1, 2. Omolwashike omapukitho ga lunda pombanda kunena, nohaga vulu okuningwa momikalo dhini? (Tala kethano ndyoka li li petameko.)

OKUNINGA iineya, okukengelela nokupukitha aantu okwa ha noonkondo monkalelo ndjika yiinima. Shika kashi na oku tu kumitha. Ombiimbeli oye shi popya sha yela kutya Satana Ondiapoli oku li omupukithi a pyokoka, noku li omupangeli gwonkalelo ndjika. (1 Tim. 2:14; 1 Joh. 5:19) Sho tu uka pehulilo lyonkalelo ndjika ya kolokosha, Satana okwa geya noonkondo, molwaashoka oku na ko owala “okathimbo okafupi.” (Eh. 12:12) Onkee ano, otatu vulu okukala twa tegelela mboka ya nwethwa mo kOndiapoli ya nayipale mokukotokela, unene tuu mboka taya humitha komeho elongelokalunga lyashili.

² Omathimbo gamwe miikundaneki ohamu popiwa omipopyo tadhi pukitha nosho wo iifundja iitokele kombinga yaapiya yaJehova naashoka yi itaala. Iinenenima yiifokundaneki, oofilima dhomatseyitho nomapandja gokOintaneta ohaga longithwa okutaandelitha iifundja. Naashoka osha piyaganeka aantu yamwe e tayi itaale nokuli nuupu iifundja mbyoka.

3. Oshike tashi vulu oku tu kwathela opo kaatu pukithwe?

³ Otwa nyanyukwa sho tu na Oohapu dhaKalunga, ndhoka dhi na ‘oshilonga shokupukulula,’ opo tu henuke omakoto ngoka omutondi gwetu ha longitha e tu teye omukumo. (2 Tim. 3:16) Osha simanenena tu ilonge kwaashoka omuyapostoli Paulus a li a nyola kutya Aakriste yamwe yomuTessalonika gwomethelemumvo lyotango oya li ya pukithwa e tayi itaale iifundja. Okwa li e ya kumagidha ‘kaaye ethe ya piyaganekwe nuupu.’ (2 Tes. 2:1, 2) Oshike tatu vulu okwiilonga mekumagidho lyopahole lyaPaulus, nongiini tatu vulu oku li tula miilonga monkalamwenyo yetu yene?

4. Ongiini Aakriste muTessalonika ya li ya londodhwa kombinga ‘yesiku lyaJehova’ ndyoka li li pokuya, natse ohatu londodhwa ngiini?

⁴ Montumwafo ye yotango ndjoka a li a nyolele egongalo  lyaTessalonika, Paulus okwa li u ukitha eitulomo kokuya ‘kwesiku lyaJehova.’ (NW) Ka li a hala aamwahe ya kale ye li momilema noinaayi ilongekidha. Pehala lyaashono, okwa li e ya ladhipike kutya ye li “aantu yomuuyelele” oye na okukala ‘ya tonata noye na eidhiliko.’ (Lesha 1 Aatessalonika 5:1-6.) Kunena, otwa tegelela ehanagulo lyaBabiloni Oshinene, shoka shi li uukwaniilwa womalongelokalunga giifundja. Shika otashi ka kala etameko lyesiku enene lyaJehova. Puuwanawa washo, otu na euvoko lya yela li na ko nasha nokugwanithwa kwelalakano lyaJehova. Natango, okupitila megongalo, ohatu mono omadhimbulukitho ge li pethimbo ngoka hage tu kwathele tu kale twa tonata. Okukaleka momadhiladhilo omalondodho ngaka hage endululwa lwiikando, otaku vulu oku tu kwathela tu kale twa tokola toko okulongela Kalunga ‘iilonga iiyapuki noonkondo dhetu dhokudhiladhila.’—Rom. 12:1, NW.

5, 6. (a) Paulus okwa li a popi kombinga yashike montumwafo ye ontiyali ndjoka a li a nyolele Aatessalonika? (b) Masiku Kalunga ota ka ninga shike okupitila muJesus, notu na okwiipula omapulo geni?

