tungu iiyambelo. (Genesis 8:20; 12:7; 26:25; 35:1; Eksodus 17:15) Jehova okwa li a lombwele Aaisraeli ya tunge etsalihangano. (Eksodus 25:8) Konima, okwe ya pe omalombwelo ya tunge otempeli. (1 Aakwaniilwa 8:27, 29) Sho oshigwana shaKalunga sha galuka muukwatwa waBabilon, osha kala hashi gongala moosinagoga. (Markus 6:2; Johannes 18:20; Iilonga 15:21) Omanga Aakriste yopetameko ya li haya gongalele momagumbo. (Iilonga 12:12; 1 Aakorinto 16:19) Nena aapiya yaJehova kongonga yevi alihe, ohaya gongalele mIinyanga yUukwaniilwa oyindjiyindji moka haya longwa kombinga yaJehova nohaye mu longele.

² Jesus okwa li a simaneka noonkondo otempeli yaJehova ndjoka ya li muJerusalem. Ohole ye oya li ya dhimbulukitha aalongwa ye oohapu ndhoka dha popiwa komunyoli gwEpisalomi, ngoka a ti: “Uulaadhi omolwongulu yoye otau thiminike ndje.” (Episalomi 69:9; Johannes 2:17) Otempeli ndjoka ya li muJerusalem oya li  “otempeli yOmuwa,” ihe itayi vulu okuyelekanithwa thiluthilu nOshinyanga shUukwaniilwa. (2 Ondjalulo 5:13; 33:4) Otu na okukala twa simaneka lela omahala getu gelongelokalunga. Moshitopolwa shika otatu ka kundathana omakotampango gOmbiimbeli, ngoka tage tu longo kutya otu na okwiihumbata ngiini uuna tu li pOshinyanga shUukwaniilwa, nkene tu na oku yi sila oshimpwiyu nankene tatu vulu okukwathela noofuto dhayo. *

3-5. Oshinyanga shUukwaniilwa oshike, notu na okukala tu uvitile ngiini okugongala kehe?

³ POshinyanga shUukwaniilwa, opo aantu haya gongalele ya longele Jehova. Okugongala kehe oku li omagano ngoka ga za kuKalunga. Ohaku tu kwathele tu koleke ekwatathano lyetu naye. Opo wo hatu tsuwa omukumo nokuwilikwa kehangano lye. Oshi li uuthembahenda uunene okuhiywa kuJehova nosho wo kOmwana oshiwike kehe, tu lye “koshililo shOmuwa.” (1 Aakorinto 10:21) Inatu dhimbwa nando kutya ehiyo ndika oli ikalekelwa.

⁴ Jehova ote tu lombwele sha yela kutya okwa hala tu kale po pokugongala, tatu mu galikana notatu kumagidhathana. (Lesha Aahebeli 10:24, 25.) Molwaashoka otwa simaneka Tate Jehova, katu na siku tu faule okugongala, kakele owala ngele kaatu na nkene. Ohatu ulike kutya otwa lenga okugongala, ngele ohatu ilongekidha nawa nohatu kutha ombinga muko. —  Episalomi 22:22.

⁵ Ohatu ulike wo kutya otwa simaneka Jehova, ngele ohatu ihumbata nawa pokugongala, nongele ohatu sile Oshinyanga shUukwaniilwa oshimpwiyu. Otwa hala eihumbato lyetu li simanekithe edhina lyaJehova, ndyoka hali kala lya nyolwa kendhindhiliko ndyoka li li kIinyanga yetu yUukwaniilwa. —  Yelekanitha 1 Aakwaniilwa 8:17.

6. Aantu ohaya ti ngiini kombinga yIinyanga yetu yUukwaniilwa nokombinga yaamboka haya kala pokugongala? (Tala kethano lyopetameko.)

