OKWIIKALELA okwa nyenga enongo! Aantu oye na ompumbwe onene yokukala nekwatathano lyopothingo nayalwe. Ohaku tiwa, “aantu ngele oye holathane noye shaathane nawa, ohaya kala nekwatathano ewanawa.” Ohatu kala twa nyanyukwa shampa yaandjetu nookuume ketu ye tu hole, ye tu simaneka noye tu uvite ko. Ashike Omuntu ngoka tu na okupanga uukuume wopothingo unene naye, Omushiti gwetu. —  Omuuv. 12:1.

2. Jehova ote tu uvanekele shike, ihe omolwashike aantu oyendji inaa itaala euvaneko ndyoka?

² Jehova ote tu hiya okupitila mOohapu dhe tu ‘hedhe’ popepi naye, note tu uvanekele kutya ngele otwe shi ningi, nena naye ota ka “hedha” popepi natse. (Jak. 4:8) Shika itashi tu tsu tuu omukumo! Ihe oyendji ohaya dhiladhila kutya osha nika uugoya okwiitala kutya Kalunga okwa hala okupanga uukuume wopothingo natse; oye wete inaaya gwana okuhedha kuye nenge ye wete e li kokule unene nokupanga uukuume nayo. Mbela otatu vulu ngaa okuhedha popepi naJehova?

3. Oshike tu na okutseya kombinga yaJehova?

³ Sho sheneshene, otatu vulu okutseya Jehova nokwa hala tu mu konge, oshoka “ke li kokule nomuntu nando ogumwe.” (Lesha  Iilonga 17:26, 27; Episalomi 145:18.) Nonando inatu gwanenena, Jehova okwa halelela oku tu taamba ko tu kale ookuume ke kopothingo. (Jes. 41:8; 55:6) Omupisalomi okwa li e shi imonene ye mwene, e ta nyola ta ti: ‘Eeno, ongoye nguka ho uvu omagalikano. Aantu ayehe otaye ya kungoye. Aanelago oomboka we ya hogolola nowe ya eta pungoye.’ (Eps. 65:2, 4, yelekanitha NW.) Ombiimbeli otayi popi kombinga yomukwaniilwa gwaJuda, Asa, ngoka e tu tulile po oshiholelwa shokuhedha popepi naKalunga, nankene Jehova a hedha popepi naye. *

4. Omukwaniilwa Asa okwa li a tulile po Aajuda oshiholelwa shini?

⁴ Omukwaniilwa Asa okwa li omulumentu omulaadhi mokulongela Kalunga kashili. Okwa hanagula po otempeli yoohonda nokuvudha mo iimenka ayihe mbyoka ya li yu udha moshilongo. (1 Aak. 15:9-13) Molwashoka Asa okwa li a panga uukuume wopothingo naJehova nokwa vulika kiipango Ye, okwa li ta vulu okulombwela aantu “ya gwanithe ehalo lyOMUWA, Kalunga koohekulu, noya vulike komalongo nokiipango ye.” Omimvo omulongo dhopetameko lyepangelo lyaAsa, Jehova okwa pe oshilongo ombili. Asa okwa li e shi shi lela kutya ombili ndjika okwe yi pewa kuJehova, nomolwaashono a lombwele oshigwana ta ti: “Otatu pangele oshilongo, molwaashoka twa gwanitha ehalo lyaKalunga ketu. Oye te tu gamene e te tu shigi koombinga adhihe.” (2 Ondjal. 14:1-7) Natu taleni shoka sha ka ningwa po.

5. Asa okwi iyadhele monkalo yini moka a holola kutya okwi inekela muKalunga, noshizemo oshini?

⁵ Natu tye ando owa li monkalo ya fa yaAsa. Serak Omusudani ota homona Juda e na aakwiita emiliyona nomatembakwiita 300. Ngoye owu na owala aakwiita 580 000, ye vulike lwaali kaakwiita Aasudani. (2 Ondjal. 14:8-10) Mbela ando owa ningi po shike , sho wa mono etangakwiita ndika tali ponokele oshilongo shoye? Mbela ando owi ipula kutya omolwashike Kalunga inee li keelela? Mbela ando oshiponokela shika owu ungaunga nasho wi ikolelela kuunongo woye mwene? Asa oku ulike kutya oku na uukuume wopothingo naJehova nonokutya okwe mu inekela. Okwa galikana a mana mo a ti: “Ngashingeyi tu kwatha, OMUWA, Kalunga ketu, oshoka otwe ku inekela nomedhina lyoye twa piti mo, tu kondjithe ongundu ndjika onenenene. OMUWA, ongoye Kalunga ketu; nokape na ngoka te ku itakeke.” Kalunga okwa yamukula ngiini eindilo ndika lyaAsa? “OMUWA okwa dhenge etangakwiita lyAasudani.” Noinapu hupa nando oye omutondi gumwe. —  2 Ondjal. 14:11-13.