⁵ Konima yethimbo efupi sho a tumu ontumwafo ye yotango kAakriste Aatessalonika, Paulus okwa li e ya tumine wo ontumwafo ontiyali. Montumwafo ndjoka okuukitha eitulomo kuudhigu mboka wu li pokuya sho Omuwa Jesus ta ka pangula “mboka inaa tseya Kalunga naamboka inaa vulika kelaka etoye.” (2 Tes. 1:6-8) Shoka shi li ngashingeyi ontopolwa 2 yontumwafo ndjika otashi holola kutya yamwe megongalo oya li ya ‘tilithwa’ kombinga yesiku lyaJehova sigo nokuli yi itaale kutya oli li popepi noonkondo. (Lesha 2 Aatessalonika 2:1, 2.) Aakriste mboka yopetameko oya li owala ye na euvoko eshona kombinga yokugwanithwa kwelalakano lyaJehova, nokuli ngaashi Paulus e ke shi zimina konima kombinga yomahunganeko, a ti: “Okutseya nokupopya kwetu elaka lyaKalunga inaku gwana. Ihe shono sha gwana sha pwa ngele tashi ya, nena shono inaashi gwana, otashi hulu po.” (1 Kor. 13:9, 10) Ihe omalondodho ga nwethwa mo ngoka ga li ga nyolwa kuPaulus, komuyapostoli Petrus nosho wo kaamwatate yalwe aagwayekwa aadhiginini yopethimbo ndyoka oga li taga vulu oku ya kwathela ya kale ye na eitaalo.

⁶ Opo a pukulule iinima, Paulus okwa li a nwethwa mo a yelithe kutya uushunimonima uunene nosho wo ‘mwiinayi’ oya li taya ka holoka manga esiku lyaJehova inaali thika. * Konima yaashono, pethimbo lye lyo opala, Omuwa Jesus  ota ka ‘hanagula po’ ayehe mboka ya pukithwa. Omuyapostoli okwa li a gandja etompelo lyepangulo ndyoka kutya ‘inaya taamba ohole yoshili.’ (2 Tes. 2:3, 8-10) Otashi ka kala nawa tu ipule tatu ti: ‘Oshili ondi yi hole shi thike peni? Mbela ondi na ngaa euvoko li li pethimbo ngaashi hali kundathanwa moshifo shika nomiileshomwa yilwe yopaMbiimbeli mbyoka ya longekidhilwa omagongalo goshigwana shaKalunga muuyuni awuhe?’

7, 8. (a) Aakriste yopetameko oya li ye na okukondjitha iinima yini mbyoka ya nika oshiponga? (b) Aakriste yashili kunena oya taalela unene tuu oshinima shini sha nika oshiponga?

⁷ Uushili owo kutya, Aakriste oya li taya ka taalela oshiponga shi vule shaashunimonima nomalongo gawo. Paulus okwa li a nyolele Timoteus kutya “mohole yeliko omo tamu zi uukolokoshi auhe.” Omuyapostoli oku ulike wo kutya ‘aantu oyendji sho ya lalakanene eliko, oya puka mo mondjila yeitaalo noya yono po oomwenyo dhawo niimpwiyu oyindji.’ (1 Tim. 6:10) ‘Uuhalu wopantu’ owa li wo tawu ka kala aluhe wa nika oshiponga.—Gal. 5:19-21.

