KONIMA yoomvula omulongo lwaampono dha ka pita, aaihokani, Gregorio naMarilou, mboka ya li mepipi lyoomvula 30 nasha, oya li taya longo ye li aakokolindjila muManila nopethimbo opo tuu mpoka oya li ye na iilonga yokwiikongela omboloto yethimbo lyu udha. Osha li eshongo kuyo, ihe oya li ya pondola. Marilou okwa li a ningwa menindjela mombaanga moka a li ha longo. Ota ti: “Iilonga yetu oya li ye tu ningitha tu kale tu na onkalamwenyo ombwambwambwambwa.” Nokuli, oya li ye na oshimaliwa lela noya tokola ya tunge egumbo ndyoka ya kala ya halelela, moshitopolwa oshiwanawa shoka shi li ookilometa 19 muuninginino waManila. Oya li ya ningi okondalaka nehangano lyontumba li ya tungile egumbo noya longekidha ya kale haya futu ko omwedhi kehe muule woomvula omulongo.

Marilou ota hokolola ta ti: “Iilonga yandje iipe oya li tayi pula ndje ethimbo olindji nosho wo oonkondo sigo sha ningitha ndje ndi kale kaandi na naanaa ehalo lyiinima yopambepo. Onda li ndu uvite kutya otandi nyokoma Jehova.” Ota yelitha ta ti: “Kanda li we tandi vulu okugwanitha po ethimbo lyokulongela Jehova ndyoka nda li nda tula po ndi longe miilonga ye.” Molwaashoka kaya li ya nyanyukilwa onkalo yawo, Gregorio naMarilou oya kundathana  esiku limwe kutya onkalamwenyo yawo oyu uka peni. Gregorio ota ti: “Otwa li twa hala okuninga elunduluko, ihe katwa li tu shi naanaa kutya natu ninge shike. Otwa kundathana nkene tatu vulu okulongitha oonkalamwenyo dhetu pakuudha miilonga yaJehova, unene tuu sho kaatu na aanona. Otwa li twa galikana kuJehova e tu wilike.”

Pethimbo ndyoka oya li ya pulakene kiipopiwa yontumba kombinga yoku ka longa komahala hoka ku na ompumbwe onene yaauvithi yUukwaniilwa. Gregorio ota ti: “Otwa li tu uvite kutya iipopiwa mbika oya li eyamukulo lyaJehova komagalikano getu.” Aaihokani mboka oya galikana ya gwedhelwe ko keitaalo lyawo opo ya kale ye na uulaadhi ya ninge omatokolo gomondjila. Endangalati limwe ndyoka lya li mondjila yawo egumbo lyawo ndyoka lya li tali tungwa. Oya adhika ya futa ko nale oomvula ndatu. Oya li taya ka ninga po shike? Marilou ota ti: “Ngele otwa teya okondalaka, otwa li tatu ka kanitha ashihe shoka twa futa nale, shoka sha li oshimaliwa oshindji noonkondo. Ihe otwa li tu na okuhogolola pokati kokupititha komeho okulonga ehalo lyaJehova nenge omahalo getu yene.” Sho ya dhiladhila koohapu dhomuyapostoli Paulus ndhoka tadhi ti kutya “iinima ayihe oyo ekanitho lyowala,” oya li ya tokola ya teye okondalaka ndjoka, ye ethe po iilonga yawo e taya landitha po iiniwe yawo oyindji e taya tembukile komukunda gu li kokule kokatuntu Palawan, hoka ke li ookilometa 480 lwaampono kuumbugantu waManila. — Fil. 3:8.

Gregorio naMarilou manga inaaya tembuka oya li ya kambadhala okwiilongekidhila okukala nonkalamwenyo yanathangwa, ihe inaye shi ndhindhillika kutya onkalamwenyo yawo otayi ka kala yanathangwa lela sigo ya thiki kehala hoka taya ka kala. Marilou ota ti: “Osha li she tu halutha shili. Pehala mpoka kapwa li olusheno, niinima yilwe mbyoka hayi ningitha onkalamwenyo ompu. Pehala lyokuteleka kesiga, otwa li tu na okupanda iikuni nokuteleka peziko. Onda li nda yuulukwa okukala handi yi koositola noku ka lya komahala galwe nosho wo iinima yilwe mbyoka yi li moondolopa.” Nonando ongawo, aaihokani mbaka oya kala nokwiidhimbulikitha kutya omolwashike ya tembukile nkoka, nomathimbohamale oya li yi igilile onkalo yawo ompe. Marilou ota ti: “Ngashingeyi ohandi nyanyukilwa okutala eshito, ngaashi oonyothi tadhi adhima nawa. Shoka hashi nyanyudha ndje unene, aantu mboka haya kala ya nyanyukwa uuna twe ya uvithile. Sho tatu longo huno, otwi ilonga okukala twa “pyokoka miinima ayihe” opo tu kale twa gwanenwa.” — Fil. 4:12.

