1. Oshike tashi dhana onkandangala yi ikalekelwa melongelokalunga lyetu?

KOMATUNGO gamwe muuyuni nokiinima yimwe moomisiuma oto adha ko kwa nyolwa edhina Jehova. Ohashi kala shi hokitha noshi nyanyudha oku li mona. Edhina lyaKalunga otali dhana onkandangala yi ikalekelwa melongelokalunga lyetu. Tse otu li Oonzapo dhaJehova twa lukilwa edhina ndyoka. Muuyuni awuhe, otse owala hatu ithanwa nedhina ndyoka. Kapu na ongundu yaantu yalwe mboka hayi ithanwa nedhina lyaKalunga ngaashi tse. Ihe uuthembahenda mboka tu na wokwiithanwa nedhina lyaKalunga, ohawu endele pamwe noshinakugwanithwa.

2. Oshinakugwanithwa shini hashi endele pamwe nuuthembahenda wokukala twa lukilwa edhina lyaKalunga?

² Jehova ita ka kala owala e tu hokwa, molwaashoka hatu tumbula edhina lye. Otu na oshinakugwanithwa shokukala metsokumwe nomithikampango ndhoka e tu tulila po. Ombiimbeli otayi tu lombwele kutya kehe gumwe gwomoshigwana shaJehova ne ‘ethe uukolokoshi e ta longo uuwanawa.’ (Eps. 34:14) Omuyapostoli Paulus okwa tsu omuthindo ekotampango ndika sho a nyola a ti: “Kehe ngoka  ta ti kutya ye ogwOmuwa, ne ethe uugoyoki.” (Lesha 2 Timoteus 2:19.) Tu li Oonzapo dhaJehova, kehe gumwe oku shi nokutya tse ohatu tumbula edhina Jehova. Ihe omeityo lini tu na okweetha uugoyoki?

3, 4. Aalongwantu yOmbiimbeli oya kala ethimbo ele ya hala okutseya uutumbulilo wu li menyolo lini, nomolwashike?

³ Oohapu ndhoka Paulus a nyola muTimoteus omutiyali 2:19 oku na mpoka e dhi tapa. Ovelise ndjoka oya popya “ekankameno ndyoka lya tungwa kuKalunga,” nokonima oya tumbula ishewe iinima iyali mbyoka ya nyolelwa kulyo. Uutumbulilo wotango, “Omuwa oku ya shi mboka ye,” osha yela kutya owa tothwa muNumeri 16:5. (Tala oshitopolwa sha zi ko.) Uutumbulilo uutiyali, otawu ti: “Kehe ngoka ta ti kutya ye ogwOmuwa, ne ethe uugoyoki.” Aalongwantu yOmbiimbeli oya kala ethimbo ele ya hala okutseya kutya uutumbulilo mboka owa hala naanaa okutya shike. Omolwashike mbela?

⁴ Omolwaashoka omukalo moka Paulus a nyola oohapu ndhoka otagu ulike kutya oku na mpoka e dhi totha. Ihe mOmanyolo gOshihebeli kaamu na lela oohapu dhu ukila hoka. Ano Paulus okwa li ta popi shike sho a ti: “Kehe ngoka ta ti kutya ye ogwOmuwa, ne ethe uugoyoki?” Omanga inaa popya oohapu ndhoka, okwa li a totha oohapu ndhoka dhi li muNumeri 16, moka tamu popiwa kombinga yuunashipotha waKora. Onkee ano, otashi vulika uutumbulilo uutiyali nawo wa pambathana nuunashipotha mboka.    

5-7. Paulus sho a nyola Timoteus omutiyali 2:19 okwa li a popi oshiningwanima shini shoka sha li sha ningwa pethimbo lyaMoses? (Tala kethano ndyoka li li petameko.)    

