OMBIIMBELI oya popya sha yela sho ya ti: Omusamane oku na “okuhola omukiintu gwe, ngashika i ihole ye mwene.” Omukulukadhi naye “oku na okusimaneka omulumentu gwe.” Ayehe oye na okugwanitha po iinakugwanithwa yawo ye li “onyama yimwe.” (Ef. 5:33; Gen. 2:23, 24) Mokweendela ko kwethimbo ekwatathano lyaaihokani ohali kolo nosho wo ohole yawo. Ngaashi owala omidhi dhomiti mbali dha tegamathana hadhi kala, onkalamwenyo yomusamane nomukulukadhi mboka taya nyanyukilwa ondjokana yawo nayo osho haya kala ngaaka.

Ihe mbela ongiini ngele omusamane nenge omukulukadhi a si? Nena ekwatathano ndyoka kaali na okuteywa, olya teka. Omuselekadhi nenge omusilwalume olundji oha kala a gwililwa po, a sa uuza, nosho wo nokuli e na ongeyo nenge u uvite e na ondjo. Momukokomoko gwoomvula 58 ndhoka Daniella a kala mondjokana, okwa li e shi oyendji mboka ya silwa ookuume kawo kopandjokana. * Ihe sho omusamane gwe a si, okwa ti: “Kanda li handi kala ndu uvite ko nkene omuntu u uvite. Omuntu iho uvu ko onkalo ndjika, sigo oosho wa piti muyo.”

Aaningi yomapekapeko oya mona kutya kapu na uupyakadhi hawu kala wa kwata miiti wu vule mboka omuntu ha kala e na uuna a silwa kuume ke kopandjokana omuholike. Oyendji mboka ya silwa otaya tsu kumwe noohapu ndhoka. Omusamane gwaMillie okwa sa nalenale. Okwa popi onkalo ye sho e li omuselekadhi,  ta ti: “Ondi uvite owala nda fa oshilema.” Ota popi onkalo ye yopamaiyuvo, ndjoka ya holoka po sho omusamane gwe ngoka a kala naye mondjokana uule woomvula 25 a si.

Susan okwa li ha kala u uvite kutya aaselekadhi mboka haya lili aasamane yawo uule woomvula ohayu ulike oluhodhi lwa pitilila. Omusamane gwe ngoka ya kala naye mondjokana uule woomvula 38 okwa si. Opwa pita oomvula dhi vulithe 20, ihe natango ota ti, “Ohandi mu dhiladhila kehe esiku.” Olundji omahodhi ge ohaga kala owala taga polinda molwaashoka oha kala e mu yuulukwa noonkondo.

Ombiimbeli oye shi ulika kutya uuwehame mboka omuntu ha kala u uvite ngele a silwa kuume kopandjokana ohawu kala uuwinayi noonkondo nohawu kala po ethimbo. Sho Sara a si, omusamane gwe Abraham “okwe mu lili.” (Gen. 23:1, 2) Kakele kokukala neitaalo meyumuko, Abraham okwa li a nika oluhodhi nayi sho omuholike gwe a si. (Heb. 11:17-19) Konima sho omukulukadhi gwe omuholike Rakel a si, Jakob ka li e mu dhimbwa nziya. Okwa kala ha lombwele oyanamati kombinga ye.—Gen. 44:27; 48:7.

Otu na okwiilonga mo shike miiholelwa mbika yopaMbiimbeli? Olundji aaselekadhi naasilwalume ohaya kala yu uvite uuwehame wokusilwa uule woomvula odhindji. Omahodhi gawo nosho wo okunika uuthigwa kwawo katu na oku yi tala ko yi li uunkundi, ihe otu na oku yi tala ko yi li iilanduliko yokuthigwa po kookuume kawo. Otashi vulika ya kale ya pumbwa okukala tu yu uvitile olukeno noku ya ambidhidha ethimbo ele.

Onkalamwenyo yomuselekadhi nenge yomusilwalume ihayi kala ya fa yaangoka inaaya mondjokana. Konima yoomvula odhindji ndhoka ya kala mondjokana, olundji omusamane oha kala e shi nkene e na okuhekeleka omukulukadhi gwe noku mu kwathela a kale e na omukumo uuna u uva nayi nenge a piyaganekwa kusha. Ngele ke po, ohole ye nosho wo omahekeleko ngoka a li ha gandja opuwo. Sha faathana, mokweendela ko kwethimbo omukulukadhi ohi ilongo wo nkene e na okuningitha omusamane gwe a kale u uvite a gamenwa nokwa nyanyukwa. Oku mu thethenga noku mu lombwela oohapu oombwanawa, eitulomo ndyoka ha gandja kuye nosho wo koompumbwe dhe itayi vulu okuyelekwa nasha. Ngele okwa si, otashi vulika a kale e wete monkalamwenyo ye mwa kambela sha. Onkee ano, yamwe mboka ya thigwa po kookuume kawo kopandjokana ohaya kala kaaye na omukumo gwokutaalela onakuyiwa nohaya kala ye na uumbanda. Ekotampango lini lyOmbiimbeli tali vulu oku ya kwathela ya mone egameno nosho wo ombili?