6. Ongiini tu na okuholela Asa?

⁶ Oshike sha kwathele Asa a kale i inekela thiluthilu kutya Kalunga ote ke mu gamena noku mu wilika? Ombiimbeli oya ti kutya “Asa okwa ningi shoka sho opalela OMUWA” nosho wo kutya “okwa kala i itula mOMUWA.” (1 Aak. 15:11, 14) Ngele otwa hala okukala nekwatathano lyopothingo naKalunga ngashingeyi nomonakuyiwa, natse otu na okulongela Kalunga nomutima aguhe. Otwa nyanyukwa shili sho Jehova a kutha onkatu, opo e tu nanene kuye noku tu kwathela tu kale popepi naye lela! Natu ka taleni kiinima iyali mbyoka Kalunga a ningi, opo e tu nanene kuye.

7. (a) Jehova okwe tu ningile shike shoka tashi tu nanene kuye? (b) Omomukalo guni gwa dhenga mbanda Kalunga he tu nanene kuye?

⁷ Sho Jehova a shitile aantu ehala ewanawa, oku ulike kutya oku ya hole. Nohole ndjika ohe yi tu ulukile natango sho he tu sile oshimpwiyu  esiku kehe, opo tu kale nomwenyo. (Iil. 17:28; Eh. 4:11) Ashike Jehova ohu ulike kutya oku tu hole unene, sho he tu pe iikulya yopambepo. (Luk. 12:42) Ote tu shilipaleke wo kutya oha pulakene ye mwene komagalikano getu. (1 Joh. 5:14) Ihe ekuliloyambo olyo omukalo dhingi moka Kalunga he tu nanene kuye nohu ulike kutya oku tu hole. (Lesha 1 Johannes 4:9, 10, 19.) Jehova okwa tumine “Omwana awike” kombanda yevi, opo e tu hupithe muulunde nomeso. —  Joh. 3:16.

8, 9. Jesus ota dhana onkandangala yini megwanithopo lyomauvaneko gaJehova?

⁸ kuza sho Jehova a hunganeke kombinga yOmuhupithi ngoka ta ka hupitha aantu, okwa li a tala ko ekulilo lya fa lya ningwa nale, shaashi okwa li e shi shi kutya elalakano lye itali ponyo. (Gen. 3:15) Nokungeyi, Jehova okwa gandja wo ompito nokwaamboka ya li ko manga Kristus inaa sa, ya mone mo uuwanawa mekuliloyambo. Konima yoomvula omathele, omuyapostoli Paulus okwa pandula Kalunga, molwaashoka ‘Jesus Kristus okwe tu kulile.’ Paulus okwa gwedha ko a ti: “Nale Kalunga okwa li i idhidhimikile nokwe etha oondjo dhaantu, inee ya geela omolwadho.” (Rom. 3:21-26) Jesus ita dhana tuu onkandangala onene moku tu hedhitha popepi naKalunga!

⁹ Aantu aaifupipiki otaya vulu owala okutseya Jehova nokukala nekwatathano lyopothingo naye okupitila muJesus. Ombiimbeli otayi shi popi ngiini? Paulus okwa nyola a ti: “Kalunga okwe tu hololele kutya oku tu hole, Kristus sho a si peha lyetu, manga twa li aalunde.” (Rom. 5:6-8) Jehova okwe tu pe ekuliloyambo, hamolwaasho ando twa gwana oku li pewa, ihe omolwaashoka ye naJesus ye tu hole. Jesus okwa ti: ‘Kaku na nando omuntu ta vulu okuya kungame, okuninga Tate, nguka a tuma ndje, te mu eta kungame.’ Pompito yilwe okwa tile: “Kape na ngoka ta vulu okuya kuTate, okuninga ta pitile mungame.” (Joh. 6:44; 14:6) Jehova oha longitha ombepo ondjapuki a nanene aantu kuye okupitila muJesus nohe ya kwathele ya kale mohole ye, ye na etegameno lyoku ka mona omwenyo gwaaluhe. (Lesha Judas 20, 21.) Natu taleni ishewe komukalo gulwe moka Jehova he tu nanene kuye.