⁸ Ihe oto vulu okukala wu uvite ko kutya omolwashike Paulus a li a londodha pahole Aatessalonika kombinga yoshiponga sha kwata miiti shaalumentu ya tya ngaaka mboka a li wo i ithana ‘aayapostoli aafundja.’ Mokati kawo omwa li aalumentu mboka ya kala “nokupopya iifundja, yi ihilile aalongwa.” (2 Kor. 11:4, 13; Iil. 20:30) Konima Jesus okwa ka pandula egongalo lyomuEfeso molwaashoka kalya li hali “mwenene aakolokoshi.” Aaefeso mboka oya li ya “konakona” oohandimwe mboka ya li lelalela aayapostoli aafundja. (Eh. 2:2) Shoka oshihokithi, montumwafo ye ontiyali ndjoka a li a nyolele Aatessalonika, Paulus okwe ya kumagidha a ti: “Aamwameme, otatu mú lombwele medhina lyOmuwa Jesus Kristus: ikalekeni kokule naantu mboka inaa hala okulonga sha.” Paulus okwa popi kondandalunde kombinga yAakriste mboka ya li ‘inaaya hala okulonga.’ (2 Tes. 3:6, 10) Ihe ngele mboka oya li ya talika ko kutya kaye na elandulathano, kasha li tuu tashi ka kala shu ukila ko kwaamboka ya li taya ningi aashunimonima! Eeno, okukala nuukuume wopothingo naantu mboka okwa li unene tuu kwa nika oshiponga pethimbo ndiyaka nokwa li ku na okuhenukwa, naashoka osho wo shi li ngaaka kunena.—Omayel. 13:20.

9. Omolwashike tu na okukala twa kotoka ngele gumwe okwa tameke okufekela nenge okugandja uusama?

⁹ Otu li popepi nuudhigu uunene nosho wo nehulilo lyonkalelo ndjika ya kolokosha, onkee ano omalondodho ngoka ga nwethwa mo ngoka ga li ga gandjwa methelemumvo lyotango oga simanenena kunena. Osha yela lela kutya inatu hala nando ‘okuhepitha’ esilohenda lyaJehova e tatu hunutha euvaneko lyomwenyo gwaaluhe, kutya nduno omegulu nenge okombanda yevi. (2 Kor. 6:1) Ngele esiku limwe omuntu ngoka ha kala pokugongala kwetu kwegongalo okwa kambadhala oku tu hekela moonkundathana dhe dhokufekela nenge dhokukala ta gandja uusama, otu na okukala twa kotoka lela.—2 Tes. 3:13-15.

10. Aakriste yomuTessalonika oya li ya ladhipikwa ya dhiginine omalongo geni?

¹⁰ Paulus okwa li a ladhipike aamwahe muTessalonika ya kale yi “ikolelela” nokukakatela shoka yi ilonga. (Lesha 2 Aatessalonika 2:15.) “Omalongo” ngoka ya li ya longwa ogeni? Osha yela kutya kage shi ngoka haga longwa komalongelokalunga giifundja nohage ga humitha komeho ga fa ando ogo ge na oshilonga ngaashi ngoka ge li mOmanyolo. Pehala lyaashono, Paulus okwa li ta popi kombinga yomalongo ngoka ye nosho wo yalwe ya li ya longwa kuJesus nosho wo kwaangoka Kalunga a li a nwetha mo aayapostoli ya longe yalwe, ngoka ogendji gomugo ga li ga ningi oshitopolwa shOmanyolo ga nwethwa mo. Paulus okwa li a pandula aamwahe yomegongalo lyaKorinto, sho a nyola kutya ohamu “dhimbulukwa ndje miinima ayihe nomwa dhiginine elongo  lyandje, ngaashi nde li mú pe.” (1 Kor. 11:2) Elongo ndyoka olya za konzo yi shi okwiinekelwa.

11. Omomikalo dhini yamwe taya vulu okuninga iihakanwa yokupukithwa?

¹¹ Sho Paulus a nyolele Aahebeli, okwa li u ukitha eitulomo komikalo mbali nkene Omukriste ta vulu okukanitha eitaalo e ta kala inii ikolelela. (Lesha Aahebeli 2:1; 3:12.) Okwa popi kombinga ‘yokufalwafalwa’ nosho wo ‘yokwiiteka.’ Okawato hoka ke li komunkulo gwomulonga ohaka vulu okufalwafalwa kashona nakashona inoo shi dhimbulula. Mokweendela ko kwethimbo, elala ndyoka li li pokati komunkulo nokawato ohali ende tali ningi ele. Mepingathano naashono, omulumentu ngoka hu undula ko okawato ke komunkulo oye mwene he ka hedhitha kokule nomunkulo. Oonkalo adhihe ndhoka mbali otadhi thaneke nawa onkalo yayamwe mboka haya ningi iihakanwa yokupukithwa, e ta ye etha einekelo lyawo moshili li nkundipale.

