1-2. (a) Omolwashike tatu vulu okutya katu na esiku tu taalele omashongo otse atuke? (b) Oshike tatu ka kundathana moshitopolwa shika?

 UUNA twa taalela omamakelo ga kwata miiti, otashi vulika tu kale tu uvite tu li otse atuke mokambautu okashona ke li mefuta lya pindjala. Nonando ongawo, ihatu taalele omashongo otse atuke. Tate yetu omunahole gwomegulu, iha kala owala e wete omaupyakadhi ngoka tu li mugo, ihe okwa uvaneka wo kutya ote ke tu kwathela tu pite mo mugo. Jehova ota lombwele aapiya ye aadhiginini ta ti: “Otandi ku kwatha.” — Jes. 41:10.

² Oshitopolwa shika otashi ka kundathana nkene Jehova he tu kwathele, (1) sho he tu wilike, (2) he tu sile oshimpwiyu, (3) he tu gamene, (4) naasho he tu hekeleke. Jehova ote tu shilipaleke kutya nonando otu iyadhe momashongo ga fa peni, ke na esiku e tu dhimbwe nando. Ke na esiku e tu thige po. Onkene katu na esiku tu kale otse atuke.

JEHOVA OHE TU WILIKE

3-4. Jehova ohe tu wilike ngiini? (Episalomi 48:14)

³ Lesha Episalomi 48:14. Jehova ina tegelela tu i wilike tse yene. Oha wilike ngiini aalongeli ye aadhiginini kunena? Omukalo gumwe moka he shi ningi, okupitila mOmbiimbeli. (Eps. 119:105) Okupitila mOohapu dhe dha nwethwa mo, Jehova ohe tu kwathele tu ninge omatokolo nokukokeka uukwatya mboka tawu tu kwathele tu kale twa nyanyukwa ngashingeyi, notu kale netegameno lyoku ka kala nomwenyo sigo aluhe monakuyiwa. Pashiholelwa, ohe tu longo tu ethe po onkone, tu kale aanashili mukehe shoka tatu ningi nokukala tu hole yalwe tashi zi komutima. (Eps. 37:8; Heb. 13:18; 1 Pet. 1:22) Uuna tatu ulike omaukwatya  ngoka gopakalunga, ohatu kala aavali, aaihokani nookuume ye li nawa.

⁴ Shimwe ishewe, Jehova okwa li a nyolitha mOmbiimbeli omahokololo gaamboka ya li ya adhika komashongo noya li ye na omaiyuvo ga fa getu. (1 Kor. 10:13; Jak. 5:17) Ngele otwa lesha omahokololo ngoka nokutula miilonga shoka tatu ilongo ko kugo, ohatu mono mo uuwanawa momikalo mbali. Gwotango, ohatu ndhindhilike kutya katu li otse atuke, molwaashoka yalwe oya li ya taalele oonkalo dha fa dhetu noya li ye dhi idhidhimikile nomupondo. (1 Pet. 5:9) Omutiyali, ohatu ilongo nkene tu na okuungaunga nomashongo getu. — Rom. 15:4.

5. Jehova oha longitha oolye, e tu wilike mondjila ndjoka tayi fala komwenyo?

⁵ Jehova okwa ninga wo elongekidho, opo ooitaali ooyakwetu ye tu wilike. a Pashiholelwa, aatonatelishikandjo ohaya talele po omagongalo pandjigilile, opo ye tu tse omukumo. Iipopiwa yawo ohayi koleke eitaalo lyetu nohayi tu kwathele tu kale twa hangana. (Iil. 15:40–16:5) Aakuluntugongalo nayo ohaya longo nuudhiginini, ya kwathele omuuvithi kehe a kale popepi naJehova. (1 Pet. 5:2, 3) Aavali ohaya wilike oyana pambepo moku ya kwathela ya kale haya ningi omatokolo gopandunge nokukala haya ningi iinima iiwanawa pandjigilile. (Omayel. 22:6) Aamwameme ya pyokoka ohaya kwathele aamwameme aagundjuka, moku ya tulila po oshiholelwa oshiwanawa, moku ya pa omayele taga longo noku ya tsa omukumo pahole. — Tit. 2:3-5.

