1. Uuna tatu uvitha, ohatu longitha ngiini oohapu dhegalikano lyaJesus, ndhoka dhi li muMateus 6:9-13?

AANTU oyendji oya tseya nawa oohapu dhegalikano ndhoka tadhi adhika muMateus 6:9-13. Uuna tatu uvitha, natse ohatu longitha oohapu ndhoka dha popiwa megalikano ndyoka. Ohatu shi ningi opo tu longe aantu kutya Uukwaniilwa owo epangelo lyaKalunga lyolela ndyoka tali ka ninga evi oparadisa. Ohatu longitha oohapu “edhina lyoye nali yapulwe,” tu ulike kutya Kalunga oku na edhina notu na oku li tala ko eyapuki. —  Mateus 6:9.

2. Otu shi shi ngiini kutya Jesus ina hala tu endulule iitya ya faathana kehe ethimbo tatu galikana?

² Mbela Jesus okwa hala tu kale hatu endulula oohapu ndhoka kehe ethimbo tatu galikana, ngaashi yamwe haye shi ningi? Aawe. Jesus okwa tile: “Ngele tamu galikana, inamu endulula iinima ya faathana.” (Mateus 6:7, yelekanitha NW) Pompito yimwe, sho a li ta longo aalongwa ye nkene ye na okugalikana, okwa li a endulula egalikano ndyoka, ihe ina longitha iitya ya faathana kondandalunde. (Lukas 11:1-4) Ano Jesus okwe tu pe oshiholelwa sha nkene tu na okugalikana, opo e tu longe kutya iinima yini tu na okupula megalikano.

3. Omapulo geni wu na okwiipula sho to konakona egalikano lyOmuwa?

 ³ Moshitopolwa shika naashoka tashi landula ko, otatu ka konakona muule egalikano lyOmuwa. Sho tatu shi ningi, ipula to ti: ‘Mbela egalikano ndika, otali kwathele ndje ngiini ndi hwepopaleke omagalikano gandje?’ Epulo lilwe lya simana olyo kutya: ‘Mbela onkalamwenyo yandje oyi li ngaa metsokumwe negalikano lyOmuwa?’

4. Uutumbulilo “Tate yetu,” otawu tu dhimbulukitha shike, naJehova oku li ngiini Tate yetu?

⁴ Jesus okwa tameke egalikano ndyoka ta ti: “Tate yetu.” Shika otashi tu dhimbulukitha kutya Tate Jehova oye He yaamwatate naamwameme ayehe kongonga yevi. (1 Petrus 2:17) Mboka ya hogololwa kuJehova ya ka kale megulu oya ninga oyana. Kungeyi, Tate Jehova oye He, momukalo gwi ikalekelwa. (Aaroma 8:15-17) Mboka taya ka kala kombanda yevi, nayo otaya vulu oku mu ithana “Tate.” Tate Jehova ohe ya pe omwenyo nohe ya sile oshimpwiyu pahole. Otaya ka ithanwa ‘aana yaKalunga,’ konima ngele ya ningi aashitwa ya gwanenena nongele ya kala aadhiginini kuJehova memakelo lyahugunina. —  Aaroma 8:21; Ehololo 20:7, 8.

5, 6. Omagano geni ge na ondilo ngoka aavali taya vulu okupa oyana, noshike okanona kehe ke na okuninga nomagano ngoka? (Tala kethano lyopetameko.)

