1. Ngaashi aayapostoli, otwa halelela okutseya shike?

UUKALELE waJesus owa li wu uka pehulilo, naalongwa ye oya li ya halelela okutseya shoka tashi ka ningwa monakuyiwa. Onkee ano, sho kwa li ku na owala omasiku omashona a se, aalongwa ye yane oye mu pula ya ti: ‘Tu lombwela, uunake ano tashi ka ningwa, nendhindhiliko olini tali holola, uuna to ya [“okukala po kwoye,” NW], nolyehulilo lyuuyuni?’ (Mat. 24:3; Mark. 13:3) Jesus okwe ya yamukula sho e ya lombwele ehunganeko ndyoka tali gwanithwa momukokomoko gwethimbo ele, ndyoka li li muMateus ontopolwa 24 nomontopolwa 25. Mehunganeko ndyoka, Jesus okwa li a hunganeke iiningwanima oyindji iindhindhilikwedhi. Shoka a li a popi oshi na eityo enene kutse molwaashoka natse otwa halelela okutseya shoka tashi ka ningwa monakuyiwa.

2. (a) Muule woomvula odhindji, otwa kala tatu kongo euvoko lya yela lela lyashike? (b) Otatu ka konakona omapulo gatatu geni?

² Muule woomvula odhindji, aapiya yaJehova oya kala nokukonakona pamwe negalikano ehunganeko lyaJesus kombinga yomasiku gahugunina. Oya kala ya hala okumona euvoko lya yela lela kombinga yethimbo ndyoka oohapu dhaJesus dha li tadhi ka gwanithwa. Opo tu ulike nkene euvoko lyetu lya yelithwa, natu ka tale komapulo gatatu ngoka taga pula kutya “uunake.” “Uudhigu uunene” otawu tameke uunake? Jesus ota ka pangula “oonzi” ‘niikombo’ uunake? Jesus ‘ote ya’ nenge tu tye ota galuka uunake? — Mat. 24:21; 25:31-33.

3. Monakuziwa, otwa li tu na euvoko lini kombinga yethimbo ndyoka uudhigu uunene wa li tawu ka tameka?

³ Muule woomvula odhindji, otwa kala tatu dhiladhila kutya uudhigu uunene owa li wa tameke mo 1914 nIita yoTango yUuyuni nosho wo kutya omasiku ngoka oga li ga “fupipikwa” kuJehova mo 1918 sho iita ya hulu opo oshihupe shaagwayekwa shi mone ompito shi uvithile iigwana ayihe onkundana ombwanawa. (Mat. 24:21, 22) Uuna iilonga yokuuvitha ya pu, epangelo lyaSatana olya li tali ka hanagulwa po. Onkee ano, uudhigu uunene owa li wa dhiladhililwa kutya otawu ka kala wu na oondondo ndatu: Owa li tawu ka kala wu na  etameko (1914-1918), owa li tawu ka yiwa moshipala (okuza mo 1918 shu uka komeho), nosho wo kutya owa li tawu ka hula puArmagedon.

4. Ontseyo yini ya li ya ningitha pu monike euvoko lya yela lela lyehunganeko lyaJesus kombinga yomasiku gahugunina?

⁴ Sho twa tsikile nokukonakona ehunganeko lyaJesus, otwa mono kutya oshitopolwa shimwe shehunganeko lyaJesus kombinga yomasiku gahugunina oshi na omagwanitho gopaali. (Mat. 24:4-22) Egwanitho lyotango olya li lya ningwa methelemumvo lyotango E.N., muJudea, negwanitho ekwawo otali ka ningwa muuyuni awuhe pethimbo lyetu. Ontseyo ndjoka oya li ya ningitha pu monike uuyelele wontumba wa yela. *

5. (a) Ethimbo edhigu lini lya li lya tameke mo 1914? (b) Ethimbo ndyoka lyoshitheta otali tsu kumwe nethimbo lini lyomethelemumvo lyotango E.N.?

