1, 2. (a) “Omakoto” gaSatana ogeni? (b) Oshike tashi ke tu kwathela tu hedhe popepi naKalunga?

JEHOVA KALUNGA okwa shita aantu nompumbwe yokukala ye na ekwatathano naye. Ihe Satana, okwa hala tu dhiladhile twe mu fa kutya inatu pumbwa Jehova. Satana okwa li a humitha komeho iifundja mbyoka moshikunino shaEden, sho a pukitha Eva. (Gen. 3:4-6) Aantu oyendji mondjokonona oya kala noku shi ulika kutya inaya pumbwa ewiliko lyaKalunga.

² Ihe tse inatu pumbwa okukala nedhiladhilo lya puka ndyoka lyaSatana. “Omakoto ge otu ga shi.” (2 Kor. 2:11) Satana oha kambadhala oku tu hedhitha kokule naJehova moku tu makela tu ninge omahogololo ga puka. Ngaashi twe shi mono moshitopolwa sha tetekele otatu vulu okuhogolola omaithano nomainyanyudho omawanawa nosho wo okuninga omatokolo ge li mondjila miinima yi na ko nasha nuukwanegumbo. Oshitopolwa shika otashi kundathana iinima ine moka tu na okuninga ehogololo, opo tu ‘hedhe popepi naKalunga.’ Iinima mbyoka oyo uuteknologi, uukolele, iimaliwa nosho wo uuntsa. — Jak. 4:8.

3. Gandja oshiholelwa nkene iinima yopauteknologi tayi vulu oku tu etela uuwanawa nosho wo uuwinayi.

³ Aantu muuyuni kunena otaya lalakanene iinima yopaelektronika mbyoka tayi endele pamwe nethimbo. Ngele iinima mbyoka otatu yi longitha momukalo omwaanawa otayi ka kala ekwatho enene kutse. Ngele otatu yi longitha nayi otashi vulika yi yone po ekwatathano lyetu naTate yetu gwomegulu. Pashiholelwa, natu tale kookompiuta. Oshifo shika to lesha osha nyolwa nokunyanyangidhwa taku longithwa ookompiuta. Oto vulu wo okukonga uuyelele owundji, okukwatathana nayalwe, nomathimbo gamwe oto vulu okulongitha okompiuta wu inyanyudhe. Ihe otashi vulika natango tu kale owala twa pwila muyo. Aalandithi oye na iineya noye shi okuheka nawa aantu noku ya itaalitha kutya oye na okukala ye na iinima mbyoka opo tayi kondo. Omulumentu gumwe omugundjuka okwa li a halelela okakompiuta kopeke, nokwa li a landitha po oshiti shanathigo she shimwe, opo e ki ilandele. Omumati nguka ina dhiladhila nando komongula.

4. Omumwatate gumwe okwa li a ningi po shike, opo a hulithe po okulongitha okompiuta sha pitilila?

 ⁴ Iinima yopauteknologi oya nika oshiponga notayi vulu okuyona po ekwatathano lyoye naJehova ngele oho yi longitha momukalo omwiinayi. Omumwatate Jon ngoka ti ihilile pomimvo 30 okwa ti: “Ondi shi shi nokutya Ombiimbeli otayi tu lombwele tu ‘longithe nawa ethimbo kehe tu li na’ miinima yopambepo. * Ihe ngele tashi ya pokulongitha okompiuta, ohandi yi longitha papuko.” Olundji Jon okwa li hi iyadha e li mOintaneta sigo omokati kuusiku. Okwa hokolola a ti: “Unene tuu ngele nda vulwa, osha li hashi kala oshidhigu kungame okweetha okupopya nayalwe nosho wo okutala uuvidio uuwinayi.” Opo Jon a hulithe po omukalondjigilile ngoka omwiinayi, okwa li a sitele okompiuta ye yi kale hayi idhimi yo yene, uuna ethimbo lye lyoku ka lala lya thiki. — Lesha Aaefeso 5:15, 16.

5, 6. (a) Aavali oye na okuningila shike oyana yawo? (b) Ongiini aavali taya vulu okushilipaleka kutya oyana ohaye endathana nookuume aawanawa?

