1. Iinima yini hayi kundathanwa pandjigilile koshigwana shaKalunga, nongiini hatu mono uuwanawa moku yi endulula?

MANGA to ilongekidhile Ekonakono lyOshungolangelo lya landula ko, mbela owu na esiku wa dhiladhilile to ti: ‘Ano inatu kundathana nale oshinima shino?’ Ngele owa kala to endathana negongalo lyopaKriste uule wethimbo lyontumba, otashi vulika wa ndhindhilika kutya iinima yimwe oya kundathanwa iikando niikando. Okukonakona kombinga yUukwaniilwa waKalunga, yekuliloyambo, yiilonga yokuninga aantu aalongwa, nosho wo yuukwatya ngaashi ohole neitaalo oku li oshitopolwa shiikulya yetu yopambepo yopandjigilile. Mokweendulula iinima mbika, ohatu kwathelwa tu kale twa kola meitaalo nohatu kwathelwa opo ‘okupulakena kwetu ku tu fale miilonga.’ — Jak. 1:22.

2. (a) Olundji omalombwelo gaKalunga ohaga kala tagu ulike kushike? (b) Omalombwelo gaKalunga oga yooloka ko ngiini kungoka gaantu?

² Oshityadhina shOshihebeli shoka sha tolokwa “omalombwelo” olundji ohashi ulike koompango, kiipango nosho wo komauthompango ngoka Kalunga ha pe oshigwana she. Kakele koompango dhopantu, ndhoka olundji hadhi kala dha pumbwa okulundululwa nenge okupupalekwa, oompango dhaJehova nomauthompango ge ohaga kala aluhe ge shi okwiinekelwa. Nonando gamwe gomugo ohaga gandjwa omolwethimbo lyontumba nenge molwonkalo yontumba, ihaga kala ge na nando epuko lyasha nenge inaaga gwana. Omupisalomi okwa ti: “Omalongo goye ogo omayuuki sigo aluhe; longa ndje oondunge, ndi kale ndi na omwenyo.” — Eps. 119:144.

3, 4. (a) Omalombwelo gaJehova ohashi vulika ga kale ga kwatela mo shike? (b) Aaisraeli oya li taya ka mona uuwanawa washike ngele ya vulika kugo?

³ Otashi vulika wa ndhindhilika kutya omathimbo gamwe omalombwelo gaJehova ohaga kala ga kwatela mo omatumwalaka gomalondodho. Oshigwana shaIsraeli osha li hashi londodhwa pandjigilile kuKalunga okupitila maapolofeti ye. Pashiholelwa, konima yethimbo efupi sho Aaisraeli ye li pokuya mEvi lyEuvaneko, Moses okwa li e ya londodha a ti: “Inamu  etha mu kuthwe po pOMUWA, ne mu ka longele ookalunga yalwe. Ngele tamu shi ningi, OMUWA ote ke mú geela.” (Deut. 11:16, 17) Ombiimbeli otayi ulike kutya Kalunga okwa li a pe oshigwana she omalombwelo ogendji ngoka ga li ge shi kwathele.

⁴ Iikando yilwe oyindji, Jehova okwa li a ladhipike Aaisraeli ya kale haye mu tila, ya pulakene kuye noya yapule edhina lye. (Deut. 4:29-31; 5:28, 29) Ngele ya tula miilonga omalombwelo ngaka, oya li ye na uushili kutya otaya ka mona omayambeko ogendji. — Lev. 26:3-6; Deut. 28:1-4.

5. Omolwashike Jehova a li a kondjele omukwaniilwa Hiskija?

⁵ Pethimbo alihe ndyoka Aaisraeli ya kala ye na onkalamwenyo yinyanyudha, Kalunga okwa li a gwanitha po omauvaneko ge. Pashiholelwa, sho Sanherib, omukwaniilwa gwAayassur a kondeke Juda e ta ningi omatilitho gokuumba koshipundi omukwaniilwa Hiskija, Jehova okwa li a yi mo olunyala sho a tumu omuyengeli. Muusiku owala wumwe, omuyengeli gwaKalunga okwa li a hanagula po “aakwiita” ayehe yetangakwiita lyAayassur, nokungawo Sanherib okwa li e na okushuna kaandjawo a sithwa ohoni. (2 Ondjal. 32:21; 2 Aak. 19:35) Omolwashike Kalunga a li a kondjele omukwaniilwa Hiskija? Omolwaashoka ‘Hiskija okwa li omwiinekelwa gwOMUWA ye ina etha okuvulika kuye, ihe okwa dhiginine iipango ye.’ — 2 Aak. 18:1, 5, 6.