12. Iinima yini mbyoka hayi lalakanenwa kunena tayi vulu okuyona po uupambepo wetu?

¹² Aatessalonika yamwe otashi vulika ya li monkalo ya faathana. Onkalo oyi li ngiini kunena? Iinima mbyoka hayi mana po ethimbo otayi indjipala. Dhiladhila kombinga yoowili ndhoka hadhi longithwa mokuninga omakwatathano okupitila mOintaneta, okulesha nokuyamukula omatumwalaka gopaelektronika, okulalakanena nuulaadhi iinima mbyoka tu hole okuninga, nenge okukala aluhe wu li pethimbo nomaudhano. Kehe shimwe shomiinima mbika otashi vulu okupiyaganeka Omukriste e ta kanitha uulaadhi we. Oshizemo? Egalikano tali zi komutima, ekonakono lyOohapu dhaKalunga, okukala pokugongala nokuuvitha onkundana ombwanawa otaku vulu okukala taku shongola. Oshike nduno tatu vulu okuninga opo kaatu piyaganekwe nuupu?

13. Ngaashi sha li sha hunganekwa, aantu oyendji oye na iikala ya tya ngiini, noshike tashi ka gamena eitaalo lyetu?

¹³ Oshinima shimwe shoka twa pumbwa okuninga osho okukaleka momadhiladhilo ethimbo ndyoka tu li mulyo nosho wo shoka tashi vulu oku tu ningilwa uuna hatu endathana naamboka inaaya hala okuzimina kutya otu li ‘momasiku gahugunina.’ (NW) Omuyapostoli Petrus okwa li a nyola kombinga yethimbo ndika a ti: “Otaku ka holoka aantu mboka taa endithwa kuuhalu wawo. Oyo otaye ke mú fundjaleka taa ti: ‘Oye oku uvaneke tuu, ta ka galuka? Oku li peni? Ootate oya sa nale, ihe iinima ayihe oyi li, ngaashi ya kala shito okuza keshito lyuuyuni.’” (2 Pet. 3:3, 4) Okulesha Oohapu dhaKalunga esiku kehe noku dhi konakona pandjigilile otaku ke tu kwathela tu kale tatu gandja eitulomo kethimbo ndyoka tu li mulyo, sha hala okutya, oku tu kaleka tu shi kutya otu li ‘momasiku gahugunina.’ Uushunimonima mboka wa hunganekwa owa li wa holoka nale nowu li po sigo okunena. ‘Mwiinayi’ oko e li sigo okunena nota tsikile okupataneka aapiya yaKalunga. Omolwaashoka otwa pumbwa okukaleka momadhiladhilo shi vulithe nale esiku lyaJehova ndyoka li li popepi.—Sef. 1:7.

14. Okukala twi ipyakidhila miilonga yaKalunga ohaku tu gamene ngiini?

¹⁴ Okukala aluhe omuntu i ipyakidhila miilonga yokuuvitha onkundana ombwanawa yUukwaniilwa oko ku li omukalo gumwe gwa simana ngoka gwa monika kutya ohagu kwathele omuntu a kale a tonata ye a kale itaa piyaganekwa nuupu. Onkee ano, sho Kristus Jesus, Omutse gwegongalo, a lombwele aalanduli ye ya ka ninge aantu aalongwa yomiigwana ayihe, oku ya longa okudhiginina ayihe mbyoka e yi ya longo, okwa li a gandja omayele ngoka ga li taga ka gamena aalanduli ye. (Mat. 28:19, 20) Otwa pumbwa okukala aalaadhi miilonga yokuuvitha, opo tu ulike kutya otatu katuka metsokumwe newiliko lye. Mbela sho to tala aamwaho yomuTessalonika oya li ngaa taya vulu okukala ya gwanenwa kokuuvitha nokulonga kaaye na ko nasha, sha fa ando oshilonga showala shoka shi na okulongwa nuunye? Dhimbulukwa oohapu dhaPaulus ndhoka a li e ya lombwele a ti: ‘Inamu  keelela ombepo ondjapuki, inamu dhina omahunganeko.’ (1 Tes. 5:19, 20) Ihatu konakona tuu nokulombwela yalwe omahunganeko omahokithi!