⁵ Inashi pumbiwa aavali ya kale taya konenene okanima kehe hoka oyana taya ningi, ihe ngele taya longitha okompiuta oya pumbwa oku ya tonatela. Inamu ya ningitha ya tale iinima ya nyata, omaudhano gelongithonkondo, iinima yuumpulile noye endathane nookuume aawinayi okupitila mointaneta, molwaashoka mwa hala owala ye mu ze momeho. Uuna tamu shi ningi, otashi vulika ya thike pehulithodhiladhilo kutya ‘omanga meme natate ya mwena, shoka tatu ningi oshi li nawa.’ Aavali omu na oshinakugwanithwa shokugamena aanona yeni, mwa kwatelwa naamboka ye na omimvo omulongo nasha kaaya kuthe ombinga moshinima kehe shoka tashi ya fala kokule naJehova. Nokuli niinamwenyo ohayi gamene uunimona wayo ngele wu li moshiponga. Dhiladhila owala kwaashoka ando emwanka ekiintu tali ka ninga ngele lya mono kutya uunimona walyo owu li moshiponga! — Yelekanitha Hosea 13:8.

⁶ Aavali omu na okukwathela oyana yeni ya kale haye endathana nAakriste mboka haya ningi omahogololo omawanawa, kutya nduno Aakriste mboka aagundjuka nenge aakuluntu. Aavali omu na okukala mu shi kutya aanona yeni oya hala mu kale hamu kala nayo ethimbo lya gwana. Onkee ano, aavali kongeni ethimbo lyokuyola, lyokudhana, lyokulonga ‘nolyokuhedha kuKalunga’ pamwe noyana yeni. *

7. Omolwashike atuheni hatu kala twa hala tu kale tu na uukolele?

⁷ Olundji ohatu pula yalwe ngele oye li ngaa nawa. Omathimbo gamwe omuntu ohashi vulika a tye oku li nawa, nonando ke li nawa shili. Atuheni ohatu ehama, omolwaavali yetu yotango mboka ya li ye etha Satana e ya hedhithe kokule naJehova. Satana oha kala a nyanyukwa ngele tatu ehama, molwaashoka ohashi kala oshidhigu kutse okulongela Jehova, nongele otwa si, ihatu vulu oku mu hambelela nando. (Eps. 115:17) Onkee ano, ohatu ningi oonkambadhala opo tu kale tu na uukolele. * Otu na wo okukala tu na ko nasha nuukolele waamwatate naamwameme.

8, 9. (a) Oshike tashi ke tu kwathela tu kale tu na ondjele miinima yi na ko nasha nuukolele? (b) Uuwanawa wuni tatu ka mona ngele ohatu lalakanene okukala nenyanyu?

⁸ Osha simana tu kale nondjele ngele tashi ya piinima  ya kwatela mo uukolele. Opu na yamwe mboka haya humitha komeho nuuladhi iikulya mbyoka aniwa yi na uukolele, omapango nenge omiti dhontumba, shi vulithe nokuli pokuhumitha komeho onkundana ombwanawa yUukwaniilwa waKalunga. Otashi vulika haye shi ningi netompelo kutya otaya kwathele yalwe. Ihe otu na okukala tu shi kutya pOshinyanga shUukwaniilwa nenge pehala lyoshigongi, hapo tu ya tu humithile komeho iinima yopaunamiti nenge yokwiininga nawa tu kale tatu monika nawa. Omolwashike mbela?

⁹ Elalakano lyetu lyokugongala olyo okukundathana iinima yopambepo nokuhumitha komeho enyanyu lyetu ndyoka lyi li shimwe shomiiyimati yombepo ondjapuki yaKalunga. (Gal. 5:22) Okugandja omayele miinima ya nika uukolele nenge miinima yopaunamiti, kutya nduno oto shi ningi wa pulwa nenge ino pulwa, otashi ka ya moshipala elalakano lyetu lyiinima yopambepo notashi yono po ombili yayalwe. (Rom. 14:17) Omuntu kehe oye e na okuninga ehogololo nkene te ku ungaunga nuukolele we. Shimwe ishewe, kapu na ngoka ta vulu okupanga omikithi adhihe ndhoka aantu ye na. Nokuli noondohotola mboka ookapyoko miinima yopaunamiti nayo ohaya kulupa, ohaye ehama nohaya si. Kutya nduno otu kale hatu isile oshimpwiyu shi thike peni opo tu kale nuukolele, katu na siku tu gwedhele ko konkalamwenyo yetu. (Luk. 12:25) Ihe Ombiimbeli otayi ti kutya “omutima gwa nyanyukwa otagu eta uundjangandjele.” — Omayel. 17:22.

10. (a) Omaukwatya omawanawa geni Jehova ha kala a hokwa? (b) Uunake owala tatu ka kala tu na uukolele wa gwanenena?