“Inamu sila esiku lyanofu oshimpwiyu, oshoka esiku lyanofu otali isile lyo lyene oshimpwiyu. Oshoka esiku kehe olya gwana nuudhigu walyo.” (Mat. 6:34) Oohapu ndhoka dhaJesus otadhi ulike unene tuu koompumbwe dhopamaliko, ihe odha kwathela oyendji yi idhidhimikile uuwehame wokusilwa omuholike gwawo. Omusilwalume gumwe Charles, okwa li a nyola konima yoomwedhi dhontumba konima sho a silwa omukulukadhi gwe, a ti: “Sigo okunena ohandi kala nda yuulukwa Monique noonkondo, nomathimbo gamwe onkalo ohayi kala owala ya fa tayi nayipala. Ihe ondi wete kutya shika oshi li paunshitwe nosho wo kutya uuwehame wandje otawu ka hwepopala ngaa.”

Odhoshili kutya Charles okwa li e na okwiidhidhimika ‘ethimbo alihe ndyoka.’ Osha li she ende ngiini opo e shi pondole? Okwa ti: “Pakwatho lyaJehova onda vulu okutya po hwepo esiku nesiku.” Charles ka li a gwililwa po koluhodhi. Uuwehame we kawa li owala wa zi po  muusiku wumwe, ihe kawa li wo we mu tono oonkondo. Ngele owa silwa kuume koye kopandjokana kambadhala wu ungaunge neso ndyoka shi ikolelela kesiku kehe nuudhigu walyo. Ku shi wo kutya mesiku lya landula oto ka mona mo uuwanawa nenge eladhipiko lyashike.

Eso kalya li oshitopolwa shelalakano lyaJehova lyopetameko. Mepingathano naashono, oli li oshitopolwa ‘shiilonga yomuhindadhi.’ (1 Joh. 3:8; Rom. 6:23) Satana oha longitha eso nosho wo uumbanda weso, opo a tule aantu oyendji muupika noya kale kaaye na etegameno. (Heb. 2:14, 15) Satana oha kala a nyanyukwa uuna gumwe e wete kutya ita vulu okukala e na enyanyu lyashili negwaneno, nokuli noomuuyuni uupe waKalunga. Kungawo, ngoka u uvite uukweyi omolweso lyaakuume ke kopandjokana, oshi li oshizemo shuulunde waAdam nosho wo iihelele yaSatana. (Rom. 5:12) Jehova ota ka kutha po eyonuko ndyoka lye etithwa kuSatana, e ta hulitha po oshilwitho she oshiwinayi, eso. Yamwe yomwaamboka ya manguluka ko kuumbanda mboka Satana ha tula maantu, omwa kwatelwa oyendji mboka ya silwa ookuume kawo kopandjokana, tashi vulika nangoye.

Uuna tashi ya pwaamboka taya ka yumudhilwa kombanda yevi, osha yela kutya otapu ka kala omalunduluko ogendji momakwatathano gopantu. Dhiladhila kombinga yaavali, yookuku nosho wo yookukulululwa mboka taya ka galukila momwenyo e taya ende taye endele ko yu uka megwaneneno pamwe noyana nonaatekulu. Uukulupe otawu ka hulithwa po. Mbela epipi lyaagundjuka otashi vulika li ka kale lya pumbwa okwiilonga okukala li na etaloko li ili li na ko nasha nankene lya tala ko kunena ookukululululwa? Mbela inatu itaala kutya omalunduluko ngoka otaga ka kala gamwe gomomalunduluko ngoka taga ka ningwa momaukwanegumbo gopantu?

 Opu na omapulo ogendji ngoka taga vulu okwiipulwa kombinga yaamboka taya ka yumudhwa, ngaashi kombinga yaamboka ya silwa ookuume kopandjokana yaali nenge ye vule po. Aasadukayi oya li ya pula kombinga yomukiintu ngoka a li a silwa omusamane gwe gwotango, nomutiyali, nosho tuu. (Luk. 20:27-33) Aantu mboka otaya ka kala ye na ekwatathano li li ngiini ngele ya yumudhwa? Katu shi shi kutya otaya ka kala ngiini, nokatu na etompelo lyokukala tatu fekele nenge tu piyaganekwe kiinima mbyoka kaayi shiwike. Otu na okukala twi inekela muKalunga moshinima shika. Oshinima shimwe shoka tu na uushili musho osho shoka kutya, kehe shimwe shoka Jehova ta ka ninga monakuyiwa otashi ka kala oshiwanawa, oshinima shoka tatu vulu okukala twa tegamena, ihe katu na okukala twe shi tila.