⁵ Aavali ohaya pe oyana omagano, ngele ye ya kwathele yu uve ko kutya Tate Jehova oye He yawo gwomegulu noku ya longa ya galikane kuye. Omutonatelishikandjo gumwe moSouth Africa okwa ti: “Sho aamwandjekadhona ya valwa, onda li handi galikana pamwe nayo ongulohi kehe, kakele uuna nda za po. Olundji ohaye tu lombwele kutya ihaya dhimbulukwa naanaa iitya mbyoka nda li handi longitha sho te galikana. Ihe otaya dhimbulukwa ombepo ndjoka hayi kala po, uuthembahenda uunene wokupopya naTate yetu Jehova, okukala yu uvite ya pepelelwa noya gamenwa. Konima sho ya koko kashona, onde ya ladhipike ya kale haya galikana muule, opo ndi uve sho taya lombwele Jehova omadhiladhilo nomaiyuvo gawo. Shika osha li ompito ombwanawa yokumona shoka shi li momitima dhawo. Onda li nda vulu oku ya dheula nawa, ya kale haya kwatele mo iinima ya simana yegalikano lyOmuwa momagalikano gawo, opo ga kale taga ti sha.”

⁶ Oyanakadhona yomumwatate ngoka oya tsikile nokuhedha popepi naJehova sigo oosho ya koko. Ngashingeyi oya hokanwa notaya longele Jehova miilonga yethimbo lyu udha, pamwe naasamane yawo. Omagano ge na ondilo ngoka aavali taya vulu okupa oyana, oku ya longa kutya Jehova Omuntu gwolela nosho wo kutya otaya vulu okupanga uukuume wopothingo naye. Ihe okanona kehe oke na okukaleka po uukuume wako wopothingo naJehova kuko kene. —  Episalomi 5:11, 12; 91:14.

7. Otu na uuthembahenda wuni, ihe oshike tu na okuninga?

⁷ Otu na uuthembahenda wokutseya edhina lyaKalunga nokukala “oshigwana hashi ithanwa nedhina lye.” (Iilonga 15:14, yelekanitha NW; Jesaja 43:10) Ohatu galikana tatu ti: “Edhina lyoye nali yapulwe.” Ano edhina lyaKalunga li kale lya yogoka. Ohatu pula wo Jehova e tu kwathele kaatu longe, tse kaatu popye sha, shoka tashi ke mu shekitha. Inatu kala ngaashi yamwe mboka ya li ihaaya gwanitha po shoka ya li haya longo yalwe ya ninge, methelemumvo lyotango. Omuyapostoli  Paulus okwe ya nyolele ta ti: “OmolwAajuda aapagani otaa sheke edhina lyaKalunga.” —  Aaroma 2:21-24.

8, 9. Gandja oshiholelwa sha nkene Jehova ha kwathele mboka ya hala okuyapulitha edhina lye.

⁸ Ohatu ningi kehe shimwe tatu vulu tu simanekithe edhina lyaJehova. Omumwameme gumwe moNorway, okwa thigwa po oye awike nomwana gwoomvula mbali, konima sho omusamane gwe a hulitha. Okwa popi a ti: “Olya li ethimbo edhigu monkalamwenyo yandje. Onda galikana esiku kehe, konyala owili kehe, opo ndi kaleke omadhiladhilo gandje pehala. Kanda li nda hala ndi pe Satana ompito yokusitha Jehova ohoni mokuninga etokolo kaali li pandunge nenge mokwaavulika. Onda li nda hala ndi yapulithe edhina lyaJehova, nonda li nda hala omumwandje a ka mone he mOparadisa.” —  Omayeletumbulo 27:11.

⁹ Mbela Jehova okwa li a yamukula omagalikano ge? Eeno. Okwa li a ladhipikwa mokukala pamwe aluhe naamwahe megongalo. Konima yoomvula ntano, okwa hokanwa komukuluntugongalo. Omwanamati oku na oomvula 20 ngashingeyi, nokwa ninginithwa. Omumwameme ngoka okwa popi a ti: “Onda nyanyukwa sho omusamane gwandje a kwathele ndje tu mu putudhe.”

10. Tate Kalunga ota ka yapulitha ngiini edhina lye thiluthilu?

¹⁰ Tate Jehova ota ka yapulitha edhina lye, ngele a hanagula po thiluthilu mboka inaaya hala okupangelwa kuYe nohaye mu sheke. (Lesha Hesekiel 38:22, 23.) Pethimbo mpoka aantu otaya ka kala ya gwanenena, nakehe gumwe megulu nokombanda yevi ota ka longela Jehova nokusimanekitha edhina lye eyapuki. Tate yetu omunahole “ota ka ninga oye awike omupangeli gwaayihe.” —  1 Aakorinto 15:28.