6. Oshike tu na okuninga, opo tu mone mo uuwanawa mewiliko lyaJehova?

⁶ Jehova ohe tu pe ewiliko ndyoka twa pumbwa, opo tu ninge omatokolo omawanawa. Ongiini tatu vulu okuulika kutya otwa pandula shoka e tu ningila? Omayeletumbulo 3:5, 6 otaga ti: “Inekela Omuwa nomutima gwoye aguhe noino igameka koondunge dhoye mwene.” Ngele otwe shi ningi, “oondjila [dhetu] ote dhi yelekanitha,” sha hala okutya, ote ke tu kwathela tu yande omaupyakadhi ogendji nokunyanyukilwa onkalamwenyo. Otatu pandula Jehova, sho ha pe kehe gumwe gwomutse omayele gopahole. — Eps. 32:8.

JEHOVA OHE TU SILE OSHIMPWIYU

7. Omomikalo dhimwe dhini Jehova he tu sile oshimpwiyu? (Aafilippi 4:19)

⁷ Lesha Aafilippi 4:19. Kakele owala koku tu wilika pambepo, Jehova oha yambeke oonkambadhala dhetu, opo tu kale tu na iinima mbyoka twa pumbwa ngaashi iikulya, iizalomwa nosho wo ehala lyokukala. (Mat. 6:33; 2 Tes. 3:12) Nonando oshi li paunshitwe okukala tatu ipula kombinga yoompumbwe dhetu dhopalutu, Jehova ote tu ladhipike kaatu kale tatu ipula unene niinima mbyoka. Omolwashike mbela? Oshoka Tate yetu ke na esiku a ekelehi aalongeli ye aadhiginini, uuna ya pumbwa ekwatho. (Mat. 6:8; Heb. 13:5) Otatu vulu okwiinekela oohapu dhe, sho a ti kutya ote ke tu sila oshimpwiyu.

8. Jehova okwa li a ningile shike David?

⁸ Natu ka taleni komukalo moka Jehova a li a kwathele David. Momukokomoko gwomimvo ndhoka David a li muudhigu, Jehova okwa li e mu sile oshimpwiyu pamwe naalumentu mboka ya li naye, moku ya pa shoka ya pumbwa, opo ya hupe. Sho David a dhiladhila kunkene Jehova a kala noku mu sila oshimpwiyu uule womimvo, okwa nyola a ti: “Ngame ngashingeyi onda kulupa, onda kala muuyuni ethimbo ele, ihe inandi mona nando olumwe omuyuuki e ethiwa kOmuwa, nenge oyana taa hehela iikulya.” (Eps. 37:25) Ngaashi David, otashi vulika nangoye wa mona nkene Jehova e ku sila oshimpwiyu nosho wo aalongeli ye yalwe aadhiginini.

9. Kunena, Jehova oha sile ngiini oshigwana she oshimpwiyu, uuna pwa holoka iiponga yopaunshitwe? (Tala wo omathano.)

 ⁹ Jehova oha sile wo oshimpwiyu oshigwana she, uuna pwa holoka iiponga yopaunshitwe. Pashiholelwa, sho pwa holoka ondjala methelemumvo lyotango, Aakriste yokiilongo yi ili noyi ili oya li ya tumu iikwatha kaamwatate naamwameme mboka ya li ye na ompumbwe. (Iil. 11:27-30; Rom. 15:25, 26) Nokunena, oshigwana shaKalunga ohashi ulike ombepo ya faathana yokugandja nehalo ewanawa. Uuna pwa holoka oshiponga shopaunshitwe, Jehova oha inyengitha oshigwana she shi gandje iipumbiwa ngaashi iikulya, omeya, iizalomwa nomiti kaamwatate mboka ye li miitopolwa mbyoka ya dhengwa kiiponga yopaunshitwe. Osipana yokutunga ohayi opalekulula nokutungulula omagumbo nosho wo Iinyanga yUukwaniilwa mbyoka ya yonagulwa. Naapiya yaJehova ohaya endelele okugandja ehekeleko netsomukumo okuza mOmbiimbeli, kwaamboka ya kanitha omagumbo gawo nenge aaholike yawo. b

10-11. Oshike tatu ilongo koshimoniwa shaBorys?