Elongo limwe lyomomalongo ngoka ga yela ge li mOohapu dhaKalunga olyo kutya oonakusa otaya ka galukila momwenyo. Omahokololo gOmbiimbeli ge na ko nasha nomayumuko ngoka ga ningwa nale otage tu ulukile kutya ‘ayehe mboka ye li moombila, otaya ka uva ewi lyaJesus e taya zi mo.’ (Joh. 5:28, 29) Aantu mboka taya ka kala ye na omwenyo pethimbo mpoka otaya ka nyanyukilwa okuhambelela mboka ya li ya kuthwa po keso. Mepingathano naashono, itatu vulu nokuli okudhiladhila kunkene mboka taya ka yumudhwa taya ka kala yu uvite.

Kevi otaku ka kala enyanyu inaali monika ko nando onale sho oonakusa taya ka yumudhwa. Aantu omabiliyona mboka ya sa otaya ka kala ishewe nomwenyo. (Mark. 5:39-42; Eh. 20:13) Okutedhatedha koshikumithalonga shika shomonakuyiwa oku na okuhekeleka ayehe mboka ya silwa mboka ye hole.

Mbela opu na ngaa omuntu ta ka kala e na etompelo lyokukala a pongola sho aantu taya ka galukila momwenyo? Ombiimbeli otayi yamukula kutya ahawe. Pakupopya kwaJesaja 25:8, Jehova “ota ka hanagula po eso sigo aluhe.” Shoka osha kwatela mo okuhulitha po iinima ayihe mbyoka hayi etithwa keso, molwaashoka ehunganeko olya tsikile ko tali ti: “Ota ka theta po omahodhi momeho gaayehe. . . . OMUWA mwenemwene a popi ngeyi.” Ngele owa nika oluhodhi ngashigeyi molwaashoka kuume koye a sa, osha yela kutya eyumuko otali ku pe etompelo lyokukala wa nyanyukwa.

Kapu na omuntu u uvite ko lela ashihe shoka Kalunga ta ka gwanitha po muuyuni uupe. Jehova ota ti:  “Ongaashi egulu li li pombanda puule li vule e vi, osho wo oondjila dhandje dhi vule oondjila dheni nomadhiladhilo gandje ge vule omadhiladhilo geni.” (Jes. 55:9) Euvaneko lyaJesus kombinga yeyumuko otali tu pe ompito yokukala twi inekela muJehova, ngaashi Abraham. Shoka sha simanenena kOmukriste kehe kunena osho okuninga shoka Kalunga a tegelela tu ninge nokungawo ‘otatu ka talwa twa gwana notwo opalela okuya muuyuni mbwiyaka tawu ya’ pamwe naamboka taya ka yumudhwa.—Luk. 20:35.

Otu na okukoleka etegameno lyetu pehala lyokukala twa tila. Onakuyiwa otayi monika ya luudha thoko pataloko lyopantu. Ihe Jehova ote tu pe etegameno lyoshinima oshiwanawa. Itatu vulu okutseya lela nkene Jehova ta ka gwanitha po oompumbwe dhetu nomahalo getu, ihe katu na okukala nomalimbililo ngele ote ke shi ninga ngaa. Omuyapostoli Paulus okwa nyola a ti: “Ngele otu wete shoka twe shi tegamena, nena kashi shi we etegameno. Oshoka olye ta tegamene shoka e shi wete? Ihe ngele tatu tegamene shoka kaatu shi wete, nena otatu shi tegamene neidhidhimiko.” (Rom. 8:24, 25) Etegameno lya kola momauvaneko gaKalunga otali ke ku kwathela wu idhidhimike. Omolweidhidhimiko, oto ka mona onakuyiwa ndjoka moka Jehova te ke ku pa “shoka wa yuulukwa.” Ota ka ‘kutitha kehe shimwe shi na omwenyo.’—Eps. 37:4; 145:16; Luk. 21:19.

Sho Jesus a li pokusa, aayapostoli ye oya li ya nika oluhodhi. Jesus okwa li e ya hekeleke noohapu ndhika tadhi ti: “Oomwenyo dheni inadhi kala dha ziyalala. Itaaleni Kalunga ne mu itaale ndje wo.” Okwe ya lombwele a ti: “Itandi mú thigi po ne amuke, ihe otandi ke ya kune.” (Joh. 14:1-4, 18, 27) Momukokomoko gwoomvula omathele, oohapu dhe odha li tadhi ka pa aalanduli ye aagwayekwa etegameno nosho wo eidhidhimiko. Kwaamboka ya yuulukwa okumona oonakusa yawo aaholike ya yumuka, nayo oye na etompelo lyokukala ye na etagameno. Jehova nOmwana itaye ya etha. Oto vulu okukala nuushili waashoka!