⁵ Ombiimbeli otayi ti kutya Datan, Abiram oyanamati yaEliab, oya li ya wayimine Kora. Oyo ya li ya kwatela komeho mboka ya tsila ondumbo Moses nAaron. (Num. 16:1-5) Oya li ye shi ulike montaneho kutya oya dhina Moses noya li ye ekelehi oonkondopangelo ndhoka a pewa kuKalunga. Aanashipotha mboka oya kala nokweendathana noshigwana shaKalunga, noya li ya nwetha mo nayi uupambepo waamboka ya li aadhiginini. Sho esiku lya thikana, Jehova okwa li a gandja elombwelo lya yela, opo a yoolole pokati kaamboka aadhiginini kuye nosho wo mboka ye mu tukulila oshipotha.

⁶ Ombiimbeli otayi ti: “OMUWA okwa ti kuMoses: ‘Lombwela aantu ya ze po pomatsali gaKora, Datan naAbiram.’ Moses okwa yi kuDatan naAbiram a thindilkilwa kaawiliki yAaisraeli. Okwa lombwele aantu a ti: ‘Thikameni kokule nomatsali gaantu mbaka aadhudhu, ne inamu guma iinima yawo ayihe, opo mwaa kombwe po pamwe nayo moluulunde wawo.’ Aantu noya zi po pomatsali gaKora, Datan naAbiram.” (Num. 16:23-27) Opo ihe Jehova okwa dhipaga aatsindumbo ayehe. Onkee ano, mboka aadhiginini oya li ya thikama kokule, sha hala kutya, oya li ye ‘etha uugoyoki’ e taya hupithwa.       

⁷ Jehova oha mono shoka shi li momitima dhetu. Mboka aadhiginini kuye oku ya wete. Ihe mboka aadhiginini oye na okukatuka oonkatu, opo yi iyoolole mo mokati kaagoyoki. Otashi vulika Paulus a li ta popi ehokololo ndyoka li li muNumeri 16:5, 23-27 sho a nyola a ti: “Kehe ngoka ta ti kutya ye ogwOmuwa, ne ethe uugoyoki.” Onkee ano, oshi li pandunge okuthika pehulithodhiladhilo kutya uutumbulilo “Omuwa oku ya shi mboka ye” nawo otawu ulike koshiningwanima shoka. — 2 Tim. 2:19.

8. Omolwashike okukala megongalo lyopaKriste nosho wo okwiithana edhina Jehova inaashi gwana?

⁸ Okukala owala wu li megongalo lyopaKriste inashi gwana. Paulus okwa li a dhimbulukitha Timoteus kutya okwa pumbwa okukatuka onkatu meendelelo, opo ekwatathano lye li na ondilo ndyoka e na naJehova kaali yonwe po. Sho te shi ningi, Paulus okwa li a popi iinina mbyoka ya li ya ningwa pethimbo lyaMoses. Pethimbo  ndyoka kasha li owala sha gwana okwiithana edhina Jehova. Aalongelikalunga aadhiginini oya li ye na okutokolatoko ye ethe uugoyoki. Timoteus okwa li e na nduno okuninga po shike? Aapiya yaJehova yokunena otayi ilongo shike moohapu dhaPaulus ndhoka dhanwethwa mo?

9. “Okuludhika kwa nika uugoya nokwaa na owino” okwa li kwa gumu ngiini egongalo lyopaKriste lyopetameko?

⁹ Oohapu dhaKalunga odhi na omayele gokondandalunde ngoka taga popi iilonga yuugoyoki mbyoka Aakriste ye na okweetha nenge okuyanda. Pashiholelwa, muTimoteus omutiyali 2:19, Paulus okwa li a kumagidha Timoteus a ha ‘kale e hole okuludhika’ iitya nosho wo a ‘yande omapopyo ga nyata.’ (Lesha 2 Timoteus 2:14, 16, 23.) Yamwe megongalo oya li taya humitha komeho omalongo gaashunimonima. Opu na yalwe wo mboka ya li taya taandelitha oohapu ndhoka tadhi eta omahilathano. Nonando oohapu dhawo dhimwe kadha li ompinge naashoka omanyolo taga ti, odha li tadhi eta olutandu. Odha li dhe etitha oontamanana nosho wo okuludhika iitya. Oshinima shoka osha li she etitha etopoko megongalo. Onkee ano, Paulus okwa li a ladhipike Timoteus kutya “yanda okuludhika kwa nika uugoya nokwaa na owino.”