⁵ Otu uva ko wo kutya oshitopolwa shotango shuudhigu uunene kasha li sha tameke mo 1914. Omolwashike mbela? Omolwaashoka omahunganeko gOmbiimbeli oga holola kutya uudhigu uunene itawu ka tameka niita yiigwana, ihe onokuponokelwa kwomalongelokalunga giifundja. Kungeyi, iiningwanima mbyoka ya li ya tameke mo 1914 kaya li etameko lyuudhigu uunene, ihe oya li “ongetameko lyoshitheta, okanona ngele taka valwa.” (Mat. 24:8) ‘Oshitheta’ shika otashi tsu kumwe naashoka sha li sha ningwa muJerusalem nomuJudea okuza mo 33 E.N. sigo omo 66 E.N.

6. Endhindhiliko lini tali ku ulika etameko lyuudhigu uunene?

⁶ Endhindhiliko lini tali ku ulika etameko lyuudhigu uunene? Jesus okwa li a hunganeke a ti: “‘Ngele tamu mono iihuna yeshunduko, mbyoka ya popiwa komuhunganeki Daniel, yi li meha eyapuki’ (omuleshi na ndhindhilike nawa), ‘nena ayehe mboka ye li muJudea, naa tembukile koondundu.’” (Mat. 24:15, 16) Megwanitho lyotango, ‘iihuna oya li ya yi mehala eyapuki’ mo 66 E.N. sho etangakwiita lyaRoma (“iihuna yeshunduko”) lya ponokele Jerusalem notempeli yasho (ehala ndyoka lya li eyapuki kAajuda). Megwanitho enene, ‘okuya mehala eyapuki’ kwiihuna otaku ka tameka sho Iigwana ya Hangana (“iihuna yeshunduko” yokunena) tayi ka ponokela  Omalongelokalunga giifundja gopaKriste (ngoka ge li omayapuki kwaamboka aniwa Aakriste) nosho wo Babiloni Oshinene ashihe. Eponokelo olyo tuu ndyoka olya popiwa mEhololo 17:16-18. Oshiningwanima shoka otashi ka kala etameko lyuudhigu uunene.

7. (a) ‘Aantu oya li ya hupithwa’ ngiini methelemumvo lyotango? (b) Oshike twa tegelela shi ka ningwe monakuyiwa?

⁷ Jesus okwa li wo a hunganeke a ti: ‘Omasiku ngoka otaga ka fupipikwa.’ Megwanitho lyotango, shika osha li sha ningwa mo 66 E.N. sho etangakwiita lyaRoma lya li lya ‘fupipike’ omasiku galyo gokuponokela. Opo nduno, Aakriste aagwayekwa muJerusalem nomuJudea oya fadhuka po, shoka she ya pe ompito ‘ya hupithwe.’ (Lesha Mateus 24:22; Mal. 3:17) Oshike nduno twa tegelela shi ka ningwe pethimbo lyuudhigu uunene mboka tawu ya? Jehova ota ka ‘fupipika’ omasiku gokuponoka kwIigwana ya Hangana, ita ka pitika elongelokalunga lyashili li hanagulwe po mumwe naangoka giifundja. Shika otashi ka pa ompito oshigwana shaKalunga shi hupithwe.

8. (a) Iiningwanima yini tayi ka ningwa uuna oshitopolwa shotango shuudhigu uunene sha hulu? (b) Oponkatu yini oshilyo shahugunina sho 144 000 tashi ka pewa ondjambi yasho megulu? (Tala iitsa yopehulilo lyoshitopolwa.)

 ⁸ Oshike tashi ka ningwa uuna oshitopolwa shotango shuudhigu uunene sha hulu? Oohapu dhaJesus otadhi ulike kutya otapu ka kala elala lyethimbo ndyoka tali ka kala po sigo opokutameka kwaArmagedon. Oshike tashi ka ningwa momukokomoko gwethimbo ndyoka? Eyamukulo oli li muHesekiel 38:14-16 nomuMateus 24:29-31. (Lesha.) * Konima yaashono, Armagedon ote ya, ngoka e li ehulilo lyuudhigu uunene, ndyoka lya faathana nehanagulo lyaJerusalem mo 70 E.N. (Mal. 4:1) Niita yaArmagedon mbyoka yi li ehulilo lyawo, uudhigu uunene mboka wu li pokuya otawu ka kala wi ikalekelwa, oshiningwanima ‘shoka inaashi kala ko nale okuza ketameko lyuuyuni.’ (Mat. 24:21) Uuna a hulu, Elelo lyaKristus lyOomvula Eyuvi otali ka tameka.