Gregorio ota ti: “Sho opo twe ya pehala mpano, opwa li owala Oonzapo dhi li ne. Oya li ya nyanyukwa noonkondo sho nda tameke okugandja iipopiwa yomontaneho oshiwike kehe nokuhika oshiketala shandje sho tatu imbi omaimbilo gUukwaniilwa.” Muule womvula yimwe, aaihokani mboka oya li ya mono nkene okangundu hoka okashona taka koko nokuninga egongalo li na aauvithi 24. Gregorio ota ti: “Oohapu dhopahole ndhoka twa li tu uvu kaakwanegongalo mboka odha li dhe tu gumu noonkondo.” Ngashingeyi sho taya dhiladhila oomvula hamano ndhoka ya longa koshitopolwa shoka shi ikalekelwa, otaya ti: “Kapu na nando osha tashi vulu okuyelekanithwa nenyanyu ndyoka hali zi mokumona egongalo tali koko pambepo. Otu uvite shi vulithe nale kutya onkalamwenyo yetu oyi na eityo.”

MuFilipine, aamwatate naamwameme tayi ihilile 3 000 oya tembukila kiitopolwa hoka ku na ompumbwe onene yaauvithi yUukwaniilwa. Yamwe yomuyo 500 lwaampono aamwameme inaaya hokanwa. Pashiholelwa, natu tale kuKaren.

Karen, ngashingeyi e li mepipi lyoomvula 20 nasha, okwa putukile muBaggao shi li muCagayan. Sho a li mepipi lyoomvula omulongo nasha, okwa li ha dhiladhila olundji kombinga yokutamununa mo uukalele we. Ota ti: “Molwaashoka onda li ndi wete kutya ethimbo lya hupa ko efupi nosho wo kutya aantu ayehe oya pumbwa okuuva etumwalaka lyUukwaniilwa, onda li nda hala oku ka longa kehala hoka ku na ompumbwe onene yaauvithi.” Nonando yaandjawo yamwe oya li ye mu ladhipike a lalakanene elongo lyopombanda pehala lyokutembukila kehala li ikalela e ku uvithe, Karen okwa galikana kuJehova e mu wilike. Okwa li wo a popi nayalwe mboka haya longo koshitopolwa shi ikalela. Sho e na oomvula 18, okwa tembukile koshitopolwa shi ikalela shoka shi li uule wookilometa 64 lwaampono kokule nondoolopa yaandjawo.

Egongalo eshona ndyoka Karen a ka ambidhidha olya li hali uvithile iitopolwa ayihe yi li moondundu komunkulofuta gwaFilipine. Karen ota hokolola ta ti: “Opo tu ye kegongalo epe, otwa li hatu ende omasiku gatatu okuza kuBaggao, notwa li hatu taaguluka omilonga lwiikando yi vule 30, tatu ningi twa londo twa londuluka ko koondundu.” Ota gwedha ko ta ti: “Opo ndi ye kaakonakonimbiimbeli yamwe, onda li handi ende oowili hamano, e tandi lala megumbo lyomukonakoni, nopo nduno esiku lya landula ko ohandi ende ishewe oowili hamano ndi shune kegumbo.” Mbela oonkambadhala ndhoka odha li ngaa dhe e ta uuwanawa washa? Karen ota popi ti imemeha ta ti: “Omathimbo gamwe omagulu gandje ohaga kala tage ehama, ihe onda ninga omakonakonombiimbeli ge li 18. Onda ‘konakona nonda mono nkene OMUWA omwaanawa’!” — Eps. 34:8.

Oshike sha li shi inyengitha Sukhi, omumwameme inaa hokanwa ngoka e li mepipi lyoomvula 40 a kala moAmerika, a tembukile kuFilipine? Mo 2011 okwa li a kala poshigongi shopashikandjo mpoka aaihokani yamwe ya li ya pulwapulwa. Oya popi nkene ya li ya landitha po iiniwe yawo oyindji opo ya tembukile kuMeksiko ya ka kwathele miilonga yokuuvitha. Sukhi ota ti: “Omapulapulo ngoka oga li ga ningitha ndje ndi dhiladhile kombinga yomalalakano ngoka nda li inaandi dhiladhila nale.” Sho Sukhi, ngoka Omuindia, u uvu kutya opu na ompumbwe onene yoku ku uvithila Aapunjabi mboka haya kala muFilipine, okwa li a tokola a ye a ka kwathele. Mbela mondjila ye omwa li mu na omandangalati?