10. Oshike tu na okuninga po ngele otu uvu omadhiladhilo gaashunimonima?

¹⁰ Momagongalo ogendji gOonzapo dhaJehova kunena kamu na aashunimonima. Ihe ngele otu uvu yamwe taya popi omadhiladhilo ngoka ge li kokule nOmbiimbeli, natu ge ekelehi thiluthilu kutya nduno otaga popiwa nee kulye. Kashi li pandunge okukala tatu ningi inda mo ndi ye mo naashunimonima. Kutya nduno otatu shi ningi oshipala noshipala nenge okuyamaukula iihapu yawo yaa fele mbyoka haya tula kointaneta. Katu na okukwatathana nayo momukalo kehe. Nonando ohashi vulika tu kale twa hala oku ya kwathela, oshinima shoka otashi kondjithathana nehalo lyaKalunga. Tu li aapiya yaJehova, otu na okuyanda thiluthilu aashunimonima.    

11. Oshike tashi vulu okweetitha “okuludhika kwa nika uugoya,” naakuluntugongalo otaya vulu ngiini okutula po oshiholelwa oshiwanawa?

¹¹ Kakele kaashunimonima, opu na iinima yimwe mbyoka tayi vulu okuyona po ombili yegongalo. Pashiholelwa, omataloko ga yoolokathana ngele tashi ya pomainyanyudho otashi vulika ge ete “okuludhika kwa nika uugoya nokwaa na owino.” Ihe ongiini ngele gumwe ota humitha komeho omainyanyudho ngoka kaage li metsokumwe nomithikampango dhaJehova? Mbela aakuluntugongalo oye na okumwena owala, opo ya yande oohapu ndhoka tadhi eta omahilathano? Osha yela kutya kaye na nando okwiidhidhimikila oshinima shoka. (Eps. 11:5; Ef. 5:3-5) Shimwe natango, aakuluntugongalo oye na okukala ya kotoka kaaya humithe komeho omataloko gawo gopaumwene. Oye na okulandula eladhipiko li li mOmbiimbeli ndyoka tali ti: “Kaleni aasita yoshigunda shoka mwe shi pewa kuKalunga. . . . Inamu pangela mboka ya tulwa metonatelo lyeni, ihe kaleni mu shi kuholelwa kegongalo.” — 1 Pet. 5:2, 3; lesha 2 Aakorinto 1:24.

12, 13. (a) Aapiya yaJehova ohaya hogolola ngiini omainyanyudho, nomakotampango gOmbiimbeli geni taga longo moshinima shika? (b) Omakotampango ngoka ga kundathanwa mokatendo oka-12 otaga longo ngiini momataloko ga yoolokathana ngele tashi ya miinima yopaumwene?

¹² Ehangano ihali ka tala uumuvie, uudhano woovidio, omambo nenge omaimbilo li tu tulile po oompango kutya natu yande shike. Omolwashike mbela ihaali shi ningile? Ombiimbeli otayi ladhipike kehe gumwe a kale e shi “okuyoolola shoka shu uka nenge sha puka.” (Heb. 5:14) Ombiimbeli oya tula po omakotampango ngoka Omukriste ta vulu okutungila kugo uuna ta hogolola omainyanyudho. Kehe shimwe shoka tatu ningeni monkalamwenyo, natu “kambadhaleni okwiilonga okutseya shoka sho opalela Omuwa.” (Ef. 5:10) Ombiimbeli otayi popi kutya omitse dhomagumbo odhi na oonkondopangelo. Onkee ano, otadhi vulu okuhogolola omainyanyudho ngoka itadhi ka pitika ga ningwe  momagumbo gadho. * — 1 Kor. 11:3; Ef. 6:1-4.