6. Omukwaniilwa Josia okwa li a tula ngiini einekelo lye muJehova?

⁶ Oshiholelwa shilwe shagumwe ngoka a li a vulika kiipango yaJehova oshomukwaniilwa Josia. Okutameka sho omushona lela e na oomvula hetatu “okwa longo shoka sho opalela OMUWA; . . . nokwa vulika lela kiipango ayihe yaKalunga.” (2 Ondjal. 34:1, 2) Josia okwa li u ulike kutya okwi inekela lela muJehova sho a kutha mo iikalunga moshilongo e ta totulula elongelokalunga lyashili. Mokuninga ngaaka, Josia ka li owala i iyetele omalaleko nuuyamba ihe okwa li wo e ga etele oshigwana ashihe. — Lesha 2 Ondjalulo 34:31-33.

7. Oshizemo osha li shike sho Israeli a li inaa simaneka omalombwelo gaJehova?

⁷ Shinikitha oluhodhi, oshigwana shaKalunga kasha li aluhe shi inekele thiluthilu omalombwelo gaJehova. Momukokomoko gwoomvula omathele, osha kala tashi tengauka, nena otashi vulika ongula itashi vulika. Uuna eitaalo lyasho lya nkundipala, olundji osha kala hashi ‘tengatengithwa nohashi alaalithwa kombepo kehe yomalongo,’ ngaashi oohapu dhomuyapostoli Paulus tadhi ti. (Ef. 4:13, 14) Nongaashi sha li sha hunganekwa, sho sha li inaashi tula einekelo lyasho momalombwelo gaKalunga, osha li sha mono iizemo yiyemateka. — Lev. 26:23-25; Jer. 5:23-25.

8. Ongiini tatu vulu okwiilonga sha koshiholelwa shaIsraeli?

⁸ Omomukalo guni tatu vulu okumona uuwanawa  moshiholelwa shaIsraeli? Ngaashi a li e shi ningilwa, oshigwana shaKalunga shokunena ohashi pewa omayele nuutekuvuliko. (2 Pet. 1:12) Ethimbo kehe tatu lesha Oohapu dhaKalunga dha nwethwa mo otatu vulu okwaadha mo omalombwelo, nenge tu tye otadhi vulu oku tu dhimbulukitha. Tu li aantu ye na emanguluko lyokuninga omatokolo, otatu vulu okuhogolola ngele otatu vulika kewiliko lyaJehova nenge otatu lalakanene iinima mbyoka tu wete kutya oyo yi li mondjila. (Omayel. 14:12) Natu ka tale komatompelo gamwe kutya omolwashike tatu vulu okutula einekelo lyetu momalombwelo gaJehova nankene hatu mono uuwanawa uuna tatu vulika kugo.

9. Sho Aaisraeli ya li mombuga, Jehova okwa li e ya shilipaleke ngiini kutya okwa li te ya ambidhidha?

⁹ Sho Aaisraeli ya li yi idhenge ondjila ‘mombuga ontilithi’ moka ya kala uule woomvula 40, Jehova ka li e ya pe uuyelele wokondandalunde komeho yethimbo shi na ko nasha nankene a li te ke ya wilika, te ke ya gamena note ke ya sila oshimpwiyu. Nonando ongawo, okwa li u ulike iikando niikando kutya oya li taya vulu okukala ye mu inekela nosho wo omalombwelo ge. Mokulongitha oshikogo shomuzile omutenya nosho wo shomulilo uusiku, Jehova okwa li a dhimbulukitha Aaisraeli kutya okwa li te ya ambidhidha sho a li te ya pititha mombuga moka mwa li mwa nika oshiponga. (Deut. 1:19; Eks. 40:36-38) Okwa li wo a sile oshimpwiyu oompumbwe dhawo dhakehe esiku. “Oonguwo dhawo inadhi kulupa, noompadhi dhawo inadhi zinda.” Eeno shili, okwa li e ya “gwanithile oompumbwe dhawo adhihe.” — Neh. 9:19-21.