11, 12. Mo 1876, Jehova okwa li a kwathele aantu yu uve ko shike?

¹¹ Manga Jesus inaa shuna megulu, aalongwa ye oye mu pula ya ti: “Omuwa, uunake ano to ka pa Aaisraeli Oshilongo?” Jesus okwe ya yamukula kutya kalya li ethimbo, ya tseye kutya uunake Uukwaniilwa waKalunga tawu tameke okupangela. Okwa li e ya lombwele ya gandje eitulomo kiilonga ya simana yokuuvitha. (Lesha Iilonga 1:6-8.) Ihe okwa li wo e ya longo ya galikane Uukwaniilwa waKalunga wu ye noya kale ye wu tegelela. Nomolwaashono hatu galikana Uukwaniilwa wu ye.

¹² Sho ethimbo lya thikana, opo Jesus a tameke okupangela megulu, Jehova okwa kwathele aantu yu uve ko kutya otashi ka ningwa momvula yini. Mo 1876, omumwatate Charles Taze Russell okwa li a nyola oshileshwa shi na oshipalanyolo: “Ethimbo lyaapagani, ota li hulu uunake?” Okwa fatulula kutya “omimvo heyali” ndhoka dha popiwa mehunganeko lyaDaniel odha faathana ‘nomauthwathimbo giigwana,’ (NW) ngoka ga popiwa mehunganeko lyaJesus. Oshileshwa shoka osha li sha yelitha kutya ethimbo ndyoka ota li hulu mo 1914. * —  Daniel 4:16; Lukas 21:24.

13. Oshike sha ningwa po mo 1914, niiningwanima mbyoka ya ka landula omumvo ngoka oyu ulike shike?

¹³ Mo 1914, iita oya tameke muEuropa nokonima oya taandele nuuyuni awuhe. Ondjala oya pimbile omolwiita. Konima sho iita ya hulu mo 1918, ekunku olya dhipaga aantu  oyendji muuyuni shi vulithe iita. Iiningwanima ayihe mbika oya li ‘endhindhiliko’ ndyoka Jesus a li a gandja, ndyoka tali ulike kutya mo 1914 okwa ningi Omukwaniilwa megulu. (Mateus 24:3-8; Lukas 21:10, 11) Momumvo ngoka “okwa yi, a ka sindane, oshoka oye omusindani.” (Ehololo 6:2) Jesus oku umbile Satana noompwidhuli dhe kombanda yevi. Okuza mpoka, ehunganeko lye olya tameke okugwanithwa ndyoka tali ti: “Ihe iihuna otayi ka kala yi thike peni kombanda yevi nomefuta! Oshoka omuhindadhi okwa kulukile kune u udha ondjahi, sho e shi shi kutya oku na ko ashike okathimbo okafupi kowala.” —  Ehololo 12:7-12.

14. (a) Omolwashike hatu galikana natango Uukwaniilwa waKalunga wu ye? (b) Iilonga ya simana yini tu na okulonga ngashingeyi?

¹⁴ Ehunganeko ndyoka li li mEhololo ontopolwa 12 ota li tu kwathele tu uve ko kutya omolwashike iinima iiwinayi ya tameke okuningwa kombanda yevi, pethimbo ndyoka Jesus a ningi Omukwaniilwa gwUukwaniilwa waKalunga. Nonando Jesus ota pangele megulu, Satana ota pangele natango kombanda yevi. Ihe masiku Jesus ota ka ‘sindana,’ sho ta ka kutha ko uukolokoshi awuhe kombanda yevi. Manga twa tegelela shoka shi ningwe, otu na okukala hatu galikana Uukwaniilwa waKalunga wu ye nokukala twi ipyakidhila niilonga yokuuvitha kombinga yUukwaniilwa mboka. Iilonga yetu otayi gwanitha ehunganeko lyaJesus ndyoka tali ti: ‘Onkundana ndjika ombwanawa yUukwaniilwa otayi ku uvithilwa uuyuni awuhe yi ningile iigwana ayihe onzapo; notaku ya ihe ehulilo.’ —  Mateus 24:14, yelekanitha NW.