⁶ Ngele otwa simaneka Oshinyanga shetu shUukwaniilwa, aantu ohaye shi ndhindhilike. Pashiholelwa, omulumentu gumwe moTurkey okwa ti: “Onda li nda fuuka, sho nda mono Oshinyanga shUukwaniilwa sha yela nawa noshi na elandulathano. Aapulakeni oya li ya zala nawa, tayi imemeha noya popitha ndje nohamu. Shika osha fuula ndje noonkondo.” Omulumentu nguka okwa tameke okukala po pokugongala kehe, nokonima okwa ninginithwa. Aamwatate moshilando shimwe shaIndonesia oya li ya hiya aashiinda, omuleli gwoshilando naanambelewa yalwe, ya talele po Oshinyanga shUukwaniilwa shoka opo sha tungilwe. Omuleli gwoshilando okwa li a fuulwa kongushu yetungo, komutungilo gwalyo nokoshikunino shalyo oshiwanawa. Okwa ti: “Uuyogoki woshinyanga shika otawu holola eitaalo lyeni lyashili.”

7, 8. Ongiini tatu vulu okuulika kutya otwa simaneka Jehova, uuna tu li pOshinyanga shUukwaniilwa?

⁷ Jehova oye he tu hiya kokugongala. Oku na ko nasha nomukalo moka hatu iyopaleke, hatu zala nomukalo moka hatu ihumbata, uuna tu li po. Onkee ano, katu na okukala tatu endekele kombinga yimwe. Katu na okukala tatu dhengele unene nokutula po ooveta dhankene tu na okuzala, tse ishewe katu na okukala twa zala twa fa tu li megumbo. Jehova okwa hala ayehe mboka tatu hiya kokugongala ya kale ya manguluka, sho ye li pOshinyanga shUukwaniilwa. Ihe inatu hala nando okudhinitha okugongala kwetu. Nomolwashono hatu zala oonguwo dha yogoka notadhi opalele. Ohatu yanda wo okukala tatu tumu omatumwalaka kongodhi, tatu popi, tatu li nenge tatu nu pethimbo lyokugongala. Aakuluntu oye na okulonga oyana kaaya kale  taya matuka nenge taya dhana pOshinyanga shUukwaniilwa. —  Omuuvithi 3:1.

⁸ Sho Jesus a mono aantu taya landithile motempeli, oshe mu geyitha e te ya tidha mo. (Johannes 2:13-17) Otashi ka kala wo sha puka okungeshefela mOshinyanga shUukwaniilwa, oshoka omo hatu ilongo kombinga yaJehova nomo hatu mu longele. —  Yelekanitha Nehemia 13:7, 8.

9, 10. (a) Oshigwana shaJehova ohashi longitha omukalo guni, opo pu tungwe Iinyanga yUukwaniilwa, nopwa tungwa Iinyanga yi thike peni? (b) Ehangano lyaJehova ohali kwathele ngiini omagongalo ngoka itaaga vulu okwiitungila Iinyanga yUukwaniilwa?

⁹ Aapiya yaJehova muuyuni awuhe ohaya longo ya mana mo, sho taya tungu Iinyanga yUukwaniilwa. Mboka haya thaneke oopulana naamboka haye yi tungu noku yi opalekulula, ihaya futwa sha. Omolwaaiyambi mboka, momukokomoko gwoomvula 15 dha piti, muuyuni awuhe omwa tungwa Iinyanga yUukwaniilwa iiwanawa ya konda po 28 000 nenge konyala itano esiku kehe.

¹⁰ Ehangano lyaJehova ohali tumu aaiyambi ya ka kwathele okutunga Iinyanga yUukwaniilwa mpoka ya pumbiwa, tali longitha oshimaliwa shoka ooitaali haya gandja. Ohatu landula ekotampango lyOmbiimbeli ndyoka tali ti kutya mboka ye na oshindji otaya vulu okukwathela mboka kaaye na oshindji. (Lesha 2 Aakorinto 8:13-15.) Oshizemo? Omagongalo ogendji ngoka ga li itaaga vulu okwiitungila Iinyanga yUukwaniilwa, ngashingeyi oga tungilwa Iinyanga.

11. Aamwatate yamwe oya ti ngiini kombinga yOshinyanga shawo shUukwaniilwa shoka opo sha tungilwe, naashoka oshe ku uvitha ngiini?