¹⁰ Jehova oha kwathele wo nehalo ewanawa mboka ihaaye mu longele. Sha faathana, natse ohatu kongo wo oompito, opo tu yambidhidhe mboka ihaaya longele Jehova. (Gal. 6:10) Olundji shoka ohashi gandja uunzapo. Natu taleni koshimoniwa shaBorys, omukuluntusikola ngoka ha zi moUkraine. Nonando Borys ke shi gumwe gwomOombangi dhaJehova, okwa li aluhe ha ungaunga nohenda naalongwa mboka ye li Oombangi dhaJehova nokwa li a simaneka  eitaalo lyawo. Sho Borys a tokola a ze mo mehala moka mu na iita noku ya koshitopolwa sha gamenwa, aamwatate oye mu kwathele. Lwanima, Borys okwa li e ya kEdhimbuluko lyeso lyaKristus. Sho Borys a dhiladhila kwaashoka a ningilwa kaamwatate okwa ti: “Oombangi dhaJehova odha li dha ungaunga nangame nohenda nokusila ndje oshimpwiyu. Otandi dhi pandula.”

¹¹ Natse wo otatu vulu okuholela Tate yetu gwomegulu omunahenda, mokukala hatu ulukile ohole mboka ye na ompumbwe kutya nduno otu li meitaalo limwe nayo nenge hasho. (Luk. 6:31, 36) Otwa inekela kutya oonkambadhala dhetu dhokuulukila aantu ohole, otadhi vulu oku ya inyengitha ya ninge aalongwa yaKristus. (1 Pet. 2:12) Kashi na nduno mbudhi kutya oshizemo oshini, otatu ka mona enyanyu ndyoka hali zi mokugandja. — Iil. 20:35.

JEHOVA OHE TU GAMENE

12. Jehova oku uvaneka kutya ota ka gamena ngiini oshigwana she shi li ongundu? (Episalomi 91:1, 2, 14)

¹² Lesha Episalomi 91:1, 2, 14. Kunena, Jehova okwa uvaneka oku tu gamena kukehe shimwe shoka tashi vulu okuteya po ekwatathano lyetu naye. Ke na esiku a ethe Satana a nyateke elongelokalunga lyashili. (Joh. 17:15) Nuuna “uudhigu unene” wa tameke, otatu vulu okukala neinekelo kutya Jehova ota ka gwanitha po euvaneko lye lyokugamena oshigwana she palutu noku shi kwathela shi kale neitaalo lya kola. — Eh. 7:9, 14.

13. Omomikalo dhini Jehova he tu gamene pauhandimwe?

¹³ Jehova ohe tu gamene ngiini pauhandimwe? Okupitila mOmbiimbeli, Jehova ohe tu kwathele tu yoolole shoka shi li mondjila kwaashoka sha puka. (Heb. 5:14) Uuna tatu tula miilonga omakotampango ngoka ge li mOohapu dhaKalunga, ohatu gamene uukuume wetu naye nohatu igamene wo palutu. (Eps. 91:4) Shimwe ishewe, Jehova ohe tu gamene okupitila megongalo. (Jes. 32:1, 2) Ngele ohatu endathana naamboka ye hole Jehova nohaya kala metsokumwe nomithikampango dhe, oha shi tu tsu omukumo nohashi tu kwathele tu yande enwethomo ewinayi. — Omayel. 13:20.