¹⁰ Oshi li pandunge okukala tu na ko nasha neholokopo lyetu. Ihe ngele omimvo dhetu odha ya, katu na okukala hatu holeke iinima ayihe mbyoka hayi ya po sho omuntu to kulupa. Iinima mbyoka otayi vulu okukala endhindhiliko kutya owa koka nowi isimaneka nosho wo lyuuwanawa wokomutima. Ombiimbeli otayi ti: “Oomvi dhokomutse odho oshishani shuulenga; otadhi adhika mondjila yuuyuuki.” (Omayel. 16:31) Jehova osho he tu tala ko ngaaka, natse otu na wo okwiitala ko ngaashi he tu tala ko. (Lesha 1 Petrus 3:3, 4.) Mbela oshi li ngaa pandunge tu ninge iinima mbyoka tayi tu etele oshiponga, nenge tu landule omilandu dhomatando gontumba nenge tu longithe omiti dhontumba nelalakano tu kale tatu monika aagundjuka? “Enyanyu ndyoka OMUWA te li gandja” oli li onzo yuuwanawa washili mboka hawu zi meni, kutya nduno uukolele wetu owu li ngiini nosho wo kutya omimvo dhetu odhi thike peni. (Neh. 8:10) Muuyuni uupe omo owala tatu ka kala tu na uukolele wa gwanenena, nomo owala itaamu ka kulupiwa. (Job 33:25; Jes. 33:24) Omanga tu li monkalelo ndjika, natu kale tu na oondunge nosho wo eitaalo lya kola, molwaashoka iinima mbyoka oyo owala tayi ke tu kwathela tu hedhe popepi naJehova, omanga tatu ningi kehe shoka tatu vulu tu mu nyanyudhe. — 1 Tim. 4:8.

11. Ongiini iimaliwa tayi vulu okuninga omwiigo?

¹¹ Oshimaliwa kashi shi nando oshinima oshiwinayi, noinashi puka okuninga ongeshefa yi li pauyuuki. (Omuuv. 7:12; Luk. 19:12, 13) Ihe okukokeka ‘ohole yeliko’ otashi ke tu fala kokule naJehova. (1 Tim. 6:9, 10) “Oshimpwiyu shuuyuni,” nenge okukala to ipula sha pitilila nankene wu na okumona iinima yontumba monkalamwenyo, otashi vulu oku ku thiminika pambepo. Lyo ‘nefundjaleko lyuuyamba,’ sha hala okutya, omadhiladhilo ga puka kutya uuyamba ohawu etele omuntu elago nosho wo egameno monkalamwanyo nalyo otali vulu oku tu thiminika pambepo. (Mat. 13:22) Jesus okwe shi popi sha yela kutya ‘kaku na’ ngoka ta vulu okulongela Kalunga nosho wo omaliko pethimbo limwe. — Mat. 6:24.

12. Kunena opu na oomwigo dhini dhokuninga aayamba, noshike tu na okuninga opo kaatu ninge iihakanwa?

¹² Ngele otu na etaloko lya puka kombinga yiimaliwa, otashi vulika shi tu ningithe tu katuke oonkatu dha puka. (Omayel. 28:20) Aantu yamwe oya yulwa komwigo gwokuninga aayamba nziya nogwokulikola oshimaliwa inaapu kalwa. Yamwe ohaya landa uukalata opo ya ninge aasindani aanelago, nenge ya kale taya lalakanene oondondo momahangano ngoka haga yele aantu uuna we eta mo iilyo oyindji, nohashi vulika nokuli ya kokele mo iilyo yilwe yegongalo. Yalwe oya ya momwigo gwokugandja iimaliwa yawo kuyalwe, molwaashoka yu uvanekelwa oku yi galulilwa niihohela yi li pombanda. Ino etha olwiho lwu ku ninge oshihakanwa shokukengelelwa. Kala aluhe ho longitha oondunge dhokuyoolola. Osha pumba lela okumona oshimaliwa nuupu, ngele ino za omazigudhe gasha.

13. Etaloko lyaJehova li na ko nasha niimaliwa olya yooloka ko ngiini kwaandyoka lyuuyuni?

 ¹³ Jehova oha yambeke oonkambadhala ndhoka tatu ningi tu imonene iipumbiwa yetu monkalamwenyo uuna twa pititha komeho “[uukwaniilwa waKalunga, NW] nuuyuuki we.” (Mat. 6:33; Ef. 4:28) Jehova ina hala tu kale tatu kothakotha pokugongala, molwaashoka twa li tatu longo olutayima nenge tu kale twa kuutumba mOshinyanga shUukwaniilwa tatu ipula shi na ko nasha niimaliwa. Ihe aantu oyendji muuyuni oyi itaala kutya otaya ka kala owala ye na onkalamwenyo ya gamenwa noya thuwa uuna ya kala tayi idhipagele po nokwiilikolela iimaliwa. Olundji ohaya ladhipike oyana ya kale nelalakano lya fa lyawo lyokwiilikolela omaliko. Jesus okwe shi popya kutya okudhiladhila kwa tya ngaaka kaku li pandunge. (Lesha Lukas 12:15-21.) Shika otashi tu dhimbulukitha Gehazi ngoka a li ta dhiladhila kutya ota vulu okukala omunalwiho, nopethimbo tuu mpoka oku na ekwatathano ewanawa naJehova. — 2 Aak. 5:20-27.