¹¹ Aamwatate megongalo limwe moCosta Rica, oya nyola ngeyi: “Aluhe uuna twa thikama komeho gOshinyanga shetu shUukwaniilwa, ohatu kala tu wete twa fa tatu tsu ondjodhi. Ihatu shi itaale nuupu kutya Oshinyanga shetu oshiwanawa osha tungwa shi ihwa po, muule owala womasiku gahetatu.” Otwa vulu okupondola omolwomalaleko nuuyamba gaJehova, omalongekidho ngoka ga ningwa kehangano nokekwatho ndyoka twa pewa kaamwatate aaholike. Ehala lyetu ndika lyokulongela Jehova, oli li omagano ge na ondilo shili, nolya fa emanya lyondilo ndyoka twa pewa kuJehova. Otwe li nyanyukilwa unene.” Ohashi tu nyanyudha shili, ngele tu wete aamwatate naamwameme taya pandula Jehova, omolwiinima ayihe mbyoka e ya ningila. Otwa nyanyukwa wo sho aamwatate muuyuni awuhe taya vulu okukala ye na Oshinyanga shUukwaniilwa. Osha yela kutya Jehova oye ta yambeke iilonga yokutunga Iinyanga yUukwaniilwa, oshoka shampa ya tungwa, yo aantu oyendji nayo otaya tameke okuya kokugongala yi ilonge kombinga yaJehova. —  Episalomi 127:1.

12. Ongiini to vulu okukwathela miilonga yokutunga Iinyanga yUukwaniilwa?

¹² Ongiini to vulu okukwathela miilonga yokutunga Iinyanga yUukwaniilwa? Oto vulu okwiiyamba wu ka kwathele mokutunga. Atuheni  otatu vulu okugandja oshimaliwa, opo Iinyanga yUukwaniilwa yi tungwe. Ngele tatu ningi kehe shimwe tatu vulu opo tu kwathele miilonga mbika, otatu ka mona enyanyu ndyoka ha li zi mokugandja notatu simanekitha Jehova. Kungeyi, otatu holele aapiya yaJehova yopethimbo lyOmbiimbeli, mboka ya li ye na ehalo lyokwaambidhidha, opo omahala gawo gelongelokalunga ga tungwe. —  Eksodus 25:2; 2 Aakorinto 9:7.

13, 14. Oshike tatu ilongo mOmbiimbeli, shoka tashi tu ulukile kutya otu na okukaleka Oshinyanga shetu shUukwaniilwa sha yela noshi li melandulathano?

¹³ Tate Jehova, oKalunga omuyogoki nomuyapuki. Oku na wo elandulathano. Onkee ano, otu na okukaleka Iinyanga yetu yUukwaniilwa ya yela noyi li melandulathano. (Lesha 1 Aakorinto 14:33, 40.) Ihe ngele otwa hala okukala twa yogoka notwa yapuka ngaashi Jehova, katu na owala okukaleka elongelokalunga lyetu, omadhiladhilo getu niilonga yetu ya yela. Otu na wo okukaleka omalutu getu ga yela. —  Ehololo 19:8.

¹⁴ Otatu ka kala tu na omukumo gwokuhiya aantu kokugongala, ngele ohatu kaleke Oshinyanga shetu shUukwaniilwa sha yela noshi li melandulathano. Aantu otaya ka mona kutya ohatu tula shili miilonga shoka hatu uvitha kombinga yuuyuni uupe, mboka tawu ka kala wa yela. Otaya ka mona wo kutya ohatu longele Kalunga omuyapuki nomuyogoki, ngoka ta ka ninga evi oparadisa ombwanawa. —  Jesaja 6:1-3; Ehololo 11:18.

15, 16. (a) Omolwashike ihaashi kala aluhe oshipu okukaleka Oshinyanga shUukwaniilwa sha yela? Omolwashike tu na oku shi kaleka sha yela? (b) Omalongekidho geni haga ningwa po, opo Oshinyanga sheni shUukwaniilwa shi opalekwe, nakehe gumwe gwomutse oku na uuthembahenda wokuninga shike?

¹⁵ Aantu oye na omataloko ga yooloka ngele tashi ya puuyogoki. Omolwashike mbela? Otashi vulika omolwomukalo moka ya putudhwa. Yamwe otashi vulika wo haya zi pomahala ge na ontsi nenge popepi noopate dha kaka nodhi na ontopo. Yalwe otashi vulika kaaye na omeya ga gwana, nenge oothewa dhokwoopaleka. Ihe kashi na nduno mbudhi kutya ohatu zi peni nenge aantu momidhingoloko dhetu oya tala ko ngiini uuyogoki, otu na okukaleka Oshinyanga shetu shUukwaniilwa sha yela noshi li melandulathano. Oshinyanga shetu shUukwaniilwa, osho ehala mpoka hatu longele Jehova. —  Deuteronomium 23:14.