9. Ehunganeko lyaJesus kombinga yuudhigu uunene olya guma ngiini aapiya yaJehova?

⁹ Ehunganeko ndika kombinga yuudhigu uunene  otali tu nkondopaleke. Omolwashike? Omolwaashoka otali tu shilipaleke kutya nonando otu iyadhe muudhigu wu thike peni, oshigwana shaJehova shi li ongundu otashi ka pita mo muudhigu uunene nenge tu tye momahepeko omanene. (Eh. 7:9, 14) Komeho gaayihe, otwa nyanyukwa molwaashoka puArmagedon, Jehova ota ka yukipalitha uunamapangelo we nota ka yapulitha edhina lye eyapuki. — Eps. 83:18; Hes. 38:23.

10. Monakuziwa, otwa li tu na euvoko lini kombinga yethimbo lyokupangulwa kwoonzi niikombo?

¹⁰ Natu tale kethimbo lyoshitopolwa shilwe shehunganeko lyaJesus ndyoka tali popi kombinga yeyele lyokupangula oonzi niikombo. (Mat. 25:31-46) Nale, otwa li tatu dhiladhila kutya okupangulwa kwaantu ye li oonzi nenge iikombo otaku ningwa momukokomoko gwethimbo alihe lyomasiku gahugunina okuza mo 1914 okuuka komeho. Otwa li twa thiki pehulithodhiladhilo kutya mboka ya tinda etumwalaka lyUukwaniilwa nosho wo mboka ya si manga uudhigu uunene inaawu tameka, oya sa ye li iikombo, sha hala okutya, kaaye na etegameno lyeyumuko.

11. Omolwashike okupangulwa kwaantu ye li oonzi nenge iikombo kaakwa li kwa tameke mo 1914?

¹¹ Lwomokati koomvula dho 1990 nasha, Oshungolangelo oya li ya konakonununa Mateus 25:31, ngoka ta ti: ‘Uuna Omuna gwomuntu te ya meadhimo lyuukwaniilwa we pamwe naayengeli ye ayehe, nena ota ka kuutumba koshipangelapundi shuukwaniilwa we.’ Osha li sha ndhindhilikwa kutya Jesus okwa li a ningi Omukwaniilwa gwUukwaniilwa waKalunga mo 1914, ashike ka li a ‘kuutumba koshipangelapundi shuukwaniilwa we’ e li Omupanguli ‘gwaantu ayehe yokombanda yevi.’ (Mat. 25:32, yelekanitha Daniel 7:13.) Ihe, eyele lyoonzi niikombo otali popi unene Jesus e li Omupanguli. (Lesha Mateus. 25:31-34, 41, 46.) Molwaashoka Jesus ka li natango Omupanguli gwaantu ayehe yokombanda yevi mo 1914, okupangula kwe aantu ye li oonzi nenge iikombo kakwa li taku vulu okutameka momvula ndjoka. * Uunake nduno, Jesus ta ka tameka okupangula aantu?

12. (a) Uunake Jesus ta ka katuka onkatu oshikando shotango e li Omupanguli gwaantu ayehe yokombanda yevi? (b) Iiningwanima yini ya hokololwa muMateus 24:30, 31 nosho wo muMateus 25:31-33, 46?

 ¹² Ehunganeko lyaJesus kombinga yomasiku gahugunina olya holola kutya ota ka katuka onkatu e li Omupanguli gwaantu ayehe yokombanda yevi oshikando shotango konima yehanagulo lyomalongelokalunga giifundja. Ngaashi sha popiwa  mokatendo 8, yimwe yomiiningwanima mbyoka tayi ka ningwa pethimbo ndyoka oya nyolwa muMateus 24:30, 31. Uuna wa konakona oovelise ndhoka, oto ka mona kutya moovelise moka Jesus okwa hunganeke iiningwanima mbyoka ya faathana naambyoka a tumbula meyele lyoonzi niikombo. Pashiholelwa, Omuna gwomuntu okwe ya meadhimo pamwe naayengeli; omihoko adhihe naantu ayehe yokombanda yevi oya gongelwa; mboka ya pangulwa ye li oonzi oya ‘thikama yu ukilila’ molwaashoka ‘omwenyo gwaaluhe’ ogwe ya tegelela. * Mboka ya pangulwa ye li iikombo ‘otaa lilagana,’ sho ya mono kutya ‘ehanagulo lyaaluhe’ olye ya tegelela. — Mat. 25:31-33, 46, yelekanitha NW.