14, 15. Omolwashike kaatu na okwiikongela egameno lyopashimaliwa? Gandja oshiholelwa.

¹⁴ Otaku hokololwa kutya ethimbo limwe omakodhi ngoka haga yakula oohi oonene ohaga si omeya, molwaashoka ohaga kala owala ga ndjika omanyala gago mohi ndjoka ga yakula nonando ondhigu. Mbela oshinima sha faathana otashi vulu okuningilwa Omukriste? Omukuluntugongalo gwedhina Alex okwa ti: “Ngame omuntu gumwe ngoka handi ningi iinima nuukeka. Ngele onda thinine othewa yomomutse ya pitilila kashona peke, ohandi shuna mo yimwe mokakende.” Ihe Alex okwa li a kwatwa ko omboko kiinima yopangeshefa, nokwa li ta dhiladhila kutya ote ke yi etha po nziya, opo a ye muukokolindjila. Okwa kala ta konakona nkene e na okulanda nokulanditha iipambuliko, nokulongitha iimaliwa mbyoka ta mono mo a lande kehe shimwe shoka a hala. Okwa li a longitha iimaliwa ye mbyoka a pungula nosho wo mbyoka a lya omikuli a lande iipambuliko oyindji. Ihe ongushu yiipambuliko mbyoka oya shuna pevi noonkondo. Alex okwa hokolola a ti: “Onda li nda tokola okumona iimaliwa yandje mbyoka nda longitha. Onda li te dhiladhila kutya ngele onda tegelele ko owala, ongushu yiipambuliko yandje otayi ka londa pombanda.”

¹⁵ Uule woomwedhi Alex okwa kala owala ta dhiladhila kombinga yiipambuliko ye. Osha li oshidhigu kuye okugandja eitulomo kiinima yopambepo, nokwa kala ha londokwa koomposi. Ihe iipambuliko ye inayi ka londa we. Alex okwa li a kanitha iimaliwa mbyoka a pungula nokwa li e na okulanditha po egumbo lye. Okwe shi zimine a ti: “Onda li nde etele aanegumbo lyandje uudhigu uunene.” Kungeyi okwa li i ilongo oshiilongomwa shoka sha simana. Okwa ti: “Ngashingeyi ondi shi shi kutya kehe gumwe ngoka ta tula einekelo lye muuyuni waSatana ota ka yematekwa noonkondo.” (Omayel. 11:28) Ano ngele otwa tula einekelo lyetu miimaliwa mbyoka twa pungula, moontanithopungulo dhetu, nenge mokwiilikolela oshimaliwa monkalelo ndjika osha fa owala tatu tula einekelo lyetu muSatana, ‘kalunga kuuyuni mbuka.’ (2 Kor. 4:4; 1 Tim. 6:17) Okuza mpono Alex okwa ningi onkalamwenyo ye yanathangwa “omolwonkundana ombwanawa.” Ngele owe mu adha ote ke ku lombwela kutya sho e shi ningi ye nosho wo yaandjawo oya kala ya nyanyukwa noshe ya hedhitha popepyeelela naJehova. — Lesha Markus 10:29, 30.

16. Uuntsa uuwanawa owa yooloka ko ngiini kwaamboka wa pitilila?

¹⁶ Inashi puka okukala tu uvitile uuntsa oshinima oshiwanawa. Pashiholelwa, otu na okukala tu uvite uuntsa sho tu li Oonzapo dhaJehova. (Jer. 9:24) Ngele otwi isimaneka otashi ke tu kwathela tu ninge omatokolo omawanawa notu henuke iinima mbyoka tayi lyatele pevi omithikampango dhaKalunga. Ihe ngele otwa lenga unene omadhiladhilo getu nenge oondondo dhetu otashi vulu oku tu fala kokule naJehova. — Eps. 138:6; Rom. 12:3.

17, 18. (a) Tumbula iiholelwa yi li mOmbiimbeli yaamboka ya li aaifupipiki noyaamboka ya li ye na uuntsa. (b) Omumwatate gumwe okwa li a ningi po shike opo kee ethe uuntsa wu mu fale kokule naJehova?