10. Jehova ota wilike ngiini oshigwana she kunena?

¹⁰ Aapiya yaKalunga kunena oye li puuyanda wuuyuni uupe moka tamu ka kala uuyuuki. Mbela otwi inekela ngaa muJehova e tu pe shoka twa pumbwa opo tu vule oku ka hupa ‘puudhigu uunene’ mboka wu li pokuya? (Mat. 24:21, 22; Eps. 119:40, 41) Oshili, Jehova ine tu pa oshikogo shomuzile nenge shoka shomulilo opo e tu thikithe muuyuni uupe. Ihe ota longitha ehangano lye e tu kwathele tu kale twa tonata. Pashiholelwa, okwa kala taku tsuwa omuthindo shi vulithe shito tu koleke uupambepo wetu okupitila melesho lyOmbiimbeli lyopaumwene, mokukala nElongelokalunga lyUukwanegumbo lyokongulohi, nokukala pokugongala pandjigilile nosho wo muukalele. Mbela otwa ninga ngaa omalunduluko opo tu vule okulandula omalombwelo ngaka? Okuninga ngaaka otaku ke tu kwathela tu tunge eitaalo lyetu ndyoka tali ke tu hupitha tu ye muuyuni uupe.

11. Omomikalo dhini Kalunga hu ulike kutya oku na ko nasha natse?

¹¹ Kakele koku tu kwathela tu kale twa tonata pambepo, ewiliko ndyoka twa pewa ohali tu kwathele tu ungaunge niinima yakehe esiku. Iiholelwa yewiliko ndyoka oya kwatela mo okukala netaloko li li nawa li na ko nasha niinima yopamaliko nokukala neho lyanathangwa opo kaatu kale tu na iimpwiyu ya pitilila. Otwa mona wo uuwanawa mewiliko li na ko nasha nokuzala kwetu nonokwiiyopaleka, nokuhogolola omainyanyudho omawanawa, nonokutokola shi na ko nasha nelongo li li pandjele ndyoka tu na okumona. Dhiladhila wo kombinga yomalombwelo gegameno ngoka twa pewa shi na ko nasha nomagumbo getu, niiyenditho, nIinyanga yUukwaniilwa nokwiilongekidhila eulumompumbwe ndyoka tali vulu okuholoka po. Omayele ngoka otagu ulike kutya Kalunga oku na ko nasha nonkalonawa yetu.

12. (a) Jesus okwa li a popi naalongwa ye iikando niikando kombinga yashike? (b) Oshilonga shini sheifupipiko sha li sha gumu noonkondo Petrus, noshi na oku tu guma ngiini?

¹² Pethimbo lyaayapostoli, oshigwana shaKalunga osha li hashi pewa omalombwelo, nenge tu tye hashi dhumbulukithwa pandjigilile. Iikando niikando Jesus okwa li a popi naalongwa ye kombinga yankene sha pumbiwa ya kokeke uukwatya weifupipiko. Ihe, okwa li a ningi oshindji pehala lyokulombwela owala aalanduli ye kutya osha hala okutya shike okukala aaifupipiki, ano tu tye, okwa li e ya tulile po oshiholelwa. Mesiku lye lyahugunina kombanda yevi e li omuntu gwopanyama,  Jesus okwa li a gongaleke aayapostoli ye ya dhane Opaasa. Manga aayapostoli ye ya li taya li, Jesus okwa li a yambuka po piikulya e ta yogo oompadhi dhawo, oshilonga shoka sha li owala hashi longwa komupiya gwowala. (Joh. 13:1-17) Oshilonga shika sheifupipiko osha li she ya longo oshiilongomwa sha simanenena shoka ya li itaaya ka dhimbwa. Konima yoomvula 30 lwaampono dha ka landula ko, omuyapostoli Petrus ngoka a li po puulalelo mboka, okwa li a pe ooitaali ooyakwawo omayele kombinga yeifupipiko. (1 Pet. 5:5) Oshiholelwa shaJesus oshi na oku tu inyengitha atuhe tu kale aaifupipiki uuna tatu ungaunga nayakwetu. — Fil. 2:5-8.