14. (a) Omolwashike Jehova ihee tu gamene komashongo agehe? (b) Eshilipaleko lini tatu adha mEpisalomi 9:10? (Tala wo enyolo lyopevi.)

¹⁴ Monakuziwa, omathimbo gamwe Jehova okwa li a gamene aalongeli ye kaaya ehamekwe palutu. Ihe haaluhe a li he shi ningi. Omathimbo gamwe, ohatu adhika ‘kiiningwanima yombaadhilila.’ (Omuuv. 9:11) Shimwe ishewe, okuza nale, Jehova okwa li a etha aapiya ye ya pite momahepeko noya dhipagwe nokuli, opo a ulike kutya Satana omuniifundja. (Job 2:4-6; Mat. 23:34) Shono osha faathana wo nokunena. Nonando Jehova iha kutha po omashongo getu, otatu vulu okukala tu na uushili kutya ke na esiku a ekelehi mboka ye mu hole. c — Eps. 9:10.

JEHOVA OHE TU HEKELEKE

15. Ohatu hekelekwa ngiini okupitila mokugalikana, mOohapu dhaKalunga nokAakriste ooyakwetu? (2 Aakorinto 1:3, 4)

¹⁵ Lesha 2 Aakorinto 1:3, 4. Omathimbo gamwe, ohatu kala twa nika oluhodhi, tu na iimpwiyu nenge twa gwililwa po. Otashi vulika wu li monkalo ondhigu ngashingeyi, ndjoka tayi ku ningitha wu kale wu uvite wu li ongoye awike. Mbela opu na ngaa gumwe ngoka e uvite ko omaiyuvo goye? Jehova oku shi nkene wu uvite. Iha kala owala e uvite uuwehame wetu, ihe ‘ohe tu hekeleke wo momaupyakadhi getu agehe.’ Ngiini mbela? Uuna twa indile Jehova twa mana mo okupitila megalikano, ohe tu pe ‘ombili ye ndjoka hayi gamene oomwenyo dhetu nomadhiladhilo getu.’ (Fil. 4:6, 7) Uuna  tatu lesha Oohapu dhaJehova, ano Ombiimbeli, ohadhi tu hekeleke wo. Ohole, uunongo netegameno mbyoka tayi adhika mOohapu dhe ohayi tu pe epepelelo. Ohatu mono ehekeleko uuna tu li pokugongala kwopaKriste, etsomukumo lya kankamena kOmbiimbeli mpoka hatu kala naamwatate naamwameme mboka ye tu hole.

16. Oshike tatu ilongo koshimoniwa shaNathan naPriscilla?

¹⁶ Opo tu mone nkene Jehova ha gandja ehekeleko netsomukumo okupitila mOohapu dhe, natu taleni koshimoniwa shaNathan naPriscilla, mboka haya zi koAmerika. Omimvo dhontumba dha ka pita, oya tokola ya tembukile hoka ku na ompumbwe onene yaauvithi yUukwaniilwa. Nathan okwa ti: “Otwa li tu na einekelo kutya Jehova ota ka yambeka oonkambadhala dhetu.” Ihe konima sho ya thiki kehala ndyoka, oya adhika ombaadhilila kuupyakadhi wuukolele nosho wo wopashimaliwa. Lwanima, aaihokani mboka oya ka shuna kegumbo, hoka natango ya li ye na uupyakadhi wopashimaliwa. Nathan okwa ti: “Onda li tandi ipula kutya omolwashike Jehova inee tu yambeka ngaashi twa li tatu dhiladhila. Onda li tandi ipula kutya pamwe ondi na shoka nda ninga sha puka.” Ihe mokweendela ko kwethimbo, Nathan naPriscilla oye shi ndhindhilike kutya Kalunga ine ya ekelahi pethimbo ya li mompumbwe. Nathan okwa gwedha ko a ti: “Pethimbo twa li muudhigu, Ombiimbeli oya li fa kuume ketu omunawino. Nathan okwa ti: “Okugandja eitulomo kunkene Jehova e tu kwathele tu idhidhimikile uudhigu pehala lyokugandja eitulomo kuudhigu wo wene, oshe tu kwathele tu ilongekidhile omashongo gomonakuyiwa, tu na eitaalo kutya ote ke tu kwathela.”