13. (a) Uunake Jesus ta ka pangula aantu ye li oonzi nenge iikombo? (b) Euvoko ndika ohali gumu ngiini nkene twa tala ko uukalele wetu?

¹³ Otatu vulu nduno okuthika pehulithodhiladhilo lini? Jesus ota ka pangula aantu ayehe yokombanda yevi ye li oonzi nenge iikombo sho te ke ya pethimbo lyuudhigu uunene. Opo nduno, mboka ya fa iikombo otaya ka ‘hanagulwa po’ sigo aluhe puArmagedon, ngoka e li ehulilo lyuudhigu uunene. Euvoko ndyoka ohali gumu ngiini nkene twa tala ko uukalele wetu? Ohali tu kwathele tu mone kutya iilonga yetu yokuuvitha oya simana shi thike peni. Manga uudhigu uunene inaawu tameka, aantu oye na natango ethimbo ya lundulule okudhiladhila kwawo nokutameka okweenda mondjila ya thinana ndjoka ‘tayi fala komwenyo.’ (Mat. 7:13, 14) Kunena, aantu otashi  vulika yu ulike iikala ya fa yoonzi nenge yiikombo. Ihe nonando ongaaka, otu na okudhimbulukwa kutya epangulo lya hugunina kutya oolye oonzi nosho wo kutya oolye iikombo otali ka ningwa pethimbo lyuudhigu uunene. Onkee ano, otu na omatompelo omawanawa gokutsikila okugandja ompito kaantu oyendji ngaashi tashi vulika opo ya pulakene ketumwalaka lyUukwaniilwa noku li taamba ko.

14, 15. Omanyolo geni gane taga kundathana iinima mbyoka tayi popi kombinga yokuya kwaKristus monakuyiwa e li Omupanguli?

¹⁴ Mbela okutsikila okukonakona ehunganeko lyaJesus otaku holola ngaa kutya euvoko lyetu lyethimbo lyiiningwanima yilwe iindhindhilikwedhi oli na okulunduluka? Ehunganeko lyo lyene otali gandja eyamukulo. Natu ka tale kutya otali li gandja ngiini.

¹⁵ Moshitopolwa shimwe shehunganeko ndyoka li li muMateus 24:29–25:46, Jesus oku ukitha eitulomo unene kwaashoka tashi ka ningwa momasiku ngaka ga hugunina nosho wo pethimbo lyuudhigu uunene mboka wu li pokuya. Mehunganeko ndyoka, Jesus okwa popi lwiikando ihetatu kombinga ‘yokuya’ kwe nenge tu tye yokugaluka kwe. * Kombinga yuudhigu uunene okwa popi a ti: ‘Otaa ka mona Omuna gwomuntu te ya te ende kiikogo.’ ‘Inamu tseya, esiku olini Omuwa gweni te ya.’ ‘Omuna gwomuntu ote ke ya pethimbo tuu ndyoka inaamu mu tegelela.’ Nomeyele lye lyoonzi niikombo, Jesus okwa popi a ti: ‘Omuna gwomuntu ote ya meadhimo lye.’ (Mat. 24:30, 42, 44; 25:31) Oovelise adhihe ne otadhi ulike kuKristus te ke ya monakuyiwa e li Omupanguli. Omoovelise dhini mehunganeko lyaJesus tatu adha iinima yilwe ine?

16. Okuya kwaJesus okwa tumbulwa momanyolo galwe geni?

¹⁶ Kombinga yomupiya omudhiginini nomunandunge, Jesus okwa ti: ‘Omumati omunelago oye ngoka, omuwa gwe ngele te ya, te mu adha ta ningi ngaaka.’ Meyele lyaakadhona omulongo, Jesus okwa ti: ‘Sho ya yi, ya ka lande, ombushiki okwe ya.’ Meyele lyiitalenti, Jesus okwa ti: ‘Konima yethimbo ele omuwa gwaamati mbeyaka okwa galuka.’ Meyele lya faathana, omuwa okwa ti: ‘Mokugaluka kwandje [‘sho nde ya,’ Int] onda galulilwa shoka shandje.’ (Mat. 24:46; 25:10, 19, 27) Iiningwanima mbika ine otayi ulike kethimbo lini lyokuya kwaJesus?