13. Jesus okwa li a dhimbulukitha aalongwa ye kombinga yokukokeka uukwatya wuni wa simanenena?

¹³ Jesus okwa li wo a kundathana olundji naalongwa ye kombinga yankene sha pumbiwa ya kale neitaalo lya kola. Konima yaasho ya li inaaya vula okutidha mo ompwidhuli ndjoka ya li mokamati kamwe, aalongwa oya pula Jesus ya ti: “Omolwashike twa nyengwa oku yi tidha mo?” Jesus okwa yamukula a ti: ‘Omolweitaalo lyeni enkundi. Otandi mú lombwele: Andola mu na eitaalo li thike pomuma yosinapi, ando kaku na shoka tashi mu nyenge.’ (Mat. 17:14-20) Momukokomoko guukalele we, Jesus okwa li a longo aalongwa ye kutya eitaalo olyo uukwatya wa simanenena. (Lesha Mateus 21:18-22.) Mbela ohatu longitha ngaa oompito ndhoka tu na opo tu koleke eitaalo lyetu okupitila momayele taga tungu ngoka hatu mono piigongi iinene niishona nosho wo pokugongala kehe kwopaKriste? Ndhika kadhi shi owala oompito dhinyanyudha; odhi li oompito tu ulike kutya otwi inekela muJehova.

14. Omolwashike sha simana tu kokeke ohole ya fa yaKristus kunena?

¹⁴ Omanyolo gopaKriste gOshigreka ogu udha omalombwelo ge tu nuninwa tu kale tu holathane. Jesus okwa li a popi kutya oshipango oshinene oshitiyali osho ‘okuhola mukweni ngaashi ngoye wi ihole mwene.’ (Mat. 22:39) Sha faathana, Jakob omumwayinagona gwaJesus okwa li a ti kutya ohole oyi li ‘ompango yoshilongo.’ (Jak. 2:8) Omuyapostoli Johannes okwa nyola a ti: “Aaholike yandje, ongame itandi mú nyolele oshipango oshipe, aawe, ooshika tuu oshikulu, mwa kala nasho oketameko.” (1 Joh. 2:7, 8, OB-1954) Johannes okwa li tu ulike kushike sho a popi ‘oshipango oshikulu’? Okwa li tu ulike koshipango shohole. Osha li “oshikulu” meityo ndyoka kutya Jesus okwa li e shi gandja oomvula omilongo dha ka pita, okuza ‘ketameko.’ Ihe osha li wo “oshipe” molwaashoka osha li tashi pula ohole yeiyambo, ndjoka aalongwa ya li taya ka kala ya pumbwa sho ye li moonkalo oompe. Tu li aalongwa yaKristus, mbela katu na olupandu lwomalondodho ngoka hatu mono ngoka hage tu kwathele tu henuke okukokeka ombepo yokwiihola mwene, uukwatya mboka wu niwe kuuyuni mbuka, mboka tawu vulu oku tu ningitha tu kale kaatu hole yakwetu?

15. Elalakano lyaJesus lya simanenena lyokuya kombanda yevi olya li lyashike?

¹⁵ Jesus okwa li u ulike kutya oku na ko nasha  naantu paumwene. Otatu mono nkene a li u ulike okunakonasha kwe sho a aludha aavu niilema naasho a yumudha oonakusa. Ihe, elalakano lye lya simanenena lyoshilonga she kalya li lyokwaaludha aantu palutu. Okuuvitha kwe nokulonga aantu okwa li taku ka guma oonkalamwenyo dhaantu noonkondo. Ngiini mbela? Otu shi shi kutya mboka Jesus a li a aludha nokwa yumudha pethimbo lyaayapostoli, oya ka kulupa e taya si, omanga mboka yaa taamba ko etumwalaka lyonkundana ombwanawa ndyoka a li u uvitha oya li ya mono etegameno lyoku ka mona omwenyo gwaaluhe. — Joh. 11:25, 26.

16. Iilonga yokuuvitha Uukwaniilwa noyokuninga aantu aalongwa otayi longwa shi thike peni kunena?

¹⁶ Iilonga yokuuvitha mbyoka Jesus a li a tameke pethimbo lyaayapostoli otayi longwa kunena shi vulithe nokuli nale. Eeno, Jesus okwa li a lombwele aalongwa ye a ti: “Indeni ano, ka ningeni aantu ayehe aalongwa yandje.” (Mat. 28:19) Oya kala taye shi ningi shili, notatu vulu okutya, eeno shili otwe shi ninga! Oonzapo dhaJehova dhi vulithe poomiliyona heyali otadhi uvitha nuulaadhi Uukwaniilwa waKalunga miilongo yi vulithe po 230, nohadhi konakona Ombiimbeli pandjigilile naantu omamiliyona. Okuuvitha huka otaku gandja uunzapo kutya otu li momasiku gahugunina.