10. Ombiimbeli ohayi tu kwathele ngiini tu hedhe popepyeelela naKalunga?

¹⁰ Sigo oompaka moshileshwa shika otwa longitha omanyolo ga za momambo 14 gOmbiimbeli. Ngele ando Ombiimbeli kaya li po, mbela ando otwa tseya ngiini kutya otatu vulu okuhedha popepi nOmushiti gwetu? Ando otwa tseya ngiini kombinga yekuliloyambo nonokutya otatu vulu okuhedha popepi naJehova okupitila muJesus? Jehova okwa longitha ombepo ye a nyolithe Ombiimbeli ndjoka tayi holola uukwatya we uuwanawa nosho wo elalakano lye. Pashiholelwa, muEksodus 34:6, 7, Jehova okwa lombwele Moses kombinga ye, a ti: “Ongame Kalunga omunamutimahenda, omunalukeno nomutalanteni, ihandi geye mbala nondu udha esilohenda nuudhiginini. Ohandi dhiginine ohole yandje koluvalo lwomayuvi note dhimi po [uukolokoshi,] omayono noondjo.” Olye ta ka kala kee hole omuntu a tya ngaaka? Jehova oku shi kutya ngele otwe mu tseya nawanawa, ota ka kala omuntu gwolela kutse notatu ka panga uukuume wopothingo naye.

11. Omolwashike tu na okukambadhala okwiilonga kombinga yuukwatya waKalunga noondjila dhe? (Tala kethano lyopetameko.)

¹¹ Petameko lyembo Hedha popepi naJehova opu na oohapu tadhi popi nkene tatu vulu okukala nekwatathano lyopothingo naKalunga ndhoka tadhi ti: “Opo tu pange uukuume nomuntu gwontumba, ohatu ilongo kombinga ye nokukala twa hokwa iikala ye iiwanawa notwe yi lenga. Onkee ano, osha simanenena okukonakona omaukwatya noondjila dhaKalunga ndhoka dhi li mOmbiimbeli.” Onkee ano, inatu  pandula tuu sho Jehova a nyolitha Oohapu dhe momukalo moka tatu vulu oku dhi uva ko!     

12. Jehova okwa longithile shike aantu oyo ya nyole Ombiimbeli?

¹² Jehova okwa li ta vulu okulongitha aayengeli oyo ya nyole Ombiimbeli. Nokuli oye tu hole noye na ko nasha naashoka tatu ningi. (1 Pet. 1:12) Osha yela kutya oya li taya vulu okunyolela aantu etumwalaka lyaKalunga kaali na nando okapuko kasha. Ihe aayengeli kaye na etaloko lya fa lyaantu. Kaye na omaiyuvo noompumbwe dha fa dhetu, nokaye na uunkundi nomalalakano ga fa getu. Jehova oku shi kutya oya yooloka ko kutse, nomolwaashono a tokola Ombiimbeli yi nyolwe kaantu. Otu uvite ko omadhiladhilo nomaiyuvo gaanyoli yOmbiimbeli nosho wo gayalwe mboka ya popiwa mo. Ohatu kala tu yu uvitile uukwawo wanankali, sho tatu lesha kombinga yomalimbililo ngoka ya li ye na, yuumbanda wawo, kombinga yomapuko ngoka ya ningi, yokwaagwanenena kwawo naasho yu uvithwa nayi. Naasho tatu lesha kombinga yenyanyu lyawo, natse ohatu kala twa nyanyukwa. Aanyoli yOmbiimbeli, ngaashi omupolofeti Elia, oya li ‘aantu ye tu fa.’ —  Jak. 5:17.

13. Egalikano lyaJona ohali ku uvitha ngiini?

¹³ Pashiholelwa, mbela omuyengeli okwa li ngaa ta vulu okuholola thiluthilu shoka omupolofeti Jona a li u uvite, sho ta fadhuka po oshilonga she shoka a pewa kuKalunga? Oshihwepo sho Jehova a pitike Jona a nyole ehokololo lye mwene, mwa kwatelwa egalikano lye ndyoka a galikana sho e li kohi yefuta. Jona okwa ti: “Sho nda li ndi uvite omwenyo gwandje tagu thigi ndje po, onde ku galikana, OMUWA.” —  Jona 1:3, 10; 2:1-9.

14. Omolwashike wu uvite ko shoka Jesaja a nyola kombinga ye mwene?

¹⁴ Natu taleni wo kwaashoka Jehova a nwetha mo Jesaja a nyole kombinga ye mwene. Konima sho omupolofeti nguka a mono eadhimo  lyaKalunga memoniko, okwa popi kombinga yuulunde we a ti: “Yaye ngame! Otandi ka kana, oshoka ngame omulumentu ndi na omilungu dha nyata, nonda kala mokati kaantu ye na omilungu dha nyata, nomeho gandje mwene onda tala Omukwaniilwa, OMUWA Omunankondoawike!” (Jes. 6:5) Kapu na omuyengeli ta vulu okwiipopya ngaaka. Ihe Jesaja okwa li ta vulu oku shi ninga. Notu uvite ko nkene Jesaja a li u uvite, oshoka natse inatu gwanenena ngaashi ye.