15. Iinima yimwe yini tatu vulu okukundathana pelongelokalunga lyuukwanegumbo?

¹⁵ Dhoshili, otwa hala okukwathela omaukwanegumbo getu ga kale ge na uunkulungu wokulonga miilonga yomomapya. Aamwatate naamwameme oyendji oya mona kutya omukalo gumwe moka taya vulu okupondola mwaashoka, okugandja eitulomo kuukalele melongelokalunga lyawo lyuukwanegumbo. Otashi vulika mu kale mu wete shi li nawa mu kundathane nkene iilyo yuukwanegumbo tayi ka ninga omaishunoko kwaamboka yu ulika ohokwe. Otaya ka popya shike petalelopo lya landula ko? Iitopolwa yini tashi vulika tayi ka ningitha aatalelwa po ya kale ye na ohokwe? Opethimbo lini hashi kala oshiwanawa unene okuninga omaishunoko? Oyendji ohaya longitha wo ethimbo lyawo limwe pethimbo lyelongelokalunga lyuukwanegumbo yi ilongekidhile okugongala kwegongalo, opo ya kale ye shi shoka tashi ka kundathanwa po. Mbela ito vulu okwiilongekidha nawa opo wu ka kuthe ombinga? Okukutha kwoye ombinga otaku ka koleka eitaalo lyoye notaku ke ku kwathela kuupiyaganekwe. (Eps. 35:18) Eeno, elongelokalunga lyuukwanegumbo otali ke tu kwathela kaatu kale tatu fekele iinima mbyoka inaayi popiwa mOmbiimbeli nokaatu kale tu na omalimbililo.

16. Oshike sha tsa omukumo Aakriste aagwayekwa ya kale ya tokola toko kaaya piyaganekwe?

¹⁶ Uuna tatu tedhatedha kunkene Jehova a laleka nuuyamba oshigwana she neuvoko lya yela lyomahunganeko gOmbiimbeli momukokomoko gwoomvula, otatu vulu okukala nolupandu lwondjambi ndjoka yi li komeho. Aagwayekwa oye na etegameno lyoku ka kala pamwe naKristus megulu. Shoka inashi ya tsa tuu omukumo ya kale ya tokola toko kaaya piyaganekwe kusha! Otatu vulu shili okuukitha kuyo oohapu ndhoka Paulus a li a nyolele Aatessalonika tadhi ti: ‘Aamwameme naaholike yOmuwa, tse otu na okuhambelela Kalunga aluhe omolweni. Oshoka Kalunga okwe mú hogolola mu ninge aantu ye aayapuki koonkondo dhombepo nokokwiitaala kweni oshili.’—2 Tes. 2:13.

17. Eladhipiko lini li li mAatessalonika aatiyali 3:1-5?

¹⁷ Mboka ye na etegameno lyoku ka kala nomwenyo sigo aluhe kombanda yevi oye na wo okukambadhala kaaye ethe ya piyaganekwe nuupu. Ngele owu na etegameno lyokukala kombanda yevi, taamba ko eladhipiko lyopahole ndyoka Paulus a li a nyolele aagwayekwa ooyakwawo mboka ya li muTessalonika (Lesha 2 Aatessalonika 3:1-5.) Kehe gumwe gwomutse oku na okukala a lenga oohapu ndhoka dhopahole. Eeno, oontumwafo ndhoka dha li dha nyolelwa Aatessalonika otadhi gandja omalondodho ga kwata miiti kombinga yokufekela nenge yokukala nomadhiladhilo taga limbilike. Omalondodho ngaka oga simanenena kAakriste kunena pethimbo lyehulilo ndika tu li mulyo.