Sukhi ota ti: “Osha li oshidhigu kungame okuhogolola kutya oshike ndi na okulanditha po nashike ndi na okukala po nasho. Niishewe, konima sho nda kala uule woomvula 13 mehala lyandje ewanawa, onda li nda ka kala noyaandjetu nehala ndyoka kalya li ewanawa li vule ndiyaka. Kasha li oshipu, ihe osha li omukalo omwaanawa gwokwiilongekidhila onkalamwenyo yanathangwa.” Omashongo geni a li a mono sho a tembukile kuFilipine? “Okukala  handi tila iipuka noonkondo nokukala nondjuulukwe yoyaandjetu, oyo iinima mbyoka ya li eshongo enene kungame. Onda li ndi ilongo okwiinekela Jehova shi vulithe nale!” Mbela oonkambadhala ndhoka odha li ngaa dhe e ta uuwanawa washa? Sukhi okwi imemeha e ta ti: “Jehova ote tu lombwele ta ti: ‘Yelekii ndje, notamu ka mona, sho tandi mú lokithile eloolo lyomaliko guuyamba.’ Ohandi mono uushili woohapu ndhika paumwene uuna omunegumbo a pula ndje ta ti: ‘Oto galuka ishewe uunake? Ondi na omapulo ogendji natango.’ Ohashi nyanyudha ndje noonkondo nohe kala ndu uvite nda gwanenwa sho tandi vulu okukwathela mboka ya sa ondjala pambepo!” (Mal. 3:10) Sukhi ota gwedha ko ta ti: “Dhoshili, oshinima shoka sha li oshidhigu okuninga etokolo lyokutembuka. Ihe konima sho nda ningi etokolo ndyoka, osha li oshikumithi okumona nkene Jehova ta tulile ndje iinima pomahala.”

Sime, omumwatate a hokana ngoka ngashingeyi e na oomvula 30 nasha, okwa li a tembuka mo muFilipine a ka longe iilonga mbyoka hayi futu nawa moshilongo shimwe shi li muumbugantuninginino waAsia. Manga e li hoka, eladhipiko lyomutonatelishikandjo nosho wo oshipopiwa shoka sha li sha gandjwa koshilyo shOlutuwiliki oya li ye mu inyengitha a pitithe komeho Jehova monkalamwenyo ye. Sime ota ti: “Ihe onda li handi kwatwa kuumbanda shaa nda dhiladhila okweetha po iilonga yandje.” Nonando ongawo, okwe etha po iilonga ye e ta shuna koFilipine. Kunena, Sime nomukulukadhi gwe Haidee, otaya longo koDavao del Sur, kuumbugantu woshilongo hoka kwa pumbiwa aauvithi yUukwaniilwa ya mane ko oshitopolwa shoka oshinene. Sime ota ti: “Ngele nda dhiladhila konakuziwa, onda pandula sho nda sinda uumbanda wandje wokukanitha iilonga nonda pititha Jehova komeho. Kapu na sha shilwe shoka tashi ku pe egwaneno lyashili monkalamwenyo kaashi shi owala oku pa Jehova ashihe shoka wu na oku mu pa!”

Sho Ramilo naJuliet, aaihokani mboka ye li aakokolindjila ye li mepipi lyoomvula 30 nasha, yu uvu kutya opu na egongalo limwe ndyoka li li uule wookilometa 30 okuza pegumbo lyawo kutya olya pumbwa ekwatho, oya li yi iyamba ye ke li ambidhidhe. Onkee ano, oshiwike kehe kutya nduno oku na omvula nenge omutenya, Ramilo naJuliet ohaya yi nokapakapaka kawo kokugongala nomuukalele. Nonando ohaya hingi moondjila mu na omalambo nokweenda koontopa dhe endjelela shoka shi li eshongo, oya nyanyukwa molwaashoka ya tamununa mo uukalele wawo. Ramilo ota ti: “Ngame nomukulukadhi gwandje ohatu ningi omakonakonombiimbeli 11 kumwe. Okulonga kehala hoka ku na ompumbwe onene ohashi pula okuninga omaiyambo, ihe ohashi tu etele egwaneno lyashili!” — 1 Kor. 15:58.

Mbela owa hala okutseya oshindji kombinga yoku ka longa koshitopolwa hoka ku na ompumbwe onene yaauvithi yUukwaniilwa moshilongo sheni nenge kondje yiilongo? Ngele osho, popya nomutonatelishikandjo gweni e to lesha oshitopolwa “Mbela oto vulu ‘okutaagulukila kuMakedonia’?” shi li mUukalele Wetu wUukwaniilwa waAuguste 2011.