¹³ Omakotampango ngoka gOmbiimbeli itaga longo owala uuna tatu hogolola omainyanyudho. Omataloko ga yoolokathana ngele tashi ya piizalomwa nomaiyopaleko, miinima yuukolele niikulya nosho wo iinima yilwe yopaumwene otayi vulu okweetitha oohapu dhomahilathano. Ngele kapu na ekotampango lyopamanyolo ndyoka tali yonwa moshinima shontumba, nena aapiya yaJehova ihaya kala taya patathana musho. Ombiimbeli otayi ti: “Omumati gwOmuwa ita pumbwa okutamanana. Oye oku na okukala omulongi omwaanawa, omwiidhidhimiki, e na olukeno naayehe.” — 2 Tim. 2:24.

14. Ethaneko lini Paulus a li a longitha ndyoka tali ulike kutya otu na okwiiyageka eendathano ewinayi?

¹⁴ “Ngoka ta ti kutya ye ogwOmuwa, ne ethe uugoyoki.” Omomukalo guni mbela? Oku na okwiiyageka okukala he endathana unene naantu mboka haya longo uugoyoki. Sho Paulus a popi “ekankameno ndyoka lya tungwa kuKalunga,” okwa li a landulitha ko ishewe ethaneko lilwe. Okwa nyola kombinga ‘yegumbo enene’ moka mu na “iiyaha nomatiti goludhi kehe: yimwe oya ningwa moshisiliveli nomoshingoli, yimwe omiiti nomeloya, yimwe ohayi longithwa ashike omasiku gamwe niikwawo ohayi longithwa esiku kehe.” (2 Tim. 2:20, 21) Sho a popi oohapu ndhoka okwa kunkilile Aakriste yi ‘iyoolole mo muuwinayi mbuka awuhe, mboka wu li iiyaha nomatiti ngoka haga “longithwa ashike omasiku gamwe.”

15, 16. Oshike tatu vulu okwiilonga methaneko ‘lyegumbo enene?’

¹⁵ Ethaneko “megumbo enene” olya hala okutya ngiini? Paulus okwa li a longitha omufethelamo ngoka, opo a yelekanithe egongalo lyopaKriste nosho wo iilyo ya yoolokathana megongalo ya fa “iiyaha nomatiti,” nenge tu tye iikwatelwa yomegumbo. Iikwatelwa yimwe megumbo ohashi vulika yi kakekwe kiinima ya nika oshiponga nenge ya nyata. Mwene gwegumbo ota ka yoolola  iikwatelwa mbyoka. Mbi ya kaka ote yi tula kombinga yimwe, yo mbyoka ya yela te yi tula kombinga yilwe. Iikwatelwa ya yela mbyoka hayi telekelwa ote yi itulile wo.

¹⁶ Osha faathana naapiya yaJehova. Opo ya kale nonkalamwenyo ya yogoka oye na okwiiyageka okupanga uukuume megongalo noohamutsemukukutu mboka ya dhina omakotampango gaJehova. (Lesha 1 Aakorinto 15:33.) Ngele nani megongalo momwene omu na aantu ya tya ngawo, mbela kaatu na ‘okuyanda’ okukala hatu endathana unene naamboka ye li kondje yegongalo? Oyendji yomuyo ‘oye hole eliko, ihaa vulika kaakuluntu, noya pota. Aapwidhi, aadhudhu noye tonde uuwanawa, aakotokeli, noye hole olundundu peha lyokuhola Kalunga.’ — 2 Tim. 3:1-5.     