 ¹⁶ Otu na okukala tu na elandulathano, ngele otwa hala okukaleka Oshinyanga shetu shUukwaniilwa sha yela. Aakuluntugongalo ohaya tula po elandulathano megongalo, nohaya shilipaleke kutya opu na aluhe oothewa dha gwana niilongitho yokwoopalekitha ya gwana. Aakuluntugongalo ohaya unganeke wo iilonga yokwoopaleka, opo yi longwe. Opu na iinima yimwe mbyoka ya pumbwa okukala hayi opalekwa konima yokugongala kehe. Ihe yimwe inayi pumbwa okwoopalekwa. Atuheni otu na uuthembahenda wokukutha ombinga mokwoopaleka Oshinyanga shUukwaniilwa.

17, 18. (a) Oshike tatu ilongo komukalo ngoka aapiya yaJehova yonale ya li haya sile otempeli oshimpwiyu? (b) Omolwashike tu na okukaleka Oshinyanga shUukwaniilwa monkalo ombwanawa?

¹⁷ Ohatu kaleke wo Oshinyanga shetu shUukwaniilwa monkalo ombwanawa, mokupangela iinima mbyoka ya pumbwa okupangelwa. Oshigwana shaJehova pethimbo lyonale, nasho osho sha li hashi ningi. Pashiholelwa, pethimbo lyelelo lyomukwaniilwa gwaJuda, Joas, aantu oya li ya gandja iimaliwa kotempeli. Omukwaniilwa okwa lombwele aayambi ya longithe iimaliwa mbyoka, ya opaleke otempeli mpoka ya pumbwa okwoopalekululwa. (2 Aakwaniilwa 12:4, 5) Sho pwa piti omimvo 200, omukwaniilwa Josia naye okwa li a longitha omaambidhidho gotempeli, opo e yi opaleke. —  Lesha 2 Ondjalulo 34:9-11.

¹⁸ Ookomitiye dhimwe dhIitayimbelewa odha koneka kutya aantu yamwe miilongo yawo, inaya igilila okukaleka omatungo niilongitho yi li monkalo ombwanawa. Otashi vulika aantu owala aashona miilongo moka ye shi nkene iilonga yi na okulongwa. Nenge tashi vulika kaaye na oshimaliwa sha gwana shokwoopalekululitha Oshinyanga. Ihe ngele otwa pititha po ethimbo inaatu opalekulula Oshinyanga shetu, otashi ka kala kaashi li monkalo ombwanawa, naantu otaya ka sa uunye. Ihe ngele otwa kambadhala twa mana mo tu kaleke Oshinyanga shetu monkalo ombwanawa, otatu hambelelitha Jehova, tse itatu ka hepitha oshimaliwa shoka aamwatate haya gandja.

19. Owu na okuninga shike, opo wu ulike kutya owa simaneka ehala mpoka hamu longele Jehova?

¹⁹ Iinyanga yUukwaniilwa ayihe oya yapulilwa Jehova. Kayi shi yomuntu gwontumba, yo kayi shi yegongalo lyontumba. Omakotampango gOmbiimbeli, ngoka twa kundathana moshitopolwa shika, otage tu kwathele tu kale niikala yu uka yankene tu na okukala twa tala ko ehala lyetu, mpoka hatu longele Kalunga. Molwaashoka otwa simaneka Jehova, ohatu simaneke wo okugongala kwetu nosho wo Oshinyanga shetu shUukwaniilwa. Ohatu gandja oshimaliwa nenyanyu, opo ku tungwe Iinyanga yUukwaniilwa. Ohatu longo wo nuudhiginini tu yi kaleke ya yela noyi li monkalo ombwanawa. Ngaashi Jesus a li e na uulaadhi molwotempeli, natse otu na uulaadhi omolwomahala getu gokulongela Jehova notwe ga simaneka wo. —  Johannes 2:17.