17. Paulus naPetrus oya gandja omayele geni?

¹⁷ Osha yela kutya omalombwelo, nenge tu tye omadhimbulukitho oga li ga kwathele Aakriste yopetameko ya kale ya kola meitaalo. Dhiladhila keladhipiko ndyoka Timoteus e na okukala a li a mono sho omuyapostoli Paulus ngoka a li mondholongo pethimbo ndyoka e mu lombwele a ti: “Dhiginina oohapu dhoshili ndhoka nde dhi ku longo.” (2 Tim. 1:13) Konima sho a ladhipike Aakriste ooyakwawo ya kokeke uukwatya ngaashi eidhidhimiko, ohole yuumwayinathana, nosho wo eikwatonawa, omuyapostoli Petrus okwa ti: “Otandi kala noku mú dhimbulukitha iinima mbika, nonando omu yi shi nale nomwa kolelela moshili.” — 2 Pet. 1:5-8, 12.

18. Aakriste yopethimbo lyaayapostoli oya li ya tala ko ngiini omalombwelo?

¹⁸ Eeno, oontumwafo ndhoka Paulus naPetrus ya li ya nyola omu na “oohapu ndhoka dha popiwa nalenale kaahunganeki aayapuki.” (2 Pet. 3:2) Mbela aamwatate yopethimbo lyaayapostoli oya li yu uvu nayi sho ya pewa ewiliko ndyoka? Aawe, molwaashoka osha li euliko lyohole yaKalunga, ndjoka ya li ye ya kwathele ya ‘kale taya koko mesilohenda nomokutseya Omuwa gwetu nOmukulili Jesus Kristus.’ — 2 Pet. 3:18.

19, 20. Omolwashike tu na okukala twi inekela omalombwelo gaJehova, nongiini hatu mono uuwanawa mokuninga ngaaka?

¹⁹ Kunena, otu na omatompelo ogendji gokukala twi inekela momalombwelo gaJehova, ngoka ge li mOohapu dhe, Ombiimbeli, ndhoka kaadhi na esiku dhi kale dha puka. (Lesha Josua 23:14.) Momapandja gayo otatu adha mo nkene Kalunga a li u ungaunga naantu inaaya gwanenena oomvula omayuvi dha ka pita. Ehokololo ndika lyondjokonona olya nyolwa omolwuuwanawa wetu. (Rom. 15:4; 1 Kor. 10:11) Otwa mona egwanitho lyomahunganeko gOmbiimbeli. Omahunganeko otaga vulu okuyelekanithwa nomalombwelo ngoka haga gandjwa komeho yethimbo. Pashiholelwa, aantu omamiliyona oya mbombolokela kelongelokalunga lyashili lyaJehova, ngaashi sha li sha hunganekwa kutya osho tashi ka ningwa ‘pehulilo lyomasiku.’ (Jes. 2:2, 3, yelekanitha NW.) Oonkalo dhuuyuni ndhoka tadhi nayipala otadhi gwanitha wo omahunganeko gOmbiimbeli. Nongaashi sha tumbulwa, oshikonga shokuuvitha shoka tashi ningwa muuyuni awuhe oshi li egwanitho lyoohapu dhaJesus. — Mat. 24:14.

²⁰ Omushiti gwetu oku ulika kutya otatu vulu oku mu inekela. Mbela ohatu mono ngaa uuwanawa momalombwelo ge? Otwa pumbwa okukala tu na eitaalo momalombwelo ge. Shoka osho Rosellen a li a ningi. Okwa ti: “Sho nda tameke okukala ndi inekela thiluthilu muJehova, onda tameke okukala ndi wete lela oshikaha she shopahole tashi sile ndje oshimpwiyu notashi nkondopaleke ndje.” Natu mone wo uuwanawa mokukala tatu dhiginine omalombwelo gaJehova.