15, 16. Omolwashike inaashi gwana okugalikana owala ehalo lyaKalunga li gwanithwe kombanda yevi? Shi yelitha.

¹⁵ Oomvula 6 000 dha ka pita, ehalo lyaKalunga olya li hali gwanithwa kombanda yevi. Nomolwaashono Jehova a popi kutya iinima mbyoka a shita, oyo “opala lela.” (Genesis 1:31) Konima Satana okwa ningi omunashipotha,  nokuza mpono aantu oyendji inaya kala we haya gwanitha ehalo lyaKalunga. Ihe kunena oku na aantu oomiliyona hetatu taya longele Jehova. Ohaya galikana ehalo lyaKalunga li gwanithwe kombanda yevi nohaya longo ehalo lye. Onkalamwenyo yawo oya hokiwa kuKalunga nohaya uvithile yalwe nuulaadhi kombinga yUukwaniilwa we.   

¹⁶ Pashiholelwa, omumwameme gumwe omutumwa moAfrika, ngoka e na omimvo 80, ngoka a ninginithwa mo 1948, okwa ti: “Ohandi galikana aluhe, opo aanamitima omiwanawa ya monike, yo ya kwathelwe ya tseye Jehova manga ethimbo inaali pwa po. Natango manga inaandi uvithila omuntu, ohandi pula owino opo ndi adhe omutima gwomuntu ngoka. Ohandi galikana Jehova a yambeke oonkambadhala dhetu, tu kwathele aanamitima omiwanawa mboka taya konakona nale.” Omumwameme nguka omukokele okwa kwathela aantu oyendji ya tseye Jehova. Mbela owu shi aakokele yalwe mboka taya longo ehalo lyaJehova nuulaadhi? —  Lesha Aafilippi 2:17.

17. Owu uvitile ngiini shoka Jehova ta ka ningila aantu nosho wo evi monakuyiwa?

¹⁷ Otu na okutsikila nokugalikana ehalo lyaJehova li gwanithwe, sigo a hanagula po aatondi ye kombanda yevi. Ngele shoka sha ningwa, evi otali ka ninga oparadisa naantu omabiliyona otaya ka yumudhwa. Jesus okwa ti kutya “ethimbo otali ya, uuna oonakusa ayehe mboka ye li moombila, taa ka uva ewi lye. Yo notaa ka za mo moombila dhawo.” (Johannes 5:28, 29) Dhiladhila kenyanyu ndyoka tatu ka kala tu na sho tatu ka hambelela aaholike yetu. Kalunga “ota ka theta omahodhi agehe” momeho getu. (Ehololo 21:4) Oyendji yomwaamboka taya ka yumudhwa, oyo ‘aawinayi,’ mboka inaaya tseya oshili kombinga yaJehova naJesus. Otatu ka nyanyukilwa oku ya longa ehalo lyaKalunga, opo ya ka mone “omwenyo gwaaluhe.” —  Iilonga 24:15; Johannes 17:3.

18. Oshike shoka aantu ya pumbwa unene?

¹⁸ Ngele Uukwaniilwa waKalunga we ya, otawu ka yapulitha edhina lye, naantu ayehe muuyuni ota ya ka longela Jehova ya hangana. Tate Kalunga ota ka pa aantu shoka ya pumbwa unene, sho ta ka yamukula omaindilo gatatu gotango gegalikano lyOmuwa. Moshitopolwa tashi landula, otatu ka kundathaneni iinima yimwepo mbyoka twa pumbwa okukwatela mo momagalikano getu, ngaashi Jesus e tu longa.