17. Otwa li twa popi shike kombinga yokuya kwaJesus hoka kwa popiwa muMateus 24:46?

 ¹⁷ Monakuziwa, miileshomwa yetu otwa li twa popya kutya oovelise ndhika ne dhahugunina otadhi popi kombinga yaJesus te ya nenge tu tye ta galuka mo 1918. Opo tu mone oshiholelwa, natu taleni kwaashoka Jesus a popi kombinga ‘yomupiya omudhiginini nomunandunge.’ (NW) (Lesha Mateus 24:45-47.) Otwa li tu uvu ko kutya ‘okuya’ hoka kwa tumbulwa movelise 46 okwa li kwa kwatakanithwa nethimbo ndyoka Jesus a li e ya a konakone uupambepo waagwayekwa mo 1918 nosho wo kutya okulangekwa po kwomupiya a tonatele iinima yOmuwa okwa ningwa mo 1919. (Mal. 3:1) Ihe, ekonakono lya gwedhwa po kombinga yehunganeko lyaJesus otali ulike kutya otwa pumbwa okuninga elunduluko meuvoko lyetu kombinga yethimbo lyiinima yimwe yehunganeko ndyoka. Omolwashike mbela?

18. Sho twa konakona ehunganeko lyaJesus alihe, oshe tu thikitha pehulithodhiladhilo lini kombinga yokuya kwe?

¹⁸ Moovelise dhopetameko ndhoka dha ya sigo opuMateus 24:46, oshitya ‘okuya’ osha popya owala kombinga yethimbo uuna Jesus te ke ya a pangule nokuhanagula po aantu pethimbo lyuudhigu uunene. (Mat. 24:30, 42, 44) Natango, ngaashi twa konakona  mokatendo 12, ‘okuya’ kwaJesus hoka kwa tumbulwa muMateus 25:31 otaku ulike kethimbo lyepangulo olyo tuu ndyoka lyomonakuyiwa. Onkee ano, oshi li pandunge okuthika pehulithodhiladhilo kutya sho Jesus te ya a langeke po omupiya omudhiginini a tonatele iinima ye hoka kwa tumbulwa muMateus 24:46, 47, otaku ulike wo kokuya kwe kwomonakuyiwa pethimbo lyuudhigu uunene. * Eeno, okukonakona ehunganeko lyaJesus alihe, otaku ulike kutya kehe shimwe shomiinima mbika ihetatu ya tumbulwa kombinga yokuya kwe, otayi popi kombinga yepangulo lyomonakuyiwa pethimbo lyuudhigu uunene.

19. Omalunduluko geni twa konakona ga ningwa mwaashoka twa li tu shi, nomapulo geni taga ka yamukulwa miitopolwa tayi landula ko?

¹⁹ Natu ngongeni shoka twi ilongo. Petameko lyoshitopolwa shika, otwe eta po omapulo gatatu ngoka taga pula kutya “uunake.” Tango otwa konakona kutya uudhigu uunene kawa li wa tameke mo 1914, ihe otawu ka tameka sho Iigwana ya Hangana tayi ka ponokela Babiloni Oshinene. Nokonima, otwa konakona kutya omolwashike Jesus kaa li a tameke okupangula aantu ye li oonzi nenge iikombo mo 1914, ihe ote ke ku ninga puudhigu uunene. Nopehulilo, otwa konakona kutya omolwashike Jesus kaa li e ya a langeke po omupiya omudhiginini a tonatele iinima ye ayihe mo 1919 ihe ote ke ku ninga pethimbo lyuudhigu uunene. Onkee ano, omapulo agehe gatatu kutya “uunake,” otagu ulike kelala lyethimbo limwe lyomonakuyiwa, ano kuudhigu uunene. Euvoko ndika lya lunduluka olya guma ngiini ontseyo yetu yeyele lyomumati omwiinekelwa nenge tu tye lyomupiya omudhiginini? Ongiini wo lya guma euvoko lyetu lyomayele, nenge lyomathaneko gaJesus ngoka taga gwanithwa pethimbo ndika lyehulilo? Omapulo ngaka ga simana otaga ka konakonwa miitopolwa tayi landula ko.