17. Omumwameme gwedhina Helga, okwa li a mono ngiini ehekeleko? (Tala wo ethano.)

¹⁷ Aamwatate naamwameme otaya vulu oku tu pa ehekeleko lya gwedhwa po. Ngiini mbela? Natu taleni koshiholelwa shaHelga, ngoka ha zi moHungary. Uule womimvo, okwa li ta ungaunga nomashongo ogendji, ngoka ga li ge mu ningitha a kale e na iimpwiyu noku uvite  kee na oshilonga. Ihe uuna a dhiladhila komimvo ndhoka, okwa mona nkene Jehova a kala noku mu hekeleka okupitila megongalo. Okwa nyola a ti: “Jehova okwa kala aluhe nokukwathela ndje, sho a li a mono kutya onda gwililwa po omolwiilonga yandje yakehe esiku, sho tandi sile oshimpwiyu okanona kandje hoka taka ehama naasho nda li tandi idhidhimikile omashongo galwe. Okwa kala nokugwanitha po euvaneko lye lyokuhekeleka ndje, uule womimvo adhihe 30. Okwa kala aluhe nokunkondopaleka ndje, okupitila moohapu dhayalwe dholupandu, dha dhiladhilwa nawa notadhi tsu omukumo. Oya li aluhe haya tumine ndje omatumwalaka, okakalata nenge oohapu dholupandu dhi li pethimbo.”

18. Ongiini tatu vulu okuhekeleka yalwe?

¹⁸ Otu na uuthembahenda wokuholela Kalunga ketu mokukala hatu hekeleke yalwe. Ongiini tatu vulu oku shi ninga? Otatu vulu okupulakena kuyo neidhidhimiko, okupopya nayo nolukeno noku ya kwathela momikalo tadhi longo. (Omayel. 3:27) Otwa halelela okuhekeleka ayehe mboka taya mono iihuna, mwa kwatelwa naamboka ihaaya longele Kalunga. Uuna aashinda yetu ya nika oluhodhi, taya ehama nenge ya gwililwa po, ohatu ke ya talela po, hatu pulakene kuyo nokutopolelathana nayo oohapu dhetsomukumo okuza mOmbiimbeli. Ngele ohatu holele Jehova “ngoka kuye haku zi ekwatho alihe,” itatu ka kwathela owala ooitaali ooyakwetu ya idhidhimikile omashongo, ihe otatu ka kwathela wo mboka ihaaya longele Kalunga, opo ya kale ya hala okwiilonga kombinga ye. — Mat. 5:16.

JEHOVA OHE TU HEKELEKE ALUHE

19. Jehova ohe tu ningile shike nongiini tatu vulu oku mu holela?

¹⁹ Jehova oku na ko nasha naantu ayehe mboka ye mu hole. Ihe tu ekelehi, uuna tatu piti moonkalo oondhigu. Ngaashi owala omuvali omunahole ha sile okanona ke oshimpwiyu, Jehova naye oha sile oshimpwiyu aalongeli ye aadhiginini. Ohe tu wilike, he tu sile oshimpwiyu, he tu gamene noku tu hekeleka. Ohatu holele Tate yetu gwomegulu omunahole, uuna tatu yambidhidha nokutsa yalwe omukumo, sho taya idhidhimikile omashongo. Nonando otwi iyadhe momashongo notwa teka omukumo, otatu vulu okukala nuushili kutya Jehova oku li pamwe natse. Komeho gaayihe, okwa uvaneka kutya: “Ino tila, ongame ndi li pungoye!” (Jes. 41:10) Shono itashi tu tsu tuu omukumo! Odhoshili kutya katu na esiku tu kale otse atuke.