15, 16. (a) Omolwashike hatu uvu ko shoka aantu ooyakwetu yu uvite? Gandja iiholelwa. (b) Oshike tashi ke tu kwathela tu hedhe popepyeelela naJehova?

¹⁵ Mbela omuyengeli okwa li ta vulu okutya “inandi opalela” esilohenda lyaKalunga ngaashi Jakob a tile, nenge okutya ye “omulumentu omulunde” ngaashi Petrus a li u uvite? (Gen. 32:10; Luk. 5:8) Ando mbela okwa “haluka” ngaa ngaashi aalongwa yaJesus ya halukile? Nenge mbela aayengeli aayapuki oya li ngaa taya ka kala ya pumbwa okwiitsa “omukumo” sho taya patanekwa, ngaashi Paulus nooyakwawo ya li taya patanekwa, sho taya uvitha onkundana ombwanawa? (Joh. 6:19; 1 Tes. 2:2) Aawe, oshoka aayengeli oya gwanenena noye na oonkondo dhi vule dhaantu. Ihe ngele aantu mboka inaaya gwanenena taya popi omaiyuvo ga tya ngaaka, ohatu yu uvu ko nziya, oshoka natse aantu twe ya fa. Sho tatu lesha Ombiimbeli, otatu vulu shili ‘okunyanyukwa pamwe naamboka ya nyanyukwa nokulila pamwe naamboka taa lili.’ —  Rom. 12:15.       

¹⁶ Ngele otwa kala hatu dhiladhila muule kunkene Jehova a li hu ungaunga naapiya ye aadhiginini nale, otatu ki ilonga iinima oyindji kombinga yaKalunga ketu ngoka a hedhele popepi nayo, nonando inaya gwanenena, te shi ningi nohole noneidhidhimiko. Kungeyi, otatu ka tseya Jehova nawa notatu ka kala tu mu hole unene. Naashika otashi ke tu hedhitha popepyeelela naye. —  Lesha Episalomi 25:14.     

17. (a) Asarja okwa pe Asa omayele geni omawanawa? (b) Asa okwa tindi ngiini omayele gaAsarja, noshizemo osha li shini?

¹⁷ Sho omukwaniilwa Asa a sindi etangakwiita lyAasudani, omupolofeti gwaKalunga, Asarja, okwe mu pe omayele omawanawa pamwe noshigwana she, a ti: “OMUWA ota kala nane, ngele otamu kala naye. Ngele otamu mu kongo, ote ke mú ihololela, ihe ngele otamu mu pilamene, ote ke mú etha.” (2 Ondjal. 15:1, 2) Ihe konima yethimbo, Asa ina ka vulika komayele ngoka. Sho uukwaniilwa waIsraeli wokuumbangalantu wa ponokele Juda, Asa okwa ka konga epopilo kAasiria. Pehala lyokugalikana ishewe kuJehova, okwa pula ekwatho koshigwana shaapagani. Nomolwaashono Asa a lombwelwa ngeyi: “Owa longo uugoya, onkee okuza nena oto ka kala aluhe to hingilwa iita.” Okuza mpoka Asa okwa kala shili ta hingilwa iita. (2 Ondjal. 16:1-9) Otatu ilongo mo shike?    

18, 19. (a) Otu na okuninga po shike ngele katu na we ekwatathano ewanawa naKalunga? (b) Ongiini tatu vulu okuhedha popepyeelela naJehova?

¹⁸ Inatu etha po nando Jehova. Ngele ekwatathano lyetu naJehova ngashingeyi olya nkundipala, otu na okutula Hosea 12:6 miilonga, ndjoka tayi ti: “Inekeleni Kalunga keni nokugalukila kuye. Kaleni aainekelwa naayuuki, nokutegelela neidhidhimiko ekwatho lyaKalunga keni.” Ngele otwa tedhatedha kekuliloyambo notwa kala hatu konakona Ombiimbeli nuukeka, otatu ka hedha popepyeelela naJehova. —  Lesha Deuteronomium 13:4.

¹⁹ Omunyoli gwepisalomi okwa nyola a ti: “Osho opalela ndje okukala popepi naKalunga.” (Eps. 73:28) Atuheni natu tsikileni okwiilonga iinima iipe kombinga yaJehova, shoka tashi ke tu inyengitha tu kale tu mu hole noonkondo. Jehova na kale popepyeelela natse ngashingeyi nosigo aluhe!