17. Aaisraeli oya li ya katuka oonkatu dha tya ngiini, opo yu ulike kutya inaya hala okulonga uugoyoki?

¹⁷ Ombiimbeli oya popya kondandalunde etokolotoko ndyoka Aaisraeli ya li ya ningi sho ya lombwelwa “ya ze po pomatsali gaKora, Datan naAbiram.” Ehokololo otali ti: “Aantu noya zi po” nziya. (Num. 16:24, 27) Kaya li taya ngonzonoka nenge ya kwatakwate. Ombiimbeli otayi ti kutya oya katuka oonkatu meendelelo sho ya ti: ‘Aantu oya zi po pomatsali’ gawo nziya. Oomwenyo dhaantu mboka aadhiginini kadha li dhi li pokuya moshiponga. Oya li ya vulika kuJehova nomutima aguhe. Oya li yu ulike shili kutya oya gama kombinga ye, noina ya hala okulonga uugoyoki. Oshike tatu vulu okwiilonga kuyo?

18. Paulus okwa li ta kumagidhile Timoteus shike sho e mu nyolele a ‘yande uuhalu womuugundjuka’?

¹⁸ Uukuume wetu naJehova owu li oshinima sha simana. Otu na okuninga kehe shimwe tatu vulu meendelelo nokukala twa tokolatoko tu wu kaleke po. Paulus osho a li ta kumagidhile Timoteus a ninge sho e mu nyolele ta ti kutya ‘yanda uuhalu womuugundjuka.’ (2 Tim. 2:22) Ethimbo ndyoka Timoteus otashi vulika a li e na omimvo 30 nasha. Ihe ngaashi tu shi shi “uuhalu womuugundjuka” haaluhe hawu ngambekwa koomvula dhomuntu. Timoteus okwa li e na ‘okuyanda’ iikala mbyoka ya puka uuna tayi ya muye. Niitya yimwe, Timoteus ka li e na ‘okwiiyethele muugoyoki.’ Jesus naye okwa li a popi oshinima sha fa shoka sho a ti: “Eho lyoye ngele tali ku hongolola, li tsipula mo, ngu u li ekelehi.” (Mat. 18:9) Aakriste mboka haya tula miilonga oohapu ndhoka ohaya ningi omatokolo ya mana mo uuna uupambepo wawo wu li moshiponga. Ihaya kala taya ngonzonoka nenge ya kwatakwate.     

19. Yamwe oya ninga omatokolotoko geni kunena ya gamene uupambepo wawo?

¹⁹ Aakriste yamwe oya ninga po shike, opo ya gamene uupambepo wawo? Yamwe mboka ya li oonkolwe e taya mono oshili oya hogolola kuyo yene kaaya nwe we iikolitha. Yamwe ohaya henuka omainyanyudho ngoka inaaga puka, ihe otaga vulu okuhwahwameka omahalo ga puka muyo. (Eps. 101:3) Pashiholelwa, omumwatate gumwe manga inee ya moshili, olundji okwa li e hole omainyanyudho gondanisa ndjoka ya nyata. Sho i ilongo oshili, ka li ha ndanisa nokuli nopomainyanyudho ngoka pu na owala Oonzapo. Oha kala a tila muye mu penduke omahalo ga puka nenge omadhiladhilo omawinayi gomonakuziwa. Otu shi shi kutya Aakriste inayi indikwa nando okunwa omalovu, okundanisa nenge okuninga iinima yilwe mbyoka inayi puka. Ihe atuhe otu na okutokolatoko nokudhiladhila pandunge, opo kaatu gwile moshiponga kehe shoka tashi yono po uupambepo wetu.

20. Nonando kaashi shi oshipu ‘okweetha uugoyoki,’ oshike tashi tu pe einekelo nehekeleko?

²⁰ Uuthembahenda wokwiithanwa nedhina lyaJehova otawu endele pamwe noshinakugwanithwa. Otu na ‘okweetha uugoyoki’ nosho wo ‘okweetha uukolokoshi e tatu longo uuwanawa.’ (Eps. 34:14) Ihe haaluhe oshipu okuninga. Kakele kaashono, Jehova “oku ya shi mboka ye” noku ya hole aluhe uuna taya vulika kuye. Oshinima shono otashi tu hekeleke. — 2 Tim. 2:19; lesha 2 Ondjalulo 16:9a.