¹⁷ MOmbiimbeli omu na iiholelwa yaamboka ya li ye na uuntsa naamboka ya li aaifupipiki. Omukwaniilwa David okwa li a pula neifupipiko ewiliko kuJehova, na Jehova okwa li e mu yambeke. (Eps. 131:1-3) Ihe Jehova okwa li a fupipike omukwaniilwa Nebukadnezzar nosho wo Belshazzar, omolwuuntsa wawo. (Dan. 4:30-37; 5:22-30) Kunena ohashi vulika pu holoke oonkalo ndhoka tadhi pula twi ifupipike. Pashiholelwa, omumwatate Ryan, gwoomvula  32, okwa li a tembukile kegongalo epe manga e li omuyakuligongalo. Okwa popi a ti: “Onda li nda tegelela ndi langekwe po nziya ndi li omukuluntugongalo, ihe opwa li pwa piti omvula shoka inaashi ningwa.” Mbela okwa li e na okugeya nenge u uve nayi sho aakuluntugongalo inaaye mu pa esimano ndyoka a li a hala? Mbela okwa li e na okweetha po okugongala, nokweetha uuntsa wu mu fale kokule naJehova nosho wo noshigwana she? Andola ongoye ando owa ningi po shike?

¹⁸ Ryan okwa ti: “Onda li handi lesha kehe shimwe shoka shi li miileshomwa yetu tashi popi kombinga yokutegamena oshinima ethimbo eleeleka.” (Omayel. 13:12) “Onda li nda mono kutya ondi na okukala omwiidhidhimiki nomwiifupipiki. Onda li ndi na okweetha Jehova a dheule ndje.” Ryan okwa tameke okukala ha kwathele yalwe megongalo nosho wo muukalele, pehala lyokukala owala ta dhiladhila kuuwanawa we mwene. Konima owala yaashono, okwa li a mono aakonakoni taya humu komeho. Okwa ti: “Onda li nda langekwa po ndi li omukuluntugongalo konima yomvula netata, nokanda li nde shi tegelela. Kanda li handi ipula we nokulangekwa po ndi li omukuluntugongalo, molwaashoka onda li tandi nyanyukilwa noonkondo uukalele wandje.” — Lesha Episalomi 37:3, 4.

19, 20. (a) Ongiini tatu vulu okushilipaleka kutya iinima mbyoka hatu ningi esiku kehe itayi tu fala kokule naJehova? (b) Iiholelwa yoolye mboka ya kala popepi naJehova tatu vulu okulandula?

¹⁹ Iinima ayihe mbyoka ya kundathanwa moshitopolwa shika naashoka sha tetekele oyi na ethimbo lyayo monkalamwenyo. Ohatu kala tu uvite uuntsa sho tu li aapiya yaJehova. Ngele otu na uukwanegumbo wu na ombili nosho wo uukolele, nena natu kale tu shi kutya ngoka ogamwe gomomagano ga dhenga mbanda ngoka Jehova ha gandja. Otu shi shi kutya iilonga nosho wo iimaliwa ohayi vulu oku tu kwathela tu isile oshimpwiyu. Otu shi shi wo kutya omainyanyudho ohaga vulu oku tu talaleka nosho wo kutya iinima yopauteknologi ohayi vulu oku tu kwathela. Ihe ngele katu na ondjele miinima mbyoka notatu yi longitha momukalo gwa puka, nenge momukalo ngoka tagu yi moshipala okulongela kwetu Jehova, otashi ke tu fala kokule naye.

²⁰ Satana okwa hala shoka sha ningwa. Ihe oto vulu okukeelela kuu shi ningilwe pamwe naanegumbo lyoye. (Omayel. 22:3) Hedha popepi naJehova, e to kala popepi naye. Opu na iiholelwa ya nyolwa mOmbiimbeli mbyoka tayi tu kwathele moshinima shika. Henok nosho wo Noowa oya li ye “ende pamwe naKalunga” kashili. (Gen. 5:22; 6:9) Moses “okwa li e na omukumo ongaangoka a mono Kalunga, nando iha monika.” (Heb. 11:27) Jesus okwa kala aluhe nokulonga shoka tashi opalele He gwomegulu. Omolwoshinima shoka, Kalunga okwa kala aluhe noku mu ambidhidha. (Joh. 8:29) Iiholelwa iiwanawa mbyoka yi shi okuholelwa ongaashi: ‘Okunyanyukwa aluhe, okugalikana aluhe nokupandula aluhe.’ (1 Tes. 5:16-18) Ino etha nando osha shi ku fale kokule naJehova!